Nega Idauidau ai Gaukaralaia
1. Hereva Momokani Oi Diba pepapepana ena namo be dahaka?
1 Pepapepa ladana Oi Ura Hereva Momokani Oi Diba, A? ese ita do ia durua Baibel stadi ita hamatamaia totona. Danu unai tulu namona ita gaukaralaia diba hereva momokani ena uhe be gabu idauidau ai ita hadoa totona. (Had. 11:6) Henunai be ita gaukaralaia diba daladia haida idia noho.
2. Edena bamona pepapepa amo herevahereva dalana ita hamatamaia diba?
2 Herevahereva Hamatamaia Dalana: Reana ruma tauna dekenai pepapepa oi henia, pepapepa ena vaira kahanai idia noho henanadai 6 oi hahedinaraia, bona oi nanadaia: “Inai henanadai 6 amo edena henanadai be oi laloa momo?” Ena haere oi abia murinai, pepapepa lalonai Baibel ese ruma tauna ena henanadai ia haerelaia dalana oi herevalaia bona idia gwauraia siri ta oi duahia. Rau ena dokona kahana oi duahia o ena hereva badadia oi gwauraia, bona Baibel Hadibaia bukana oi hariharilaia. Herevana buka ia abia dae lasi, to ia ese pepapepa ia abia, unai amo hereva momokani be ena kudouna dekenai ia tubu diba.—Mat. 13:23.
3. Bema ruma tauna be ia bisi, reana dahaka do ita karaia?
3 Bema Ruma Tauna Ia Bisi: Reana oi gwau: “Inai be nega namona lasi dainai, lau ura oi dekenai inai pepapepa lau rakatania. Inai pepapepa dekenai vaia ita henia henanadai 6 idia noho bona edia haere be Baibel ese ia hahedinaraia. Lau giroa mai neganai, lau dekenai emu lalohadai oi gwauraia diba.”
4. Dala haroro ai pepapepa ita hariharilaia neganai, dahaka ita gwau diba?
4 Dala ai Ita Haroro Neganai: Oi gwau diba: “Namo. Nega ta inai bamona henanadai ta oi gwauraia, a? [Haere naria.] Baibel ese inai henanadai ia haerelaidia goevagoeva.” Bema unai tauna be mai ena nega, pepapepa amo henanadai ta ena haere umui herevalaia hebou bona Baibel Hadibaia bukana oi hariharilaia.
5. Edena dala ai taunimanima idia noho lasi rumadia ai pepapepa ita gaukaralaia?
5 Taunimanima Idia Noho Lasi Rumadia: Teritori haida ai, nega momo pablisa taudia ese pepapepa be raka hanai taudia ese idia itaia lasi gabunai idia atoa. Bema kongrigeisen taudia be vaia unai bamona idia karaia, vadaeni Hereva Momokani Oi Diba pepapepana dekenai unai bamona idia karaia diba danu. Bema oi giroa lou neganai, reana oi gwau: “Vanegai ai mai neganai, oi be oi noho lasi, unai dainai inai pepapepa be emu iduara dekenai ai rakatania. Oi ura edena henanadai ena haere oi diba?”
6. Dahaka dainai haroro gaukara ai Hereva Momokani Oi Diba pepapepana be tulu namona?
6 Hereva Momokani Oi Diba pepapepana ese hereva momokani be auka lasi, bona anina ia hedinarai goevagoeva dalanai ia hahedinaraia. Ia ese tomadiho idauidau bona noho dala idauidau taudia ibounai edia lalona ia veria. Ia be auka lasi ita hariharilaia totona, natudia maragidia bona pablisa matamatadia ese idia karaia diba. Oi be nega idauidau ai unai pepapepa oi gaukaralaia, a?