Peroveta Taudia Tohotohoa​—Hosea

1. Nega haida edena bamona oi sibona oi henanadai?

¹ Iehova ena hariharibada bona hebogahisi oi laloa dobu neganai, reana oi sibona oi henanadai: ‘Iehova lau hesiai henia totona, dahaka gau haida lau karaia be namo?’ (Sal. 103:2-4; 116:12) Hosea be Iehova ena oda ia badinaia totona, gau haida ia karaia danu. Edena dala ai Hosea ita tohotohoa diba?

2. Edena dala ai Hosea ena haheitalai ita tohotohoa bena haroro gaukara ita goadalaia?

² Nega Dikadia ai Haroro: Hosea be Israela ena iduhu ten basileiana ai ia haroro momo, badina unuseniai momo be Dirava momokanina idia tomadiho henia lasi. King Ieroboama II be Iehova ena vairanai ia kara dika, bona ia be boromakau ia tomadiho henia​—⁠Ieroboama I ena dala ia badinaia. (2 Kin. 14:23, 24) Israela ena king ma haida danu be tomadiho koikoi idia goadalaia ela bona lagani 740 B.C.E. ai unai basileia dekenai dika ia vara. Ena be tomadiho koikoi ia bada, to Hosea be lagani 59 bamona lalonai peroveta gaukarana ia goadalaia. Ita danu be hanaihanai ita haroro, herevana taunimanima idia kamonai lasi o idia dagedage, a?​—⁠2 Tim. 4:2.

3. Edena dala ai Hosea ena sivarai ese ia hahedinaraia, Iehova ena hebogahisi be bada?

³ Iehova Ena Hebogahisi Laloa Noho: Iehova ese Hosea ia hamaoroa ‘ariara hahine ta do ia adavaia.’ (Hos. 1:2) Hosea ena adavana, Gomere be natuna ta ia havaraia, to gabeai ariara hahine ai ia lao bona natuna rua ma ia havaraia. Hosea ese adavana ena dika ia gwauatao hegeregerena, gwau-edeede Israela taudia idia helalo-kerehai neganai, Iehova ese ia hebogahisi henidia. (Hos. 3:1; Roma 9:22-26) Taunimanima idauidau dekenai Iehova ena hebogahisi karana ita hahedinaraia totona, dahaka gau haida ita karaia be namo?​—⁠1 Kor. 9:19-23.

4. Iehova ita hesiai henia totona, dahaka gau haida ita karaia diba?

⁴ Iehova ena hesiai taudia haida be pei bada gaukarana idia rakatania, haroro gaukara idia habadaia totona. Ma haida be Basileia idia atoa guna dainai, idia headava lasi o natuna idia havaraia lasi. Reana Hosea ena sivarai ita laloa neganai, ita gwau, ‘Hosea bamona lau karaia diba lasi.’ To, Iehova ena hebogahisi hereadaena ita laloa bada bona ena lauma helaga dekenai ita tabekau neganai, Dirava be ita do ia gaukaralaia, Hosea ia gaukaralaia bamona.​—⁠Mat. 19:26; Fili. 2:13.