Hadibaia Hereva

◼ March 1-12: Gaukara badana do ita karaia Gima Noho! buklet hariharilaia totona. March 13-31: Diba ese Mauri Dekenai Ita Ia Hakaua Lao. Do ita hekwarahi Baibel stadi ita hamatamaia totona. April bona May: Gima Kohorona bona Awake! magasin do ita hariharilaia. Dirava Tomadiho Henia bukana do ita gaukaralaia Baibel stadi ta ita hamatamaia totona, bema idia haida be guna Diba bukana bona Dahaka Ita Karaia? buklet idia stadilaia vadaeni. June: Hadibaia Tauna Badana amo Diba Ita Abia. Bema ruma taudia idia gwau idia be natudia lasi, vadaeni Dahaka Ita Karaia? buklet hariharilaia. Do ita hekwarahi Baibel stadi ita hamatamaia totona.

◼ Kongrigeisen edia seketere ese Regula Painia Gaukara Aplikeisen (S-205-MO) bona Heduru Painia Gaukara Aplikeisen (S-205b-MO) sisina momo idia dogoatao be namo. Literature Request Form (S-14-E) amo unai umui oda diba. Namona be lagani tamona totona idia hegeregere.

◼ Memorial be Thursday, March 24, 2005 ai do ita karaia. Bema emu kongrigeisen ese Thursday ai hebou idia karaia, namona be wiki ena dina ma ta ai umui karaia, bema Kingdom Hall be ta ese ia gaukaralaia lasi. Bema unai ia hegeregere lasi bona emui Hesiai Hebou umui karaia diba lasi, emui kongrigeisen ese idia badinaia diba kahadia be Hesiai Hebou ma ta ida umui karaia hebou diba.

◼ Lagani 2005 ena Memorial negana ena spesel pablik tok ena ladana be “Dahaka Dainai Iesu be Hisihisi Ia Abia Bona Ia Mase?”

Kahana 7—Baibel Stadi Namodia Karaia

Stadi Dekenai Guriguri Gwauraia

¹ Baibel stiuden be lauma dalanai ia goada ia lao totona, Iehova ena heduru ia abia be namo. (1 Kor. 3:6) Unai dainai, guriguri amo stadi ita kehoa bona koua be maoro. Nega momo tomadiho laloa bada taudia edia stadi ginigunana dekenai unai ita karaia diba. Ma stiuden haida dekenai, guriguri ita hamatamaia ena nega maorona ita diba be namo. Reana Salamo 25:​4, 5 bona 1 Ioane 5:14 amo stiuden tauna ita durua guriguri ita gwauraia ena badina ia lalopararalaia totona; bona danu, Ioane 15:16 amo Iesu Keriso amo Iehova ita guriguri henia ena badina badana ita herevalaia totona.

² Baibel stadi ta ai daika ia guriguri be namo? Bema bapatiso tadikaka ta be taihu ta ia bamoa stadi ta itaia totona, tadikaka ia guriguri be namo, herevana taihu ese stadi ia hakaua bona ena kwarana ia koua. (1 Kor. 11:​5, 10) To, bema Basileia ia harorolaia bapatiso lasi pablisa tauna ta be taihu ta ia bamoa stadi ta itaia totona, namona be taihu ia guriguri. Bema unai ia vara, taihu ese stadi ia hakaua bona guriguri ia gwauraia neganai, ena kwarana ia koua be namo.

³ Guriguri Lalonai Oi Gwauraia Gaudia: Baibel stadi lalonai guriguri idia lata lasi, to stiuden tauna ia abia be namo gaudia ita gwauraia be namo. Stadi lalonai Dirava ena heduru ita noia bona ita dibaia hereva momokani dainai Dirava ita tanikiu henia sibona lasi, to Iehova be hadibaia herevadia ena Badina dainai ita hanamoa be namo. (Isa. 54:13) Danu, iseda guriguri herevadia amo ita hahedinaraia ita be stiuden tauna ita laloa bada bona Iehova ese ena orea ia gaukaralaia dainai ita tanikiu. (1 Tes. 1:​2, 3; 2:​7, 8) Iehova ita noia stiuden do ia durua ia dibaia gaudia ia badinaia neganai, unai ese stiuden do ia durua “Dirava ena hereva . . . badinaia” karana ena namo ia itaia totona.​—Iam. 1:22.

⁴ Guriguri karana ena namo be momo. Unai ese Dirava ena hahenamo ia mailaia. (Luka 11:13) Ia hahedinaraia Dirava ena Hereva stadilaia karana be mai anina bada. Stiuden tauna ese eda guriguri ia kamonai neganai, ia be guriguri gwauraia dalana ia dibaia. (Luka 6:40) Danu, bema iseda kudouna be Dirava lalokau henia bona ena kara hereadia laloa bada karana amo ia honu bona ita guriguri, unai ese stiuden tauna do ia durua Iehova ia tura henia totona.