Peroveta Herevadia

Anina: Dirava ese ena lauma amo ia havaradia herevadia; unai hereva amo iena ura bona iena palani ia hahedinaraia. Peroveta herevadia haida be nega vairai do idia vara gaudia herevadia; haida be Dirava ena taravatu herevadia, bona ma haida be Dirava ena oda herevadia eiava ena hahemaoro herevadia.

Edena peroveta herevadia, Baibel lalonai idia torea herevadia, edia anina idia vara vadaeni?

Unai hereva haida itaia totona, inai sinado badadia “Baibel,” “Dina Gabedia,” bona “Dina bona Lagani Edia Namba” oi itaia.

Baibel ena peroveta herevadia badadia haida, edia anina idia do vara lasi herevadia, be dahaka dahaka?

1 Tes. 5:3: “Inai bamona hereva, ‘Maino bona gari lasi ita noho inai,’ taunimanima idia gwauraia noho neganai, karaharaga hisihisi dika momokani bona mase do ia ginidae! Rogorogo hahine ese mara ena hisihisi ia davaria haraga bamona unai hisihisi do ia ginidae. Bona unai taunimanima do idia roho mauri diba lasi.”

Apok. 17:16: “Dagedage gauna mai ena doana 10, oi itaia vadaeni gaudia ese ariara hahine [Babulono Badana] do idia badu henia. Do idia hadikaia momokani, iena dabua do idia kokia, kopina kavakava do idia rakatania. Vadaeni iena tauanina do idia ania, bona lahi dekenai do idia gabua.”

Esek. 38:​14-19: “Gog ba hamaoroa, baoto, Ḡaubada Iehova na ini e gwau tomamu: Una dina ai egu bese [lauma] Israel e noho namonamomu negana ai, oi na ba tore isi, emu gabu, mirigini kahana gabu daudaudia, amo baoma, oi bona bese momo oi ida . . . Ḡaubada Iehova ma e tomu, A una dina ai, Gog ese Israel tanona ituari-henina bainema dinana ai, egu badu baine vara. Badina be egu vaḡeḡe ai bona egu badu ḡaraḡara ai na gwaumu.”

Dan. 2:44: “Guba Diravana ese basileia ta baine haginia . . . Ia ese unu basileia iboudiai na baine hamakohidia sisisisi bona baine hadokodia, bena baine gini hanaihanai.”

Esek. 38:23: “Egu herea-dae bona egu helaḡa baina hahedinaraidia, bona bese momo vairadiai sibogu baina hahedinarai. Bena idia bae diba lau na Iehova.”

Apok. 20:​1-3: “Vadaeni aneru ta lau itaia, guba dekena amo ia diho. Iena imana dekenai guri dobu masemase ena ki ia dogoatao, bona auri seini badana ta danu. Inai aneru ese unai huala, unai idaunegai gaigaina, ma iena ladana be ‘Diabolo’ bona ‘Satani’, ia dogoatao, seini dekenai ia guia. Vadaeni do ia guia noho ela bona lagani 1,000 idia ore. Aneru ese huala unai guri dobu masemase lalonai ia negea diho. Vadaeni unai guri ia lokaia, bona koua toana ia karaia. Satani be unai bamona ia koua, tanobada bese do ia koia diba lasi totona, lagani 1,000 lalonai. Unai lagani 1,000 idia ore neganai idia ese Satani ma do idia ruhaia lou nega sisina sibona.”

Ioane 5:​28, 29: “Inai kara dekenai do umui hoa lasi. Badina be nega ta do ia mai, mase guria gabu dekenai idia noho taudia ibounai ese iena gadona do idia kamonai. Vadaeni guria gabu dekena amo do idia toreisi, kara namo taudia ese do idia toreisi mauri hanaihanai totona, to kara dika taudia do idia toreisi kota henia totona.”

Apok. 21:​3, 4: “Gado ta lau kamonai, helai gabuna badana dekena amo ia mai, ia hereva badabada, ia gwau, ‘Harihari Dirava ena noho gabuna be taunimanima edia huanai do ia noho, bona idia be iena bese taudia do idia lao. Dirava be idia danu do ia noho, bona ia be edia Dirava do ia lao. Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.’ ”

1 Kor. 15:​24-28: “Unai murinai dokona do ia ginidae, vadaeni Keriso ese . . . Dirava ena Basileia Tamana Dirava ena imana dekenai do ia atoa. . . . To Dirava ese gau ibounai Keriso henunai ia atoa murinai, Natuna ese sibona Dirava henunai do ia atoa. Oibe, Dirava, gau ibounai Keriso henunai ia atoa Diravana, be unai neganai gau ibounai edia biaguna momokani do ia lao.”

Dahaka dainai Keristen taudia ese Baibel ena peroveta herevadia idia laloa bada be namo?

Mat. 24:42: “Unai dainai do umui naria, badina be umui emui Lohiabada do ia mai negana be umui diba lasi.”

2 Pet. 1:​19-21: “[Ororo dekenai Iesu ena toana ia senisi neganai ia vara gauna dainai] ai daradara lasi momokani, to ai diba peroveta taudia edia hereva be momokani. Umui danu peroveta taudia edia hereva do umui badinaia be namo. . . . Badina be peroveta hereva gunadia be tau ta ese sibona ena ura dekenai ia gwauraia lasi. Lasi momokani. To Lauma Helaga ese helaga taudia ia hasiahua momokani dainai, idia ese Dirava ena hereva idia gwauraia.”

Her. 4:18: “Kara maoromaoro taudia edia dala na daba matana na heto; diarina na e bada e laomu ela bona dina e taramu.”

Mat. 4:4: “Aniani sibona dekena amo taunimanima do idia mauri lasi, to Dirava ena uduna dekena amo idia mai hereva ibounai ese mauri idia henia.” (Anina be iena peroveta herevadia namodia danu.)

2 Tim. 3:16: “Buka Helaga ena hereva ibounai be Dirava ena Lauma ese ia havaraia. Bona inai hereva be mai ena siahu, hereva momokani ita dekenai do ia hadibaia. Ia be mai ena siahu danu iseda kara dika do ia hedinaraia, iseda kerere do ia hamaoromaoroa, bona mauri dala maoromaorona ita dekenai do ia hadibaia.” (Unai dainai Dirava ena Buka Helaga ena hereva ibounai ita stadilaia namonamo be namo.)

Bema Ta Ia Gwau​—⁠

‘Umui kerere, badina be peroveta herevadia umui laloa momo dainai. Bema Keriso umui abia dae emui Hahemauri Tauna bona bema Keristen mauri dalana namona umui badinaia, unai be hegeregere’

Reana inai bamona oi haere henia diba: ‘Momokani Iesu ena hahemauri karana ita laloa bada be namo. To inai oi diba a: Iuda taudia ese ia idia abia dae lasi, badina be peroveta herevadia idia tahua namonamo lasi dainai?’ Bena reana ma oi gwau: (1) ‘Peroveta herevadia Heberu Revarevadia lalodiai idia torea ese idia hahedinaraia, Mesia (Keriso) be edena negai do ia hedinarai bona dahaka do ia karaia. To Iuda taudia momo ese unai peroveta herevadia idia laloa lasi. Sibodia edia lalohadai hegeregeredia idia gwau Mesia be inai bamona o unai bamona do ia karaia, bona unai dainai Dirava ena Natuna idia dadaraia. (Rau 211 itaia, inai sinado “Iesu Keriso” henunai.)’ (2) ‘Iseda nega lalonai Keriso be guba dekenai ia lohia matamaia vadaeni, bona bese iboudiai ia hapararadia noho, taunimanima haida do ia hamauridia totona bona haida do ia hamasedia ore totona. (Mat. 25⁠:​31-33, 46) To taunimanima momo herea ese gau idaudia idia tahua noho.’

Eiava inai bamona oi hereva diba: ‘Momokani, ita be Keristen taudia namodia hegeregeredia ita noho be gau badana. To bema lau ese Iesu ena hereva haida mo sibodia lau badinaia bona ena be ia gwau gau ta be iseda mauri lalonai do ita tahua guna be namo to lau ese unai gau lau laloa lasi, lau be Keristen tauna namona lasi, ani? . . . Mani iena hereva Mataio 6⁠:33 dekenai oi laloa.’ Bena reana ma oi gwau: ‘Iesu ese ita ia hadibaia unai Basileia totona do ita guriguri ani? Ia gwau do ita gurigurilaia guna, gabeai Dirava do ita noia, iseda dika do ia gwauatao badina be iseda Hahemauri Tauna Iesu ita abidadama henia dainai. (Mat. 6⁠:​9-12)’