Maria (Iesu ena Sinana)

Anina: Dirava ese ia abia hidi bona ia hanamoa bada hahinena. Ia be Iesu ena sinana, King David ena tubuna, Iuda iduhuna hahinena, bona Heli ena natuna. Baibel ese ia sivarailaia matamaia neganai, ia gwau ia be Iosef ena maoheni. Unai tau danu be Iuda iduhuna tauna, David ena tubuna. Baibel ese ma Maria idaudia 5 ia gwauraidia.

Maria sivaraina Baibel lalonai idia torea ese dahaka ia hadibaia ita dekenai?

(1) Ena be Dirava ese ena hesiai taudia edia amo ita ia hadibaia herevadia ese iseda lalona idia hahekwarahia eiava ita laloa ia gwauraia gauna do ia vara diba lasi, to unai hereva ita kamonaia be namo.​—⁠Luka 1:​26-37.

(2) Dirava ena ura ita diba neganai, namona be ita karaia mai eda lalo-goada bona mai eda abidadama ida. (Luka 1⁠:38 itaia. Deuteronomi 22:​23, 24 ese ia hahedinaraia hegeregerena, bema Iuda haneulato rami-hebou ta idia davaria ia rogorogo, panisi bada idia henia diba.)

(3) Dirava ena lalona ia hegeregere ogogami taudia do ia hagaukaradia.​—⁠Luka 2:​22-24 be Levitiko 12:​1-8 ida oi hahegeregerea.

(4) Tomadiho karadia laloa bada. (Luka 2⁠:41; Kara 1⁠:14 itaia. Dirava ese Iuda hahinedia ia oda henidia lasi, lagani ta ta Paseka negadiai edia adavadia do idia bamodia Ierusalem dalana daudauna dekenai idia laolao negadiai, to Maria be unai bamona ia karaia.)

(5) Kara goeva laloa bada.​—⁠Luka 1:34.

(6) Ta ese ena natuna Dirava ena Hereva ia hadibalaia goadagoada. (Iesu ena lagani be 12 neganai ia karaia karana ese unai ia hahedinaraia. Luka 2:​42, 46-49 itaia.)

Ia mara bona Iesu ia abia neganai, Maria be momokani haneulato rami-hebou, a?

Luka 1:​26-31 ia gwau aneru Gabriel ese “tau ia diba lasi kekeni” ladana Maria ia hereva henia, ia gwau: “Oi be do oi rogorogo, mero ta do oi abia, ena ladana do oi hatoa Iesu.” Lu 1 Siri 34 ia gwau Maria be unai hereva ia kamonai neganai, “aneru dekenai ia nanadaia, ia gwau, ‘Lau be tau lau diba lasi, inai be edena bamona do ia vara?’ ” Mataio 1⁠:​22-25 be ma ia gwau: “Inai kara ibounai idia vara, Lohiabada ese peroveta tauna ena uduna dekena amo ia gwauraia herevana hamomokania totona. Ia gwau, ‘Umui kamonai, tau ia diba lasi kekeni ese ena natuna do ia abia, mero ta. Iena ladana do idia hatoa, Emanuela.’ Emanuela ena anina be, ‘Dirava be ita dekenai ia noho.’ Iosepa be mahuta dekenai ia noga, vadaeni Lohiabada ena aneru ese ia hamaoroa hegeregerena ia karaia. Ena adavana Maria ia abia dae. To Maria danu nega tamona idia mahuta lasi, ela bona ena natuna ia abia. Vadaeni mero ena ladana ia hatoa Iesu.”

Inai sivarai ita abia dae diba a? Natu havaradia siahuna taunimanima ia henidia Diravana ese ena siahu amo Maria ia harogorogoa be auka lasi, ani? Hoa dalanai Iehova ese ena vara guna Natuna ena mauri siahuna bona ena lalona oromana be guba amo ia hadihoa bona Maria ena bogana lalonai ia atoa. Bena Dirava ena siahu, iena lauma helaga unai, ese unai mero ena tubu dalana Maria ena bogana lalonai ia naria ela bona taunimanima goevadaena ta ia vara.​—⁠Luka 1⁠:35; Ioane 17⁠:⁠5.

Maria be tau ta ese ia mahuta henia lasi ela bona ia mase, a?

Mat. 13:​53-56: “Iesu ese inai parabole ia gwauraia ore, vadaeni unai gabu dekena amo ia raka siri. Ena hanua korikori dekenai ia ginidae, edia dubu dekenai ia hadibaia. Vadaeni idia be idia hoa, idia gwau, ‘Inai tau ena aonega bona ena siahu kara be edeseni ia abia? Inai be kamuta tauna ena natuna lasi, a? Ena sinana ena ladana be Maria, ani? Ena tadina [Greek gado, a·del·phoiʹ] be Iakobo bona Iose, bona Simona bona Iuda, ani? Ena taihuna [Greek gado, a·del·phaiʹ] be ita dekenai idia noho, ani?’ ” (Inai siri dainai dahaka oi laloa​—⁠Iesu be Maria ena natuna tamona, eiava Maria be mai ena natuna ma haida danu?)

New Catholic Encyclopedia (1967, Vol. IX, p. 337) ia gwau, Greek gado herevadia a·del·phoiʹ bona a·del·phaiʹ, Mataio 13:​55, 56 dekenai ia torea, “edia anina be tadikaka bona taihu korikori . . . Lagani A.D. 380 bamona ai Helvidius ese revareva ta lalonai unai ia herevalaia goevagoeva, inai do ia hahedinaraia totona: Maria ese Iesu sibona ia abia lasi to natuna ma haida ia abia danu, unai dainai natudia momo idia abia hahinedia ese iena kara idia tohotohoa be namo. To Dubu Oreana ena hahediba herevana be, Maria be tau ta ida ia mahuta hebou lasi ela bona ia mase, bona Saint Jerome ese unai hereva ia laloa bada dainai, lagani A.D. 383 lalonai revareva ta ia torea, Helvidius ena hereva gorea totona. . . . Katolik hadibaia taudia ese unai revareva lalonai ia torea herevadia idia badinaia ema bona hari.”

Mar. 3:​31-35: “Iesu ena tadina bona iena sinana idia mai, murimuri dekenai idia gini. Hereva idia siaia, idia ura itaia. Hutuma bada herea ia kahirakahira idia helai, idia gwau, ‘Oiemu sinana bona tadina bona taihuna idia noho murimuri dekenai, idia tahua oi.’ Iesu ia haere henia, ‘Lauegu sinana bona tadina be daika?’ Iena matana ia negea unuseni helai taudia dekenai, ia gwau, ‘Lauegu sinana bona lauegu tadina be inai. Dirava ena ura idia karaia taudia, unai taudia be lauegu tadina, bona lauegu taihuna, bona lauegu sinana.’ ” (Iesu ese ia hahedinaraia ena tadikaka korikori be idau bona ena lauma tadikaka, iena hahediba taudia unai, be ma idau. Baibel idia duahia taudia iboudiai idia diba, unai hahine, Iesu itaia totona ia mai hahinena, be iena sinana korikorina, ta ese unai ia gorea lasi. Vadaeni, bema ta ia gwau unai tatau, Iesu ese iena tadina ia gwauraidia taudia, be iena tadina korikori lasi to idia be iena varavara, iena hereva be maoro lasi, ani? Baibel lalonai, ta ena tadikaka idia gwauraidia lasi to iena varavara idia gwauraidia neganai, Greek gado herevana idauna ta, [syg·genonʹ] idia torea, Luka 21⁠:16 dekenai idia torea hegeregerena.)

Maria be Dirava ena Sinana a?

Hoa dalanai do ia mara sivaraina ia hamaorolaia aneruna ia gwau lasi do ia abia natuna be Dirava. Ia gwau: “Oi be do oi rogorogo, mero ta do oi abia, ena ladana do oi hatoa Iesu. Ia be do ia tau bada herea momokani, ia be Dirava Ataiai Momokani ena Natuna do idia gwauraia . . . Inai mero helagana be Dirava ena Natuna do idia gwauraia.”​—⁠Luka 1⁠:​31-35.

Heb. 2:​14, 17: “Inai iena natuna taudia be taunimanima sibona, mai tauanina bona rara. Unai dainai Iesu danu idia edia tauanina toana ia abia . . . Ia be kara ibounai dekenai iena tadina taudia hegeregerena momokani do ia lao.” (To bema ia be Dirava taunimanima ta lalonai ia noho, ia be “iena tadina taudia hegeregerena momokani” lasi, ani?)

New Catholic Encyclopedia ia gwau: “Bema Maria be momokani Iesu ena sinana bona Iesu be momokani Dirava, vadaeni Maria be momokani Dirava ena sinana.” (1967, Vol. X, p. 21) Baibel ia gwau Maria be Iesu ena sinana, to Iesu be Dirava eiava? Baibel idia torea haorea bena nega daudau murinai, lagani 300 C.E. murinai, Katolic Dubu Oreana ese ena Toi Tamona herevana ia halasia. (New Catholic Encyclopedia, 1967, Vol. XIV, p. 295; rau 388 itaia, inai sinado “Toi Tamona” henunai.) Unai negai Dubu Oreana be ena hahediba herevana ladana Nicene Creed lalonai Iesu Keriso ia gwauraia “Dirava korikori.” Unai murinai, lagani 431 C.E. lalonai, Efeso ena Kaunsolo dekenai, Dubu Oreana ese Maria ia gwauraia The·o·toʹkos, anina be “Dirava Havaraia [Hahinena]” eiava “Dirava ena Sinana.” Baibel be gado idauidau ai idia hahanaia vadaeni, to unai hereva o unai lalohadai be Baibel ta lalonai ita davaria diba lasi. (Rau 211-5 itaia, inai sinado “Iesu Keriso” henunai.)

Iena sinana ia rogorogo negana amo Maria be mai ena kara dika lasi, a?

New Catholic Encyclopedia (1967, Vol. VII, pp. 378-381) ese unai lalohadai ia vara dalana ia gwauraia, ia gwau: “Baibel lalonai idia gwauraia hedinarai lasi . . . Dubu Oreana ena Hadibaia Taudia Badadia ginigunadia idia laloa Maria be ia helaga, to idia gwau lasi ia be mai ena kara dika lasi. . . . Dubu Oreana taudia ese [Maria be asi ena kara dika herevana] idia abia dae laganina be ai gwauraia diba lasi, to A.D. 700 o A.D. 800 murinai Dubu Oreana taudia ese idia abia dae vadaeni. . . . [Lagani 1854 lalonai Pope Pius Namba 9 ese unai hereva ena anina ia gwauraia hedinarai goevagoeva, ia gwau] ‘Dirava ese ia hanamoa bada hahinena rami-hebou, Maria, ena sinana ia rogorogo matamaia negana amo ia naria dainai, kara dika ginigunana ena siahu ese ia hadikaia lasi.’ ” Inai hahediba herevana be Katolik Dubu Oreana ena kaunsolo badana ladana Vatican Iharuana (1962-1965) ese ia hamomokania.​—⁠The Documents of Vatican II (New York, 1966), edited by W. M. Abbott, S.J., p. 88.

Baibel ia gwau: “Tau tamona [Adam] dekena amo kara dika ia vareai mai tanobada dekenai, bona iena kara dika ese mase ia mailaia. Unai dainai mase be taunimanima ibounai ese idia abia, badina be ibounai be mai edia kara dika.” (Roma 5⁠:12) Unai ena anina be Maria danu be mai ena kara dika, a? Baibel ia gwau, Iesu ena vara murinai dina 40 idia ore neganai, Mose ena taravatu hegeregerena Maria ese kara dika boubouna be dubu helagana dekenai ia abia lao Ierusalem dekenai. Ia danu ese kara dika bona goevadae lasi maurina Adam ena amo ia abia vadaeni.​—⁠Luka 2:​22-24; Lev. 12:​1-8.

Maria be guba dekenai ia daekau mai ena tauanina ida, a?

Lagani 1950 lalonai Pope Pius Namba 12 ese inai hereva ia harorolaia, ia gwau ia be Katolik hahediba herevana korikori ta. New Catholic Encyclopedia (1967, Vol. I, p. 972) ese iena hereva inai bamona ia gwauraia: “Maria be mai ena tauanina ida guba dekenai ia daekau herevana be Baibel lalonai idia gwauraia lasi, to Pope ese ia halasia neganai, ia gwau inai hereva momokanina ena badina be Buka Helaga lalonai.”

Baibel ia gwau: “Tauanina bona rara ese Dirava ena Basileia do idia abia diba lasi.” (1 Kor. 15⁠:50) Iesu ia gwau, “Dirava be Lauma.” Iesu ia toreisi lou neganai, ia be lauma ai ia lao lou, “mauri hanaihanai ia henia Laumana” unai. Aneru be lauma. (Ioane 4⁠:24; 1 Kor. 15⁠:45; Heb. 1⁠:​13, 14) Bema ta ia gwau taunimanima ta mai ena tauanina, tanobada dekenai sibona ia mauri diba gauna, ese guba maurina ia abia, unai hereva be Baibel amo ia hamomokania dalana be lasi, ani? (Rau 419-22 itaia, inai sinado “Toreisi-Lou” henunai.)

Maria be ita dainai Dirava do ia noia totona ita guriguri henia be maoro, eiava?

Iesu Keriso ia gwau: “Inai bamona do umui guriguri. ‘Aiemai Tamana e, guba dekenai oi noho . . . ’ ” Ma ia gwau: “Dala be lau, hereva momokani be lau, mauri danu lau. Tamana dekenai do idia lao taudia ibounai edia dala ta be lasi, lau sibona. . . . Bema gau ta lauegu ladana dekenai umui noia, lau be do lau karaia.”​—⁠Mat. 6⁠:9; Ioane 14⁠:​6, 14.

Bema ita ese eda Tamana Dirava na hahine edia kara ia manadalaidia hahinena ena amo ita guriguri henia neganai, iseda noinoi ia abia dae mai ena hebogahisi bada ida a, to Iesu Keriso ena amo ita guriguri henia neganai be unai bamona lasi, a? Baibel ese eda Tamana Dirava inai bamona ia gwauraia: “Tamana ese natuna e bogadia hisimu heḡereḡerena, Iehova ese ia garina e garimu taudia na unu e bogadia hisi tomamu. Badina be ede e karada toma na ia dibana; ia vada e helalo une, ita na tano ḡahuna mo.” Ia be “hebogahisi bona harihari-bada Diravana. Badu ai e halahemu; hebogahisi ai bona uraheni ai e haraḡamu.” (Sal. 103⁠:​13, 14; Eso. 34⁠:⁠6) Bona Baibel ese Keriso inai bamona ia gwauraia: “Iseda Boubou Helaga Karaia Tauna Badana ese ita ia bogahisihisi henia diba. Badina be ia danu ese hedibagani ena mamina ia abia, ita ese ena mamina ita abia hegeregerena. To Iesu ese kara dika ta ia karaia lasi. Unai dainai mai gari lasi danu Dirava ena bogahisihisi ia noho helai gabuna dekenai ita raka kahirakahira lao be namo. Vadaeni ia ese ita do ia bogahisihisi henia, bona ia ese hariharibada bona durua ita do ia henia, iseda metau hegeregerena.”​—⁠Heb. 4:15, 16.

Maria ena laulau tomadiho henidia karana be Baibel ena Keristen dalana hegeregerena, a?

Inai kara be Katolik Dubu Oreana ena Kaunsolo badana ta ladana Vatican Iharuana (lagani 1962-1965) ese ia gwauraia namo, ia gwau: “Inai Hebou Helaga Hereana . . . ese Dubu Oreana taudia iboudiai ia sisiba henidia goadagoada, Helaga Hahine Rami-Hebou tomadiho henia karana do idia goadalaia. Inai Kaunsolo ese ia hamaorodia [Maria] tomadiho henia karadia do idia laloa bada; unai kara be Dubu Oreana ese ia gwauraia namo lagani handred momo lalodiai. Bona ia haganidia, Keriso bona Helaga Hahine Rami-Hebou, bona helaga taudia danu edia laulau tomadiho henidia karana do idia badinaia, edia tomadiho karana korikori hegeregerena.”​—⁠The Documents of Vatican II, pp. 94, 95.

Baibel ena haere davaria totona, rau 225-9 itaia, inai sinado “Kaivakuku” henunai.

Aposetolo edia negai Keristen ekalesiana lalonai Maria idia matauraia bada, a?

Aposetolo Petro ese ia gwauraia lasi iena revareva lalodiai. Aposetolo Paulo ese ia gwauraia neganai, ena ladana ia hatoa lasi to “hahine” ia gwauraia sibona.​—⁠Gal. 4⁠:⁠4.

Iesu ese ena sinana edena bamona ia herevalaia dainai ita danu be unai bamona ita herevalaia be namo?

Ioane 2:​3, 4: “[Headava ariana Kana dekenai idia karaia neganai,] uaina ibounai ia ore neganai, Iesu ena sinana ese Iesu dekenai ia hereva, ia gwau, ‘Edia uaina ia ore vadaeni.’ To Iesu ia haere henia, ia gwau, ‘Hahine e, lau dekenai be dahaka oi karaia? Lauegu nega be dohore.’ ” (Iesu be do mero neganai, iena sinana bona iena tamana daelaina ia kamonai henidia. To ia bada vadaeni neganai, ia ese Maria ena oda herevana ia dadaraia mai ena hemataurai ida. Maria ese ena hereva ia abia dae mai ena manau ida.)

Luka 11:​27, 28: “[Iesu ese] unai hereva ia gwauraia neganai hahine ta taunimanima hutuma edia huanai Iesu dekenai ia hereva, ia hereva badabada, ia gwau, ‘Oi ia havaraia bona oi dekenai rata ia henia hahine be mai moale bada.’ To Iesu ia gwau, ‘Gau badana momokani be inai, Dirava ena hereva idia kamonaia bona idia badinaia taudia be idia moale bada.’ ” (Bema Iesu ese ena sinana ia hanamoa bada be namo, unai negai ia hanamoa bada be namo herea. To ia be unai bamona ia karaia lasi.)

Maria tomadiho henia karana ena matamana be dahaka?

Katolik haroro tauna Andrew Greely ia gwau: “Maria be tomadiho toana ta mai ena siahu bada herea Europe ena sivarai lalonai . . . Idaunegai besedia ese dirava hahinedia idia tomadiho henidia bona idia gwauraidia edia sinadia; Maria toana ese Keristen tomadihona ia hakapua unai tomadiho gunadia dekenai.”​—⁠The Making of the Popes 1978 (U.S.A., 1979), p. 227.

Inai hereva, Maria be Dirava ena Sinana herevana, idia hamomokania gabuna ita laloa namonamo be namo. “Efeso ena Kaunsolo be Theotokos ena dubu lalonai idia hebou, lagani 431 lalonai. Unai hanua dekenai iena ladana ‘Dirava Havaraia Hahinena’ idia gorea diba lasi, badina be bese momo idia diba unai hanua taudia ese Atemis tomadiho henia karana idia goadalaia; Roma taudia ese unai dirava hahinena ena ladana idia hatoa Diana. Efeso taudia idia gwau iena laulau be guba amo ia moru, bona lagani 330 B.C. amo idia ese edia dubu badana idia hahelagaia Sinana Badana ena, bona gabeai idia gwau Maria ese nega sisina ia noholaia rumana ta be unuseniai.”​—⁠The Cult of the Mother-Goddess (New York, 1959), E. O. James, p. 207.

Bema Ta Ia Gwau​—⁠

‘Umui ese Haneulato Rami-Hebou Maria sivaraina umui abia dae a?’

Reana inai bamona oi haere henia diba: ‘Buka Helaga ia gwau Iesu Keriso ena sinana be tau ta ia diba guna lasi, bona ai ese unai hereva ai abia dae. Dirava be Iesu Keriso ena Tamana. Maria ese ia abia merona be momokani Dirava ena Natuna, aneru ese Maria ia hamaoroa hegeregerena. (Luka 1⁠:35)’ Bena reana ma oi gwau: ‘To inai oi laloa vadaeni a: Dahaka dainai Iesu be unai dalai ia vara be gau badana? . . . Unai dala tamona amo iseda mauri davana ia karaia diba, kara dika bona mase amo ita ia ruhaia totona.​—⁠1 Tim. 2⁠:​5, 6; bena reana Ioane 3⁠:16.’

Eiava inai bamona oi hereva diba: ‘Maria sivaraina ibounai Buka Helaga lalonai idia torea be ai ese ai abia dae, bona unai buka ia gwau Maria be do haneulato rami-hebou, ia mara bona Iesu ia abia neganai. Lau ese Maria sivaraina orena Baibel lalonai lau moalelaia. Ena kara namodia ita dibalaia bona ita tohotohoa be namo. (Rau 266-7 dekenai idia noho herevadia oi gwauraia.)’

‘Umui ese Haneulato Rami-Hebou Maria umui abidadama henia lasi’

Reana inai bamona oi haere henia diba: ‘Lau diba taunimanima haida idia abia dae lasi haneulato rami-hebou ta ese Dirava ena Natuna ia havaraia. To ai ese unai sivarai ai abia dae. (Iseda buka ta be unai hereva dekenai oi kehoa, bona ruma tauna oi hahedinarai henia.)’ Bena reana ma oi gwau: ‘To unai sibona dainai hahemauri do ita abia, eiava gau ma ta dainai do ita abia, a? . . . Mani Iesu ena hereva ta oi kamonaia, iena Tamana ia guriguri henia neganai ia gwauraia. (Ioane 17⁠:⁠3)’