Basileia
Anina: Dirava ena Basileia be Iehova ena lohia siahuna gabu iboudiai dekenai hahedinaraia gauna o dalana; unai gau o dala amo ia ese ia havaradia gaudia iboudiai ia lohiadia. Basileia ena anina badana be, Dirava ena Natuna Iesu Keriso ese ia gunalaia gavamanina, unai gavamani amo Dirava ese ena lohia siahuna ia hahedinaraia. “Basileia” ena anina ma ta be Dirava ese Pavapava ai ia halaoa tauna, Keriso, ena pavapava siahuna, eiava iena guba gavamanina ese do ia lohiaia tanobadana.
Dirava ena Basileia be gavamani korikori ta, a?
Eiava ia be siahu ta taunimanima edia kudoudia lalodiai, a?
Luka 17:21: “Bona ta do ia gwau lasi, ‘Gauna inai,’ o, ‘Gauna unai,’ badina be Dirava ena Basileia be umui emui lalona dekenai ia noho.” (Mani inai oi laloa, Luka 17 siri 20 ese ia hahedinaraia hegeregerena, Iesu ese Farisea taudia ia hereva henidia unai. Ia gwau henidia, ia gwau idia be koikoi taudia; unai dainai ita diba ia be inai hereva amo ia gwau lasi Basileia be edia lalona dekenai ia noho. To Basileia be Keriso ena amo idia bogaragidiai ia noho. Unai hegeregerena, nao gado Baibel haida lalodiai unai siri be inai bamona idia torea: “Dirava ena Basileia be umui emui huanai ia noho.” Unai Baibel edia ladadia be inai: The New English Bible, The Jerusalem Bible, bona The New World Translation of the Holy Scriptures.)
Basileia lalonai daidia be pavapava?
Apok. 15:3: “Lohiabada Dirava e, Siahu Ibounai Diravana e, oiemu gaukara be bada herea momokani. Oiemu hoa karadia be idau momokani. Oi be bese ibounai edia King!”
Dan. 7:13, 14: “Ta na guba oridia ai ema, ia na taunimanima natuna na heto [Iesu Keriso unai; Mareko 14:61, 62 itaia]; ia na Ḡauka dekena ema, bena vairanai e hakaua lao. Bena lohia siahuna e henia, bona hairai bona basileia danu, bese idau-idau bona basileia idau-idau bona gado idau-idau iboudiai ese ia isiaina bae lao heni helaoreana.”
Apok. 5:9, 10: ‘Oi [Iesu Keriso] idia alaia mase, bona oiemu rarana dekena amo taunimanima oi hoidia, Dirava ena taudia do idia lao totona. Bese ibounai, gado ibounai, hanua ibounai bona kopina idauidau ibounai oi ese oi hoidia. Oi ese idia oi haboua, vadaeni idia be Basileia ta bona Dirava ena boubou helaga karaia taudia oi ese idia oi halaoa vadaeni, bona idia ese tanobada do idia gunalaia.’ (Apokalupo 14:1-3 dekenai ia gwau, Dirava ese taunimanima 144,000 “tanobada dekena amo ia hamauria,” guba ena Siona Ororona dekenai Mamoe Natuna ida do idia lohia hebou totona.)
Hari Basileia ese taunimanima edia gavamani edena bamona do ia kara henidia?
Dan. 2:44: “Unu pavapava edia nega ai guba Diravana ese basileia ta baine haginia, nega ta ai basie habuaia tari diba ḡauna; bena ena lohia siahuna na basine hanai bese idauna ta enai. Ia ese unu basileia iboudiai na baine hamakohidia sisisisi bona baine hadokodia, bena baine gini hanaihanai.”
Sal. 2:8, 9: “Ba noigu, bena bese idau-idau baina henimu, oi ahumu, tanobada dokodia do baina henimu, emu. Auri itotohina amo ba hamakohidia, uro na heto ba huaridia.”
Dirava ena Basileia ese dahaka do ia karaia?
Dirava ena ladana do ia hahelagaia bona ena lohia siahuna do ia hamomokania
Mat. 6:9, 10: “Unai dainai, inai bamona do umui guriguri. ‘Aiemai Tamana e, guba dekenai oi noho, oiemu ladana do ai hahelagaia. Oiemu Basileia do ia mai.’ ” (Dirava ena ladana hahelagaia karana bona iena Basileia ena mai be unai siri lalodiai ia herevalaia hebou.)
Esek. 38:23: “Egu herea-dae bona egu helaḡa baina hahedinaraidia, bona bese momo vairadiai sibogu baina hahedinarai. Bena idia bae diba lau na Iehova.” (Dirava ese ena ladana hadikaia gaudia iboudiai do ia haorea; mauri taudia iboudiai ese iena ladana do idia hahelagaia bona do idia matauraia; iboudiai ese Iehova ena lohia siahuna do idia hamomokania mai edia ura ida, bona iena ura do idia karaia mai edia moale ida. Iehova ena ladana unai bamona hahelagaia karana amo guba taudia bona tanobada taudia edia maino bona edia noho namo do idia vara; dala idauna ta be lasi.)
Satana ena lohia siahuna do ia haorea
Apok. 20:2, 3: “Inai aneru [guba Pavapavana, Iesu Keriso] ese unai huala, unai idaunegai gaigaina, ma iena ladana be ‘Diabolo’ bona ‘Satani’, ia dogoatao, seini dekenai ia guia. Vadaeni do ia guia noho ela bona lagani 1,000 idia ore. Aneru ese huala unai guri dobu masemase lalonai ia negea diho. Vadaeni unai guri ia lokaia, bona koua toana ia karaia. Satani be unai bamona ia koua, tanobada bese do ia koia diba lasi totona, lagani 1,000 lalonai. Unai lagani 1,000 idia ore neganai idia ese Satani ma do idia ruhaia lou nega sisina sibona.” (Unai dala amo ia ese taunimanima na Satana Diabolo bona ena demoni edia siahu amo do ia ruhadia; unai siahu amo kara maoromaoro taudia idia hahekwarahidia, dagedage karadia dika rohorohodia idia havaraia, bona taunimanima idia hagaridia hanaihanai.)
Gau iboudiai do ia hatamonadia, Dirava momokani tamona tomadiho henia karana lalonai
Apok. 5:13; 15:3, 4: “Bona Dirava ese ia karaia gaudia ibounai, guba dekenai, tanobada dekenai, bona tanobada henunai, bona davara dekenai, inai gabudia lalonai gau ibounai edia boiboi lau kamonai, idia gwau, ‘Helai gabuna badana dekenai ia helai Diravana [Iehova], bona Mamoe ena Natuna [Iesu Keriso] be, hanamoa, bona hairai, bona hemataurai, bona siahu do idia abia, ela bona hanaihanai.’ ” “Lohiabada Dirava e, Siahu Ibounai Diravana e, oiemu gaukara be bada herea momokani. Oiemu hoa karadia be idau momokani. Oi be bese ibounai edia King! Oiemu kara ibounai be maoromaoro bona momokani. Lohiabada e, daika ese oi do ia gari henia lasi? Daika ese oiemu ladana do ia hanamoa lasi? Badina be oi sibona be helaga. Bese ibounai oi dekenai do idia mai, oi do idia tomadiho henia. Badina be oiemu kara maoromaoro be ibounai idia itaia vadaeni.”
Ia amo taunimanima ese Dirava do idia badinaia goevagoeva lou
Roma 8:19-21: “Dirava ese ia karaia gaudia [taunimanima] ibounai idia ura bada Dirava ese iena natuna taudia korikori do ia hedinaraia [anina be, do ia hahedinaraia mase amo idia toreisi lou bena guba dekenai Iesu ida idia noho taudia be idia lohia matamaia vadaeni], bona inai totona idia naria noho, mai laloa momo danu. Badina Dirava ese ia karaia gaudia be mauri anina lasi idia davaria, sibodia edia ura dainai lasi, to Dirava ena ura dainai. To dala namona ta Dirava ese ia laloa. Dirava ese dina ta iena karaia gaudia [taunimanima] be do ia ruhaidia dika ena bodaga dekena amo, vadaeni Dirava ena natuna edia hairai do idia abia, ma Dirava ese edia dala do ia kehoa, vadaeni kwalimu momokani do idia abia.”
Tuari do ia haoredia ela bona hanaihanai
Sal. 46:8, 9: “Aoma, Iehova ena ḡaukara a itaia; hahedika karadia ia ese tanobada ai vada e kara. Tuari ia ese e hadokodiamu ela bona tanobada dokona.”
Isa. 2:4: “Idia ese edia dare bae hododia, ruarua auridia ai bae halaodia, bona edia io bae hododia, kwama-kwama kaiadia ai bae halaodia; bese ta ese dare basine veri lasi, bese ta ihadikana totona, bona tuari daladia basie hahedibalai lou.”
Lohia dikadia do ia kokidia bona hahisia karadia do ia haorea
Sal. 110:5: “Ḡaubada na oi idibamu kahana ai; ena badu dinana ai pavapava baine huaridia.”
Sal. 72:12-14: “E dabumu tauna e boiboimu negana ai ia [Iehova ena Mesia Pavapavana] ese e hamauriamu, ogoḡami tauna bona asi iduruna tauna danu. Ia ese manoka-manoka taudia bona ogoḡami taudia e bogadia hisimu, bona e dabumu taudia e hamauridiamu. Daḡedaḡe bona ala-ala amo ia ese edia mauri e rauadiamu, raradia na ḡau herea-daena ia vairanai.”
Aniani momo do ia havaraia, taunimanima iboudiai edia
Sal. 72:16: “Aniani reidia na tano ai bae vara momomomo, ororo doridia reidia bae helado.”
Isa. 25:6: “Ina ororo ai [guba ena Siona Ororona ai, Dirava ena Basileia ena gabu unai; unuseniai tanobada taudia ubudia dalana do idia karaia], Iehova Sabaota ese aria namo-hereana baine karaia, bese iboudiai adia; vine-ranuna negarina, aniani gaihodia, vine-ranuna asi nurinurina.”
Gorere bona manoka iboudiai do ia haorea
Luka 7:22; 9:11: “Umui lao, umui itaia bona umui kamonai karadia Ioane dekenai do umui hamaoroa. Matakepulu taudia edia matana idia kehoa, aena dika taudia idia raka namonamo, lepera taudia idia goeva, taia kudima taudia idia kamonai, mase taudia idia toreisi, bona ogogami taudia Sivara Namo idia kamonai henia.” “Vadaeni ia [Iesu Keriso] ese idia ia abia dae, Dirava ena Basileia herevana ia haroro henia idia dekenai, bona gorere hanamoa ura taudia ia hanamoa.” (Unai dala amo Iesu ese ia hahedinaraia ia be guba Pavapavana ai do ia lao neganai taunimanima be edena bamona do ia durudia.)
Ia amo taunimanima iboudiai ese ruma namodia do idia abia
Isa. 65:21, 22: “Ruma bae haginidia bena bae noholai; vine imeadia bae hado, bena anidia bae ani. Dia idia ese bae haginidia, bena idauna ta ese baine noholai, bona dia idia bae hadohado, bena idauna ta ese baine anianilai.”
Ia dainai iboudiai ese edia gaukara ena anina do idia moalelaia
Isa. 65:23: “Basie hekwarahi kava, bona natudia basie havaradia, dika ena; badina be idia na Iehova ena lalokau taudia natudia, bona idia natudia danu idia ida.”
Ia henunai taunimanima do idia noho namonamo; gau ta ese do ia hadikadia lasi
Mika 4:4: “Ta ta ena vine auna ena vine auna bona ena suke auna ena suke auna henudiai bae helai, bona tau ta ese basine hagaridia; badina be Iehova Sabaota na uduna amo vada e hereva.”
Sal. 37:10, 11: “Asi vanahana kara dika tauna baine puki; ena gabu ba tahua, to basio davaria. A manau taudia ese tano bae abia; maino ena harihari-bada idia ese bae moalelaia.”
Kara maoromaoro bona hahemaoro goevagoeva do ia havaraia
2 Pet. 3:13: “Dirava ese ia gwauhamata vadaeni guba matamata bona tanobada matamata do ia havaraia. Inai totona do ita naria noho. Unai gabu dekenai be kara maoromaoro sibona do ia noho.”
Isa. 11:3-5: “Ia [Mesia Pavapavana] na basine hahemaoro, matana e itamu ḡaudia daidiai, bona lalona basine hadaia, taiana e kamonaimu herevadia daidiai; a mai kara maoromaorona ida ia ese ogoḡami taudia baine hahemaoro henidia, bona lalona baine hadaia maoro, tanobada ena manau taudia ediai . . . Kara maoromaoro na ia gabana ḡauna ai bainela, bona kara momokani na ia koekoena iḡeḡelaina ḡauna ai bainela.”
Taunimanima do ia naridia, lai gubana eiava unai bamona gauna ma ta ese do ia hadikadia lasi totona
Mar. 4:37-41: “Lai bada herea ia mai, bona hurehure bada danu, ela bona vanagi kahirakahira ia honu. . . . Vadaeni Iesu ia toreisi, lai dekenai ia gwau henia, bona davara dekenai ia hereva, ia gwau, ‘Umui doko, umui maino noho.’ Vadaeni, nega tamona lai ia doko, bona hurehure be lasi. . . . Idia hoa bona gari bada, idia hereva, ‘Inai tau be daika? Lai bona davara ese iena hereva idia kamonai henia.’ ” (Unai amo Iesu ese ena siahu ia hahedinaraia, guba dekenai do ia lohia neganai unai gau iboudiai be unai siahu amo do ia biagua.)
Mase taudia do ia hatoredia isi lou
Ioane 5:28, 29: “Inai kara dekenai do umui hoa lasi. Badina be nega ta do ia mai, mase guria gabu dekenai idia noho taudia ibounai ese iena gadona [King Keriso ena gadona] do idia kamonai. Vadaeni guria gabu dekena amo do idia toreisi.”
Apok. 20:12: “Mase taudia, ladana bada taudia bona ladana maragi taudia be lau itaia, helai gabuna badana ena vairanai idia gini. Vadaeni Dirava ese buka haida ia kehoa, bona buka ma ta ia kehoa, mauri bukana. Bona mase taudia be Dirava ese ia kota henia, edia kara buka lalonai ia torea hegeregerena [idia toreisi lou murinai idia karaia karadia unai; Roma 6:7 itaia].”
Adam ena kara dika dainai ia vara masena ibounai do ia haorea
Isa. 25:8: “Ia ese mase baine ha-orea ela bona hanaihanai; Ḡaubada Iehova ese irurumata na vaira iboudiai amo baine dahu oho.”
Apok. 21:4: “Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.”
Tanobada oromana matamatana do ia havaraia, ia lalonai taunimanima do idia lalokau heheni momokani
Ioane 13:35: “Taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Iesu ena hahediba taudia be mai edia dala, ia ida do idia lohia hebou guba Basileiana lalonai, eiava unai Basileia henunai do idia noho tanobada dekenai.)
Ia dainai animal bona taunimanima be maino dekenai do idia noho hebou
Isa. 11:6-9: “Uda sisiana na mamoe natuna ida bae noho, bona taiga na nani natuna ida bae hekure; boromakau natuna bona leona bona ubu-ubu ḡauna na bae noho hebou, bona mero maraḡina ta ese baine hakaudia. Boromakau hahinena bona bea bae aniani hebou, bona natudia bae hekure hebou; bona leona ese rei kakoro baine ania, boromakau maruanena na heto. Rata e inumu merona na gaigai ena guri latanai baine gadara, bona rata vada e dadaraia merona ese imana na duba ena guri lalonai baine toia vareai. Basie hahehisi bona basie hahebua tari, egu ororo helaḡana idoinai ai; badina be tanobada na Iehova idiba-maorona ai baine honu, davara ena honuhonu-dae na heto.” (Isaia 65:25 danu)
Hos. 2:18: “Una dina ai baina haherohemui maino, umui bona uda boromadia bona atai manudia bona tano ai e raumu ḡaudia; . . . bena mai mainomui ida ba hekure diba.”
Tanobada be paradaiso ai do ia halaoa
Luka 23:43: “Momokani lau hamaoroa oi dekenai, . . . ita ruaosi Paradaisa dekenai do ita ginidae.”
Sal. 98:7-9: “Davara reḡena baine dae, bona e hahonuamu ḡaudia iboudiai, tanobada, bona e noholaiamu taudia iboudiai. Abata na imadia bae patapata, ororo na moale anedia bae abi hebou Iehova vairanai. Badina be ia na e maimu, tanobada baine biagua totona; ia ese tanobada baine hahemaoro henia mai maoromaorona ida, bona bese idau-idau ahudia korikoridia baine henidia.”
Genese 1:28; 2:15; Isaia 55:11 itaia danu.
Edena negai Dirava ena Basileia ia lohia matamaia?
Aposetolo edia nega lalonai a?
Kol. 1:1, 2, 13, BH: “Lau Paulo, Iesu Keriso ena aposetolo taugu, Dirava ena ura dainai, bona varavarada Timoteo, ai raruosi ese umui helaḡa taumui [guba Basileiana do idia abia taudia] . . . a tore henimui . . . [Ita helaga tauda, Keristen ekalesiana tauda, be Dirava ese] dibura siahuna amo vada e hamaurida, ia Natuna, ena lalokau, ena basileia lalonai vada e abida vareai.” (Aposetolo edia nega lalonai, Paulo ese unai hereva ia do torea lasi neganai, Keriso ese Keristen ekalesiana ia lohiaia matamaia, to tanobada ibounai lohiaia basileiana ia do haginia lasi.)
1 Kor. 4:8: “Harihari umui be bogakunu vadaeni, harihari umui be kohu momo taudia. Umui ese ai umui hanaia vadaeni, bona king hegeregere umui lao, ani? Bema umui be king momokani be namo, vadaeni ai danu king taudia do ai lao umui danu.” (Ita diba Paulo ese ia gwau henidia unai, lalohadai kererena idia abia dainai.)
Apok. 12:10, 12, BH: “Harihari iseda Dirava ena hahemauri bona ena goada bona ena basileia, bona iena Keriso ena siahu, vada eme gini dae; badina be Dirava vairanai varavarada e habadelaidia boi e habadelaidia rani tauna na vada e tahoa dobi. Guba e! Guba ai o nohomu taumui e! Idia daidiai ba moale. Tanobada bona davara, madi ihabaimui! Badina be diabolo vada e vasi, e badu dikadikamu; badina be ia dibana ena nega eme kwadogi.” (Unai siri ese idia hahedinaraia, Dirava ena Basileia do ia ginidae neganai Satana be guba amo do idia negea diho. Iobu karoa 1, 2 ena sivarai ese ia hahedinaraia Eden lalonai ia gwau-edeede neganai unai bamona idia kara henia lasi. Ioane ese Apokalupo bukana ia torea lagani 96 C.E. lalonai, bona Apokalupo 1:1 ese ia hahedinaraia ia ese unai nega murinai do idia vara gaudia ia torea unai.)
Dirava ena Basileia do ia ginidae lasi ela bona tanobada taudia iboudiai do idia helalo-kerehai, a?
Sal. 110:1, 2: “Iehova ese egu lohia e hamaoroamu, e tomu ‘Lau idibagu kahana ai ba helai, ela bona oi inaimu na aemu ihadaidia ḡaudia ai baina halaodia’. Iehova ese ena siahu dagina auna na Siona amo vada e siaia, oi inaimu bogaragidiai ba lohia.” (Anina be, do ia lohia matamaia neganai, ena inai taudia, iena lohia siahuna do idia abia dae lasi taudia, be do idia noho; unai murinai ia ese do ia hadareredia.)
Mat. 25:31-46: “Taunimanima ena Natuna [Iesu Keriso] be mai ena hairai danu do ia mai, mai ena aneru helagadia danu, ena terona namo herea momokani latanai do ia helai. Vadaeni bese ibounai iena vairana dekenai do ia haboua. Vadaeni ia ese idia do ia hapararaia, mamoe naria tauna ese mamoe bona nanigosi ia hapararaia bamona. . . . Idia [iena tadikaka, Dirava ese ia horodia taudia idia bogadia hisi lasi taudia] be davana ia dika hanaihanai gabuna dekenai do idia lao. To kara maoromaoro taudia be mauri hanaihanai gabuna dekenai do idia lao.” (Unai ese ia hahedinaraia, Keriso be ena terona latanai do ia helai neganai, taunimanima haida idia do helalo-kerehai lasi; edia kara amo do idia hahedinaraia idia be kara maoromaoro taudia lasi.)
Baibel ese Basileia do ia lohia matamaia laganina ia gwauraia hedinarai, a?
Rau 80-2 itaia, inai sinado badana “Dina bona Lagani Edia Namba” henunai, bona rau 83-8 danu inai sinado “Dina Gabedia” henunai.
Bema Ta Ia Gwau—
‘Basileia be lauegu mauri negana lalonai do ia ginidae lasi’
Reana inai bamona oi haere henia diba: ‘To taunimanima haida idia do mauri noho lalonai do ia ginidae, ani? . . . Unai idia diba guna be mai dalana, a? Iesu ena aposetolo idia ura unai do idia diba, unai dainai idia nanadailaia, bona iena haere be mai anina bada ita dekenai, hari inai nega lalonai. (Mat. 24:3-14; Luka 21:29-32)’
Eiava inai bamona oi hereva diba: ‘Taunimanima momo herea be unai bamona idia laloa. To Baibel ena hereva dainai Iehova ena Witness taudia idia laloa Dirava ena Basileia be guba lalonai ia lohia noho, bona namona be ita hahedinaraia ita ura Dirava ena kara maoromaoro gavamanina henunai tanobada do ita noholaia, eiava lasi. Unai dainai hari dina oiemu ruma dekenai lau mai inai. Mani inai hereva Mataio 25:31-33 dekenai oi itaia.’