Satana Diabolo

Anina: Lauma ta, Dirava korikori Iehova bona ia idia tomadiho henia taudia iboudiai edia inai tauna badana unai. Ena ladana idia hatoa Satana badina ia ese Iehova ia inai henia dainai. Satana idia gwauraia Diabolo danu, badina ia be Dirava ena ladana hadikaia tauna badana. Baibel ese Satana ia gwauraia idaunegai gaigaina, badina Eden lalonai gaigai ena uduna amo ia hereva Eva ia koia totona, unai dainai “koikoi tauna” idia gwauraia “gaigai.” Apokalupo lalonai Satana idia gwauraia huala badana, taunimanima ia anidia ore gauna.

Edena dala amo ita diba unai bamona lauma tauna ta be momokani ia noho?

Baibel amo unai ita diba goevagoeva. Nega momo Baibel ese ena ladana Satana bona Diabolo ia gwauraia. Satana ia itaia vadaeni tauna ta ena hereva be Baibel lalonai ia noho danu. Unai be daika? Iesu Keriso unai, tanobada dekenai ia do mai lasi neganai guba dekenai ia noho tauna; nega momo unai dika tauna ia gwauraia bona ena ladana ia hatoa danu.​—⁠Luka 22:31; 10:18; Mat. 25:41.

Satana Diabolo ena sivarai Baibel lalonai be mai anina korikori. Dika bada be tanobada taudia dekenai ia vara, unai dika ena bada ese edia lalo-dika ena bada ia hanaia momokani. Ena be taunimanima momo herea idia ura maino, to lagani tausen momo lalodiai, badu, dagedage, bona tuari ese taunimanima idia hadikadia, bona unai kara idia bada idia lao dainai, taunimanima iboudiai idia hadikadia ore gwauraia. Satana ena vara dalana bona ena kara edia sivarai Baibel lalonai ese unai dika iboudiai edia badina idia hahedinaraia goevagoeva.

Bema Diabolo be lasi, taunimanima ese iena sivarai Baibel lalonai bema idia abia dae neganai, unai ese do ia hanamodia hanaihanai lasi. To, taunimanima momo, guna babalau bona meamea karadia idia karaia eiava unai kara idia karaia taudia edia heduru idia tahua taudia, idia gwau unai neganai idia lalo-metau, badina be idia itadia diba lasi laumadia edia “gado” idia kamonai, bona unai lauma goada hereadia ese idia “bolodia” dainai. To Satana ena sivarai Baibel lalonai idia dibaia, bona Baibel ena sisiba herevadia, babalau bona meamea karadia taravatulaia herevadia, idia badinaia bona guriguri amo Iehova ena heduru idia tahua neganai, edia lalo-metau ia ore.​—⁠Rau 43-8 itaia, inai sinado “Babalau, Meamea” henunai.

Haida idia laloa Satana be mai doana, mai iuna, bona imana ai foka latana ia dogoatao bona hel lahina lalonai taunimanima ia gabudia. To, ena be ita abia dae Satana be ia mauri noho, to unai bamona ita laloa be kerere, badina be Baibel ese unai bamona ia gwauraia lasi. Laulau torea taudia ese unai bamona lalohadai idia abia Greek taudia edia dirava koikoina Pan ena laulau amo, bona Italy tauna ladana Dante Alighieri ese ia torea bukana ladana Inferno amo danu. Baibel ia gwau lasi hel be lahi gabuna, to ia hahedinaraia goevagoeva ‘mase taudia be gau ta idia diba lasi.’​—⁠Koh. 9⁠:⁠5.

Reana Satana be dika ena siahu sibona, taunimanima lalodiai ia noho siahuna, a?

Iobu 1:​6-12 bona Iobu 2:​1-7 ese Iehova Dirava bona Satana idia herevahereva heheni sivaraina idia gwauraia. Bema Satana be taunimanima lalodiai ia noho dikana, anina be unai negai unai dika be Iehova lalonai ia noho. To unai bamona hereva be Baibel ena hereva ma haida hegeregeredia lasi, badina ia gwau Iehova ‘lalonai kara dikana ta be lasi.’ (Sal. 92⁠:15; Apok. 4⁠:⁠8) Baibel bukana Iobu be Heberu gado ai ia torea tauna ese inai hereva has·Sa·tanʹ ia torea. Unai amo ia hahedinaraia ia sivarailaia laumana be Dirava ia tuari henia tauna badana.

Luka 4:​1-13 ia gwau Diabolo ese Iesu ia dibagania toho iena ura do ia karaia totona. Unai sivarai ese Diabolo ena hereva bona Iesu ena haere ia gwauraidia. Unai negai Iesu lalonai ia noho dikana ese ia dibagania, a? Unai bamona lalohadai be Baibel ena hereva hegeregerena lasi, badina ia gwau Iesu be mai ena kara dika lasi. (Heb. 7⁠:26; 1 Pet. 2⁠:22) Ena be Ioane 6⁠:70 (BH) ai Iuda Iskariote ena kara dika dainai ia gwauraia diabolo (Greek gado, di·aʹbo·losʹ), to Luka 4⁠:3 (BH) ai inai Greek gado herevana, ho di·aʹbo·los (Diabolo) ia torea, tau ta ena kara gwauraia totona lasi to unai tau gwauraia totona.

Haida ese Diabolo idia samania, sibodia edia kerere ena davana do idia abia lasi totona, a?

Taunimanima haida, ena be kara ta be idia ese idia karaia, to idia gwau Diabolo ese ia karaia. To Baibel ese ia hahedinaraia, taunimanima ese idia davaria hisihisidia momo be taunimanima ma haida edia kara dainai eiava sibodia edia kara dainai idia davaria. (Koh. 8⁠:9; Gal. 6⁠:⁠7) To, Baibel ese taunimanima edia inai tauna mai siahuna bada, taunimanima edia lalona ia hahisia bada tauna, ena noho bona ena kara ia gwauraia hedinarai. Ia hahedinaraia edena bamona iena siahu henuna amo ita siri diba.

Satana be edeseni amo ia mai?

Iehova ena gaukara iboudiai idia goevadae; kara dika ia havaraia lasi; unai dainai kara dika tauna ta ia havaraia lasi. (Deut. 32⁠:4; Sal. 5⁠:⁠4) Satana ai ia lao tauna be guna Dirava ena lauma natuna goevadaena ta. Iesu ia gwau Diabolo ese hereva momokani ia badinaia noho lasi, unai dainai ita diba gunaguna ia ese ia badinaia. (Ioane 8⁠:44) To, Dirava ese ia havaraia taudia iboudiai hegeregeredia, hari lauma natuna be mai ena ura-kwalimu. Iena ura-kwalimu ia gaukaralaia kerere, iena lalona ai ia hekokoroku, bena ia ura haida ese ia do idia tomadiho henia Dirava idia tomadiho henia hegeregerena. Adam bona Eva edia lalona ia ania ia do idia kamonai henia bona Dirava do idia kamonai henia lasi totona. Unai kara amo ia be sibona Satana ai ia halaoa, badina unai ladana ena anina be “tuari henia tauna.”​—⁠Iak. 1⁠:​14, 15; rau 231 itaia danu, inai sinado “Kara Dika” henunai.

Dahaka dainai Dirava ese Satana ia hamasea ore haraga lasi ia gwau-edeede neganai?

Satana ese inai gau ia hepapahuahulaia: (1) Iehova ena lohia dalana be maoro bona taunimanima ia lohiadia be maoro, eiava lasi? Iehova ese ura-kwalimu, ia amo taunimanima ese moale do idia davaria diba gauna, be idia edia amo ia koua, a? Taunimanima ese sibodia edia mauri do idia naria namonamo bona do idia mauri noho dalana tamona be Dirava do idia kamonai henia, a? Iehova ese taravatu ta ia henidia neganai ia gwau gwau-edeede ese mase do ia havaraia; unai bamona ia hereva neganai ia hereva koikoi a? (Gen. 2⁠:​16, 17; 3⁠:​3-5) Unai dainai reana Iehova be mai ena maoro lasi taunimanima do ia lohiadia, a? (2) Taunimanima bona aneru ese Iehova do idia badinaia momokani, eiava? Adam bona Eva ese Dirava idia rakatania neganai, inai henanadai ia vara: Lalokau dainai Iehova Dirava ena hesiai taudia ese ia do idia badinaia momokani a, eiava reana idia iboudiai ese do idia rakatania bena Satana ena dala do idia badinaia, a? Iobu ena negai Satana ese unai henanadai ia habadaia. (Gen. 3⁠:6; Iobu 1⁠:​8-11; 2⁠:​3-5; ma danu Luka 22⁠:31 itaia.) Unai hepapahuahu bona henanadai koudia totona, gwau-edeede taudia hamasedia sibona be hegeregere lasi.

Dirava ia diba vadaeni dahaka be maoro. To unai hepapahuahu ese guba bona tanobada noholaia taudia edia maino bona edia noho namona do idia hadikaia lou lasi totona, Iehova ese nega taina daudau ia atoa, unai hepapahuahu do ia hadokodia momokani bena ta ese do ia daradaralaidia lou lasi. Adam bona Eva ese Dirava idia gwau-edeede henia murinai idia mase, Dirava ia hereva bamona. (Gen. 5⁠:⁠5) To Dirava bona Satana ese idia hepapahuahulaia gauna be unai sibona lasi. Unai dainai, Dirava ese Satana bona taunimanima nega ia henidia, sibodia do idia lalohadailaia lohia daladia idauidau do idia gaukaralaia toho totona. Unai dala idauidau ta ese noho hanaihanai mainona ia havaraia lasi. Dirava ese taunimanima ia koudia lasi, unai dainai Iena taravatu maorodia idia dadaraia bona sibodia edia ura idia karaia badabada. Edia kara edia huahua ese idia hahedinaraia edia kara be maoro lasi. Baibel ena hereva be momokani, ia gwau: “Taunimanima ena raka na ia sibona ese basine gwauraia hidi.” (Ier. 10⁠:23) Danu, Dirava ese iena hesiai taudia nega ia henidia, do idia hamomokania ia idia badinaia noho. Edia kamonai karana amo unai bamona do idia karaia, herevana hedibagani bona dagedage, Satana ese ia havaraia gaudia, do idia davaria. Iehova ese ena hesiai taudia ia noidia, ia gwau: “Natugu e, ba aonega, lalogu na ba hamoalea, e gwau henigumu tauna baina haere henia totona.” (Her. 27⁠:11) Dirava idia kamonai henia taudia ese hahenamo momo idia davaria hari inai negai, bona edia helaro be mauri hanaihanai mai goevadaena do idia abia. Unai mauri do idia gaukaralaia, iena kara bona iena dala idia ura henia momokani Diravana, Iehova, ena ura karaia totona.

Hari inai nega lalonai Satana be mai ena siahu bada a?

Iesu Keriso ese ia gwauraia “tanobada ena lohia,” tanobada taudia hutuma ese idia kamonai henia tauna. Satana ese edia lalona ia ania Dirava ena taravatu do idia dadaraia totona. (Ioane 14⁠:30; Ef. 2⁠:⁠2) Baibel ese ia gwauraia “inai tanobada ena Dirava,” inai tanobada idia badinaia taudia be edia tomadiho karadia amo idia hanamoa diravana.​—⁠2 Kor. 4⁠:4; 1 Kor. 10⁠:20.

Satana Diabolo ese Iesu Keriso ia dibagania toho neganai, “ia hakaua daekau nega sisina lalonai tanobada ena basileia ibounai ia hahedinarai henia. Satani ia gwau, ‘Oi dekenai siahu do lau henia, inai gau ibounai do oi naria, vadaeni ladana bada do oi abia. Inai gau ibounai be lauegu, bona lau ura henia tauna dekenai do lau henia diba. Unai dainai, bema oi tomadiho henia lau dekenai, inai gau ibounai be do oi abia oiemu.’ ” (Luka 4⁠:​5-7) Apokalupo 13⁠:​1, 2 ese ia hahedinaraia Satana ese ‘siahu, helai gabuna badana bona goada bada herea’ tanobada ena politikol oreadia ia henidia. Daniel 10⁠:​13, 20 ese ia hahedinaraia Satana be mai ena basileia lohiadia, lauma dikadia unai, idia ese tanobada ena basileia badadia idia biagudia. Efeso 6⁠:12 ese ia gwauraidia ‘gaubada hereadia, siahu taudia, tanobada ena dibura lohiadia, bona lauma dikadia guba gabudia ai.’

Unai dainai 1 Ioane 5⁠:19 ia gwau: “Satani ese tanobada taudia ibounai ia gunalaia noho.” To iena siahu do ia noho hanaihanai lasi, bona unai siahu ia do dogoatao noho badina tamona be Siahu Ibounai Diravana, Iehova, ese ia do koua lasi dainai.

Satana ese taunimanima do ia hakaudia kerere ela bona edena negai?

Hari ita be Satana ena tanobada oromana dikana ena nega dokona ai ita noho. Unai oi hamomokania totona, rau 80-3 itaia, inai sinado “Dina bona Lagani Edia Namba” henunai, bona inai sinado badana “Dina Gabedia” danu.

Satana ena siahu dikana hadokoa dalana be aposetolo Ioane ese inai bamona ia gwauraia hedinarai, ia gwau: “Aneru ta lau itaia, guba dekena amo ia diho. Iena imana dekenai guri dobu masemase ena ki ia dogoatao, bona auri seini badana ta danu. Inai aneru ese unai huala, unai idaunegai gaigaina, ma iena ladana be ‘Diabolo’ bona ‘Satani’, ia dogoatao, seini dekenai ia guia. Vadaeni do ia guia noho ela bona lagani 1,000 idia ore. Aneru ese huala unai guri dobu masemase lalonai ia negea diho. Vadaeni unai guri ia lokaia, bona koua toana ia karaia. Satani be unai bamona ia koua, tanobada bese do ia koia diba lasi totona, lagani 1,000 lalonai. Unai lagani 1,000 idia ore neganai idia ese Satani ma do idia ruhaia lou nega sisina sibona.” (Apok. 20⁠:​1-3) Unai murinai dahaka do ia vara? “Satani, idia ia koia tauna, be lahi bona salifa gohuna lalonai Dirava ese ia negea diho.” (Apok. 20⁠:10) Unai ena anina be dahaka? Apokalupo 21⁠:8 ia haere, ia gwau: “Inai be mase iharuana.” Do ia boio ela bona hanaihanai!

“Guri dobu masemase lalonai ia negea diho,” anina be Satana be taunimanima idia noholaia lasi tanobadana dekenai do ia noho bona unai lagani 1,000 lalodiai taunimanima do ia dibaganidia diba lasi, a?

Unai lalohadai hamomokania totona, taunimanima haida ese Apokalupo 20⁠:3 idia gwauraia. Idia gwau unai “guri dobu masemase” ese do ia noho kava tanobadana ia laulaulaia. Unai be momokani, a? Apokalupo 12⁠:​7-9, 12 ese ia hahedinaraia aneru ese Satana guri dobu masemasena lalonai ia do negea lasi neganai, Satana be “idia negea diho” tanobada ai, bena unuseniai taunimanima edia hisihisi ia habadaia. Unai dainai, Apokalupo 20⁠:3 ena hereva, Satana be “guri dobu masemase lalonai ia negea diho” herevana, ena anina be ia noholaia vadaeni gabunai tanobada kahirakahira dekenai do ia noho lasi, to unai gabu amo do idia kokia “tanobada bese do ia koia diba lasi totona, lagani 1,000 lalonai.” Mani oi laloa, Apokalupo 20⁠:3 ia gwau, unai lagani 1,000 do idia ore neganai Satana be unai guri dobu masemasena amo do idia ruhaia; tanobada besedia unai guri amo ruhadia herevana ia gwauraia lasi. Satana do idia ruhaia neganai, tanobada dekenai taunimanima do ia davaridia, guna idia be unai bese idauidau taudia.

Taunimanima haida ese Isaia 24:​1-6 bona Ieremia 4:​23-29 edia hereva idia gwauraia edia lalohadai idauna hamomokania totona. Isaia ia gwau: “A itaia, Iehova ese tanobada baine havahua, tano ḡaḡaena ai baine halaoa . . . Tanobada na baine havahua vaitani bona baine habuaia tari ḡuḡuru, badina be Iehova ese ina hereva vada e gwauraia.” Ieremia ia gwau: “Tanobada na itaia, vada e vahu bona asi anina . . . Na roha lao, tau ta asina itaia . . . Badina be Iehova ini e gwau tomamu: Tano idoinai baine hahevahura . . . Hanua iboudiai e heautanidiamu, lalodiai tau ta se nohomu.” Unai peroveta herevadia edia anina be dahaka? Edia anina be Ierusalem bona Iuda tanona dekenai ia vara guguru guna. Iehova ese unai taudia ia panisidia totona, Babulono taudia ia koudia lasi, tuari totona edia tano ai idia vareai neganai. Gabeai unai gabu ia dika bona taunimanima idia noholaia lasi. (Ieremia 36⁠:29 itaia.) To unai negai Dirava ese tanobada ibounai amo taunimanima ia kokia lasi, bona hari inai negai danu unai bamona do ia karaia lasi. (Rau 366-9 itaia, inai sinado “Tanobada” henunai, bona inai sinado badana “Guba” danu.) To, do ia haorea vaitani gaudia be inai: Kamonai lasi Ierusalem ese ia laulaulaia gauna, Kerisendom, ena kara dika amo Dirava ena ladana ia hadikaia gauna, bona Satana ena tanobada oreana ena orena ibounai danu.

Keriso ena Lohia Laganidia 1,000 lalodiai, Satana be guri dobu masemasena lalonai idia koua noho negana lalonai, tanobada do ia noho kava lasi, to ia be paradaiso ai do ia lao. (Inai sinado badana “Paradaiso” itaia.)