Buklet Matamatadia Gaukaralaia Namonamo

‘Dirava Ena Basileia Do Ia Mai!’ distrik hebouhebou ai buklet matamatadia rua ita abia. Buklet Namba 1 be Dirava Oi Kamonai Henia bona Buklet Namba 2 be Dirava Oi Kamonai Henia Bena Oi Mauri Hanaihanai. Unai buklet be taunimanima bona gado idauidau taudia totona idia karaia. Hari, Papua New Guinea ai, unai buklet be gado 8 ai idia hahanaia. Buklet Namba 1 lalonai hereva be momo lasi. Unai ese taia kudima taudia, duahiduahi idia diba lasi taudia, bona natudia do ia durua. Rau ena henuna kahanai siri idia noho. Buklet Namba 2 lalonai laulau ta ta be mai edia hereva. Pablisa ese Buklet Namba 2 idia gaukaralaia diba Buklet Namba 1 ena anina idia herevalaia totona. Buklet Namba 2 do ita hariharilaia bena lou henia do ita karaia dalana be inai:

Buklet Namba 2 oi hariharilaia neganai, hereva kwadogidia oi gaukaralaia. Hegeregere, rau 2 bona 3 edia laulau oi hahedinaraia neganai, reana inai bamona oi hereva diba:

◼ “Momo idia ura guba dekenai idia lao, badina unuseniai mauri hanaihanai idia abia diba, to oi laloa tanobada ai mauri hanaihanai ita abia diba, a? [Haere naria.] Baibel ese ita ia hadibaia mauri hanaihanai ita abia diba, bona unai mauri abia dalana ia hadibaia danu.” Isaia 55:3 duahia. Buklet ena rau 2 bona 3 edia laulau oi hahedinaraia, bona oi nanadaia: “Oi ura inai bamona tanobada dekenai oi noho, a?” Buklet oi hariharilaia, bena dala oi karaia oi lou henia totona.

Lou henia oi karaia neganai, buklet ena rau 22-23 edia laulau oi hahedinaraia bona oi henanadai:

◼ “Inai laulau be mai hairaina, ani? [Haere naria.] Oi dekenai lau henia buklet ai ia noho danu.” Rau 22-23 edia hereva oi kikilaia bena oi henanadai: “Oi ura unai paradaiso mai hairaina lalonai do oi noho hanaihanai, a? [Haere naria.] Bema oi ura unuseniai do oi noho, vadaeni Baibel ena hereva oi itaia. Badina Baibel ese ia hahedinaraia dahaka ita karaia be namo, paradaiso ai ita noho totona. [Ioane 17:3 duahia.] Lau ura gabeai lau giroa mai bona inai buklet amo oi ida Baibel ita stadilaia diba; ia be davana lasi. Unai oi ura, a?” Bema ia ura, vadaeni palani karaia oi giroa lou totona.

Ita hekwarahi inai buklet rua edia hereva namodia be ma haida dekenai ita harorolaia totona. Ruma tauna ena gado ai idia hahanaia buklet be ruma tauna dekenai oi henia, unai amo Dirava kamonai henia dalana do ia dibaia bona aonega tauna ai do ia lao.​—Aonega Herevadia 1:5.

This article is unique to PNG