Iehova Ena Ura Badinaia

“Oi ia badinaia tauna be oi [Iehova] ese ia do oi badinaia.”​—2 SAMUEL 22:26.

1. Taunimanima be Iehova ena ura idia badinaia neganai ia ese idia dekenai dahaka ia karaia?

IEHOVA ese iena taunimanima ia durudia bada to unai heduru dainai davana ita henia diba lasi. (Salamo 116:12) Lauma dalanai bona tauanina dalanai iena heduru bona iena hebogahisi karadia be namo momokani! Idau negai Israel ena Pavapava David ia diba bema taunimanima be Dirava ena ura idia badinaia Dirava be idia edia ura ia badinaia danu. David ese unai ia herevalaia ia karaia anena lalonai, ia gwau: “Iehova ese David ena inai taudia iboudiai edia imana amo bona [Pavapava] Saulo ena imana amo ia hamauria.”​—2 Samuel 22:1.

2. David ena ane 2 Samuel karoa 22 dekenai ena hereva badadia haida be dahaka?

² David ese ena ane ena hereva ginigunadia lalonai (Salamo 18 ena hereva hegeregerena) ia ese Iehova ia hanamoa, ia gwau guriguri haerelaia neganai ia be ‘Hahemauri tauna.’ (2 Samuel 22:​2-7) Iena guba dubuna dekena amo, Dirava ese kara ta ia karaia iena hesiai tauna idia inai henia siahu bada taudia amo ia hamauria totona. (2Sa 22 Siri 8-19) David be kara maoromaoro dalana ia tahua bona Iehova ena dala ia badinaia dainai hahenamo ia abia. (2Sa 22 Siri 20-27) Murinai, Dirava ese ia henia goadana dekena amo ia karaia gaudia ia gwauraia hedinarai. (2Sa 22 Siri 28-43) Hereva dokona lalonai, David ia gwau taunimanima edia tuari amo bona idau bese taudia edia amo Dirava ese ia hamauria bona Iehova ia tanikiu henia “kwalimu badana Ia ese ena pavapava ia henia bona ia horoa tauna ia ese ia hebogahisi henia” dainai.” (2Sa 22 Siri 44-51) Bema ita be kara maoromaoro dalana ita tahua bona Iehova dekenai ita tabekau goada ita abia totona ia ese ita do ia hamauria.

Dirava Ena Ura Badinaia Karana Ena Anina

3. Bible ena hereva dekenai, Dirava ena ura badinaia ena anina be dahaka?

³ David ena hahemauri hereva ena anena ese ita dekenai inai hagoadaia hereva ia henia: “Oi ia badinaia tauna be oi [Iehova] ese ia do oi badinaia.” (2 Samuel 22:26) Hebrew adjective hereva cha·sidhʹ ena anina be kara “ia badinaia tauna,” eiava ‘mai hebogahisi lalokau tauna.’ (Salamo 18:​25) Noun herevana cheʹsedh ena anina be hebogahisi mai lalokau karana be gau ta dekenai ia noho ela bona ena ura unai gauna dekenai ia hagugurua. Iehova ese iena hesiai taudia dekenai unai bamona hebogahisi karana ia hahedinaraia, idia ese ia dekenai idia hahedinaraia hegeregerena. Unai kara maoromaoro, helaga badinaia karana idia gwauraia ‘lalokau hebogahisina’ bona ‘lalokau amo badinaia.’ (Genese 20:13; 21:23) Greek Revarevadia lalonai, noun herevana ho·si·oʹtes bona adjective herevana hoʹsi·os ese idia hahedinaraia “badinaia” ena anina haida be helaga bona gari henia karadia. Unai badinaia karana lalonai abidadama bona lalokau henia karadia idia noho bona ena anina be Dirava ita tomadiho henia bona ia dekenai kara iboudiai do ita karaia namonamo. Iehova ena ura ita badinaia ena anina be mai lalokau henia bada karana danu ia dekenai ita tabekau noho.

4. Iehova ese sibona ena kara ia badinaia be edena bamona ia hahedinaraia?

⁴ Iehova be dala idauidau dekenai ia ese ena kara badinaia dalana ia hahedinaraia. Hegeregere, ia ese kara dika taudia dekenai hahemaoro karana ia karaia, badina ia ese ena taunimanima ia lalokau henidia bona kota maoromaoro bona kara maoromaoro ia ura henia. (Apokalupo 15:​3, 4; 16:5) Iena gwauhamata herevana Abraham dekenai ia badinaia dainai Israel taudia dekenai ia haheauka. (2 Hanua Pavapavadia 13:23) Dirava ena ura idia badinaia taudia idia diba Dirava dekena amo heduru idia abia noho ela bona idia mase bona murinai idia do ia lalodia tao. (Salamo 37:​27, 28; 97:10) Iesu be goada ia abia badina ia diba ia be Dirava “matauraia” tauna badana, bona ia diba Dirava ese mase guri dekenai do ia rakatania lasi.​—Salamo 16:10; Kara 2:​25, 27.

5. Iehova ese sibona ena kara ia badinaia dainai, ia ura iena hesiai taudia edia kara be dahaka, bona dahaka henanadai ita laloa be namo?

⁵ Iehova Dirava ese sibona ena kara ia badinaia dainai, ia ura iena hesiai taudia be iena ura idia badinaia danu. (Efeso 4:24) Hegeregere, kongregesen elda dagina abia totona tatau be Dirava ena ura idia badinaia be gau badana. (Tito 1:8) Namona be dahaka gaudia ese Iehova ena taunimanima idia doria iena ura idia badinaia totona?

Idia Diba Gaudia Dainai Idia Moale

6. Bible amo ita diba gaudia dekenai iseda lalohadai be dahaka, bona unai aonega hereva dekenai dahaka do ita laloatao be gau badana?

⁶ Namona be Bible dekena amo ita diba herevadia dainai ita moale bona ita idia doria Iehova ena ura ita badinaia totona. Aposetolo Paulo ese Timoteo ia hagoadaia, ia gwau: “Oi ese oi abia dae bona oi abidadama henia hereva momokani do oi badinaia namonamo noho. Inai hereva momokani oi dekenai idia hadibaia taudia ibounai oi diba vadaeni, ani? Bona inai danu oi diba vadaeni, oi be mero maragi neganai Buka Helagadia dekenai oi manada vadaeni. Inai Buka Helagadia ese oi dekenai aonega idia henia diba ela bona hahemauri do oi davaria, Keriso Iesu oi abidadama henia dainai.” (2 Timoteo 3:​14, 15) Laloaboio lasi, Dirava ese iena “hesiai tauna mai ena kamonai bona mai ena kara maoromaoro” oreana dekena amo unai aonega ia halasia.​—Mataio 24:​45-47.

7. Dirava ese kamonai hesiai oreana dekena amo lauma aniani ita dekenai ia henia, namona be elda taudia be unai kara dekenai edia lalohadai be dahaka?

⁷ Namona be elda dagina idia abia tataudia idia moale badina Dirava ese kamonai hesiai tauna oreana dekena amo lauma aniani namona ita dekenai ia henia. Lagani haida gunanai, elda taudia be unai kara idia laloa momo lasi. Hahine ta ia gwau unai tataudia be “Gima Kohorona magasin edia hereva idia maumauraia, idia ura lasi idia abia dae ia be . . . Dirava ena dala hereva momokani ia halasia totona, bona hanaihanai haida edia lalona idia ania idia edia lalohadai idia abia dae totona.” To, Dirava ena ura idia badinaia elda taudia be haida edia lalona idia ania lasi Dirava ese kamonai hesiai tauna oreana dekena amo ia halasia lauma aniani haida idia dadaraia totona.

8. Mai ena kamonai bona mai ena kara maoromaoro hesiai oreana ese Bible ena hereva ta ena anina idia halasia neganai, to unai hereva ita abia dae be ia auka, dahaka do ita karaia?

⁸ Ita be Iehova ena gwauhamata Witness taudia dainai, ita ta ta iboudiai ita ura ia dekenai bona iena orea dekenai ita abidadama. Dirava ena diari namona ita rakatania bona Dirava dadaraia taudia ai ita lao be namo lasi momokani, badina unai dala amo lauma dalanai ita mase diba bona gabeai tauanina dalanai do ita mase. (Ieremia 17:13) To edena bamona bema kamonai hesiai oreana ese Bible ena hereva ta ia halasia to ita be unai hereva ita abia dae be ia auka eiava ena anina ita lalo-pararalaia lasi? Bema unai bamona, namona be mai iseda manau danu hereva momokani ita diba dalana ita laloatao, bona ita guriguri aonega dalana amo unai hetoho ita haheaukalaia ela bona hereva ma haida idia halasia unai gauna ena anina idia hahedinaraia goevagoeva totona.​—Iakobo 1:​5-8.

Keristen Tadikaka Oreana Laloa Bada

9. Ioane Ginigunana 1:​3-6 ese edena bamona ia hahedinaraia Keristen taudia idia hebamo heheni be gau badana?

⁹ Iseda kudouna ibounai ida ita moale badina iseda Keristen tadikaka oreana lalonai hebamo heheni karana ia noho dainai, bona unai ese ita ia durua Iehova ena ura ita badinaia totona. Oibe, bema unai lalohadai ita abia lasi, iseda hebamo karana Dirava bona Keriso dekenai be lauma dalanai do ia goada diba lasi. Aposetolo Ioane be horoa Keristen taudia dekenai ia gwau: “Ai ese ai itaia bona ai kamonai gaudia umui ai hamaorolaia noho, umui ese aiemai orea tamona lalonai do umui vareai [“hebamo heheni,” Diaglott] totona. Badina be ai ura Tamana bona iena Natuna Iesu Keriso danu orea tamona taudia do ita lao. . . . Bema ita gwau ita be Dirava ena orea taudia, to dibura lalonai ita raka noho, ita koikoi noho, hereva momokani ita badinaia lasi.” (1 Ioane 1:​3-6) Unai hereva maorona be mai anina Keristen taudia iboudiai dekenai, herevana edia helaro be guba dekenai eiava tanobada dekenai.

10. Ena be Euodia bona Sunutuke idia hapapahuahu bona edia hekwakwanai hanaia dalana be ia auka, to Paulo be unai hahine ruaosi be edena bamona ia lalodia?

¹⁰ Hebamo heheni karana ia noho totona gau badana be ita hekwarahi bada. Hegeregere, Keristen hahinedia Euodia bona Sunutuke be idia hepapahuahu bona unai hekwakwanai idia hanaia be ia auka. Unai dainai Paulo ia sisiba henidia ‘do idia lalo-tamona Lohiabada lalonai.’ Ma ia gwau: “Oi danu, lauegu durua tauna e, inai hahine ruaosi oi durua be namo, badina be idia be lau danu idia gaukara hebou Sivarai Namona totona. Klemento bona lau danu idia gaukara hebou taudia haida danu lau idia durua. Idia edia ladana be Dirava ena mauri buka lalonai idia torea vadaeni.” (Filipi 4:​2, 3) Unai Dirava gari henia hahinedia be Paulo bona ma haida ida idia gaukara hebou “Sivarai Namona” idia harorolaia totona, bona ia diba unai hahinedia “edia ladana be Dirava ena mauri buka lalonai idia torea vadaeni.”

11. Bema Dirava ena ura ia badinaia Keristen tauna be lauma dalanai hekwakwanai ia davaria, namona be dahaka ita laloatao be maoro?

¹¹ Iehova ena orea dekenai edia gaukara dagina eiava Dirava ena ura badinaia karana idia hahedinaraia totona Keristen taudia be toa ta idia hahedokilaia lasi. Bema lauma dalanai idia haida be mai edia hekwakwanai, gunaguna idia be Iehova ena ura idia badinaia karana ita laloaboio be lalokau lasi karana! Reana, idia gwauraia “durua tauna” be Dirava ena ura ia badinaia tadikakana ta bona ia ura dikadika haida ia durudia. Bema oi be elda tauna ta, oi be “durua tauna” ta, bona oi hegaegae noho hebogahisi dalana amo taunimanima oi durudia totona, a? Namona be ita ibounai be orea tamona taudia edia kara namo ita lalodia, Dirava ese ia lalodia bamona, bona lalokau dalana amo ita durudia edia maduna idia huaia totona.​—Galatia 6:2; Heberu 6:10.

Ita Lao Gabuna Ma Ta be Lasi

12. Iesu ena hereva dainai ‘hahediba taudia momo be idia rakatania gaudia dekenai idia giroa lou’ neganai, Petro be dahaka ia karaia?

¹² Iena orea taudia danu Iehova ena ura ita badinaia noho totona, namona be ita laloatao mauri hanaihanai abia gabuna ma ta be lasi. Iesu ena hereva dainai ‘hahediba taudia momo be idia rakatania gaudia dekenai idia giroa lou neganai,’ ia be ena aposetolo taudia dekenai ia gwau: “Umui danu do umui raka siri a?” Petero ia haere henia: “Lohiabada e, ai be daika dekenai do ai lao? Mauri hanaihanai herevadia be oi dekenai idia noho. Ai be ai abidadama henia bona ai diba vadaeni, oi be Dirava ena Helaga Tauna.”​—Ioane 6:​66-69.

13, 14. (a) Keristen ginigunadia edia nega lalonai, dahaka dainai Dirava ese Iuda tomadiho ia lalo-namo henia lasi? (b) Nega daudau lalonai Witness orea dekenai ia noho tauna ta ese Dirava ena tanobada oreana be edena bamona ia herevalaia?

¹³ Keristen ginigunadia edia nega lalonai Iuda tomadiho lalonai “mauri hanaihanai herevadia” be lasi. Unai orea ena kara dika badana be Mesia tauna, Iesu ia dadaraia. Iuda tomadiho idauidau iboudiai be Heberu Revarevadia sibona dekenai idia haginia lasi. Sadukea taudia idia gwau aneru idia noho lasi bona toreisi lou herevana idia abia dae lasi. Ena be Farisea taudia be idia edia hereva haida idia abia dae lasi, to edia kara dika be bada badina edia sene karadia idia badinaia neganai idia be Dirava ena Hereva idia dadaraia. (Mataio 15:​1-11; Kara 23:​6-9) Unai sene karadia ese Iuda taudia ia guidia bona idia momo be Iesu Keriso idia abia dae be ia auka. (Kolose 2:8) Mai goada danu Saulo (Paulo) be ‘gunaguna sene taudia edia kara ia karaia,’ bona lalohadai kerere dekenai ia be Keriso ena hahediba taudia ia dagedage henidia bada.​—Galatia 1:​13, 14, 23.

¹⁴ Dirava ese Iuda tomadiho ia lalo-namo henia lasi, to Iehova ese iena natuna ena hahediba taudia edia orea ia hanamoa​—‘kara namodia idia goadalaia taudia’ unai. (Tito 2:14) Unai orea ia do noho, bona nega daudau unai orea dekenai ia noho Iehova ena Witness tauna ta ia gwau: “Lau dekenai gau ta be mai anina bada, lau ura nega ibounai Iehova ena tanobada oreana danu lau kahirakahira henia noho. Lau tauhau neganai lau lalo-parara taunimanima edia aonega herevadia lau abia dae be namo lasi. Unai lau lalo-pararalaia namonamo neganai, egu lalona lau hadaia momokani abidadama oreana kahirakahira dekenai lau noho totona. Ma dala ta be lasi Iehova ena lalo-namo bona hahenamo abia totona, ani?” Ma gabu ta be lasi Dirava ena lalo-namo bona mauri hanaihanai ita abia totona.

15. Iehova ena tanobada oreana bona unai orea dekenai dagi gaukarana ena maduna idia huaia taudia danu ita gaukara hebou ena badina be dahaka?

¹⁵ Namona be iseda kudouna be ita idia doria Iehova ena orea danu ita gaukara hebou totona, badina ita diba Iehova ena lauma siahuna sibona be unai orea ia hakaua bona unai orea ese iena ladana bona iena ura ia hahedinaraia. Momokani, unai orea dekenai dagi gaukarana ena maduna idia huaia taudia be goevadae lasi taudia. (Roma 5:12) To, “Iehova ena badu be ia bada herea” Aaron bona Miriam dekenai, badina idia ese Mose idia maumauraia, idia laloaboio gauna be Dirava ese Mose dekenai gaukara ia henia, idia dekenai ia henia lasi. (Numera 12:​7-9) Hari inai negai, Dirava ena ura idia badinaia Keristen taudia be gaukara idia “hakaua taudia” danu idia gaukara hebou, badina unai be Iehova ena ura. (Heberu 13:​7, 17) Dirava ena ura ita badinaia ia hahedinaraia dalana ta be Keristen hebou iboudiai dekenai ita lao bona unuseniai haere ita henia karana amo ‘taunimanima ita durudia lalokau bona kara namodia idia karaia totona.’​—Heberu 10:​24, 25.[19]

Haida Oi Hagoadaia

16. Namona be ita ura dahaka ita karaia haida durudia totona, bona unai ese ita ia doria Iehova ena ura ita badinaia totona?

¹⁶ Bema oi ura taunimanima oi hagoadaia unai ese oi ia doria Iehova ena ura oi badinaia totona. Paulo ia torea, ia gwau: “Diba ese hekokoroku ia havaraia noho, to lalokau ese goada ia havaraia noho.” (1 Korinto 8:1) Diba haida ese idia abia taudia edia hekokoroku ia havaraia, unai dainai Paulo ena hereva ena anina danu be lalokau idia hahedinaraia taudia dekenai goada ia vara. Profesa taudia Weiss bona English idia torea bukana lalonai, ia gwau: “Lalokau ia hahedinaraia diba tauna be taunimanima ese ia idia lalokau henia danu. Mauri ena kara ibounai dekenai kara namo bona hemataurai ia hahedinaraia diba tauna be . . . sibona dekenai namo bada ia davaria bona ia kara henia taudia be namo bada idia davaria danu, unai kara amo idia ruaosi be idia moale.” Lalokau hahedinaraia karana amo, ita be taunimanima ma haida bona ita sibona ita hagoadaia, Iesu ena hereva ese unai ia hamomokania, ia gwau: “Henia kara ena moale be bada, abia kara ena moale be maragi.”​—Kara 20:35.

17. Lalokau be edena bamona ita ia hagoadaia, bona ita ia durua dahaka ita karaia lasi totona?

¹⁷ Korinto Ginigunana 8:1 dekenai, Paulo ese Greek herevana a·gaʹpe ia gaukaralaia, bona ena anina be sibona ena ura ia tahua lasi lalokauna. Unai lalokau ese taunimanima ia hagoadaia, ia be mai ena hebogahisi bona haida ia durudia, gaukara bona metau ibounai ia goadalaia, bona metau ibounai lalonai ia gini goada noho. Unai lalokau ese kudou ena ura dikana ia kokia, hegeregere hekokoroku bona mama. (1 Korinto 13:​4-8) Unai bamona lalokau ese ita ia durua bena iseda tadikaka do ita maumauraidia lasi, badina idia be ita bamona idia goevadae lasi. Unai lalokau ese ita ia durua bena ‘Dirava diba lasi taudia’ bamona ai do ita lao lasi, idia be Keristen ginigunadia edia nega lalonai “hunia dala dekenai” Keristen momokani taudia edia orea dekenai idia vareai. Unai taudia be “Dirava ena siahu idia gwauraia be anina lasi. Idia ese danu guba noho taudia idia hereva dika henia.” Unai guba noho taudia ena anina be dagi gaukarana idia abia horoa Keristen naria taudia, bona idia maumauraidia. (Iuda 3, 4, 8) Iehova ena ura ita badinaia dainai, namo lasi unai bamona hetoho karana ta ita karaia.

Diabolo Dadaraia!

18. Satana be Iehova ena taunimanima dekenai dahaka ia ura karaia, to dahaka dainai ia karaia diba lasi?

¹⁸ Ita be Dirava ena taunimanima dainai Satana be ia ura iseda lalo-tamona karana ia hadikaia, unai ita diba neganai namona be ita ia hagoadaia Iehova ena ura ita badinaia noho totona. Satana ia ura Dirava ena taunimanima iboudiai do ia haoredia, bona Diabolo ena tanobada hesiai taudia be nega haida tomadiho momokani taudia idia alaia mase. To Satana be idia iboudiai do ia hamasedia diba lasi badina Dirava ese do ia koua. Iesu be ena mase dekena amo “mase ia biagua tauna, Satani, do ia hadikaia ore diba.” (Heberu 2:14) Lagani 1914 ai, Keriso be Pavapava ai ia lao bona Satana be guba amo ia negea, unai murinai Satana ena siahu be mai ena hetoana. Bona Iehova ia ura negana lalonai, Iesu be Satana bona iena orea do ia hadikadia ore.

19. (a) Gunaguna inai magasin ta ese Satana ena kara dekenai dahaka ia gwau? (b) Satana ena hedibagani lalonai ita moru garina, dahaka dainai iseda kara orea taudia dekenai ita naria namonamo be namo?

¹⁹ Gunaguna inai magasin ta lalonai ia gwau: “Bema Satana, Diabolo, be Dirava ena taunimanima huanai heiriheiri ia havaraia diba, bema ia hasiahudia diba idia hepapahuahu bona idia heai totona, eiava ia hasiahudia diba sibodia edia ura idia tahua karana idia hahedinaraia bona do idia habadaia totona, unai ese tadikaka lalokau heheni karana do ia hadikaia, bona unai neganai idia dekenai ia kwalimu bona idia ia hadikaia diba.” (The Watch Tower, May 1, 1921, rau 134) Diabolo ita dadaraia, namo lasi ita ia hasiahua tadikaka ladana hadikaia bona heai heheni karadia ita karaia totona, badina unai karadia ese iseda lalo-tamona karana ia hadikaia. (Levitiko 19:16) Namo lasi Satana be ita dekenai ia kwalimu, unai ia karaia diba bema Iehova ena ura idia badinaia hesiai taudia ita haberodia eiava ita kara auka henidia. (2 Korinto 2:​10, 11 itaia danu.) Namona be Petro ena hereva ita badinaia, ia gwau: “Umui laloa maoromaoro bona naria namonamo. Umui ia tuari henia tauna, Satani be leona mai ena boiboi bada bamona. Ia ese hunia dekenai ia raka loaloa noho, do ia ania ore taudia ia tahua noho. Emui abidadama dekenai do umui gini goada, vadaeni Satani do umui koua.” (1 Petero 5:​8, 9) Bema ita gini goada bona Satana ita koua, Iehova ena taunimanima edia lalo-tamona kara namona ita dogoatao noho diba.​—Salamo 133:​1-3.

Mai Guriguri danu Dirava Tabekau Henia

20, 21. Edena bamona mai guriguri danu Iehova ita tabekau henia karana ese iena ura ita badinaia karana ia durua?

²⁰ Mai guriguri danu Dirava ita tabekau henia neganai unai ese ita ia durua Dirava ena ura ita badinaia totona. Iseda guriguri ia haerelaia ita itaia neganai, unai ese ita ia veria ia kahirakahira dekenai. Aposetolo Paulo ese ita ia hagoadaia mai guriguri danu Iehova Dirava ita tabekau henia totona, ia gwau: “Lau ura tatau ibounai gabu ibounai dekenai do idia guriguri. Lau ura mai helaga danu edia imana Dirava dekenai idia abia isi. Lau ura inai idia karaia neganai idia be badu ta lasi, bona hepapahuahu ta lasi.” (1 Timoteo 2:8) Hegeregere, elda taudia be mai guriguri danu Dirava idia tabekau henia be gau badana! Kongregesen durua herevadia kikilaia totona elda taudia idia hebou neganai, Iehova ena ura idia badinaia idia hahedinaraia, unai ese ia durudia bena hereva do idia hepapahuahulaia momo lasi bona badu karana ia koua.

²¹ Mai guriguri danu Iehova Dirava dekenai ita tabekau neganai, unai ese ita ia durua iena hesiai gaukara ita karaia namonamo totona. Nega daudau lalonai Iehova ena ura ia badinaia tauna ta ia gwau diba: “Dirava ena tanobada ibounai oreana ese gaukara ta ita ia henia neganai, bona mai iseda ura danu unai gaukara ita karaia noho, ita goadalaia, iseda hekwarahi dainai Dirava ese ita ia moale henia. Ena be ita laloa unai gaukara be anina bada lasi gauna, to bema unai gaukara ita karaia lasi, ma haida ese mai anina bada gaukaradia do idia karaia diba lasi. Unai dainai, bema ita manau bona ita ura lasi iseda ladana ia bada to Iehova ena ladana ita hahairaia, vadaeni, ita diba do ita ‘gini goada, ita marere lasi, bona nega ibounai Iehova ena gaukara do ita karaia goadagoada.’ ”​—1 Korinto 15:58.

22. Iehova ena hahenamo be momo ita dekenai, unai dainai namona be iseda lalohadai Dirava ena ura ita badinaia karana dekenai be dahaka?

²² Momokani, herevana Iehova ena hesiai gaukara dekenai ita karaia gaukarana be dahaka, to ita dekenai ia henia heduruna dainai davana ita henia diba lasi. Dirava ena orea dekenai ita noho dainai ita gari lasi, badina ita be Dirava ena turadia danu ita noho! (Iakobo 2:23) Iehova ese ita dekenai ia henia hahenamo ta be lalo-tamona karana, unai lalo-tamona ia vara badina tadikaka helalokau heheni karana be ia bada herea, bona Satana be ia kokia diba lasi. Unai dainai namona be sibona ena kara ia badinaia guba Tamana ita tabekau henia bona ita be iena taunimanima dainai namona be ita gaukara hebou. Harihari ela bona hanaihanai, namona be Iehova ena ura ita badinaia.

Edena Bamona Do Oi Haere?

◻ Dirava ena ura badinaia ena anina be dahaka?

◻ Dahaka gau haida ese ita idia doria Iehova ena ura ita badinaia totona?

◻ Dahaka dainai Diabolo ita dadaraia be gau badana?

◻ Guriguri be edena bamona ita ia durua Iehova ena ura ita badinaia totona?

[Picture on page 23]

Iehova ena ura idia badinaia hesiai taudia be edia Inai Tauna, leona bamona tauna, Diabolo unai, idia koua idau edia lalo-tamona ia hadikaia