Memorial Dekenai Idia Mai Taudia Ita Durua Daladia

¹ March 22, 2008 ai, tanobada hegegemadai taunimanima milioni momo be hereva badana ta do idia kamonai. Memorial dekenai idia lao taudia do idia kamonai Iehova be taunimanima ia lalokau henia dainai, Iesu ena mauri davalaia boubouna ia henia. (Ioa. 3:​16) Idia be do idia diba Basileia be dahaka, bona Iehova ese edena dala ai Basileia do ia gaukaralaia tanobada ai Iena ura ia hagugurua totona. (Mat. 6:​9, 10) Idia ese Dirava ena taunimanima edia lalokau, lalotamona bona heabidae karadia do idia itaia.​​—Sal. 133:1.

² Baibel Stadi Taudia: Memorial dekenai do idia mai taudia haida be Baibel stadi taudia matamatadia. Oi hakaudia lao tadikaka taihu ma haida idia hedavari henia totona. Wiki ta ta ai ita abia heboudia oi herevalaia, o Kingdom Hall ena lalonai idia noho gaudia ma haida oi hahedinaraia. Memorial tok lalonai, hereva henia tauna be taunimanima do ia hagoadaia Iehova tura henia karadia idia goadalaia noho totona. Oi ese unai tadikaka ena tok amo emu Baibel stadi taudia oi hagoadaia diba.

³ Haroro Lasi Pablisa: Memorial dekenai do idia mai taudia haida be haroro lasi pablisa taudia. Namona be oi lao bona idia oi hedavari henia. Anina lasi henanadai eiava hemarai do ia havaraia herevadia oi gwauraia lasi. Memorial ia ore bena dina haida o wiki ta murinai, namona be elda taudia be unai haroro lasi pablisa idia vadivadi henia, idia tanikiu henidia badina Memorial dekenai idia mai, bona ia noidia kongrigeisen ena hebou gabena dekenai idia mai totona.

⁴ Vadivadi Taudia: Memorial dekenai do idia mai taudia haida be eda turadia o ruma bese taudia. Ma haida be Memorial ena boiboi pepana idia abia taudia. Bema Memorial dekenai vadivadi taudia matamatadia oi itaia, vadaeni oi lao idia oi hedavari henia o welkam henidia. Idia haida be reana nega ginigunana eda hebou dekenai idia mai. Oi nanadaia, edena bamona idia oi davaria lou diba. Memorial dinana ia ore murinai, idia oi vadivadi henia o telefon amo oi rini henia, bona idia dekenai lalona ia veria gaudia ma haida o Baibel stadi oi herevalaia toho.

⁵ Reana Memorial tok ai ita kamonai gaudia ita herevalaia murinai, Baibel Hadibaia buka amo lou henia ita karaia. Hegeregere, Memorial ena tok henia tauna be Isaia 65:​21-​23 do ia duahia. Lou henia oi karaia neganai, reana unai tok oi herevalaia bena oi gwau diba: “Lau ura Iesu ena mauri davalaia boubouna ese ia havaraia hahenamo ma haida lau herevalaia.” Bena Baibel Hadibaia buka ena rau 4-5 herevalaia. Eiava oi gwau diba: “Momo idia ura diba, Isaia ena peroveta herevana be edena negai do ia guguru.” Bena buka ena karoa 9 ena paragraf 1-3 herevalaia. Eiava Memorial ena tok oi herevalaia lou, Baibel Hadibaia buka oi kehoa, bona Baibel stadi karaia dalana oi haheitalaia.

⁶ Namona be ita ta ta be dala ita tahua Memorial dekenai do idia mai Baibel stadi taudia, haroro lasi pablisa, bona vadivadi taudia ita durudia totona. (Luka 22:19) Momokani, Iehova be iseda hesiai gaukara do ia hanamoa bona habadaia.

Magasin Herevalaia Daladia

The Watchtower Feb. 1

“Bema famili ibounai be inai sisiba idia badinaia, oi laloa dahaka do ia vara? [Efeso 4:​31 duahia. Bena haere naria.] Inai magasin lalonai be Baibel ena heduru hereva namodia haida idia noho, unai ese famili do ia durua headava lalonai hepapahuahu idia hamaoromaoroa bona idia moale totona.” Magasin ena rau 18-​20 ai ia noho kahana hahedinaraia.

Awake! Feb.

“Taunimanima haida idia gwau, Dirava be iseda kerere ibounai ia laloatao. Ma haida idia gwau, Dirava be kerere ibounai ia gwauatao, herevana kerere haida be dika rohoroho. To, oi be dahaka oi laloa? [Haere naria. Bena Kara 3:​19 duahia.] Inai magasin ese ia hahedinaraia, bema tau ta ia ura Dirava ese ia hebogahisi henia, vadaeni Baibel ese ia gwauraia dala toi ia badinaia be namo.” Magasin ena rau 10-​11 ai ia noho kahana hahedinaraia.

The Watchtower Mar. 1

“Emu lalohadai be dahaka inai siri dekenai? [Ioane 3:​16 duahia.] Nega ta oi henanadai, edena dala ai tau tamona ena mase be haida ia durua mauri hanaihanai idia abia totona, a? [Haere naria.] Inai magasin ese ia hahedinaraia goevagoeva, edena dala ai Iesu ia mase dainai ita be heduru ita abia.”

Awake! Mar.

“Oi laloa tomadiho orea ibounai be idia namo, a? [Haere naria.] Baibel ese ma haida edia tomadiho ia herevalaia dalana mani oi itaia. [Mareko 7:7 duahia.] Edena dala ai ta ia diba tomadiho oreana ta be hereva momokani o “taunimanima” edia hereva ia hadibaia? Oi laloa tau ta be tomadiho ta amo hereva momokani ia dibaia diba, a? Inai magasin be unai henanadai ia haerelaia.”