Hereva Ena Namo Hahedinaraia

HEREVANA tau ta eiava taunimanima hutuma oi hereva henia, namo lasi oi laloa oi herevalaia gauna oi ura henia dainai kamonai taudia ese idia ura henia danu. Oi herevalaia gauna be mai anina bada, to bema ena namo oi hahedinaraia lasi, kamonai taudia do idia hesiku haraga.

Unai be Kingdom Hall dekenai ia vara diba danu. Reana guna idia kamonaia lasi haheitalai eiava ekspiriens oi gwauraia neganai idia ura kamonai. To idia diba vadaeni gaudia oi herevalaia neganai reana idia kamonai lasi, bona bema oi herevalaia namonamo lasi gau ma haida idia laloa haraga. Namona be idia oi durua, edia mauri lalonai oi herevalaia gauna amo namo idia davaria ena badina bona dalana idia itaia totona.

Baibel ese ita ia hagoadaia aonega namona ita gaukaralaia. (Aon. 3:21) Iehova ese Ioane Bapatiso ia gaukaralaia taunimanima dekenai ‘aonega do ia henia’ totona. (Luka 1:17) Unai aonega be Iehova gari henia karana amo ia vara. (Sal. 111:10) Unai aonega idia laloa bada taudia be unai aonega ese ia durua hari mauri lalonai idia kwalimu bona mauri korikorina, mauri hanaihanai, do idia abia.​—1 Tim. 4:8; 6:19.

Emu Hereva Ena Namo. Bema oi ura emu hereva be mai ena namo kamonai taudia dekenai, do oi herevalaia gauna sibona lasi to kamonai taudia danu oi laloa be namo. Oi laloa lasi idia be hutuma sibona. Unai hutuma lalonai be taunimanima ta ta bona famili idauidau idia noho. Reana haida be maragidia, memero kekeni, taunimanima badadia, bona reana haida idia buruka. Reana haida be kamonai matamata taudia bona haida be oi do vara lasi neganai Iehova idia hesiai henia vadaeni. Reana haida be lauma dalanai idia goada; haida be reana tanobada ena lalohadai bona kara ese idia do veria noho. Oi sibona oi nanadaia: ‘Edena dala ai do lau herevalaia gauna ese kamonai taudia ia durua? Edena bamona idia lau durua diba idia lalo-parara totona?’ Reana oi ura ita gwauraia vadaeni taudia edia orea tamona eiava rua sibona oi laloa. To, idia ma haida oi laloaboio vaitani lasi.

Bema Baibel ena hadibaia hereva badana ta do oi herevalaia be edena bamona? Edena dala ai unai hadibaia herevana idia abia dae vadaeni taudia dekenai emu hereva be mai ena namo? Edia abidadama unai hadibaia herevana dekenai oi hagoadaia toho. Edena dala ai? Unai gauna idia hamomokania Baibel siridia oi herevalaia. Unai Baibel ena hadibaia herevana dekenai edia laloa bada karana oi habadaia diba danu. Unai ia vara totona oi hahedinaraia edena dala ai inai hadibaia herevana be Baibel ena hereva momokanidia ma haida bona Iehova ena kara ida ia hegeregere. Haheitalai​—bema mai dalana idia vara momokani ekspiriens​—amo oi hahedinaraia edena dala ai unai hadibaia herevana ese taunimanima ia durua bona edia lalohadai vaira negana dekenai ia haidaua.

Idia badinaia daladia be emu hereva ena dokona lalonai oi gwauraia sisina sibona lasi. Namona be emu hereva ena matamana amo, kamonai taudia ta ta idia laloa “inai be lau totona.” Unai oi karaia murinai, hereva badadia ta ta lalonai badinaia daladia oi hahedinaraia, bona hereva dokona lalonai danu.

Badinaia daladia oi gwauraia neganai, oi hamomokania oi karaia dalana be Baibel ena hakaua herevadia ida ia hegeregere. Unai ena anina be dahaka? Anina be mai lalokau bona hebogahisi ida oi karaia. (1 Pet. 3:8; 1 Ioa. 4:8) Ena be aposetolo Paulo ese Tesalonika dekenai idia vara hekwakwanai aukadia ia herevalaia, to unuseniai idia noho Keristani tadikaka bona taihu be lauma dalanai idia goada idia lao ia herevalaia danu. Bona ia hahedinaraia ia diba idia ura ia herevalaia gauna lalonai kara namo idia karaia. (1 Tes. 4:​1-12) Unai be haheitalai namona!

Emu hereva ena badina be ma haida oi hagoadaia sivarai namona harorolaia bona hadibaia gaukarana idia karaia totona, a? Unai hahenamo dekenai edia ura bada bona laloa bada karana oi habadaia. To unai oi karaia lalonai, oi laloatao taunimanima ta ta ese unai idia karaia diba ena bada be idauidau, bona Baibel ese unai ia laloa. (Mat. 13:23) Idia hegeregere lasi lalohadaina amo emu tadikaka oi hametaua lasi. Heberu 10:24 ese ita ia hagoadaia: “Lalokau dekena amo kara namodia do umui karaia.” Bema lalokau ita habadaia, lalohadai maorodia dainai kara ta do idia karaia. Iboudiai edia kara do idia tamona lalohadaina oi habadaia lasi, to oi laloatao Iehova ia ura ia ita “abidadama henia bona kamonai henia” karadia ita habadaia. (Roma 16:26) Unai ita laloatao dainai, sibona eda bona iseda tadikaka edia abidadama ita habadaia toho.

Ma Haida Oi Durua Hereva Ena Namo Idia Itaia Totona. Ma haida oi haroro henia neganai, sivarai namona ese ia havaraia namo oi hahedinaraia. Unai totona teritori dekenai idia noho taudia idia laloa gaudia oi laloa. Unai be edena bamona oi diba? Reidio eiava televisen amo niusi oi kamonai. Niuspepa ena rau ginigunana oi itaia. Danu, taunimanima oi hagoadaia edia lalohadai idia gwauraia totona, bona edia hereva oi kamonai. Reana oi itaia idia be hekwakwanai badadia dainai idia hekwarahi​—hegeregere moni gaukara idia haboioa, rent monina idia henia be auka, idia gorere, ruma bese tauna ta ia mase, taravatu utua karadia idia vara, siahu tauna ta ena kara ia gageva, ta ena headava ia dika, natudia maragidia idia biagua be auka, bona unai bamona gaudia ma haida. Baibel ese idia ia durua diba, a? Oibe.

Herevahereva oi hamatamaia neganai, reana do oi herevalaia gauna oi diba. To, bema ruma tauna ese ia hahedinaraia gau ma ta ia laloa bada, unai oi herevalaia be namo bema oi karaia diba, eiava oi gwau do oi giroa bona heduru herevadia oi mailaia. Momokani, ita ura lasi ‘haida edia gau ita herevalaia kava,’ to Baibel ese ia henia sisiba ita hahedinaraia mai moale ida. (2 Tes. 3:11) Oibe, taunimanima edia mauri dekenai mai anina bada Baibel ena sisiba ese edia lalona ia veria.

Bema taunimanima be ita harorolaia sivaraina ese idia ia durua dalana idia itaia lasi, do idia herevahereva daudau lasi. Ena be eda hereva idia koua lasi, to bema ita herevalaia gauna ena namo ita hahedinaraia lasi, ita harorolaia sivaraina ese reana edia mauri do ia haidaua lasi. To, bema ita harorolaia sivaraina ena namo ita hahedinaraia goevagoeva, iseda herevahereva ese edia mauri ia haidaua momokani diba.

Baibel stadi oi karaia lalonai, umui stadilaia gaudia idia badinaia daladia oi hahedinaraia noho. (Aon. 4:7) Stiuden taudia oi durua, Iehova ena dala badinaia karana idia hahedinaraia Baibel ena sisiba, hakaua herevadia, bona haheitalai idia lalo-pararalaia totona. Unai bamona idia karaia ena namo oi hahedinaraia. (Isa. 48:​17, 18) Unai ese stiuden taudia ia hagoadaia, edia mauri do idia haidaua. Idia dekenai Iehova lalokau henia karana bona ia idia hamoalea urana oi habadaia, bona Dirava ena Hereva ena sisiba badinaia urana be sibona edia lalona amo ia vara be namo.