ia durua. (Aon. 15:23; 17:17) Danu, Iehova hanamoa anedia ita abia neganai, unai ese eda lalona ia hagoadaia bona ita moale. Ita lalohekwarahi neganai, hebou ai ita kamonai herevadia ese ita idia durua diba. Oibe, kongrigeisen heboudia ai Iehova ese ita ia durua bona “hagoadaia” ia ita badinaia noho totona.​—⁠Sal. 94:18, 19.

¹⁸ Dirava be mai lalokau ida ita ia naria dainai, Asapa bamona, Iehova dekenai ita gwau: “Oi ese egu imana oi dogoatao noho. Oi ese oiemu sisiba dekena amo lau oi hakaua noho.” (Sal. 73:23, 24) Ita moale bada badina Iehova be ita ia gimaia bona durua noho, unai amo do ita haheauka ela bona dokona!

Oi Laloatao, A?

Gima Kohorona matamatadia oi duahia neganai oi moalelaidia, a? Henunai idia noho henanadai mani oi haerelaidia:

Dahaka dainai ita gwau diba Solomona ese ia karaia gaudia be sisiba bamona ita dekenai?

Dirava ese King Solomona ia hanamoa bona hahenamo momo ia henia. To, ena lohia negana lalonai, Dirava ena hahegani ia lalodia bada lasi. Aigupito lohia hahinena bona hahine momo herea ma haida ia adavaia. Unai hahine haida be dirava koikoidia idia tomadiho henia, bona Solomona ese edia tomadiho ia abia dae. Namona be ita naria namonamo, ita ura lasi lalohadai o kara kereredia be metairametaira ita abia dae. (Deu. 7:1-4; 17:17; 1 Kin. 11:4-8)​—12/15, rau 8-13.

Dahaka ese ia hahedinaraia aposetolo edia nega amo ema bona hari, horoa taudia haida be tanobada ai idia noho?

Iesu ena “witi” bona “ava dikadia” parabolena lalonai, “uhe namodia” be “Basileia ena natudia” ia laulaulaia. (Mat. 13:24-30, 38) Ava dikadia be witi huanai do idia tubu ela bona witi gogoa negana. Unai dainai, ena be ita diba lasi daidia be witi oreana taudia, to aposetolo edia nega amo ema bona hari idia haida be tanobada ai idia noho.​—1/15, rau 7.

Dahaka ita karaia diba mama karana ita koua totona?

Ita idia durua daladia be inai: Tadikaka taihu ita lalokau henidia, Dirava idia hesiai henia taudia ita bamoa, kara namodia ita karaia, bona ‘idia moale taudia ida ita moale.’ (Roma 12:15)​—2/15, rau 15-17.

Bema ta dekenai heduru herevadia ita henia, edena hakaua herevadia ita laloatao be namo?

Gau ibounai tahua namonamo guna. Oi hereva haraga lasi. Oi manau bona Baibel oi gaukaralaia. Iseda buka bona magasin gaukaralaia. Idia totona abia hidi oi karaia lasi.​—3/15, rau 7-9.