Orea

Anina: Orea ta lalonai idia noho taudia idia gaukara hebou, gaukara ta karaia totona o palani ta ena anina havaraia totona. Edia orea naria daladia bona ena taravatu ese ia hatamonadia. Iehova ena witness taudia, ia idia gwauhamata henia bona idia bapatiso taudia, be Iehova ena orea lalonai idia vareai, edia vara dainai lasi bona haida ese idia doridia dainai lasi, to sibodia edia ura hegeregerena idia vareai. Iena orea tanobada dekenai idia ura henia, badina be orea ena hahediba herevadia bona ena kara idia moalelaia, bona idia ura ena gaukara do idia durua.

Iehova be momokani mai ena orea tanobada dekenai, a?

Mani unai henanadai haerelaia totona, inai oi laloa:

Iehova ena guba taudia, aneru, be orea ta lalonai idia gaukara hebou, a?

Dan. 7:​9, 10: “Na itaiava ai na terono haida na hehelai, bena ḡauka ta na e helai diho; ena dabua na kuroka-kuroka, snow na heto, bona kwarana huina na mamoe huina ḡoeva-daena na heto; ena terono na lahi hururu-hururudia, ava-keikeina na e aramu lahina. Ia vairanai lahi e aru lasiva, sinavai na heto; daha daha ese ia isiaina e lao heniva, gerebu gerebu na ia vairanai e giniva, hahemaoro tauna na e hahemaorova, bona buka na e hekehova.”

Sal. 103:​20, 21: “Iehova ena aneru, ia ba hanamoa; umui goada taumui, ena hereva o badinamu, bona erena o kamonaimu. Ena tuari oreadia iboumui ai, Iehova ba hanamoa; ena hesiai taumui, ena ura o karamu taumui.”

Nega gunadia ai Dirava ese edena dala amo iena hesiai taudia tanobada dekenai ia hadibadia?

Iehova tomadiho henia taudia be momo lasi neganai, ia ese edia bese kwaradia, Noa bona Abraham bona ma haida, ia hadibadia, bena idia ese Iehova ena ladanai edia bese taudia idia hereva henidia. (Gen. 7:​1, 7; 12:​1-5) Iehova ese Israel taudia Aigupito amo ia hamauridia neganai, Mose ena amo ia hadibadia. (Eso. 3⁠:10) Sinai Ororona dekenai, Dirava ese orea ta lalonai ia hatamonadia bona bese ta ai ia halaodia; taravatu bona hahegani ia henidia, edia tomadiho dalana bona idia kara heheni daladia naria totona. (Eso. 24⁠:12) Ia ese hahelaga taudia edia orea ia haginia, taunimanima edia tomadiho karadia ai do idia gunalaidia bona Iehova ena taravatu do idia hadibalaidia totona; ena bese taudia idia raka kerere negadiai, peroveta taudia ia haginidia, do idia sisiba henidia goadagoada, dika do idia davaria garina. (Deut. 33:​8, 10; Ier. 7:​24, 25) Ena be Iehova ese ia idia tomadiho henia taudia ta ta ena guriguri ena guriguri ia kamonaia, to orea ta amo ia hadibadia.

Bena Iehova Dirava ese Iesu Keriso tanobada dekenai ia siaia, Iena hereva do ia halasia totona, badina be ia ena amo ia ese tomadiho momokani taudia be ia sibona ida ia hatamonadia gwauraia. (Heb. 1⁠:​1, 2) Bena lagani 33 C.E. ena Pentekoste dinana ai lauma helaga ia bubua diho neganai, Keristen ekalesiana ia havaraia. Iesu be guba dekenai ia giroa lou murinai, hari ekalesia be Iehova ese ia gaukaralaia, Keristen taudia hadibadia bona hagaukaradia hebou totona. Unai neganai kongregesen ta ta be mai edia naria taudia, bona idia henanadailaia gaudia be hakaua oreana ta ese idia lalohadailaia bona edia gaukara idia gunalaia. Momokani, unai neganai Iehova ese orea ta tanobada dekenai ia havaraia vadaeni, Keristen momokani taudia edia orea unai.​—⁠Kara 14:23; 16:​4, 5; Gal. 2:​7-10.

Iehova ese ia karaia gaudia ese idia hahedinaraia ia be orea gaukaralaia Diravana, a?

Isa. 40:26: “Ba gaga dae, ba itaia, unu hisiu na daika ese e karadia? Ia ese edia orea na ta ta amo e halasidiamu, bona iboudiai ladadia e hatomu; ena goada herea-daena amo, bona ena siahu na bada dainai, ta se boiomu.” (Ena be hisiu edia toadia be idauidau, to idia be edia orea ta ta lalodiai idia noho bona idia marere. Dina idia gegea hisiudia be edia dala korikori ai bona edia nega korikori ai idia heau. Inai ibounai ese ia hahedinaraia Dirava ese edia orea amo ia biagudia namonamo.)

Baibel ese ia hahedinaraia Keristen momokani taudia be orea ta lalonai do idia gaukara hebou, a?

Mat. 24:14; 28:​19, 20: “Basileia ena Sivarai Namona be tanobada ibounai dekenai do idia harorolaia. Vadaeni unai murinai dokona be do ia ginidae.” “Unai dainai do umui lao, bese ibounai be diba tahua taudia do umui halaoa, bona . . . do umui bapatiso henia idia dekenai. Bona idia dekenai do umui hadibaia.” (Bema orea ta lalonai idia gaukara hebou lasi, inai gaukara be edena bamona idia karaia diba? Iesu ese ena hahediba taudia ginigunadia inai gaukara karaia dalana ia hadibalaidia neganai, ia hamaorodia lasi idia ta ta be sibona ena ura gabuna sibona ena ura gabuna do idia lao bona sibodia edia ura hegeregeredia dala idauidau ai do idia haroro. Lasi, to ia hadibalaidia namonamo bona ia haganilaidia, bena ia siaidia, orea taudia hegeregeredia do idia gaukara hebou totona. Luka 8:1; 9:​1-6; 10:​1-16 itaia.)

Heb. 10:​24, 25: “Umui ta ta dekenai durua henia daladia do umui laloa noho. Unai bamona lalokau dekena amo kara namodia do umui karaia. Iseda guriguri hebou kara do umui hadokoa lasi haida ese idia hadokoa bamona. To umui ta ta emui ekalesia varavara taudia edia lalona do umui hagoadaia, oibe, inai kara do umui habadaia be namo. Badina be Lohiabada ena Dina be kahirakahira do ia ginidae.” (To bema orea be lasi bona orea taudia idia hebou loulou lasi, ta ese kamonai taudia edeseni do ia hakaudia lao, inai oda herevana idia badinaia totona?)

1 Kor. 14:​33, 40: “Dirava be ia ura lasi hereva kava bona heai, ia be maino Diravana. . . . Ekalesia ena gaukara ibounai umui karaia namonamo, mai dala maorona, karaia kava lasi.” (Unai siri lalodiai aposetolo Paulo ese kongregesen heboudia naridia namonamo dalana ia gwauraia, Dirava ena lauma helaga ese ia hadibaia hegeregerena. Inai sisiba idia badinaia taudia ese orea naria dalana idia matauraia.)

1 Pet. 2:​9; 2:17, BH: “To Dirava ese umui ia abia hidi vadaeni, umui be iena bese, umui be King ena boubou helaga karaia taudia, bese helagana, bona Dirava ena orea korikori taudia. Dirava ese umui ia abia hidi, iena hoa kara badadia do umui gwauraia hedinarai. Badina be ia ese dibura dekena amo umui ia boiria, vadaeni iena diari namo bada herea lalonai do umui noho.” “Iseda orea taudia ba lalokau henidia.” (Orea taudia idia gaukara hebou, idia gwauraia guna gaukarana karaia guguru totona.)

Dirava ena hesiai taudia mai edia kamonai be Kerisendom ena dubu oreadia idauidau lalodiai idia noho, a?

2 Kor. 6:​15-18: “Abidadama tauna bona abidadama lasi tauna ruaosi be idia hegeregere diba, a? . . . Unai dainai Lohiabada ma ia hereva, ia gwau, ‘Umui ese idia do umui rakatania, bona idia dekena amo do umui parara. Miro gaudia ibounai dekena amo do umui raka siri. Vadaeni umui do lau abia dae. Lau be umui emui Tamana do lau noho, bona lauegu natuna, tau bona hahine, umui do lau halaoa. Siahu ibounai Lohiabadana be unai bamona ia hereva.’ ” (Dubu oreadia taudia idia gwau idia be abidadama taudia, to edia mauri dalana amo idia hahedinaraia idia be abidadama lasi taudia; bema taunimanima ta be unai bamona taudia ida ia tomadiho noho, ia be Dirava ena hesiai tauna momokanina lasi, ani? Inai sinado badana “Babulono Badana” itaia.)

1 Kor. 1:10: “Lauegu varavara taudia e, iseda Lohiabada Iesu Keriso ena ladana dainai umui lau noia, umui parara lasi. Hereva tamona do umui gwauraia, bona do umui gaukara hebou mai laloa tamona danu.” (Kerisendom ena dubu oreadia idauidau be unai bamona idia lalo-tamona lasi.)

Ioane 10:16: “Lau be mai egu mamoe idaudia haida danu idia noho. Idia be inai magu lalonai idia noho lasi. Idia danu do lau hakaudia mai, vadaeni egu gadona do idia kamonai, vadaeni orea do ia tamona, naria tauna danu do ia tamona.” (Iesu ia gwau ia ese unai bamona taudia ‘orea tamona’ lalonai ia hakaudia vareai gwauraia; unai ese ia hahedinaraia goevagoeva idia be Kerisendom ena tomadiho oreadia idauidau lalodiai lasi, ani?)

Iehova ena orea hari inai negai be dahaka toana amo ita dibaia?

(1) Orea taudia idia gwau Iehova be Dirava momokanina tamona, bona iena ladana idia abia isi.​—⁠Mat. 4⁠:10; Ioane 17⁠:⁠3.

(2) Inai idia abia dae vaitani: Iesu Keriso be mai ena dagi badana Iehova ena palani lalonai​—⁠ia be Iehova ena lohia siahuna hamomokania tauna, Mauri Biaguna, Keristen ekalesiana ena kwarana, bona ia lohia noho Mesia Pavapavana.​—⁠Apok. 19:​11-13; 12:10; Kara 5:31; Ef. 1:​22, 23.

(3) Dirava ena Hereva idia badinaia goevagoeva; orea ena hahediba herevadia bona taravatu iboudiai be Baibel ena hereva hegeregeredia.​—⁠2 Tim. 3⁠:​16, 17.

(4) Tanobada idia tura henia lasi.​—⁠Iak. 1⁠:27; 4⁠:⁠4.

(5) Orea ena taravatu hegeregerena orea taudia ese kara goeva idia badinaia, badina be Iehova be helaga.​—⁠1 Pet. 1:​15, 16; 1 Kor. 5:​9-13.

(6) Idia ese Baibel ia perovetalaia gaukarana idia karaia goadagoada: Dirava ena Basileia ena sivarai namona be tanobada ibounai dekenai idia harorolaia, bese iboudiai hadibadia totona.​—⁠Mat. 24⁠:14.

(7) Ena be orea taudia idia goevadae lasi, to idia ese Dirava ena lauma ena huahua idia havaraia​—⁠lalokau, moale, maino, haheauka, hebogahisi, kara maoromaoro, abidadama, manau, boga-auka​—⁠unai kara idia goadalaia dainai idia idau, tanobada taudia oredia hegeregeredia lasi.​—⁠Gal. 5⁠:​22, 23; Ioane 13⁠:35.

Iehova ena orea be edena bamona ita matauraia diba?

1 Kor. 10:31: “Gau ibounai do umui karaia Dirava hanamoa totona.”

Heb. 13:17: “Umui idia hakaua taudia do umui kamonai henia, bona edia hereva do umui badinaia. Badina be idia ese umui emui lauma idia naria noho nega ibounai. Gabeai idia ese Dirava ena vairanai edia gaukara ibounai ena anina do idia gwauraia hedinarai.”

Iak. 1:22: “Inai hereva do umui badinaia danu: Umui kamonaia kava lasi.”

Tito 2:11, 12: “Ita diba, Dirava ese iena hariharibada ia hedinaraia vadaeni, taunimanima ibounai do ia hamauria totona. Bona inai hariharibada ese ita ia hadibaia noho, Dirava negea kara bona lebulebu kara do ita rakatania. Ita ia hadibaia danu, do ita noho namonamo, do ita kara maoromaoro, bona Dirava do ita matauraia.”

1 Pet. 2:17: “Keristani taudia ibounai do umui lalokau henia.”