Hadibaia Tauna Badana amo Diba Ita Abia Bukana Stadilaia Ena Namo
1. April 13 purana ai, Kongrigeisen Baibel Stadi dekenai edena buka do ita stadilaia?
1 April 13 purana ai, Kongrigeisen Baibel Stadi dekenai Hadibaia Tauna Badana amo Diba Ita Abia bukana do ita stadilaia. Ena be tama sina ese unai buka idia gaukaralaia edia natudia ida idia stadi totona, to unai buka lalonai idia noho hakaua herevadia momo be matamata bona buruka taudia ia durua diba. Ita ibounai be unai buka ita stadilaia karana amo namo bada do ita abia.
2. Wiki ta ta ena stadi totona, dahaka ita karaia be namo?
2 Namona be wiki ta ta ai stadi totona ita hegaegae namonamo, namo lasi ita laloa unai buka be natu maragidia edia buka bona dobu gaudia ia herevalaia lasi. Hegaegae namonamo karana ena anina be haere sibona ita makaia lasi. To, mai guriguri ida Baibel siridia ita laloa dobu karana ese ita ia durua iseda haere bona kudouna ita hegaegaelaia.—Esr. 7:10.
3. Edena dala ai kongrigeisen taudia be ta ta idia hagoadaia diba?
3 Mai kudouna ibounai ida ita henia haere kwadogina amo ta ta ita hagoadaia diba. (Roma 1:11, 12) Natudia be buka amo haere idia duahia sibona lasi, to tama sina ese idia durudia, unai amo sibona edia hereva dalana amo haere idia henia diba.
4. Kongrigeisen Baibel Stadi naria tadikaka be dahaka idia karaia be namo?
4 Namona be Kongrigeisen Baibel Stadi idia naria tadikaka ese stadi idia hakaua neganai, henanadai haida be natudia totona idia hegaegaelaia, to namona be idia laloatao stadi be taunimanima badadia bona natudia edia namo totona. Stadi naria taudia ese idia hahedinaraia, buka lalonai idia noho Baibel ena hakaua herevadia be edena dala ai tadikaka bona taihu ese edia mauri dinadia lalonai idia badinaia diba.
5. Edena dala ai matamata bona tadikaka taihu badadia ese Hadibaia Tauna Badana amo Diba Ita Abia bukana idia stadilaia amo namo idia abia?
5 Hadibaia Tauna Badana amo Diba Ita Abia bukana be buka namona natu maragidia hadibaia totona, badina unai buka amo idia ita durua diba Keriso Iesu idia tohotohoa totona. Unai amo sikuli eiava gabu ma haida ai haida ese idia doria Dirava ena taravatu idia utua neganai, Baibel ena hakaua herevadia idia badinaia diba. Danu, tadikaka taihu badadia be auka lasi dalanai Baibel ena hakaua herevadia idia stadilaia dainai, unai ese idia do ia durua ‘Keriso ena Sivarai Namona ena dala hegeregerena idia mauri noho totona.’—Fili. 1:27.