Dirava Ena Aneru ese Ita Idia Durua

TAUNIMANIMA haida idia gwau idia itaia diba gaudia sibona idia abidadama henia. To unai be lalohadai kavakavana. Idia vara momokani gaudia momo be iseda matana dekenai ita itaia lasi. Idia ta oi gwauraia diba, a?—

Ita hahodi hodahodana be edena bamona? Ita mamia diba, a?— Emu imana oi abia isi, bona oi hiriria. Gau ta oi mamia, a?— Oibe, to lai oi itaia diba lasi, ani?—

Ita itaia diba lasi lauma taudia ita herevalaia vadaeni. Ita dibaia gauna be, idia haida be namo bona ma haida be dika. Ita itaia diba lasi lauma namodia haida edia ladadia mani oi gwauraia.— Oibe, Iehova Dirava, Iesu bona aneru namodia idia noho. Aneru dikadia idia noho danu, a?— Baibel ia gwau idia noho. Mani idia dekenai oi dibaia gaudia be lau oi hamaoroa.—

Ita dibaia gauna ta be, aneru namodia bona aneru dikadia edia goada ese iseda goada idia hereaia. Hadibaia Tauna Badana be aneru edia kara ia diba namonamo. Badina tanobada dekenai beibi ta bamona ia do vara lasi neganai, ia be aneru ta. Ia be aneru ma haida ida guba dekenai ia noho vadaeni. Idia milioni momo ia diba. Unai aneru ibounai be mai edia ladadia, a?—

Ita dibaia vadaeni, Dirava ese hisiu ibounai edia ladadia ia atoa. Unai dainai ita abia dae aneru ibounai be mai edia ladadia danu. Bona ita diba idia ta ta dekenai idia herevahereva diba badina Baibel ese “aneru edia gado” ia gwauraia. (1 Korinto 13:1) Oi laloa aneru be dahaka idia herevalaia? Tanobada ai ita noho taudia idia herevalaia, a?—

Ita diba Satani ena aneru, demoni unai, idia ura Iehova do ita kamonai henia lasi. Unai dainai unai idia karaia diba dalana idia herevalaia. Idia ura edia kara ita tohotohoa, unai amo Iehova be ita do ia ura henia lasi danu. To Dirava ena kamonai anerudia be edena bamona? Oi laloa idia danu ese ita idia herevalaia, a?— Oibe. Idia ura ita idia durua. Lau ura oi dekenai, Dirava ena aneru ese Iehova idia lalokau henia bona hesiai henia taudia idia durudia dalana lau herevalaia.

Hegeregere, tau ta ena ladana be Daniela bona ia be Babulonia dekenai ia noho. Unuseniai idia noho taudia momo ese Iehova idia lalokau henia lasi. Taunimanima ese taravatu idia atoa danu, bema ta be Iehova Dirava dekenai ia guriguri do idia panisia. To Daniela ese Iehova guriguri henia karana ia hadokoa lasi. Oi diba Daniela dekenai dahaka idia karaia?—

Oibe, taunimanima dikadia ese laiona ena guri dekenai Daniela idia negea diho. Unuseniai, Daniela bona idia hitolo laiona haida sibona idia noho. Gabeai ia vara gauna oi diba, a?— Daniela ia gwau, “Dirava ese iena aneru ia siaia mai, laiona edia uduna ia koua.” Bero ta ia davaria lasi! Iehova idia hesiai henia taudia dekenai aneru be gau namodia momo idia karaia diba.​—Daniela 6:​18-​22.

Ma nega ta ai, Petero be dibura rumana dekenai ia noho. Petero be Hadibaia Tauna Badana, Iesu Keriso ena turana. Petero ese ma haida ia hamaoroa Iesu be Dirava ena Natuna neganai idia badu. Unai dainai Petero be dibura rumana dekenai idia atoa. Tuari taudia ese Petero idia gimaia unai dala amo do ia heau lasi. Ta ese ia do ia durua, a?—

Petero be gima taudia rua edia huanai ia mahuta, bona ena imana be seini amo idia lokaia. To Baibel ia gwau: ‘Iehova ena aneru ta ia mai, diari danu dibura ruma ia hadiaria. Aneru ese Petero ena kopina ia daua toho, ia hanogaia, ia gwau, “Oi toreisi haraga.” ’

Unai neganai, Petero ena imana amo seini idia moru! Bona aneru be ia dekenai ia gwau: ‘Oiemu rami oi kwatua, oiemu tamaka oi atoa bona lauegu murinai oi raka.’ Gima taudia ese idia koua diba lasi badina aneru ese Petero ia durua. Vadaeni auri amo idia karaia geiti ta dekenai idia ginidae, bona gau idauna ta ia vara. Unai geiti be sibona ia kehoa! Unai aneru ese Petero ia ruhaia unai amo do ia haroro noho.​—Kara 12:​3-​11.

Dirava ena aneru ese ita idia durua diba danu, a?— Oibe, idia karaia diba. Unai ena anina be idia ese nega ibounai ita do idia gimaia dainai dika ta do ita davaria lasi, a?— Lasi, bema kavakava karadia ita karaia, aneru ese unai kara dainai idia vara dika amo ita idia gimaia lasi. To ena be kavakava karadia ita karaia lasi, dika ita davaria diba. Dirava be aneru Ia hadibaia lasi idia vara gaudia idia koua totona. To, Ia be idia dekenai gaukara namona ta ia henia.

Baibel ia gwau aneru ta be gabu ibounai dekenai idia noho taudia ia hadibaia Dirava idia tomadiho henia totona. (Apokalupo 14:​6, 7) Unai aneru ese edena dala ai idia ia hamaoroa unai idia karaia totona? Guba amo ia boiboi bena unai amo taunimanima ibounai ese ena gadona idia kamonai diba, a?— Lasi, to Iesu murinai idia raka taudia tanobada dekenai ese ma haida dekenai Dirava idia herevalaia, bona aneru ese edia gaukara ia hakaua. Aneru ese dala idia kehoa idia ura momokani Dirava idia dibaia taudia idia kamonai totona. Unai haroro gaukara ita durua diba, bona aneru ese ita do idia durua.

To bema Dirava idia lalokau henia lasi taudia ese ita idia hahekwakwanaia, be edena bamona? Dibura dekenai ita idia atoa be edena bamona? Aneru ese ita do idia ruhaia, a?— Reana idia karaia diba. To nega ibounai idia karaia lasi.

Iesu murinai ia raka tauna, Paulo, be guna dibura rumana ai ia noho. Ia be lai guba badana negana ai bouti amo ia laolao. To aneru ese ia idia ruhaia haraga lasi. Unai bamona idia karaia badina taunimanima ma haida be Dirava ena sivarai idia kamonai be gau badana. Aneru ta ia gwau: “Paulo e, oi gari lasi, Kaisara ena vairana dekenai do oi gini.” Oibe, Paulo idia hakaua lao tanobada ena lohia badana Kaisara dekenai, unai amo Paulo be ia dekenai do ia haroro. Aneru be Paulo ena noho gabudia ibounai idia diba, bona ia idia durua. Bema mai momokani ida Iehova ita hesiai henia ita do idia durua danu.​—Kara 27:​23-​25.

Aneru ese gaukara badana ma ta do idia karaia, bona kahirakahira unai do idia karaia. Dirava ese kara dika taudia do ia hadikaia negana be kahirakahira momokani. Dirava momokanina idia tomadiho henia lasi taudia ibounai be do Ia hadikaia ore. Idia gwau aneru idia abia dae lasi badina idia itaia diba lasi taudia, be unai negai do idia diba idia kerere momokani.​—2 Tesalonika 1:​6-8.

Unai ena anina ita dekenai be dahaka?— Bema ita be Dirava ena aneru edia kahanai ita gini, idia ese ita do idia durua. To ita be edia kahanai ita gini, a?— Oibe, edia kahanai ita gini bema Iehova ita hesiai henia. Bona bema Dirava ita hesiai henia, taunimanima ma haida do ita hadibaia Ia idia hesiai henia totona.