Dina Gabedia
Anina: Bese ta ena noho dalana o tanobada taudia iboudiai edia noho dalana hadokoa totona Dirava ese taunimanima hutuma ia hamasedia gwauraia negana be Baibel ese ia gwauraia ‘dina gabedia.’ Iuda besena mai ena tomadiho Ierusalem ena dubu dekenai idia karaia, ena dina gabedia be lagani 70 C.E. vairanai idia matamaia bena unai lagani lalonai idia ore. Unai nega lalonai idia vara gaudia be toa ai idia lao, Dirava ese ena hahemaoro herevana hegeregerena bese iboudiai edia davana do ia henidia gwauraia negana lalonai do idia vara gaudia idia laulaulaia. Hari inai tanobada oromana dikana, tanobada hegegemadai ia noho, ena dina gabedia be lagani 1914 lalonai idia matamaia, bona “hisihisi badana” lalonai do idia ore vaitani neganai, unai lagani lalonai idia mauri noho taudia haida ese ena dokona do idia itaia.
Dahaka ese ia hahedinaraia hari inai negai ita be ‘dina gabedia’ lalodiai ita noho?
Hari inai nega lalonai idia vara gaudia be Baibel ese ia gwauraia vadaeni. Ia gwauraia “toana” ia vara guguru, anina be gau idauidau momo idia vara. Unai toa ia vara momokani dalana tamona be, unai gau idauidau iboudiai be uru ta ena nega lalonai idia hedinarai goevagoeva. Unai gau idauidau, toa bamona idia vara, be inai siri lalodiai idia torea: Mataio karoa 24, 25, Mareko 13, Luka 21, 2 Timoteo 3:1-5, 2 Petero 3:3, 4, bona Apokalupo 6:1-8. Mani unai gau badadia haida ita tahua.
“Bese ta ese do ia toreisi, bese ta do ia tuari henia. Bona basileia ta ese do ia toreisi, basileia ta do ia tuari henia” (Mat. 24:7)
Idaunega amo ema bona hari, tuari ese taunimanima edia mauri idia hadikaia tanobada dekenai. Bese idauidau idia tuari heheni, bona bese ta ta lalodiai bese taudia idia tuari heheni danu. To lagani 1914 lalonai tanobada ibounai tuarina ginigunana ia vara. Unai be tuari oreadia rua gabu tamona dekenai idia tuarilaia tuarina ta lasi. Bese badadia mai goadadia iboudiai nega tamona idia tuari negana ginigunana be unai. Unai bese edia gavamani edia oda herevadia hegeregeredia unai bese taudia iboudiai ese unai tuari idia durua. Ripoti ta ia gwau unai tuari ena dokona negana lalonai tanobada taudia 100 100 amo 93 93 ese idia durua. (Lagani 1914 ena anina bada be rau 88 bona 89 dekenai ai torea.)
Apokalupo 6:4 dekenai ia perovetalaia hegeregerena, ‘tanobada dekena amo maino ia kokia.’ Lagani 1914 amo ema bona hari, tanobada be heiriheiri amo ia honu. Lagani 1939 amo ela bona lagani 1945 Tanobada Ibounai Tuarina Iharuana idia tuarilaia. Gene La Rocque, guna ia be tuari sisimadia oreana gunalaia tauna ta, be ia gwau, lagani 1945 amo ela bona lagani 1982, ma tuari 270 idia vara. Hanaia lagani 90 lalodiai taunimanima 100 milion mai kahana be tuari lalodiai idia aladia mase. Danu, buka ta ladana World Military and Social Expenditures, lagani 1982 gauna, ese ia hahedinaraia hegeregerena, unai lagani lalonai taunimanima 100 milion be tuari karadia o tuari hegaegaelaia karadia idia karaia noho.
Unai peroveta herevana ia guguru momokani, ani? Niuklia tuari gaudia, bomu bona roketi, tausen momo idia atoa hegaegae vadaeni, do idia tuarilaia haraga diba totona. Saiens taudia badadia haida idia gwau, bema bese idauidau ese edia niuklia tuari gaudia haida sibodia idia tuarilaia neganai, reana tanobada taudia iboudiai do idia hamasedia ore. To Baibel ese ia perovetalaia gauna be idau, unai hegeregerena lasi.
“Gabu idauidau dekenai hitolo bada do ia vara” (Mat. 24:7)
Idaunega amo hitolo bada be nega momo ia vara vadaeni. Hari inai negai danu ia vara eiava? Tanobada ibounai tuarina ia vara dainai taunimanima momo be hitolo dainai idia mase Europe bona Asia dekenai. Africa ena gabu haida dekenai medu be nega daudau ia diho lasi dainai taunimanima momo idia hitolo mase. Lagani 1980 lalonai, orea ta ladana Food and Agriculture Organization be idia gwau taunimanima 450 milion idia hitolo mase, bona taunimanima bilion ta bamona edia aniani be hegeregere lasi. Lagani ta ta iboudiai idia 40 milion o 50 milion be hitolo dainai idia mase.
Hari hitolo negadia be idia idau a? Apokalupo 6:6 ia gwau taunimanima edia aniani korikori, bali bona uiti sisina edia davana be dina ta ena gaukara davana, bona ia sisiba henidia namona be idia naria namonamo dehoro bona uaina do idia haorea haraga garina. Unai negai Middle East dekenai idia noho taudia idia laloa bema unai gau iboudiai idia abia lasi idia dika momokani. Unai ese ia hahedinaraia hitolo bada negana do ia mai. Guna unai dika be gabu ta ta sibodia dekenai ia vara, to hari ia be tanobada hegegemadai ia vara. Lagani 1981 lalonai niuspepa ta ladana The New York Times ia gwau: “Tanobada hegegemadai taunimanima edia noho dalana idia hanamoa bena idia ese aniani momo idia tahua; unai ese aniani ena davana ia habadaia dainai, ogogami herea besedia ese edia aniani idau besedia amo idia hoia be auka.” Tano momo dekenai, ena be saiens taudia edia diba matamata amo heduru idia abia, to idia havaraia anianina be hegeregere lasi, badina be unai tano taudia idia momo daekau haraga dainai. Aniani havaraia daladia idia diba momo taudia ese unai kerere hamaoromaoroa dalana idia laloa davari diba lasi.
“Gabu ibounai dekenai tano do idia mareremarere” (Luka 21:11)
Lagani 1914 amo ema bona hari, tano be nega momo idia mareremarere eiava? Mani inai oi laloa: Lagani 1984 lalonai, hereva haida be Boulder, Colorado dekenai ia noho oreana ta ladana National Geophysical Data Center amo idia abia bona buka haida edia hereva idia tahua murinai, tano-laga badadia edia lisi idia torea. Inai bamona gaudia sibodia idia torea: edia bada be 7.5 eiava unai ataiai Richter sikele dekenai, eiava idia hadikaia gaudia edia davana be kina 5 milion o unai ataiai, eiava idia hamasedia taudia edia momo be 100 o unai ataiai. Idia davaria unai bamona tano-lagadia 856 be lagani 2,000 lalodiai idia vara ela bona lagani 1914, bona lagani 1914 murinai, lagani 69 mo sibodia lalodiai 605 idia vara. Anina be, lagani 1914 murinai lagani ta ena averes be nega 20 ia bada ia lao.
“Gabu ibounai dekenai . . . ta ta dekenai do ia hanaia gorerena do idia vara” (Luka 21:11)
Tanobada ibounai tuarina ginigunana ena dokonai gorere ta ladana Spanish flu be tanobada hegegemadai ia hanai bona taunimanima 20 milion mai kahana ia hamasedia haraga herea, gorere gunadia iboudiai ia hanaia. Ma danu, ena be doketa taudia ese edia diba idia habadaia noho, to lagani iboudiai taunimanima momo be gorere idauidau dainai idia mase. Unai gorere be inai: kensa, kudou gorerena, matabodaga karadia amo idia vara goreredia idauidau momo, maltipel sekelerousis, maleria, sinavai matakepulu gorerena, bona Chagas gorerena.
“Kara dikadia danu do idia vara gabu idauidau dekenai, vadaeni taunimanima momo edia lalokau be do ia keru” (Mat. 24:11, 12)
Taravatu utua karadia edia badina ia tahua namonamo tauna badana ta be ia gwau: “Taravatu utua karadia tanobada hegegemadai idia vara edia sivarai oi tahua namonamo neganai, ia hedinarai goevagoeva gauna ginigunana be inai: Gabu iboudiai dekenai unai kara idia bada idia lao hanaihanai. Gabu ta ta sibodia be idau, bona unai kara be gabu iboudiai dekenai ia hanai dainai, reana nega sisina murinai unai gabu danu do idia hadikaia.” (The Growth of Crime, New York, 1977, Sir Leon Radzinowicz and Joan King, pp. 4, 5) Unai kara be momokani idia bada daekau. Unai sivarai dikana be unai kara ripotilaia namonamo karana sibona amo ia vara lasi. Momokani, nega gunadia ai danu taravatu utua taudia idia noho, to hari inai negai taravatu utua karadia be gabu iboudiai dekenai idia karaia, nega gunadia idia hanaia momokani. Taunimanima burukadia be unai idia diba vadaeni, idia sibodia dekenai idia vara gaudia dainai.
Unai kara dikadia, Iesu ese ia perovetalaia karadia, be idia karaia badina be Dirava ena taravatu idia laloa lasi dainai; sibodia idia laloa bada bona Dirava idia laloa maragi. Unai lalohadai dainai, momo ese edia headava idia hadokoa, matabodaga karadia idia karaia, bona lagani ta ta iboudiai natu milion momo be sinadia edia bogadia lalodiai idia hamasedia. Mataio 24:11, 12 ese ia hahedinaraia unai kara momo idia vara badina be peroveta koikoi taudia ese taunimanima momo idia hakaudia kerere dainai; unai peroveta taudia ese Dirava ena Hereva idia dadaraia, sibodia edia hereva abia isi totona. Taunimanima ese edia hahediba herevadia idia badinaia bona Baibel idia badinaia lasi; unai dainai tanobada lalonai lalokau be lasi. (1 Ioane 4:8) Timoteo Iharuana 3:1-5 ese unai dika ia gwauraia.
“Taunimanima edia kudouna dekenai do idia gari momokani, edia laloa danu do idia doko, unai idia vara gaudia dainai” (Luka 21:25, 26)
“Gari ese iseda mauri ia biagua momokani, mamina idaudia iboudiai ia hanaia.” Unai hereva be U.S. News & World Report lalonai idia torea. (October 11, 1965, p. 144) Germany ena magasin ta ladana Hörzu ia gwau: “Hari inai negai taunimanima idia gari bada herea; nega gunadia be inai bamona lasi.”—No. 25, June 20, 1980, p. 22.
Tanobada hegegemadai taunimanima idia gari ena badina haida be inai: raskol taudia ese dagedage karadia idia karaia; taunimanima momo ese moni gaukara idia davaria diba lasi; bisinesi oreadia momo idia gini auka lasi badina be bese momo edia abitorehai be bada herea bona idia be dala lasi davana do idia henia; tanobada ibounai lalonai, tano, hodahoda, sinavai bona davara idia hadikaia; taunimanima ese edia varavara idia lalokau henidia bada lasi; bona taunimanima momo idia gari, tanobada taudia iboudiai be niuklia tuarina ta lalonai do idia mase ore garina. Luka 21:25 ia gwau “dina, hua, hisiu dekenai toa do idia vara” dainai tanobada besedia do idia lalohisihisi bada. Dina momo, dina ia daekau neganai, taunimanima be unai dina lalonai do idia vara diba gaudia garidia idia gari; hua bona hisiu edia diari ia hedinarai neganai, taunimanima ese edia iduara idia lokaia bona edia ruma idia rakatania lasi, raskol taudia garidia idia gari dainai. Hari inai nega lalonai peleini bona roketi idia gaukaralaia, hamasea bona hadikaia siahuna be guba amo idia siaia diho totona. Sabmarini mai edia roketi be davara ena kopina henunai idia heau loaloa hehuni; unai sabmarini tamona ena roketi edia siahu be hegeregere siti 160 do idia hadikaia ore. Momokani, tanobada besedia idia lalohisihisi bada be mai badina korikori!
‘Keriso idia badinaia momokani taudia be iena ladana dainai bese iboudiai ese do idia badu henidia’ (Mat. 24:9)
Idia badu henidia bona idia dagedage henidia, politikol karadia lalodiai idia vareai dainai lasi, to ‘Iesu Keriso ena ladana dainai.’ Anina be, idia dagedage henidia badina be Iesu Keriso idia abia dae Iehova ena Mesia Pavapavana, ia idia kamonai henia guna, tanobada ena lohia iboudiai be gabeai, badina be iena Basileia idia badinaia bona taunimanima edia kara lalodiai idia vareai lasi dainai. Iehova ena Witness taudia sivaraidia momo ese idia hahedinaraia, unai bamona idia kara henidia tanobada ena kahana iboudiai dekenai.
“Basileia ena Sivarai Namona be tanobada ibounai dekenai do idia harorolaia” (Mat. 24:14)
Unai sivarai, Iesu ia gwau do idia harorolaia, be inai: Dirava ena Basileia Iesu Keriso ena imana ai be guba lalonai ia lohia matamaia vadaeni, bona nega sisina murinai unai Basileia ese tanobada ena oromana dikana ibounai do ia haorea, bena taunimanima do ia hanamodia lou ela bona do idia goevadae, bona tanobada be paradaiso ai do ia halaoa. Unai sivarai namona be tano 200 mai kahana lalodiai idia harorolaia noho, ela bona tanobada ena kahana iboudiai. Lagani ta ta iboudiai Iehova ena Witness taudia ese hora milion momo unai gaukara dekenai idia haorea; taunimanima edia ruma idia lao henidia loulou, idia iboudiai be unai sivarai do idia kamonai diba totona.
Inai ‘dina gabedia’ lalodiai idia vara gaudia iboudiai ese dahaka idia hahedinaraia?
Luka 21:31, 32, BH: “Ini ḡau bae vara ba itadia, vada ba diba Dirava ena basileia vada eme kahira-kahira [Dirava ena basileia ese tanobada ena oromana dikana do ia haorea bona tanobada do ia lohiaia negana unai]. Na hamaoromui momokanimu, ina uru do basine ore, ini ḡau iboudiai do bae vara vaitani.” (Toa be lagani 1914 lalonai ia hedinarai matamaia idia itaia taudia be idia buruka vadaeni, bona edia “uru” ia ore gwauraia. Unai dainai dokona be ia kahirakahira momokani. Tanobada dekenai idia vara gaudia ese unai idia hamomokania.)
Dahaka dainai Iehova ena Witness taudia idia gwau “dina gabedia” be lagani 1914 lalonai idia matamaia?
Lagani 1914 be Baibel ena peroveta herevana ta ese ia gwauraia hidi. Unai hereva oi dibaia totona rau 80-2 oi itaia, inai sinado badana “Dina bona Lagani Edia Namba” henunai. Baibel ese gau momo ia perovetalaia, ia gwau dina gabedia lalodiai do idia vara; unai gau be unai hereva hegeregerena idia vara momokani, lagani 1914 amo ema bona hari. Unai ese ia hahedinaraia unai lagani idia gwauraia be maoro. Ataiai ai torea herevadia ese unai idia hamomokania.
Tanobada ena sivarai torea taudia ese lagani 1914 edena bamona idia laloa?
“Hari inai negai ita ese gunaguna idia vara gaudia ita laloa lou neganai, ita diba goevagoeva Tanobada Ibounai Tuarina Ginigunana idia hamatamaia neganai unai ese nega dikana ia hamatamaia; Britain ena toretore tauna Arnold Toynbee ese ‘Hekwakwanai Momo Negana’ ia gwauraia be maoro. Tanobada besedia be unai hekwakwanai idia hekwarahilaia noho. Hanaia laganidia 50 lalodiai idia vara hekwakwanaidia iboudiai edia badina tamona be lagani 1914 lalonai ia vara gauna.”—The Fall of the Dynasties: The Collapse of the Old Order (New York, 1963), Edmond Taylor, p. 16.
“Tanobada Ibounai Tuarina Iharuana ena uru taudia, lauegu uru taudia unai, be nega iboudiai do idia laloa edia tuari ese tanobada ena oromana ia haidaua vaitani. . . . To namona be inai ita diba: Tanobada Ibounai Tuarina Ginigunana ese taunimanima edia noho daladia ia haidaua bada, Tanobada Ibounai Tuarina Iharuana ese ia haidaua maragi. Politikol daladia bona taunimanima edia noho hebou daladia, nega daudau herea lalonai idia haginia vadaeni gaudia, be tuari ginigunana negana lalonai idia ore—idia haida be pura haida lalodiai idia ore. Bona dala ma haida be unai tuari ese ia haidaua ela bona hanaihanai. Taunimanima ese guna idia daradaralaia lasi gaudia be Tanobada Ibounai Tuarina Ginigunana lalonai idia daradaralaia matamaia.”—The Age of Uncertainty (Boston, 1977), John K. Galbraith, p. 133.
“Lagani 50 idia ore vadaeni, to Tuari Bada Hereana [Tanobada Ibounai Tuarina Ginigunana, lagani 1914 lalonai idia hamatamaia gauna] ena hisihisi be tanobada besedia dekenai ia do ore lasi . . . Unai hisihisi be bada herea dainai, gau ta ia noho lasi guna ia noho bamona. Bese taudia edia noho hebou daladia iboudiai: gavamani daladia, bese idauidau edia tano hetoadia, taravatu, tuari oreadia, bese idauidau idia kara heheni daladia, edia lalohadai badadia, ruma bese maurina, mauri daladia, dagi, varavara idia kara heheni daladia—unai gau iboudiai be ia ese ia haidaua vaitani. . . . Unai neganai tanobada taudia be dala maorona amo idia raka siri, bona idia davaria lou lasi ema bona hari.”—Inai hereva be Jeneral Charles de Gaulle ese ia gwauraia, lagani 1968 lalonai (Le Monde, Nov. 12, 1968, p. 9).
Inai tanobada negana ena dokona murinai, taunimanima haida be tanobada ai do idia mauri noho, a?
Oibe. Inai tanobada negana ena dokona do ia ginidae, tanobada besedia be niuklia tuarina ta lalonai do idia ala-ala heheni badabada dainai lasi, to hisihisi badana ta lalonai do ia ginidae; unai hisihisi lalonai “Siahu Ibounai Diravana ena Dina Badana” tuarina do ia vara. (Apok. 16:14, 16) Unai tuari ese tanobada do ia hadikaia ore lasi bona tanobada taudia iboudiai do ia hadikadia ore lasi.
Mat. 24:21, 22: “Unai dinadia lalonai hisihisi bada herea do idia vara, Dirava ese tanobada ia karaia nega dekena amo hisihisi unai bamona idia vara lasi ia mai bona harihari, gabeai danu unai bamona ta do ia vara lou lasi. Bema Dirava ese unai nega do ia hakwadogia lasi, taunimanima ta be do ia mauri diba lasi. To ia abia hidi taudia dekenai ia laloa dainai unai nega do ia hakwadogia.” (Anina be taunimanima haida do idia roho mauri.)
Her. 2:21, 22: “Kara maoromaoro taudia na tano bae noholaia, bona lalo-maoromaoro taudia na ia lalonai bae noho; a kara dika taudia na tano amo bae henege daure, bona kara heḡui-heḡui taudia na tano amo bae heraḡa oho.”
Sal. 37:29, 34: “Kara maoromaoro taudia ese tano bae abia, bae noholaia hanaihanai. Iehova ba naria, iena dala ai ba raka, bena baine abimu dae, tano na bavabia oiemu; kara dika taudia ihabua-taridia danu ba itaia.”
Dahaka dainai Dirava ia naria daudau ema bona hari ela bona kara dika taudia do ia haoredia?
2 Pet. 3:9: “Lohiabada ia gwauhamata vadaeni, kara haida do ia karaia. Ia ese iena gwauhamata badinaia totona ia hesiku lasi, haida idia laloa bamona. Lasi, to umui totona ia haheauka noho. Badina be ia ura lasi tau ta ia mase. Ia ura taunimanima ibounai ese dika dekena amo edia lalona do idia giroa.”
Mar. 13:10: “To Sivarai Namo bese ibounai dekenai be do idia haroro henia guna.”
Mat. 25:31, 32, 46: “Taunimanima ena Natuna [Iesu Keriso] be mai ena hairai danu do ia mai, mai ena aneru helagadia danu, ena terona namo herea momokani latanai do ia helai. Vadaeni bese ibounai iena vairana dekenai do ia haboua. Vadaeni ia ese idia do ia hapararaia, mamoe naria tauna ese mamoe bona nanigosi ia hapararaia bamona. . . . Idia be davana ia dika hanaihanai gabuna dekenai do idia lao [badina be idia abia dae lasi Keriso ena tadikaka be iena ladanai idia hereva]. To kara maoromaoro taudia be mauri hanaihanai gabuna dekenai do idia lao.”
Rau 158-61 bona 354-6 itaia danu.
Bema Ta Ia Gwau—
‘Hari inai nega ena dika ese nega gunadia edia dika ia hanaia lasi; nega iboudiai tuari bona hitolo idia vara, tano ia mareremarere, bona taravatu idia utua’
Reana inai bamona oi haere henia diba: ‘Oiemu lalohadai ena badina lau diba. Ita vara negana amo ema bona hari unai gau idia vara loulou. To tanobada ena sivarai torea taudia idia gwau hari inai nega be idau herea, nega gunadia hegeregeredia lasi. (Idia haida edia hereva rau 88 bona 89 dekenai oi duahia hedinarai.)’
Eiava inai bamona oi hereva diba: ‘Tuari, hitolo, tano-laga, bona kara dika idia vara—unai sibona be toa lasi. Inai oi diba a, Iesu ese ia gwauraia toana ia hedinarai, anina be gau idauidau be nega tamona idia vara?’ Bena reana ma oi gwau: ‘Ia gwau lasi bema unai gau tamona do ia vara unai ese do ia hahedinaraia ita be “dina gabedia” lalodiai ita noho. To unai toa ibounai be Baibel ese ia gwauraia hidi laganina lalonai ia matamaia bena tanobada hegegemadai ia hedinarai be mai anina bada.’ (Rau 83-8 bona rau 80-2 itaia danu.)
‘Reana uru gabena ta ena nega lalonai do idia vara gaudia ese unai peroveta herevana do idia hamomokania vaitani, hari inai nega lalonai idia vara gaudia do idia hanaidia, ani?’
Reana inai bamona oi haere henia diba: ‘Unai be henanadai namona, bona ena haere ese ia hahedinaraia ita be momokani “dina gabedia” lalodiai ita noho hari. Iesu ese ia gwauraia toana ena kahana ta be tuari, ia gwau bese idauidau bona basileia idauidau do idia tuari heheni. To bema unai toa do ia vara guguru lasi ela bona bese badadia mai goadadia do idia tuari heheni lou mai edia goada ibounai ida, dahaka do ia vara? Taunimanima momo lasi be unai bamona tuarina amo do idia roho mauri, eiava iboudiai be ia lalonai do idia mase reana. To Dirava ena palani be taunimanima be inai nega ena dokona amo do idia roho mauri—unai ese ia hahedinaraia ena dokona be ia kahirakahira momokani.’
Eiava inai bamona oi hereva diba: ‘Tanobada dekenai idia vara gaudia inai peroveta herevana ida hahegeregerea karana be raskol ta ena imana kwakikwakina ena toana laulauna hahegeregerea karana bamona. Ma taunimanima ta ena imana kwakikwakina ena toana be iena hegeregerena lasi. Unai hegeregerena, nega gabena ta be hari inai nega ida do ia hegeregere diba lasi, badina be lagani 1914 lalonai idia vara matamaia gaudia edia oromana be nega gabena ta lalonai do ia hedinarai lou lasi.’ Bena reana ma oi gwau: (1) ‘Toa ena kahana iboudiai idia hedinarai goevagoeva.’ (2) ‘Momokani ita ura lasi ita be Noa ena negai idia noho taudia hegeregeredia ita karaia. (Mat. 24:37-39)’
‘Dokona be iseda mauri negana lalonai do ia ginidae lasi’
Reana inai bamona oi haere henia diba: ‘To oi laloa nega do ia mai Dirava ese taunimanima edia kara dika do ia hadokoa, ani?’ Bena reana ma oi gwau: (1) ‘Ita ese unai nega ita diba dalana tamona be inai: Ia ese ita ia hadibalaia. Iesu ia gwau unai dina bona unai hora be ta ia diba lasi, to ia ese gau idauidau ia gwauraia hedinarai, ia gwau unai gau do idia vara matamaia negana lalonai do idia mauri noho taudia edia uru do ia ore lasi ela bona dokona do ia ginidae.’ (2) ‘Ia gwauraia gaudia edia mamina be oi ese oi abia vadaeni. (Bema mai dalana, inai rau idia gunalaia raudia dekenai ai torea herevadia amo toa ena kahana haida oi gwauraia hedinarai.)’
‘Unai gau lau lalo-hekwarahilaidia lasi; kerukeru do idia vara gaudia be lau laloa momo lasi’
Reana inai bamona oi haere henia diba: ‘Momokani ita be nega vaira ita laloa momo lasi be namo. To ita ibounai ese iseda mauri daladia ita hegaegaelaia, ita sibona ita naria totona bona iseda lalokau taudia naridia totona. Do idia vara momokani gaudia totona ita hegaegae be maoro. Baibel ese ia hahedinaraia gau namo hereadia do idia vara, bona unai gau do ita abia dalana ita lalohadailaia guna be aonega dalana. (Her. 1:33; 2 Pet. 3:13)’
‘Unai gau dikadia lau laloa momo lasi; lau laloa nega vairai gau namodia do idia vara’
Reana inai bamona oi haere henia diba: ‘Momokani, Iesu ia gwau iseda nega lalonai iena orea taudia be idia vara gwauraia gaudia dainai do idia moale diba. (Luka 21:28, 31)’ Bena reana ma oi gwau: ‘To mani inai oi laloa, ia hamaorodia lasi tanobada dekenai do idia vara noho gaudia do idia laloa lasi dainai do idia moale. Lasi, ia gwau edia lalona do idia goada badina be tanobada dekenai do idia vara gaudia edia anina do idia lalo-pararalaia, bona unai gau do idia doko dalana do idia diba danu.’