Ma Haida Oi Itaia Iehova ese Idia Ia Itaia Bamona

“Lohiabada ese gau ia itaia lasi, taunimanima ese idia itaia bamona.”​​—⁠1 SAMUELA 16:⁠7.

1, 2. Edena dala ai Iehova ena lalohadai Eliaba dekenai be Samuela ena lalohadai amo ia idau, bona unai amo dahaka ita dibaia?

LAGANI 1100 B.C.E. murinai, Iehova ese peroveta tauna Samuela ia siaia gaukara idauna ta ia karaia totona. Peroveta tauna ia hagania tau ta ladana Iese ena ruma dekenai do ia lao bona Iese ena natuna merona ta do ia makaia Israela ena king ai ia lao totona. Samuela ese Iese ena vara guna natuna, Eliaba, ia itaia neganai, ia laloa Dirava ese ia abia hidi tauna ia davaria. To Iehova ia gwau: “Iena toana, o iena lata do oi laloa lasi, badina be lau ese lau ura henia lasi. Badina be Lohiabada ese gau ia itaia lasi, taunimanima ese idia itaia bamona. Taunimanima ese tau ena toana idia itaia, to Lohiabada ese tau ena kudouna ia itaia.” (1 Samuela 16:​6, 7) Samuela ese Eliaba ia itaia dalana be Iehova ese ia itaia hegeregerena lasi.a

² Taunimanima ese ma haida idia laloa dalana ia kerere diba! Reana ena toana ia namo to ena kara ia gageva tauna ese ita ia koia diba. To, reana kudou-maoro taudia edia kara ese ita idia habadua dainai ita hereva auka bona kara auka henidia.

3, 4. (a) Bema Keristani taudia rua huanai hekwakwanai ta ia vara, namona be idia ta ta ese edia lalona idia hadaia dahaka idia karaia totona? (b) Iseda tadikaka ida ita lalo-tamona lasi neganai, ita sibona dekenai dahaka henanadai ita henia be namo?

³ Hekwakwanai ia vara diba bema ma haida ita hahemaoro henia haraga​​—⁠lagani momo lalonai ita diba momo taudia danu. Reana Keristani tauna ta, guna ia be emu turana namona ta, ida oi hepapahuahu. Oi ura unai hekwakwanai do oi hamaoromaoroa, a? Unai oi karaia totona dahaka ese oi do ia durua?

⁴ Mani oiemu Keristani tadikaka eiava taihu ena mauri be nega daudau lalonai oi laloa namonamo. Bona unai oi karaia noho lalonai, Iesu ena hereva oi laloa, ia gwau: “Lauegu Tamana, lau ia siaia Diravana, ese do ia veria mai tauna sibona lau dekenai do ia mai diba.” (Ioane 6:44) Bena, sibona oi nanadaia: ‘Dahaka dainai Iehova ese Iena Natuna dekenai unai tauna ia veria mai? Unai tauna ena kara namodia be dahaka? Unai kara lau lalodia bada lasi eiava lau laloa idia be anina lasi, a? Dahaka dainai matamanai ia be egu turana ai ia lao? Dahaka ese lau ia veria unai tauna ena turana ai lau lao totona?’ Matamanai, reana ena kara namodia oi laloa lou totona do oi hekwarahi bada, bona unai be momokani bema nega daudau lalonai ia oi badu henia. To, umui ruaosi huanai unai be mai anina bada negana, umui ruaosi emui hetura karana ia hadikaia gauna umui hanamoa totona. Karaia dalana oi laloa lalonai, mani tatau rua edia kara namodia ita tahua, nega haida taunimanima ese edia kerere idia itaia. Idia be peroveta tauna Iona bona aposetolo Petero.

Mai Momokani ida Iona Ena Kara Ita Itaia

5. Iona be dahaka hahegani ia abia, bona unai dainai dahaka ia karaia?

⁵ Iehoasa ena natuna King Ieroboama Iharuana ena nega lalonai, Iona be Israela ena not kahana basileiana ena peroveta tauna. (2 King Taudia 14:​23-25) Dina ta, Iehova ese Iona ia hagania Israela do ia rakatania bona Nineva dekenai do ia lao, Nineva be Asuria Basileiana goadana ena hanua badana. Unuseniai dahaka gaukara do ia karaia? Unai hanua dekenai idia noho taudia ia sisiba henidia edia hanua badana be do idia hadikaia ore. (Iona 1:​1, 2) Iona ese Dirava ena hakaua herevana ia badinaia lasi to ia heau! Tarasisi dekenai ia lao sisima ta dekenai ia guia, unai gabu be Nineva amo ia daudau herea.​​—⁠Iona 1:⁠3.

6. Dahaka dainai Iehova ese Iona ia abia hidi Nineva dekenai ia lao totona?

⁶ Iona oi laloa neganai, oi laloa ia be edena bamona tauna? Oi laloa ia be gwau-edeede peroveta tauna ta, a? Unai bamona lalohadai do ita abia diba bema iena kara ita itaia haraga. To Dirava ese Iona be peroveta tauna ai ia halaoa badina ia gwau-edeede dainai, a? Lasi momokani! Reana Iona be mai ena kara namodia haida. Iena peroveta gaukarana mani ita laloa.

7. Iona be Israela dekenai Iehova ia hesiai henia negana ai dahaka gaudia idia vara, bona iena kara dainai edena bamona unai ese emu lalohadai ia haidaua?

⁷ Iona be mai ena abidadama ida ia hekwarahi bada kamonai lasi Israela taudia ia hadibadia totona. Peroveta tauna Amosa, Iona ena nega ai ia noho tauna, ese unai negai idia noho Israela taudia ia gwauraia kohu laloa bada taudia.b Unai tano dekenai gau dikadia idia vara, to Israela taudia ese unai gau dikadia idia laloa lasi. (Amosa 3:​13-15; 4:4; 6:​4-6) To herevana dahaka, Iona be mai ena kamonai ida dina ta ta ai idia dekenai ia haroro. Bema oi be sivarai namona harorolaia tauna, do oi lalo-parara diba ia sibona ia laloa bada tauna, bona iseda hereva ia laloa lasi tauna oi hereva henia be mai ena hekwarahi. Unai dainai, Iona ena manoka ita laloa noho lalonai, namona be kamonai lasi Israela taudia dekenai ia haroro neganai ia hahedinaraia abidadama bona haheauka karana ita laloa danu.

8. Nineva dekenai Israela ena peroveta tauna ta ese dahaka hekwakwanai do ia davaria?

⁸ Nineva dekenai ia lao be mai ena hekwarahi bada. Iona be unai hanua dekenai ia lao totona, kilomita 800 do ia raka​​—⁠unai be laolao aukana badina hua tamona bamona lalonai do ia raka. Unuseniai ia ginidae neganai, peroveta tauna be taunimanima ese edia dagedage karadia dainai idia diba Asuria taudia dekenai do ia haroro. Edia tuari lalonai nega momo mai dagedage ida ma haida idia hahisia. Edia dagedage karadia dainai idia heagi danu. Unai dainai ita hoa lasi, Nineva idia gwauraia ‘rara bubua hanuana’!​​—⁠Nahumu 3:​1, 7.

9. Lai gubana ese sisima taudia ia hagaridia neganai, Iona be edena karadia ia hahedinaraia?

⁹ Iona ese Iehova ena hahegani ia kamonai lasi, sisima ta dekenai ia guia bona gabu daudau dekenai ia lao. To, Iehova ese ena peroveta tauna ia rakatania lasi eiava ena gabu do ia abia tauna ta, ia tahua lasi. To, Iehova ese Iona ia durua, do ia lalo-parara iena gaukara be mai anina bada. Dirava ese davara dekenai lai gubana ta ia havaraia. Iona ia guia sisima be davara ena hurehure ese ia doria lao doria mai. Iona dainai, kerere lasi taudia be edia mauri idia boio gwauraia! (Iona 1:⁠4) Iona be dahaka do ia karaia? Iona ia ura lasi ena kerere dainai sisima lalonai idia noho taudia ese edia mauri idia haboioa, unai dainai ia hamaorodia ia gwau: “Umui ese lau do umui abia, bona davara dekenai lau do umui negea. Unai neganai lai guba be do ia doko.” (Iona 1:12) Sisima taudia ese Iona be davara dekenai idia negea diho neganai, ia laloa lasi Iehova ese davara amo ia do ia hamauria. (Iona 1:15) Iona ia ura do ia mase, unai amo sisima taudia ese edia mauri do idia haboioa lasi. Iona ena kara amo ita itaia diba ia ese gari lasi, manau bona lalokau ia hahedinaraia, ani?

10. Iehova ese Iona ena gaukara ia henia lou neganai, dahaka ia vara?

¹⁰ Gabeai, Iehova ese Iona ia hamauria. Iona ena kara ese ia hahedinaraia Dirava do ia hesiai henia lou lasi, a? Lasi, to Iehova ese mai ena hebogahisi bona lalokau ida Iona ia siaia lou Nineva taudia dekenai do ia haroro totona. Iona be Nineva dekenai ia ginidae neganai, mai gari lasi ida hanua taudia ia hadibadia, edia kerere badana be Dirava ese ia itaia, bona edia hanua be dina 40 murinai do ia hadikaia ore. (Iona 1:2; 3:⁠4) Nineva taudia ese Iona ena hereva idia kamonai murinai, idia helalo-kerehai bona Dirava ese edia hanua ia hadikaia lasi.

11. Dahaka ese ia hahedinaraia Iona be mai anina bada gauna ta ia dibaia?

¹¹ Iona be lalohadai maorona ia do abia lasi. Unai dainai Iehova be mai ena haheauka ida haheitalai ta amo Iona ia durua, ia lalo-parara Ia be taunimanima edia toana ia itaia sibona lasi. Ia ese edia kudouna ia itaia. (Iona 4:​5-11) Iona ese ia torea bukana amo mai momokani ida sibona ena kara ia gwauraia hedinarai, unai amo ia hamomokania ia ese mai anina bada gauna ta ia dibaia. Mai ena ura ida ena manoka karadia bona ia dekenai hemarai idia havaraia gaudia danu ia gwauraia hedinarai, unai ese ena manau karana ia hamomokania danu. Ta ese ena kerere ia gwauraia hedinarai totona ia gari lasi be namo!

12. (a) Edena bamona ita diba Iesu ena lalohadai taunimanima dekenai be Iehova ena hegeregerena? (b) Ita idia hagoadaia, sivarai namona ita harorolaia taudia dekenai edena bamona lalohadai ita abia be namo? (Rau 12 dekenai ia noho maua itaia.)

¹² Lagani 800 idia hanaia murinai, Iesu Keriso ese hereva namona ta amo Iona ena mauri dekenai ia vara gauna ta ia gwauraia. Ia gwau: “Iona bamona, dina toi hanuaboi toi gwarume badana ena bogana lalonai ia noho, unai bamona Taunimanima ena Natuna danu dina toi hanuaboi toi tano lalonai do ia noho.” (Mataio 12:40) Iona ia toreisi lou murinai, do ia diba Iesu ese sibona Ena nega, guri gabuna lalonai ia noho negana, be peroveta tauna ia gaukara lasi negana ida ia hahegeregerea. Iena hesiai taudia edia kerere dainai ia hesiku lasi Diravana ita hesiai henia dainai ita moale, ani? Salamo torea tauna ia gwau: “Tamana taudia be edia natuna dekenai idia bogahisihisi noho. Inai bamona danu Lohiabada ese, ia dekenai idia gari taudia ia bogahisihisi henidia noho. Dirava ia diba, ita be tanobada ena kahu dekena amo ita ia karaia. Bona ita dekenai ia laloa noho, ita be kahu sibona.” (Salamo 103:​13, 14) Momokani, unai “kahu”​​—⁠hari idia noho goevadae lasi taudia danu​​—⁠ese Dirava ena lauma helaga ena heduru amo gau momo idia hagugurua diba!

Petero Dekenai Lalohadai Maorona Ita Abia

13. Petero ena ladana oi kamonai neganai edena kara oi laloa, to dahaka dainai Iesu ese ia abia hidi ena aposetolo ta ai ia lao totona?

¹³ Namona be haheitalai iharuana, aposetolo Petero ena, ita laloa sisina. Bema oi idia nanadaia Petero ena kara oi gwauraia hedinarai totona, maoromaoro do oi gwau ia be karaharaga bona hekokoroku tauna, a? Momokani nega haida Petero ese unai bamona kara ia hahedinaraia. To, Iesu ese Petero do ia abia hidi ena aposetolo taudia 12 ta ai ia lao totona bema Petero be laloa namonamo lasi, karaharaga eiava hekokoroku tauna momokani, a? (Luka 6:​12-14) Lasi momokani! Iesu ese Petero ena manoka gaudia ia laloa lasi, to ena kara namodia ia itaia.

14. (a) Petero be ena lalohadai ia gwauraia hedinarai haraga karana ese dahaka ia hahedinaraia? (b) Dahaka dainai Petero ena henanadai momo karana ita laloa bada be namo?

¹⁴ Nega haida Petero be aposetolo ma haida totona ia hereva. Reana ma haida idia gwau diba ia ese manau karana ia hahedinaraia lasi. To unai be mai anina bada, a? Taunimanima haida idia gwau reana Petero ena mauri lagani ese aposetolo haida edia ia hanaia​​—⁠reana Iesu ena danu. Bema unai be momokani, reana unai ese Petero be nega momo ia hereva haraga ena badina ia hahedinaraia. (Mataio 16:22) To, gau ma ta danu ita laloa be namo. Petero be lauma gaudia ia laloa bada tauna. Henanadai momo ia henia badina ia ura dikadika diba ia abia. Iena kara dainai namo ita davaria. Petero ena henanadai haerelaia totona Iesu ese mai anina bada herevadia ia gwauraia, bona unai hereva momo be Baibel lalonai idia noho. Hegeregere, Petero ena henanadai ta haerelaia totona Iesu ese “kohu naria tauna mai ena kamonai” ia herevalaia. (Luka 12:​41-44) Petero ena henanadai mani ita laloa, ia gwau: “Ai be gau ibounai ai rakatania, vadaeni oiemu murina dekenai ai raka. Unai dainai ai be dahaka do ai abia?” Unai henanadai dainai Iesu ese inai hagoadaia gwauhamata herevana ia henia, ia gwau: “Ruma, o iena tadikakana, o iena taihuna, o iena tamana, o iena sinana, o iena adavana, o iena natuna, o tano, lau totona ia rakatanidia tauna ese unai do ia abia lou, ma momo herea momokani danu. Bona mauri hanaihanai danu do ia abia.”​​—⁠Mataio 15:15; 18:​21, 22; 19:​27-29.

15. Dahaka dainai ita gwau diba Petero ese badinaia karana ia hahedinaraia momokani?

¹⁵ Petero ena kara namona ma ta be​​—⁠ia ese badinaia karana ia hahedinaraia. Hahediba taudia momo ese Iesu idia rakatania, badina iena hadibaia herevana ta idia lalo-pararalaia lasi neganai, Petero be aposetolo taudia 12 totona ia hereva bona ia gwau: “Lohiabada e, ai be daika dekenai do ai lao? Mauri hanaihanai herevadia be oi dekenai idia noho.” (Ioane 6:​66-68) Reana ia gwauraia herevadia ese Iesu ena lalona idia hagoadaia momokani! Gabeai, hutuma be Biaguna dogoatao totona idia mai neganai, ena aposetolo taudia momo idia heau oho. To, Petero be daudau amo hutuma murinai ia raka bona hahelaga tauna badana ena ruma maguna lalonai ia raka vareai. Iena gari lasi karana dainai unai gabu dekenai ia lao. Iesu idia henanadai henia noho lalonai, Petero be lahi badinai idia gini Iuda taudia danu ia gini hebou. Hahelaga tauna badana ena hesiai tauna ta ese ia itaia bona ia samania ia gwau ia be Iesu ena bamona ta. Oibe, Petero ese ena Biaguna ia gorea, to namona be ita laloaboio lasi Petero ese Iesu ia badinaia bona ia laloa dainai unai bamona ia karaia, aposetolo taudia haida ese unai bamona idia karaia diba lasi.​​—⁠Ioane 18:​15-27.

16. Dahaka badina namona dainai Iona bona Petero edia kara namodia ita laloa?

¹⁶ Petero ena kara namodia ese ena manoka karadia idauidau idia hanaia. Iona dekenai unai be momokani danu. Iona bona Petero edia kara namodia ita laloa namonamo hegeregerena, namona be ita sibona ita hadibaia hari inai negai iseda tadikaka bona taihu edia kara ita tahua neganai, edia kara namodia ita lalodia be namo. Unai bamona ita karaia neganai iseda hebamo karana idia danu do ia namo. Dahaka dainai unai bamona ita karaia be namo?

Ita Dibaia Gaudia Ita Gaukaralaia Hari

17, 18. (a) Reana dahaka dainai hepapahuahu ia vara diba Keristani taudia huanai? (b) Dahaka Baibel sisiba ese ita ia durua diba iseda tadikaka ida hepapahuahu ita hamaoromaoroa totona?

¹⁷ Tatau, hahine, bona natudia, taga taudia bona ogogami taudia, diba bada bona diba bada lasi taudia bona kopi idauidau taudia ibounai be hari mai edia lalo-tamona ida Iehova idia hesiai henia noho. (Apokalupo 7:​9, 10) Keristani kongregesen lalonai ita itaia tadikaka edia kara be idauidau! Iehova ita hesiai henia hebou dainai, nega haida hekwakwanai ia vara diba.​​—⁠Roma 12:10; Filipi 2:⁠3.

¹⁸ Ena be iseda tadikaka edia kerere ita itaia, to unai ita laloa bada lasi. Ita hekwarahi Iehova ena kara ita tohotohoa totona, salamo torea tauna ese Ia be inai bamona anelaia: “Bema oi ese aiemai kara dika ibounai oi duahia neganai, daika ese oiemu kota lalonai ia kwalimu diba?” (Salamo 130:⁠3) Namo lasi ita idia hapararaia karadia ita laloa, to “maino daladia do ita tahua, bona ita ta ta ese iseda bamona ta ta edia abidadama do ita hagoadaia.” (Roma 14:19) Ita hekwarahi Iehova ese taunimanima ia itaia bamona idia ita itaia totona, edia kerere ita lalodia lasi to edia kara namodia ita laloa. Unai bamona ita karaia neganai, unai ese ita do ia durua ita “haheauka heheni” totona.​​—⁠Kolose 3:​13, NW.

19. Keristani tauna ta ese hekwakwanai badana ia hamaoromaoroa totona, ia badinaia diba daladia haida mani oi gwauraia.

¹⁹ To bema lalo-hisihisi idia havaraia gaudia ita laloaboio haraga diba lasi be edena bamona? (Salamo 4:⁠4) Unai ia vara vadaeni oi bona emu tadikaka huanai, a? Unai hekwakwanai umui hamaoromaoroa be namo, ani? (Genese 32:​13-15) Gau ginigunana be, guriguri amo Iehova ena heduru oi noia. Bena, unai tauna ena kara namodia oi laloa noho lalonai, ia oi hereva henia mai manau ida, unai amo ‘aonega do oi hahedinaraia.’ (Iamesi 3:13) Oi hamaoroa oi ura ia ida maino oi karaia. Dirava ena lauma amo idia torea sisibana ita laloatao, ia gwau: “Hereva dekenai do umui kamonai haraga, to hereva do umui gwauraia haraga lasi. Bona do umui badu haraga lasi.” (Iamesi 1:19) Inai sisiba “badu haraga lasi” ese ia hahedinaraia oi hereva henia tauna ese reana ia karaia, eiava ia gwauraia herevana ta ese oi ia habadua diba. Bema unai ia vara, namona be Iehova oi noia oi ia durua sibona emu kara oi biagua totona. (Galatia 5:​22, 23) Oiemu tadikaka ia hereva neganai oi kamonai namonamo. Iena hereva oi utua lasi, ena be ia herevalaia gaudia ibounai oi abia dae lasi. Reana iena lalohadai be ia kerere, to namona be oi abia dae unai be iena lalohadai. Ia laloa hegeregerena hekwakwanai oi itaia. Unai ena anina be emu tadikaka ese unai hekwakwanai ia itaia hegeregerena oi itaia.​​—⁠Aonega Herevadia 18:⁠17.

20. Hekwakwanai oi hamaoromaoroa neganai, maino oi karaia totona edena dala ma haida oi badinaia diba?

²⁰ Bema inai be oiemu nega ia oi hereva henia totona, namona be mai gado namona ida oi hereva. (Kolose 4:⁠6) Oiemu tadikaka oi hamaoroa ia dekenai dahaka kara oi ura henia. Bema emu kara haida dainai lalohadai kererena ia abia, sori herevana oi gwauraia. Bema emu manau karana dainai maino umui karaia, Iehova oi tanikiu henia. Bema lasi, Iehova oi noia noho oi ia hakaua maino karaia daladia ma haida oi tahua totona.​​—⁠Roma 12:⁠18.

21. Inai stadi herevana ese edena bamona oi ia durua ma haida oi itaia Iehova ese idia ia itaia bamona?

²¹ Iehova be ena hesiai taudia ibounai ia lalokau henia. Ia moale ena hesiai gaukara lalonai ita ibounai ia gaukaralaia, ena be ita goevadae lasi. Ma haida ia laloa dalana ita dibaia noho lalonai, iseda lalokau iseda tadikaka bona taihu dekenai be do ia tubu. Bema iseda lalokau iseda Keristani tadikaka dekenai ia keru vadaeni, ita hagoadaia lou diba. Hahenamo badana do ita abia bema ita hekwarahi ma haida edia kara namodia ita itaia​​—⁠oibe, idia ita itaia Iehova ese idia ia itaia bamona!

[Footnotes]

Edena Bamona Do Oi Haere?

• Iehova ese ena hesiai taudia edia kerere be edena bamona ia laloa?

• Iona bona Petero edia kara namodia haida be dahaka dahaka?

• Emu Keristani tadikaka be edena bamona oi laloa be namo?

[Box on page 12]

Dirava ese Ma Haida Ia Itaia Dalana Mani Oi Laloa

Baibel lalonai Iona ena sivarai oi laloa noho lalonai, hanaihanai sivarai namona oi harorolaia taudia be hari edena bamona oi lalodia be namo? Reana idia laloa idia hegeregere vadaeni, eiava Israela taudia bamona ita harorolaia herevana idia laloa bada lasi, eiava Dirava ena sivarai idia dadaraia. To Iehova Dirava ese edena bamona idia ia itaia? Inai tanobada ena ladana bada taudia danu be nega ta Iehova idia tahua diba, Iona ena haroro herevana dainai Nineva ena king ia helalo-kerehai bamona.​​—⁠Iona 3:​6, 7.

[Picture on page 9]

Ma haida oi itaia Iehova ese idia ia itaia bamona, a?

[Picture on page 10, 11]

Iona ena sivarai amo Iesu ese gau namona ta ia herevalaia