17. Taunimanima dekenai dahaka dika do ia vara, bona daudau lasi edena hereva do ita laloatao?

¹⁷ Ita diba iseda tuari be ia do ore lasi. Bona sivarai namona do ita harorolaia noho​​—⁠ita idia inai henia taudia dekenai danu. (Mat. 24:​14, 21) To, iseda haroro gaukara amo kamonai taudia dekenai dala ita kehoa idia helalo-kerehai bona mauri hanaihanai idia abia totona, be kahirakahira Iehova ese do ia koua. Iehova ena ladana abia isi karana ese taunimanima hamauria gaukarana ia hereaia momokani. (Esekiela 38:23 duahia.) Tanobada besedia ibounai idia haboua Dirava ena taunimanima idia hadikaia gwauraia neganai, salamo torea tauna ena guriguri herevana do ita laloatao: “Lau ura idia be do idia hemarai, bona do idia gari noho ela bona hanaihanai. Oi ese idia do oi alaia mase, mai edia hemarai danu.”​​—⁠Sal. 83:⁠17.

18, 19. (a) Iehova ena lohia siahuna idia dagedage henia taudia dekenai dahaka do ia vara? (b) Kahirakahira Iehova ese ena lohia siahuna do ia abia isi, edena dala ai unai ese oi ia durua?

¹⁸ Iehova ena lohia siahuna idia dagedage henia taudia be Ia ese do ia haorea momokani. Baibel ese ia hahedinaraia “Sivarai Namona idia abia dae lasi taudia” be Dirava ese Aramagedono ai do ia haoredia momokani. (2 Tes. 1:​7-9) Iehova ese kara dika taudia ia haorea bona mai momokani ida Ia idia tomadiho henia taudia ia hamauria karana ese do ia hahedinaraia, Iehova be Dirava momokani tamona. Tanobada matamata ai, unai kwalimu karana be do idia laloaboio lasi. Do idia “toreisi lou, kara maoromaoro taudia, bona kara maoromaoro lasi taudia” be Iehova ese ia karaia gaudia do idia dibaia. (Kara 24:15) Tanobada matamata ai, do idia itaia Iehova ena lohia siahuna henunai idia noho be aonega karana. Bona edia huanai idia noho manau taudia do idia diba Iehova be Dirava momokani tamona.

“Unai be Dirava Ena Ladana Helagana Bona Hereadaena”

Lagani 1430 ai, Cusa tauna Nicholasa ese unai hereva be haroro herevana ta lalonai ia gwauraia. Unai tau ia ura gau momo ia diba namonamo dainai, Greek gado, Hebrew gado, taunimanima edia mauri dalana, tomadiho, matematik, bona guba gaudia ia stadilaia. Iena mauri lagani be 22 neganai, ia be Roman Katolik dubu ena taravatu ena doketa dagi ia abia. Lagani 1448 ai, ia be dubu ena kadinal dagi ia abia.

Lagani 550 bamona gunanai, Nicholas ese Kues (hari, Bernkastel-Kues) ai, buruka taudia naria rumana ta ia haginia​​—⁠Kues be Bonn ena saut kahanai ia noho, bona edia padana be kilomita 130 bamona. To hari, unai buruka taudia naria rumana be Cusa ena laiberi ai idia halaoa, bona unuseniai maniuskrip 310 mai kahana idia atoa. Unai maniuskrip ta ena ladana be Codex Cusanus 220​—⁠unuseniai, Cusa ese lagani 1430 dekenai ia henia haroro herevana ia noho. Unai haroro herevana ladana, In principio erat verbum (anina be, Matamaia Neganai Hereva Ia Noho)b dekenai, Cusa tauna Nicholas ese inai ladana “Iehova” be Latin gado ena spelin ai ia torea “Iehoua.” Maniuskrip ena rau 56 ai, Nicholas ese Dirava ena ladana be inai bamona ia herevalaia: “Unai be Dirava ena ladana. Ia be Tetragramaton o leta foa ai idia torea ladana. . . . Unai be Dirava ena ladana helagana bona hereadaena.” Cusa tauna Nicholas ena haroro herevana ese ia hamomokania, Dirava ena ladana be Heberu Revareva ginigunadia dekenai ia noho.​​—⁠Eso. 6:⁠3.

Inai maniuskrip, lagani 1430 gauna, be toretore gunana momokani, bona unuseniai Tetragramaton eiava leta foa ena gabunai be inai ladana “Iehoua” ia noho. Unai toretore ese ia hamomokania, lagani handred momo lalodiai, momo ese Dirava ena ladana, hegeregere “Iehova,” be dala idauidau ai idia torea.