Headava

Anina: Tau ta bona hahine ta idia hakapudia, Buka Helaga ena taravatu hegeregerena do idia noho hebou totona. Headava be Dirava ese ia havaraia gauna ta. Headava tauna be ena adavana ida idia lalokau heheni bona idia gwauhamata heheni vadaeni dainai, ruaosi idia abidadama heheni. Iehova ese headava ia hamatamaia, tau ena bamona ia henia totona sibona lasi, to taunimanima be edia bese lalodiai natudia do idia havaradia totona danu. Headava ta be Keristen ekalesiana vairanai ia maoro neganai, bema mai dalana, gavamani dekenai idia hamomokania be namo.

Taunimanima be gavamani ena taravatu hegeregerena idia headava be gau badana, eiava?

Tito 3⁠:1: “Oiemu taudia do oi hadibaia lou, idia ese gavana bona gavamani ena siahu taudia do idia kamonai henia. Edia oda hereva do idia badinaia.” (Bema taunimanima ese inai hereva idia badinaia, edia kara do idia hemarailaia lasi, bona edia natudia do idia hemarai lasi, headava lasi taudia edia natudia idia hemarai hegeregerena. Danu, bema headava taudia ese edia headava gavamani dekenai idia hamomokania, bema tau o hahine ia mase neganai ena kohu be kota dalana maorona amo do idia haria diba ena adavana bona ena natuna dekediai; ta ese ena ahuna do ia reaia lasi.)

Heb. 13⁠:4: “Headava kara be taunimanima ibounai ese do idia matauraia be namo. Tatau mai edia hahine e, emui headava do umui naria, ia be goevagoeva Dirava ena vairana dekenai. Do ia miro lasi. Badina be Dirava ese heudahanai taudia bona headava hadikaia taudia edia kerere davana do ia karaia momokani.” (Taunimanima ese edia headava do idia “matauraia” totona, headava taudia be taravatu hegeregerena idia headava be gau badana. Inai hereva “heudahanai” bona “headava hadikaia” edia anina ita gwauraia neganai, namona be Tito 3⁠:1 ena hereva ita laloatao.)

1 Pet. 2:​12-15: “Dirava idia diba lasi taudia edia vairanai kara namodia do umui karaia. Momokani, hari idia ese umui idia gwauraia kerere noho. To bema emui kara namodia idia itaia neganai, idia ese Dirava do idia hanamoa, Keriso do ia giroa mai dinanai. Taunimanima edia taravatu ibounai do umui badinaia, Lohiabada dainai. King do umui kamonai henia, badina ia be siahu bada herea tauna. Gavana taudia danu edia hereva do umui badinaia. Badina be king ese idia ia abia hidi, kara dika taudia do idia panisia, to kara namo taudia do idia hanamoa totona. Badina be Dirava ia ura be emui kara namo dekena amo kavakava taudia edia hereva kava do umui koua.”

Edena dala amo Adam bona Eva idia noho hebou matamaia?

Gen. 2⁠:​22-24: “Iehova Dirava ese unai tau [Adam] amo ia kokia turia dekenai hahine ta ia karaia, vadaeni tau dekenai ia abia lao. Bena unai tau ia gwau, Inai hari lau bamona tauna ia noho. Ia be lauegu turia ena turia, bona lauegu hidio ena hidio, iena ladana do idia hatoa, Hahine, badina be tau dekena amo be ia kokia. Unai dainai tau ese tamana sinana do ia rakatania, ena adavana dekenai do ia noho, ruaosi be tau-anina tamona do idia lao.” (Mani inai oi laloa, Pavapava Badana, Iehova Dirava sibona, ese Adam bona Eva ia hakapudia. Idia ruaosi be sibodia edia lalohadai hegeregerena idia headava lasi; danu, Dirava ese ia hahedinaraia tau ese ena adavana do ia badinaia; unai amo ia hahedinaraia edia headava do ia doko lasi.)

Gen. 1:28: “Dirava ese [Adam bona Eva] ia hanamodia, idia dekenai ia gwau, Emui bese umui havaraia, do umui hutuma. Tanobada ena gabu ibounai dekenai umui noho, bona umui biagua. Davara ena gwarume bona atai manudia, bona mauri gaudia tanobada dekenai idia marere gaudia umui biagua.” (Taravatu Henia Tauna Badana ese edia headava ia hanamoa unai; ia gwaumaoro henidia do idia mahuta hebou, bona gaukara ia henidia, unai gaukara amo edia mauri ese anina bada do ia havaraia.)

Tau tamona ese hahine haida ia adavadia karana bema gavamani ese ia taravatua lasi, unai bamona ia karaia be kerere lasi, a?

1 Tim. 3:​2, 12: “Ekalesia gunalaia tauna be kara maoromaoro tauna, kerere ta lasi. Tau ta ese iena kerere ta ia gwauraia diba lasi tauna. Ia be hahine tamona ena adavana . . . Diakono tauna be hahine tamona ena adavana.” (Unai tatau ese dagi idia abia sibona lasi, to idia ese kara maoromaoro idia hahedinaraia danu, Keristen ekalesia taudia ese do idia tohotohodia totona.)

1 Kor. 7:2: “Lebulebu ia vara garina tatau ese edia adavana ta ta do idia abia be namo. Hahine taudia danu edia adavana korikori sibona do idia abia be namo.” (Inai amo ia gwaumaoro henidia lasi idia ta ta be adavadia momo do idia abidia totona.)

Abraham bona Iakob ta ta be mai edia adavadia rua, bona Solomon be mai ena adavana momo herea; dahaka dainai Dirava ese unai kara ia taravatua lasi?

Tau tamona ese hahine rua eiava hahine haida ia adavadia karana be Iehova ese ia hamatamaia lasi. Ia ese Adam hahine tamona sibona ia henia. Gabeai, Kain ena tubuna Lamek ese hahine rua ia adavadia. (Gen. 4⁠:19) Unai murinai tatau ma haida ese ena kara idia tohotohoa, bona haida ese edia hesiai kekenidia idia adavadia. Dirava ese unai kara ia taravatua lasi, bona Mose ena Taravatu amo Israel taudia ia haganidia, unai bamona idia adavadia hahinedia do idia kara maoromaoro henidia. Unai bamona ia karaia noho ela bona Keristen ekalesiana ia vara, bena iena hesiai taudia ia haganidia, Eden lalonai ia haginia taravatuna do idia badinaia lou.

Abraham ese Sarai (Sara) ia adavaia. Sara ena mauri laganidia be 75 bamona neganai ia do gabani bona ia laloa natuna ta do ia abia diba lasi, unai dainai ia ese ena adavana ia noia ena hesiai hahinena do ia mahuta henia, Sara ese iena amo natuna ta do ia abia bena sibona ena natuna do ia gwauraia totona. Abraham be unai bamona ia karaia, to ena kara dainai hepapahuahu badana ia vara iena ruma bese lalonai. (Gen. 16⁠:​1-4) Iehova ese Abraham ia gwauhamata henia ena “tubuna” do ia vara, bena gabeai Sara be hoa dalanai ia harogorogoa, unai gwauhamata hamomokania totona. (Gen. 18⁠:​9-14) Abraham ese hahine ma ta ia adavaia lasi ela bona Sara ia mase.​—⁠Gen. 23⁠:2; 25⁠:⁠1.

Iakob ese hahine rua ia adavadia badina be ena ravana ese ia koia dainai. Iakob be unai ia ura lasi, hahine ta tahua totona Padan-aram dekenai ia lao neganai. Baibel ese iena adavana ruaosi edia hepapahuahu ia sivarailaia momo.​—⁠Gen. 29:​18–30:24.

Taunimanima momo idia diba Solomon ese hahine momo ia adavadia, ena adavana korikoridia bona hahine ma haida danu. To taunimanima momo idia diba lasi gauna be inai: Unai bamona ia karaia neganai Iehova ena taravatu ta ia utua; unai taravatu ia gwau, Pavapava ese ‘adavana momo do ia abia lasi, idia ese iena lalona do idia ania garina.’ (Deut. 17⁠:17) Inai danu ita laloa be namo: Solomon ena adavana, idau bese hahinedia, ese ena lalona idia ania dainai, ia ese Dirava koikoidia ia tomadiho henidia bona ‘kara dika ia karaia Iehova vairanai . . . Bena Iehova ese Solomon ia badu henia.’​—⁠1 Pav. 11⁠:​1-9.

Bema tau ta mai ena adavana ida be maino dekenai idia noho hebou diba lasi, idia parara be kerere lasi a?

1 Kor. 7:​10-16: “Headava taudia totona inai taravatu lau gwauraia, hahine ese tau do ia rakatania lasi. Inai be lauegu taravatu lasi, to Lohiabada ena. To bema ia rakatania, ia be headava lasi do ia noho, eiava do ia giroa lou iena adavana dekenai. Tau danu ese iena adavana do ia rakatania lasi. Taunimanima oredia dekenai lau ura hereva. Inai hereva be Lohiabada ena lasi [to, 1Kor 7 siri 40 ese ia hahedinaraia hegeregerena, lauma helaga ese Paulo ia hakaua]. Lauegu sisiba be inai: Sedira emui ekalesia tauna ta be mai adavana, ekalesia lasi hahine. Bema unai hahine ia ura iena tau danu ia noho neganai, iena tau ese do ia rakatania lasi. Bona ekalesia hahine ta danu sedira mai adavana, ekalesia lasi tauna. Bema unai tau ia ura iena hahine danu ia noho neganai, iena hahine ese do ia rakatania lasi. Badina be ekalesia hahine ese iena adavana ekalesia lasi tauna ia hahelagaia. Bona ekalesia tauna ese iena adavana ekalesia lasi hahine ia hahelagaia. Bema lasi neganai, umui emui natudia be helaga lasi. To momokani, harihari be idia helaga noho. To bema ekalesia lasi tauna o ekalesia lasi hahine ese iena adavana, ekalesia tauna o hahine ia ura rakatania neganai, iena dala koua lasi. Inai bamona ia vara neganai ekalesia tauna o hahine be sibona edia ura dekenai idia karaia, taravatu lasi. Dirava ese umui ia boiria, maino lalonai do umui noho. Oi ekalesia hahine, sedira bema ia danu oi noho, oiemu tau do oi durua diba ekalesia lalonai do ia vareai, ani? Bona oi ekalesia tauna, sedira bema ia danu oi noho, oiemu hahine do oi durua diba ekalesia lalonai do ia vareai, ani?” (Dahaka dainai ekalesia tauna o hahinena be hisihisi ia haheaukalaia bona ena headava ia naria namonamo toho? Badina be headava ia matauraia, Dirava ese ia havaraia dainai, bona ena helaro be, reana gabeai ia ese ena adavana ekalesia lasi hahinena o tauna do ia durua diba, Dirava momokanina ena hesiai hahinena o hesiai tauna ai do ia lao totona.)

Ta do ia headava lou totona iena adavana ia hadihoa karana be Baibel ese edena bamona ia gwauraia?

Mal. 2:​15, 16: “Sibomui ba henahua toho, bona ta ese eregabena ai e adavaia hahinena na basine rakatania. Iehova, Israel Diravana, na e tomu, Badina be hahekoho na na inai heniamu.”

Mat. 19:​8, 9: “[Iesu] ia gwau, ‘Umui emui lalona idia auka dainai Mose ia hereva umui dekenai, ia gwau, “Umui emui adavana do umui rakatania.” To hamatamaia neganai be unai bamona lasi. To lau ese umui lau hamaoroa, bema ena adavana ia heudahanai lasi, to adavana ia rakatania, vadaeni hahine ta ma ia adavaia, unai tauna be heudahanai tauna.’ ” (Anina be, bema ta ena adavana ia heudahanai, ia rakatania diba o ia badinaia diba, sibona ena ura hegeregerena.)

Roma 7:​2, 3: “Taravatu ia gwau hahine ta ese iena adavana dekenai do ia hakapua, iena tau ia mauri dinadia ibounai. To iena tau ia mase neganai, unai hahine be taravatu ese ia guia noho lasi. Bema iena adavana ia mauri noho neganai unai hahine ia lao tau ta dekenai, vadaeni ia be heudahanai hahinena. To adavana ia mase neganai, ia be taravatu lasi, bema ia ese tau ta ma ia adavaia neganai ia be taravatu ia utua lasi.”

1 Kor. 6:​9-11: “Umui sibona umui koia lasi, Lebulebu taudia, kaivakuku idia tomadiho henia taudia, heudahanai taudia, eiava lebulebu hahine edia kara idia tohotohoa tatau, eiava tatau ese tatau danu hemarai karadia idia karaia taudia. . . . Inai bamona taudia ta lasi be Dirava ena Basileia do ia davaria diba. Umui haida be guna unai bamona umui karaia. To Dirava ese umui emui kara dika ia huria vadaeni, ia ese helaga taudia umui ia halaoa vadaeni. Bona hari Dirava ena vairana dekenai umui be maoromaoro, Lohiabada Iesu Keriso dainai bona Dirava ena Lauma dainai.” (Inai ese ia hahedinaraia heudahanai taudia edia kerere be bada. Bema idia helalo-kerehai lasi edia ahuna do idia abia lasi, Dirava ena Basileia lalonai. To haida, ena be guna idia heudahanai bona reana dala kererena amo idia headava lou, to bema idia helalo-kerehai momokani bona Iesu ena boubou gauna idia abidadama henia, Dirava ese edia dika do ia gwauatao bena ia vairanai do idia goeva.)

Badina be dahaka gunaguna Dirava ese tatau be sibodia edia taihudia adavadia karana ia taravatua lasi?

Baibel ena sivarai ese ia hahedinaraia Kain ese ena taihuna ta o ena tadina ta ena natuna ta ia adavaia, bona Abraham ese ena taihuna ia adavaia. (Gen. 4⁠:17; 5⁠:⁠4; 20⁠:12) To gabeai, Mose ena amo Israel taudia ia henidia taravatuna lalonai, Dirava ese unai bamona headava ia taravatua momokani. (Lev. 18⁠:​9, 11) Hari inai negai Keristen taudia be unai bamona idia headava be taravatu. Sibodia edia varavara idia adavadia taudia edia natudia momo be idia vara mai edia gorere.

Dahaka dainai matamana neganai tau ta ese sibona ena taihuna ia adavaia be kerere lasi? Dirava ese Adam bona Eva ia havaradia neganai idia ruaosi idia goevadae, bona iena palani be taunimanima iboudiai be idia edia amo do idia vara. (Gen. 1⁠:28; 3⁠:20) Anina be, edia uru ginigunadia lalodiai idia ese sibodia edia varavara do idia adavadia. Ena be kara dika ia vara, to uru ginigunadia lalodiai unai bamona idia headava taudia edia natudia idia dika momokani lasi, badina be Adam bona Eva edia goevadae be idia edia amo ia boio sisina sibona. Unai ia hamomokania gauna be inai: Unai negai idia noho taudia edia mauri laganidia be momo herea. (Genese 5⁠:​3-8; 25⁠:⁠7 itaia.) To Adam be kara dika tauna ai ia lao bena lagani 2,500 bamona idia ore murinai, Dirava ese unai bamona headava ia taravatua. Unai ese natu edia mauri ia naria, bona unai taravatu dainai Iehova ena hesiai taudia edia kara ese bese idauidau taudia, unai negai kara bodagadia idauidau idia karaia taudia, edia kara ia hereaia.​—⁠Levitiko 18⁠:​2-18 itaia.

Dahaka ese headava ia hanamoa diba?

(1) Tau be hahine ida Dirava ena Hereva idia stadilaia hebou loulou, bona Dirava idia noia, do ia durudia edia hekwakwanai kokidia totona.​—⁠2 Tim. 3:​16, 17; Her. 3:​5, 6; Fil. 4:​6, 7.

(2) Kwara dagina matauraia. Unai amo tau ese maduna metauna ia abia. (1 Kor. 11:3; Ef. 5:​25-33; Kol. 3:19) Namona be hahine danu ese unai lalohadai ia goadalaia mai ena momokani ida.​—⁠Ef. 5:​22-24, 33; Kol. 3:18; 1 Pet. 3:​1-6.

(3) Oiemu adavana mo sibona oi hegahusi henia. (Her. 5:​15-21; Heb. 13:4) Bema ta ese ena adavana ena ura ia tahua mai ena lalokau ida, unai amo ia naria, lebulebu ese do ia dibagania garina.​—⁠1 Kor. 7:​2-5.

(4) Ruaosi idia hereva heheni mai edia hemataurai bona mai edia hebogahisi ida; idia heai heheni lasi, ta ese ta ia maumau henia lasi bona ia gwau dika henia lasi.​—⁠Ef. 4:​31, 32; Her. 15:1; 20:3; 21:9; 31:​26, 28.

(5) Hahine ia gaukara goadagoada; ruma bona ruma taudia edia dabua ia naria namonamo, bona aniani namona ia karaia.​—⁠Tito 2:​4, 5; Her. 31:​10-31.

(6) Herevana oi laloa emu adavana ia kara maoromaoro eiava lasi, to Baibel ena sisiba oi badinaia mai emu manau ida.​—⁠Roma 14:12; 1 Pet. 3:​1, 2.

(7) Lauma ena huahua namodia goadalaia dalana tahua.​—⁠1 Pet. 3:​3-6; Kol. 3:​12-14; Gal. 5:​22, 23.

(8) Natudia lalokau henidia, hadibadia bona matahakani henidia.​—⁠Tito 2:4; Ef. 6:4; Her. 13:24; 29:15.