Iesu be Ita Dekenai Guriguri Dalana Ia Hadibaia

IEHOVA Dirava oi hereva henia, a?— Ia ura Ia oi hereva henia. Dirava oi hereva henia neganai, inai be guriguri karana. Iesu be hanaihanai ena guba Tamana ia hereva henia. Nega haida ia ura ia sibona ia noho, unai amo Dirava ia hereva henia diba. Nega ta ai, Baibel ia gwau, “Iesu sibona ororo ta dekenai ia daekau, ia guriguri. Hanuaboi ia ginidae, Iesu sibona ia noho unuseni.”​—Mataio 14:23.

Iehova oi guriguri henia totona, edeseni oi lao diba?— Reana hanuaboi ai oi do mahuta lasi neganai, Iehova oi hereva henia diba. Iesu ia gwau: “Oi guriguri neganai oiemu ruma dekenai oi vareai, iduara oi koua, oiemu Tamana, . . . oi guriguri henia.” (Mataio 6:6) Hanuaboi ta ta ibounai oi do mahuta lasi neganai, Iehova oi guriguri henia, a?— Unai bamona oi karaia be namo.

Iesu be ma haida danu ia noho neganai, ia guriguri danu. Ena turana Lasaro ia mase neganai, Iesu be ma haida ida Lasaro ena guria gabunai ia noho bona ia guriguri. (Ioane 11:​41, 42) Bona Iesu be ena hahediba taudia ida ia hebou negadiai ia guriguri danu. Hebou dekenai guriguri idia gwauraia, unai heboudia dekenai oi lao danu, a?— Unuseniai nega momo tau badana ta ese guriguri ia gwauraia. Ia gwauraia herevadia oi kamonai namonamo, badina ia be oi totona Dirava ia hereva henia noho. Bena ia gwauraia gurigurina murinai “Amen” oi gwauraia diba. Guriguri ena dokonai “Amen” oi gwauraia, ena anina oi diba, a?— Anina be unai guriguri oi ura henia. Bona idia gwauraia guriguri herevadia ida oi lalo-tamona bona oi ura unai be oiemu guriguri ai ia lao danu.

Iesu be aniani negadiai ia guriguri danu. Iena aniani dainai Iehova ia tanikiu henia. Hanaihanai emu aniani oi do ania lasi neganai, oi guriguri, a?— Ita do aniani lasi neganai, aniani totona Iehova ita tanikiu henia guna be namo. Umui aniani hebou neganai, reana ma ta ese guriguri ia gwauraia. To bema oi sibona oi aniani be edena bamona? Eiava bema Iehova idia tanikiu henia lasi taudia ida oi aniani hebou, be edena bamona?— Vadaeni sibona oiemu guriguri oi gwauraia be namo.

Hanaihanai oi guriguri badabada be namo, a? Eiava bema emu lalona dekenai oi guriguri, Iehova ese ia kamonaia diba, a?— Nehemia dekenai ia vara gauna amo unai do ita dibaia. Nehemia be Iehova ia tomadiho henia tauna ta, bona Parasa ena King Aratasaseta ena ruma dekenai ia gaukara. Dina ta Nehemia ia lalohisihisi bada badina ia kamonai Ierusalema, ena taunimanima edia hanua badana, ena magu ia moru.

King ese Nehemia ia lalohisihisi ena badina ia henanadailaia neganai, Nehemia be ena lalona dekenai ia guriguri guna. Bena King dekenai ena lalohisihisi ena badina ia gwauraia, bona ia noia bema ia hegeregere Ierusalema dekenai ia lao magu ia haginia totona. Dahaka ia vara?—

Oibe, Dirava ese Nehemia ena guriguri ia haerelaia. King ese gwaumaoro ia henia! King ese Nehemia dekenai au momo ia henia magu haginia totona. Unai dainai herevana iseda lalona dekenai ita guriguri, to Dirava ese iseda guriguri ia haerelaia diba.​—Nehemia 1:​2, 3; 2:​4-8.

Mani inai oi laloa. Oi guriguri neganai, oiemu kwarana oi atoa diho be namo, a? Oi tui diho be namo, a? Dahaka oi laloa?— Nega haida Iesu be ia guriguri neganai, ia tui diho. Nega haida ia gini. Bona nega haida ia guriguri neganai, ena kwarana ia abia isi guba dekenai, Lasaro totona ia guriguri neganai ia karaia bamona.

Unai ese dahaka ia hahedinaraia?— Oibe, unai ese ia hahedinaraia oi gini eiava tui diho be gau badana lasi. Nega haida emu kwarana oi atoa diho bona emu matana oi koua be namo. Nega haida oi tui diho diba, Iesu ia karaia bamona. To laloaboio lasi, herevana ia be dina eiava hanuaboi Dirava ita guriguri henia diba, bona ita do ia kamonai. Mai anina bada gauna guriguri dekenai be, ita abia dae Iehova ia kamonai noho. Oi abia dae Iehova ese emu guriguri ia kamonai, a?—

Iehova ita guriguri henia neganai, dahaka ita gwauraia be namo?— Mani lau oi hamaoroa: Dirava dekenai oi guriguri neganai, dahaka oi herevalaia?— Iehova be ita dekenai gau namodia momo ia henia, bona unai gau namodia dainai ia ita tanikiu henia be namo, ani?— Ita ania aniani dainai ia ita tanikiu henia diba. To guba bona au edia kala bona flaoaflaoa mai hairaidia dainai ia oi tanikiu henia, a?— Unai gaudia ia karaia danu.

Nega ta Iesu ena hahediba taudia ese ia idia nanadaia idia dekenai guriguri dalana ia hadibaia totona. Unai dainai Hadibaia Tauna Badana ese idia ia hadibaia, bona do idia gurigurilaia mai anina bada gaudia ia hahedinaraia. Unai gaudia oi diba, a?— Emu Baibel oi abia, bona Mataio karoa 6 dekenai oi kehoa. Siri 9 ia lao 13 dekenai, taunimanima momo ese idia gwauraia Lohiabada Ena Guriguri ia noho. Mani ita duahia hebou.

Iniseni ita dibaia gauna be Iesu ese ita ia hamaoroa Dirava ena ladana totona ita guriguri. Ia gwau iseda guriguri lalonai Dirava ena ladana do ita hahelagaia. Dirava ena ladana be daika?— Oibe, ena ladana be Iehova, bona unai ladana ita lalokau henia be namo.

Gau iharuana be, Iesu be ita ia hadibaia Dirava ena Basileia do ia mai totona ita guriguri. Unai Basileia be mai anina bada badina tanobada dekenai maino do ia mailaia bona paradaiso ai do ia halaoa.

Gau ihatoina be, Hadibaia Tauna Badana ia gwau do ita guriguri Dirava ena ura gauna tanobada dekenai do ia karaia guba dekenai ia karaia hegeregerena. Bema unai totona ita guriguri, vadaeni Dirava ena ura gauna ita karaia be namo.

Bena, Iesu ese ita ia hadibaia dina ta ta ita abia aniani totona ita guriguri. Danu ia gwau kara kererena ita karaia neganai, Dirava dekenai sori herevana ita gwauraia be namo. Bona Dirava ita noia eda dika ia gwauatao totona. To Iehova ese unai ia do karaia lasi neganai, ita dekenai idia kerere taudia edia dika ita gwauatao be namo. Unai be auka lasi oi karaia totona, a?—

Dokonai, Iesu ia gwau namona be ita guriguri Iehova Dirava ese Satani Diabolo amo ita ia gimaia totona. Unai dainai, unai ibounai be gau namodia Dirava dekenai ita gurigurilaia totona.

Namona be ita abia dae Iehova ese iseda guriguri ia kamonai henia. Ita durua sibona totona ita guriguri lasi, to ia ita tanikiu henia noho be namo. Mai momokani ida ia ita guriguri henia bona gau maorodia totona ia ita noia neganai, ia moale. Bona unai gaudia be ita dekenai do ia henia. Unai oi abia dae, a?—