Dirava Hegeregerena, Mauri Oi Laloa Bada, A?

1, 2. Dirava ese dahaka harihari gauna ia henia bona hari dahaka dainai unai be mai anina bada?

ISEDA guba Tamana ese taunimanima dekenai harihari gauna hereadaena ta ia henia. Dirava ese ita dekenai mauri ia henia bona aonega danu, unai amo Iena kara ita tohotohoa diba. (Genese 1:27) Unai harihari gauna namo hereana dainai, ita be Baibel ena hakaua herevadia edia namo ita totona ita lalopararalaia diba. Unai hakaua herevadia ita badinaia neganai, ita be Iehova lalokau henia lo Keristani taudia ai do ita lao bona “maoro bona kerere edia idau” do ita diba.—Heberu 5:14.

² Hari inai negai, Baibel ena hakaua herevadia ita lalopararalaia be mai anina bada, badina tanobada be ia idau ia lao dainai iseda mauri lalonai idia vara gaudia idauidau ta ta dekenai taravatu ita atoa be hegeregere lasi. Hegeregere, medikol dalanai rara be dala idauidau ai idia gaukaralaia bona muramura haida idia karaia danu. Iehova idia badinaia taudia ibounai be rara idia gaukaralaia lasi dainai, unai idia laloa momo. To, bema Baibel ena hakaua herevadia edia namo ita lalopararalaia, abia hidi maorodia ita karaia diba, unai amo iseda lalomamina do ia goeva bona Dirava ena lalokau lalonai do ita noho. (Aonega Herevadia 2:6-11) Unai hakaua herevadia haida mani ita itaia.

MAURI BONA RARA BE HELAGA

3, 4. Edena nega ginigunana ai Baibel ese ia hahedinaraia rara be helaga, bona edena hahegani ese unai ia hamomokania?

³ Kaino be Abela ia alaia mase murinai, Iehova ia hahedinaraia mauri bona rara be helaga, badina rara be mauri ena badina. Dirava ese Kaino ia hamaoroa: “Oiemu tadina ena rarana be tano dekena amo ia boiboi noho lau dekenai, iena mase davana do lau karaia totona.” (Genese 4:10) Iehova ena matanai Abela ena rara ese ena mauri ia laulaulaia, bona dagedage tauna Kaino ese unai mauri ia utua. Unai dainai, Baibel ia gwau Abela ena rara be Dirava dekenai ia boiboi ena mase davana ia karaia totona.—Heberu 12:24.

⁴ Abata Badana murinai, Dirava ese taunimanima dekenai gwaumaoro ia henia animal ena hidio idia ania totona, to ena rara do idia ania lasi. Dirava ia gwau: “Vamu mai rarana danu be mai taravatu, badina be rara be mauri ena badina. Bema tau ta ese emui mauri rarana ia habubua, lau be davana do lau henia, do ia mase.” (Genese 9:4, 5) Unai hahegani be mai anina bada Noa ena natudia dekenai bona ita dekenai danu. Bona unai hahegani ese Dirava be Kaino dekenai ia gwauraia herevana ia hamomokania: (1) Taunimanima o animal edia mauri be rara lalonai ia noho. Danu, unai hahegani ese ia hahedinaraia (2) Iehova, mauri ena Badina be mauri bona rara idia matauraia lasi taudia do ia hahemaoro henidia.—Salamo 36:9.

5, 6. Edena dala ai Mose ena Taravatu ese ia hahedinaraia rara be helaga bona dava bada gauna? (Rau 90 ai ia noho maua itaia.)

⁵ Unai mai anina bada hereva rua be Mose ena Taravatu lalonai idia noho danu. Levitiko 17:10, 11 ia gwau: “Bema Israela tauna ta . . . ese vamu mai ena rara danu do ia ania, lau ese unai tau do lau badu henia, ia be iena bese dekena amo do lau atoa siri. Badina be mauri gaudia ibounai edia mauri be rara dainai. Unai dainai lau Lohiabada ese lau oda henia vadaeni rara ibounai be boubou patana dekenai do idia bubua, taunimanima edia kara dika davana do ia karaia totona. Rara be mauri, bona rara ese kara dika ia kokia noho.”a—Rau 88 ai maua ladana “Rara—Dika Gwauatao Siahuna” itaia.

⁶ Animal ena rara be boubou patana dekenai idia gaukaralaia lasi neganai, tano dekenai do idia bubua. Unai be hegeregere mauri ena biaguna dekenai unai mauri idia henia lou. (Deuteronomi 12:16; Esekiela 18:4) To, namo lasi ita gwau Israela taudia be animal ta idia hamasea neganai, animal ena rara ibounai idia kokia momokani. Lasi, to gau badana be idia ura ania animal be dala maorona ai idia alaia bona ena rara idia bubua. Unai amo Israela tauna ese unai vamu ia ania diba badina Mauri Ia Henia Tauna dekenai hemataurai ia hahedinaraia vadaeni.

7. Edena dala ai Davida ese rara ia matauraia?

⁷ Davida, “[Dirava ena] lalokau tauna,” be Dirava ena hahegani rara dekenai ia lalopararalaia. (Kara 13:22) Nega ta Davida ia ranu mase neganai, iena tuari tatau toi be Pilistia taudia edia kamepa dekenai idia vareai bona ranu guri amo ranu idia abia. Davida be dahaka ia karaia? Ia gwau: “Bema lau inua, unai be unai tau goadadia edia rarana do lau inua bamona, badina be unai ranu abia totona edia mauri idia negea bamona.” Davida ia laloa, bema unai ranu ia inua unai be hegeregere ia ese ena tuari tatau toi edia rara ia inua. Unai dainai ena be ia ranu mase, to Iehova vairanai unai “ranu ia bubua ore.”—2 Samuela 23:15-17.

8, 9. Keristani kongrigeisen ia gini neganai, Dirava be mauri bona rara dekenai iena lalohadai ia haidaua, a? Gwauraia hedinarai.

⁸ Oibe, Iehova ese Noa ia hamaoroa rara do ia ania lasi, bona gabeai lagani 900 murinai Mose ena Taravatu ese unai hereva ia gwauraia lou. Lagani 1,500 murinai Iehova ena lalohadai rara dekenai be ia idau lasi. Iehova ese ena lauma helaga amo Keristani kongrigeisen ena hakaua oreana ia hasiahua bona inai idia torea: “Lauma Helaga bona ai be inai bamona ai laloa. Ai be maduna metau haida ma do ai atoa lasi umui dekenai. To inai taravatu mai badina gaudia, idia sibona do umui naria: Kaivakuku vairana dekenai idia atoa aniani umui ania lasi, rara umui ania lasi, aiona idia gigia gaudia edia hidio umui ania lasi, bona heudahanai karadia umui karaia lasi.”—Kara 15:28, 29.

⁹ Ia hedinarai goevagoeva, hakaua orea ginigunana ia laloparara rara be helaga bona bema idia gaukaralaia kerere, unai be kaivakuku tomadiho henia karana o heudahanai karana bamona. Hari inai negai Keristani taudia korikoridia be unai idia abia dae. Danu, Baibel ena hakaua herevadia idia badinaia bona rara idia matauraia dainai, Iehova ia hamoalea abia hidi idia karaia.

MEDIKOL DALANAI RARA GAUKARALAIA KARANA

10, 11. (a) Iehova ena Witnes taudia ese rara ibounai bona ena kahana badadia abia hanai karana be edena bamona idia laloa? (b) Edena medikol daladia dekenai Keristani tauna ta be sibona ena abia hidi ia karaia diba?

¹⁰ Iehova ena Witnes taudia idia laloparara “rara . . . ania lasi,” anina ma ta be medikol dalanai rara idia abia bona henia hanai lasi, bona sibona edia rara idia kokia, idia haboua, bena gabeai tauanina dekenai idia atoa lou lasi. Dirava ena taravatu idia matauraia dainai, rara ena kahana badadia foa idia dadaraia danu: Sel kakakakadia, sel kurokurodia, pleitelet, bona plasma.

¹¹ Hari inai negai, medikol dalanai rara ena kahana badadia foa be kahana maragimaragi dekenai idia hapararaia bona dala idauidau ai idia gaukaralaia. Keristani tauna be rara ena kahana maragidia do ia abia dae, a? Ena matanai unai be rara korikorina, eiava? Keristani tauna ta be sibona ena abia hidi do ia karaia. Doketa ese idia gaukaralaia gaudia haida hegeregere hemodialysis, hemodilution, bona cell salvage dekenai ia sibona ese abia hidi do ia karaia danu. Unai gaudia idia gaukaralaia neganai, idia haboua rara idia gaukaralaia lasi, to gorere tauna ena rara idia gaukaralaia. Danu, unai gauna dekenai Keristani tauna be sibona ena abia hidi ia karaia diba.—Rau 246-49 ai ia noho Apendiks itaia.

12. Edena dala ai tadikaka ta ia abia hidi gauna ita matauraia be namo?

¹² Sibona iseda abia hidi ita karaia neganai, Iehova ese unai ia laloa bada, a? Oibe, Iehova be iseda lalohadai bona ita ura karaia gaudia ia laloa bada. (Aonega Herevadia 17:3; 21:2; 24:12) Unai dainai, ita guriguri bona medikol gaudia o daladia ita tahua murinai, namona be Baibel amo ita hadibaia lalomamina ena hakaua dalana ita badinaia. (Roma 14:2, 22, 23) Momokani, namo lasi haida ese ita idia doria gau ta ita abia hidi totona, eiava namo lasi idia dekenai ita henanadai, “Bema oi dekenai inai ia vara, dahaka do oi karaia?” Inai bamona gaudia dekenai, namona be Keristani taudia ta ta be sibona “ena metau do idia huaia.”b—Galatia 6:5; Roma 14:12; rau 93 ai maua ladana “Lau Abia Dae Rara be Helaga, A?” itaia.

IEHOVA ENA TARAVATU ESE ENA LALOKAU IA HAHEDINARAIA

13. Iehova ena taravatu bona hakaua herevadia ese dahaka idia hahedinaraia?

¹³ Baibel lalonai idia noho taravatu bona hakaua herevadia ese idia hahedinaraia, Iehova be Taravatu Hadibaia Tauna namona bona Iena natudia edia namo ia laloa bada lalokau Tamana ta. (Salamo 19:7-11) Momokani, ‘rara do ita dadaraia’ ena hahegani be rara abia hanai karana ese ia havaraia gorere idauidau amo ita ia gimaia. (Kara 15:20, NW) Doketa momo idia gwau rara lasi opereisen be medikol heduru dalana hereadaena. Unai dala ese Keristani taudia korikoridia dekenai Iehova ena aonega bada bona lalokau ia hahedinaraia.—Isaia 55:9; Ioane 14:21, 23.

14, 15. (a) Edena taravatu ese Dirava ena lalokau idia hahedinaraia? (b) Edena dala ai unai taravatu ena hakaua herevadia oi badinaia diba?

¹⁴ Dirava be Israela taudia dekenai ia henia taravatu momo ese idia hahedinaraia, Ia be ena taunimanima ia laloa bada. Hegeregere, Israela taudia be guhi dekenai gaukara idauidau idia karaia dainai, Dirava ena taravatu ta ia gwau, ta ia moru lasi totona guhi dekenai magu maragina idia karaia be namo. (Deuteronomi 22:8; 1 Samuela 9:25, 26; Nehemia 8:16; Kara 10:9) Danu Dirava ese taravatu ia atoa dagedage boromakau do idia gimaia namonamo totona. (Esodo 21:28, 29) Bema ta be unai taravatu idauidau ia dadaraia, ia hahedinaraia ia be ma haida edia namo ia laloa bada lasi bona rara dekenai ia kerere diba.

¹⁵ Unai taravatu ena hakaua herevadia be edena bamona oi badinaia diba? Mani emu animal, emu ruma, emu gaukara gabuna, moale karadia, emu motuka bona motuka oi taria dalana oi laloa. Tano haida dekenai, matamata taudia momo be aksiden dainai idia mase, badina nega momo edia mauri idia hadikaia moale karadia o spot gadara idia karaia. To, idia ura Dirava ena lalokau lalonai idia noho matamata taudia be mauri idia laloa bada bona mauri idia hadikaia moale karadia idia tahua lasi. Idia laloparara matamata taudia be dika idia davaria diba, unai dainai dika idia havaraia gaudia idia dadaraia bona edia mauri idia moalelaia.—Hadibaia Tauna 11:9, 10.

16. Edena hakaua herevana be bogana lalonai beibi hamasea karana ia herevalaia? (Futnout itaia danu.)

¹⁶ Dirava ena matanai ia do vara lasi beibi ena mauri be mai anina bada. Idaunegai Israela ai, bema ta ese rogorogo hahine ta ia haberoa, bena unai hahine o ena beibi ia mase, Dirava ese unai tauna do ia gwauraia ala-ala tauna, bona “mauri ena davana” be mauri do ia henia.c (Esodo 21:22, 23, NW ) Mani oi laloa, hahine momo idia ura matabodaga karadia idia karaia noho bona idia ura lasi idia hekwarahi dainai, lagani ta ta ai beibi be bogana lalonai idia hamasea neganai, Iehova ena hemami be edena bamona?

17. Bema hahine ta be bogana lalonai beibi ia hamasea, bena gabeai Dirava ena taravatu ia dibaia, edena dala ai ia oi durua diba?

¹⁷ To, bema hahine ta be ena bogana lalonai beibi ia hamasea, bena gabeai Baibel ena hereva momokani ia diba be edena bamona? Dirava ese ena kara dika do ia gwauatao, a? Oibe, do ia gwauatao! Ia helalo-kerehai momokani hahine be ia diba Dirava ese Iesu ena rara amo ena kerere do ia gwauatao. (Salamo 103:8-14; Efeso 1:7) Unai dainai, Keriso ia gwau: “Kara maoromaoro taudia boiria totona lau mai lasi, to kara dika taudia edia lalona do idia giroa totona lau mai.”—Luka 5:32.

LALOHADAI DIKADIA DADARAIA!

18. Baibel ese ala-ala ena badina be edena bamona ia gwauraia?

¹⁸ Iehova ia ura lasi ma haida ita kara dika henia bona ia ura lasi iseda kudouna dekenai ma haida ita inai henia noho, badina unai bamona lalohadai dainai taunimanima idia ala-ala. Aposetolo Ioane ia gwau: “Iena tadikakana ia badu henia noho tauna be ala-ala tauna.” (1 Ioane 3:15) Unai bamona tauna be ena tadikaka ia inai henia sibona lasi, to ia ura ena tadikaka ia mase be namo! Iena tadikaka ia inai henia dainai, reana do ia ura ena ladana ia hadikaia bona ia samania koikoi ia gwau, ia be kerere ta ia karaia bona Iehova ese ia hahemaoro henia be namo. (Levitiko 19:16; Deuteronomi 19:18-21; Mataio 5:22) Unai dainai, iseda kudouna ai ia noho lalohadai dikana ita kokia be mai anina bada!—Iamesi 1:14, 15; 4:1-3.

19. Baibel ena hakaua herevadia ia badinaia tauna ena lalohadai be dahaka, Salamo 11:5 bona Filipi 4:8, 9 edia hereva dekenai?

¹⁹ Iehova bamona mauri idia laloa bada bona idia ura Dirava ena lalokau lalonai idia noho taudia be dagedage karadia ibounai idia dadaraia. Salamo 11:5 (NW ) ia gwau: “[Iehova ese] dagedage ia ura henia tauna ia inai henia momokani.” Unai siri ese Iehova ena kara ia gwauraia sibona lasi, to ia be iseda mauri lalonai ita badinaia diba hakaua herevana ta ia hahedinaraia danu. Unai ese Dirava idia lalokau henia taudia ia hagoadaia dagedage moale karadia o spot gadara idia dadaraia totona. Unai hegeregerena, inai hereva Iehova be “maino ia henia Diravana” ese ena hesiai taudia ia hagoadaia lalokau bona kara namodia idia hahedinaraia totona, badina unai ese maino ia havaraia.—Filipi 4:8, 9.

TAUNIMANIMA IDIA HAMASEA OREADIA AMO ITA GINI SIRI

20-22. Keristani taudia edia lalohadai be dahaka tanobada dekenai, bona dahaka dainai?

²⁰ Dirava ena matanai, Satani ena tanobada be rara dekenai ia kerere bada. Baibel ia gwau Satani ena politikol oreadia be dagedage animal ta bamona, taunimanima momo bona Iehova ena hesiai taudia danu idia hamasedia. (Daniela 8:3, 4, 20-22; Apokalupo 13:1, 2, 7, 8) Bisinesi bona saiens taudia be unai dagedage animal ida idia gaukara hebou, tuari kohudia badadia idia karaia bona idia hoihoilaia moni momo idia abia totona. Momokani, “Satani ese tanobada taudia ibounai ia gunalaia noho”!—1 Ioane 5:19.

²¹ Iesu murinai idia raka taudia be “tanobada ena lasi” dainai, politikol karadia bona tuari lalonai idia vareai lasi. Unai idia karaia dainai, idia bona edia bese taudia be rara dekenai idia kerere lasi.d (Ioane 15:19; 17:16) Keriso idia tohotohoa dainai, haida ese idia dagedage henidia neganai, davana idia haloua lasi. To, edia inai taudia dekenai lalokau idia hahedinaraia bona idia totona idia guriguri danu.—Mataio 5:44; Roma 12:17-21.

²² Oibe, Keristani taudia korikoridia be “Babulonia badana,” tanobada ena tomadiho koikoi ibounai bona rara dekenai ia kerere bada oreana unai, idia dadaraia. Baibel ia gwau: “Ia ese peroveta taudia ia alaia mase. Ia ese Dirava ena helaga taudia edia rarana ia habubua, bona tanobada dekenai idia alaia mase taudia ibounai, edia rarana be, ia lalonai idia davaria vadaeni.” Unai dainai Baibel ia gwau: “Lauegu orea taudia e, ia dekena amo do umui raka siri.”—Apokalupo 17:6; 18:2, 4, 24.

23. Babulonia Badana amo ita raka siri ena anina be dahaka?

²³ Babulonia Badana amo ita raka siri ena anina be iseda ladana be tomadiho koikoi edia dubu amo ita kokia. To unai sibona lasi, namona be tomadiho koikoi ese idia abia dae kara dikadia—matabodaga karadia, politikol karadia, bona mai mataganigani ida kohu momo tahua karana—ita dadaraia. (Salamo 97:10; Apokalupo 18:7, 9, 11-17) Nega momo unai bamona kara ese ala-ala karadia ia havaraia!

24, 25. (a) Edena dala amo Dirava ese helalo-kerehai tauna ena kara dika ia gwauatao diba? (b) Baibel negadiai unai kara be dahaka ese ia laulaulaia?

²⁴ Ita do gwauhamata bona bapatiso ita do abia lasi neganai, ita ta ta be dala haida ai Satani ena tanobada ita durua bona rara dekenai ita kerere. To, iseda kara ita haidaua, Keriso ena mauri davalaia boubouna ita abidadama henia, bona Dirava dekenai iseda mauri ita gwauhamatalaia dainai, Dirava ese ita dekenai ia hebogahisi bona iseda hetura karana idia hadikaia gaudia amo ita ia gimaia. (Kara 3:19) Unai gimaia karana ese ita ia durua Baibel negadia idia noho heau mauri hanuana ita laloa totona.—Numera 35:11-15; Deuteronomi 21:1-9.

²⁵ Edena dala ai unai hanua ese ta ia gimaia? Bema Israela tauna ta ese aksiden dalanai ta ia hamasea, ia be heau mauri hanuana ta dekenai do ia heau lao diba. Diadi taudia be hahemaoro idia karaia murinai, ia heau tauna be heau mauri hanuana dekenai do ia noho ela bona hahelaga tauna ia mase. Unai murinai ia be ena ura gabuna dekenai ia lao diba. Dirava be unai dala namo hereana amo, ia hahedinaraia ia be hebogahisi tauna bona mauri ia laloa bada! Unai idaunegai heau mauri hanuadia be Dirava ese ia henia Keriso ena mauri davalaia boubouna bamona. Bema aksiden dainai Dirava ena taravatu mauri bona rara dekenai ita utua, Iesu ena boubou gauna ese mase amo ita ia gimaia diba. Oi be Iesu ena mauri davalaia boubouna oi laloa bada, a? Edena dala ai oi hahedinaraia unai boubou gauna oi laloa bada? Dala ta be ma haida oi boiria Dirava ese ia henia gimaia gabuna idia abia dae totona, badina “hisihisi badana” be ia mai kahirakahira noho.—Mataio 24:21, NW; 2 Korinto 6:1, 2.

MAURI ITA LALOA BADA DAINAI BASILEIA SIVARAINA ITA HAROROLAIA

26-28. Edena dala ai iseda maduna be peroveta tauna Esekiela ena bamona, bona edena dala ai Dirava ena lalokau lalonai ita noho diba?

²⁶ Hari, Dirava ena hesiai taudia ese idia karaia gaukarana ita itaia neganai, peroveta tauna Esekiela ita laloa. Iehova ese Esekiela ia hagania Israela besena ena gima tauna ai ia lao totona, Ia hamaoroa: “Oi ese lauegu sisiba hereva idia dekenai do oi hamaoroa.” Bema Esekiela be unai hahegani ia badinaia lasi, Ierusalema idia hadikaia neganai, idia mase taudia edia rara davana be iena imana ai do ia noho. (Esekiela 33:7-9) To, Esekiela be unai hahegani ia badinaia bona rara dekenai ia kerere lasi.

²⁷ Hari ita be Satani ena tanobada ena dokona ita naria noho. Unai dainai, Iehova ena Witnes taudia ese idia abia hahenamo bona maduna be taunimanima dekenai Dirava ena Basileia ena sivarai bona ena “badu dinana” ena mai do idia harorolaia. (Isaia 61:2; Mataio 24:14) Oi be unai mai anina bada gaukarana oi karaia noho, a? Aposetolo Paulo be haroro gaukara ena hahegani ia laloa bada. Unai dainai ia gwau diba: “Bema umui ta ia boio, kerere be lau lasi. Badina be Dirava ena ura ibounai umui dekenai lau hamaoroa, gau ta lau hunia lasi.” (Kara 20:26, 27) Ena haheitalai namona ita tohotohoa be namo!

²⁸ Oibe, Iehova ena lalokau lalonai ita noho totona, namona be Iehova bamona mauri bona rara ita laloa bada bona gau ma haida ita karaia danu. Iehova ena matana ai ita goeva o helaga noho be gau badana. Karoa gabena ai unai do ita stadilaia.