Duahia Taudia edia Henanadai

◼ Bible ia gwau namona be Dirava ena orea taudia ese ‘edia varavara idia naria.’ Unai dainai dahaka dainai Abraham ese Hagara bona Ismael ia siaidia lao tano gagaena dekenai?

Lalokau karana bona dala maorona be, Dirava ena hesiai taudia ese edia dabu varavaradia idia naridia. Aposetolo Paulo ese Keristen tama sina inai bamona ia gwauraidia: “Bema tau ta ese iena varavara ia naria lasi, o iena ruma taudia ia ubua lasi neganai ia ese iena abidadama Keriso dekenai ia negea vadaeni. Iena dika ese ekalesia lasi murimuri tauna ena dika ia hanaia vadaeni.”​—1 Timoteo 5:8.

Ita diba Abraham ena kara ese unai sisiba Dirava ena amo ia dadaraia lasi, badina Bible ia gwau iena abidadama be haheitalai namona, ia be “Dirava ena turana.”​—Iakobo 2:23; Heberu 11:​8-19.

Dirava ese hahenamo ta ia gwauhamatalaia, Abraham ena garana o natuna amo. Sara ia buruka bona ia do gabani neganai, Abraham ia hamaoroa namona be natuna merona do ia havaraia ena Aigupito hesiai hahinena Hagara amo. Gabeai, Hagara ia rogorogo neganai, ia ese Sara ia matauraia lasi, iena kara be “dagedage” karana bamona Abraham ena lalokau adavana dekenai. (2 Samuel 22:49; Salamo 11:5) Abraham ese Sara ia hamaoroa iena ura hegeregerena Hagara do ia kara henia, bena Sara ese ia hahemaraia, unai dainai Haraga ia heau lao tano gagaena dekenai, reana Aigupito ia lou henia gwauraia. Bible ia gwau lasi, aniani ia laohaia, unai dainai reana ia diba aniani bona ranu ia abia diba kampa dekenai idia noho taudia amo, hegeregere Bedouin taudia amo.​—Genese 12:​1-3, 7; 16:​1-6.

Aneru ese Hagara ia hamaoroa namona be ia lou lao, danu ia gwau tubuna momo do ia abia, bona ena natuna Ismael ese “taunimanima ibounai dekenai do ia inai henia.” (Genese 16:​7-12) Lagani haida murinai, Ismael ese Isako, Abraham ese ena adavana Sara amo ia havaraia natuna korikorina, ia inai henia. Ismael ese Isako ia kirikirilaia, o ia gwau dika henia. Vaia tadikaka edia kara bamona ia karaia lasi. Bible ia gwau, unai kara amo ia be Dirava ese Abraham dekenai ia gwauhamatalaia garana ia “dagedage henia.” Unai dainai ia kara auka henia be maoro.​—Genese 21:​1-9; Galatia 4:​29-31.

Iehova ese Abraham ia hamaoroa ena adavana ena hereva do ia karaia, ‘Hagara bona ena natuna do ia lulua oho.’ Ena be Abraham ia moale lasi Hagara ese ena natuna do ia abia lao dainai, to Abraham ese kohu ia henidia. Guna Hagara be tano gagaena dekenai ia lao neganai, reana aniani ia laohaia lasi, to hari Abraham ese aniani bona ranu ia henia. “Bere-Sieba ena taunimanima lasi gabuna dekenai ia loaloa” neganai dala ia reaia reana, bena edia ranu ia ore, ranu gurina ta ia do davaria lasi neganai. To unai hekwakwanai be Abraham ena kerere ta dainai ia vara lasi, badina ena be edia kara kerere dainai ia luludia, to ‘ia naridia bona ia ubudia.’​—Genese 21:​10-21.

[Map/Picture on page 31]

(For fully formatted text, see publication)

Davara Badana

Karamele Ororona

Megido

Ierusalem

Heberon

Bere-sieba

Tadi Gohuna

Diho kahana

[Credit Line]

Based on a map copyrighted by Pictorial Archive (Near Eastern History) Est. and Survey of Israel

[Picture]

Wadi Zin kourana, Bere-Sieba ena diho kahanai