Hakaua Oreana amo Ia Mai Revarevana

Iehova Ena Witnes Taudia E:

Mai moale ida umui tadikaka taihu dekenai inai revareva ai torea. Emai hemami be aposetolo Ioane ena bamona, ia gwau, ia be ena tadikaka ia “lalokau henia momokani” bona ia moale badina idia be ‘hereva momokani ena dala ai idia raka’ noho. (2 Ioa. 1, 4) Hereva momokani ita diba be hahenamo badana! Hereva momokani ese Babulonia Badana, hahediba koikoidia, bona Dirava ese ia badulaia kastom karadia amo ita ia ruhaia vadaeni. Hereva momokani ita badinaia karana ese ita ia durua ma haida ita lalokau henia bona hebogahisi henia totona. Danu, hereva momokani ese dala ia kehoa Iehova vairanai ita goeva bona mauri hanaihanai helarona ita abia totona.

Danu, Iehova ita tanikiu henia badina ena lauma helaga amo dina ta ta lalonai ita ia hakaua bona hagoadaia! Ai diba, vanegai “Lauma Helaga ese Ita Ia Hakaua” Distrik Hebouhebou umui moalelaia, badina unuseniai Iehova ese ena lauma helaga amo ita ia hakaua bona hagoadaia daladia idia herevalaia. Tanobada maurina ia dika ia lao dainai, namona be Iehova ena lauma helaga goadana dekenai ita tabekau, badina unai ese ita do ia durua nega vairai do idia vara gaudia ita haheaukalaia totona.

Iseda tadikaka momo be edia abidadama dainai hisihisi bada idia davaria, bona edia ekspiriens be Yearbook dekenai ai atodia. Ai diba edia ekspiriens umui duahia neganai, unai ese emui kudouna ia hamarerea bada. Ita hoa badina idia momo be idia do bapatiso lasi lalonai hahetoho idia davaria, bona ma haida be idia bapatiso bena daudau lasi murinai hahetoho idia davaria. Iehova idia badinaia bona kara maoromaoro idia karaia noho dainai, idia ita lalokau henia bada! Oibe, edia ekspiriens namodia ese ita idia hagoadaia, hahetoho idauidau lalonai Basileia ita badinaia noho totona.​​—1 Tes. 1:​6-8.

Tadikaka bona taihu e, ai diba moni ena hekwakwanai bona metau ma haida umui haheaukalaia, emui ruma bese lalonai lalokau bona lalotamona ia noho totona. Umui haida umui hekwarahi Basileia harorolaia gaukarana umui durua bona hanaihanai kongrigeisen heboudia umui lao henia totona. Unai dainai, ai be unai ai herevalaia momo bona Iehova ai guriguri henia murinai, kongrigeisen ena hebou karaia daladia haida ai haidaua, bona unai dala matamatana be January 1, 2009 amo ia matamaia. Inai dala matamatana dainai, ai diba nega bada do umui atoa sibona emui stadi bona famili stadi umui karaia totona.

Lagani 2008 ena hebouhebou badadia bona maragidia dekenai momo idia bapatiso dainai ita moale. Idia haida be matamata taudia. Tama sina e, umui ai hanamoa badina emui natudia umui durua hereva momokani idia laloa bada, bona idia umui hagoadaia edia matamata negana lalonai Iehova idia gwauhamata henia bona hesiai henia totona. Herevana unai matamata taudia be sikuli dekenai hahetoho momo idia davaria, to edia bapatiso karana ese ia hahedinaraia, umui tama sina be ruma dekenai idia umui hadibaia namonamo.​​—Sal. 128:​1-6.

Ma danu, ai moale badina Baibel stadi edia namba be ia bada​​—bona misinari taudia bona spesel painia taudia be unai gaukara idia durua bada. Ai ibounai, Hakaua Oreana, ai moale badina tanobada hegegemadai iseda tadikaka taihu ibounai be kamonai taudia idia boiria idia gwau, “Oi mai,”​—anina be ranu mase taudia ibounai idia boiria ‘mauri ranuna do idia abia dae, ia be davana lasi.’ (Apok. 22:17) Lagani 2008 ai bapatiso idia abia taudia ibounai 289,678 be iseda tanobada ibounai tadikaka oreana lalonai idia vareai, bona ita ura idia ita welkam henia!

Namona be aposetolo Ioane ena hereva ita laloatao noho, ia gwau: “Tanobada, mai ena gau dikadia, taunimanima idia ura dikadika gaudia, be kahirakahira do idia ore. To Dirava ena ura ia karaia noho tauna be do ia noho ela bona hanaihanai.” (1 Ioa. 2:​17) Danu, namona be ita laloatao, ita be inai tanobada ‘do ia ore’ negana lalonai ita noho inai! Unai dainai, aonega dalana be iseda mauri lalonai Dirava ena ura ita atoa guna bona ita ‘gima noho.’ (Mat. 24:​42, BHğ) Unai bamona ita karaia neganai do ita lalohisihisi lasi, to Iehova ena hebogahisi mai lalokauna dainai hahenamo momo do ita abia.​​—Isa. 63:7.

Lagani 2009 ena Yearbook lalonai be tano idauidau ai idia noho tadikaka taihu edia ekspiriens namodia idia noho; ai diba unai ese umui ibounai do ia hagoadaia emui mauri lalonai Basileia gaudia umui atoa guna totona. Ai ura umui ai hadibaia, ai be nega ibounai umui ai laloa noho, umui totona ai guriguri, bona umui ai lalokau henia bada. Namona be Iehova ese umui do ia hanamoa bada.

Emui tadikaka,

Iehova Ena Witnes Taudia Edia Hakaua Oreana