Matamata Taudia E​—⁠Umui Goada Umui Lao

“Unai gaudia do oi laloa dobu, idia dekenai emu lalona ibounai oi henia, vadaeni taunimanima ibounai do idia itaia, oi be oi goada oi lao.”​​—⁠1 TIM. 4:​15, NW.

1. Dirava ena ura matamata taudia totona be dahaka?

“UHAU tauna e, oiemu eregabe dinadia lalonai do oi moale. Oiemu eregabe dinadia lalonai oiemu kudouna ese oi do ia hamoalea.” (Had. 11:⁠9) Unai hereva be Israela ena aonega tauna King Solomona ese ia gwauraia. Momokani, Iehova Dirava ia ura emu matamata negana lalonai bona emu mauri gabediai do oi moale. To, momo be edia matamata negana lalonai idia karaia kereredia dainai, gabeai edia mauri lalonai idia lalohisihisi. Abidadama tauna Iobu be ‘ena kara dika, uhau neganai ia karaia gaudia’ dainai ia lalohisihisi danu. (Iobu 13:26) Keristani matamata taudia be mauri lagani 13 ia lao 25 idia abia neganai, abia hidi badadia idia karaia. Matamata tauna ta be abia hidi kererena ia karaia neganai, unai ese ena mauri lalonai lalohisihisi bona hekwakwanai ia havaraia diba.​​—⁠Had. 11:⁠10.

2. Matamata taudia ese edena Baibel sisibana idia badinaia neganai, idia do ia durua kerere badadia idia karaia lasi totona?

² To, matamata taudia idia laloa maoromaoro bona abia hidi maorodia idia karaia diba. Aposetolo Paulo ese Korinto taudia dekenai ia henia sisibana mani oi laloa. Ia gwau: “Natuna maragi bamona do umui laloa lasi. . . . Tau badadia bamona inai gaudia do umui laloa.” (1 Kor. 14:20) Bema matamata taudia ese unai sisiba idia badinaia bona taunimanima badadia bamona idia laloa, unai ese idia ia durua kerere badadia idia karaia lasi totona.

3. Lo Keristani tauna ai oi lao totona, dahaka oi karaia diba?

³ Bema oi be matamata tauna ta, namona be oi laloatao lo Keristani tauna ta ai oi lao totona oi hekwarahi. Paulo ese Timoteo ia hamaoroa: “Namo lasi ta ese oi ia laloa maragi badina oi be matamata sibona. To, namona be abidadama taudia dekenai emu hereva, kara, lalokau, abidadama, bona kara goeva ai oi be haheitalai namona. Namona be oi gaukara goada taunimanima vairanai oi duahiduahi noho, sisiba oi henia noho, bona oi hadibaia noho. . . . Unai gaudia do oi laloa dobu, idia dekenai emu lalona ibounai oi henia, vadaeni taunimanima ibounai do idia itaia, oi be oi goada oi lao.” (1 Tim. 4:​12-​15, NW ) Namona be Keristani matamata taudia idia hekwarahi lo Keristani taudia ai idia lao bona ma haida ese unai do idia itaia.

Oi Goada Oi Lao Ena Anina be Dahaka?

4. Ta ia goada ia lao totona dahaka ia karaia be namo?

⁴ Ta ia goada ia lao ena anina be, Dirava ena hesiai gaukara ia goadalaia bona ena kara ia hanamoa noho. Paulo ese Timoteo ia hagoadaia, namona be ena hereva dalana bona kara ia hanamoa noho, lalokau, abidadama bona laloa goevagoeva ia hahedinaraia, bona ena haroro gaukara do ia hanamoa. Ia gaukara goada ma haida dekenai haheitalai namona ia hahedinaraia totona. Unai dainai Timoteo be lo Keristani tauna ai ia lao totona ia hekwarahi be namo.

5, 6. (a) Edena nega ai ma haida idia itaia Timoteo be ia goada ia lao? (b) Matamata taudia be lo Keristani taudia ai idia lao totona, edena dala ai Timoteo idia tohotohoa diba?

⁵ Paulo be lagani 61 bona 64 C.E. huanai inai sisiba ia torea neganai, Timoteo be lagani momo lalonai elda gaukara ia karaia. Anina be ia be lo Keristani tauna ai ia lao vadaeni. Lagani 49 eiava 50 C.E. ai, Timoteo ena mauri lagani be 20 bamona neganai, ‘varavara ibounai Lusitera bona Ikonio dekenai, idia gwau Timoteo be tau namona.’ Badina idia itaia ia be Iehova ena hesiai gaukara idauidau ia goadalaia. (Kara 16:​1-5) Unai nega ai, Timoteo be Paulo ia bamoa misinari gaukara idia karaia totona. Hua haida lalonai Paulo ese Timoteo ia itaia ia goada ia lao dainai, Tesalonika dekenai ia siaia lao Keristani taudia ia durua bona hagoadaia totona. (1 Tesalonika 3:​1-3, 6 duahia.) Oibe, Timoteo be mero matamata neganai, ma haida idia itaia ia goada ia lao noho.

⁶ Kongrigeisen lalonai umui noho matamata taudia e, hari be nega namona kara namodia umui hahedinaraia noho totona, unai amo ma haida ese do idia itaia umui be lo Keristani taudia bona Baibel ena hereva momokanidia umui hadibaia namonamo. Iesu ena mauri lagani be 12 neganai, “ia tubu daekau noho, mai aonega danu.” (Luka 2:​52) Hari do ita tahua emu mauri lalonai, edena dala ai inai negadia toi ai oi hahedinaraia oi be lo Keristani tauna: (1) Hekwakwanai idauidau oi davaria neganai, (2) headava totona oi hegaegae neganai, bona (3) oi hekwarahi “hesiai tauna namona ta” ai oi lao neganai.​​—⁠1 Tim. 4:⁠6.

Hekwakwanai Idauidau Oi Davaria Neganai, Oi “Laloa Maoromaoro”

7. Matamata taudia be hekwakwanai idia davaria neganai, idia dekenai dahaka ia vara diba?

⁷ Mauri lagani 17 Keristani kekenina ta, Carol ia gwau, “Nega haida egu hemami ia dika, tauanina ia hesiku, bona lau lalometau, unai dainai lau ura lasi daba ai lau noga.”a Dahaka dainai Carol be ia lalometau? Badina iena mauri lagani be 10 neganai, ena tama sina edia headava idia hadokoa bona ia be sinana ida ia noho, bona iena sinana be Baibel ena kara maoromaoro taravatudia ia dadaraia. Carol bamona, reana oi danu be hekwakwanai badadia oi davaria bona ia auka oi hamaoromaoroa totona.

8. Timoteo ese ia davaria hekwakwanai haida be dahaka?

⁸ Timoteo be ia goada ia lao noho lalonai, hekwakwanai idauidau ia davaria danu. Hegeregere, ia be ena bogana ia hisihisi momo dainai ia “gorere nega momo.” (1 Tim. 5:​23) Paulo ena dagi idia hepapahuahulaia dainai, Korinto kongrigeisen dekenai Timoteo ia siaia unai hekwakwanai hamaoromaoroa totona. Paulo ese unai kongrigeisen ia noia Timoteo ida idia gaukara hebou totona, unai amo ia be “mai gari lasi danu” ena gaukara do ia karaia. (1 Kor. 4:​17; 16:​10, 11) Toana be Timoteo be hemarai merona.

9. Edena dala ai laloa maoromaoro karana ese ita ia durua? Bona matamata taudia haida be dahaka idia karaia?

⁹ Paulo be Timoteo ia durua totona, ia gwau: “Dirava ese ita dekenai ia henia lauma helaga ese gari ia havaraia lasi, to siahu, lalokau bona laloa maoromaoro karana ia havaraia.” (2 Tim. 1:⁠7, NW ) Bema gau haida be emu ura hegeregerena idia vara lasi, to laloa maoromaoro karana ese oi ia durua unai oi hanaia totona. Idia laloa maoromaoro lasi matamata taudia haida be gari mamina idia hahedinaraia. Haida be idia lalometau neganai, idia mahuta momo eiava TV idia raraia momo, drag idia ania, idia inuinu kekero, idia pati momo, bona matabodaga karadia idia karaia. Baibel ese ita ia hagoadaia, “Dirava ese ia ura lasi karadia bona tanobada ena ura idauidau do ita dadaraia momokani bona inai nega oromana lalonai do ita noho mai laloa maoromaoro bona kara maoromaoro ida bona Dirava do ita badinaia noho.”​​—⁠Tito 2:​12, NW.

10, 11. Edena dala ai laloa maoromaoro karana ese ita ia durua Dirava ese ia henia goada dekenai ita tabekau totona?

¹⁰ Baibel ese matamata taudia ia hagoadaia “do idia laloa maoromaoro.” (Tito 2:⁠6) Unai sisiba oi badinaia ena anina be, hekwakwanai oi davaria neganai Dirava dekenai oi guriguri. (1 Petero 4:7 duahia.) Unai amo oi hahedinaraia, oi be “Dirava ese ia henia . . . goada” dekenai oi tabekau.​​—⁠1 Pet. 4:​11.

¹¹ Carol be ia laloa maoromaoro bona ia guriguri dainai, unai ese ia durua. Ia gwau: “Egu sinana ena matabodaga karadia lau inai henia be auka. To guriguri karana ese lau ia durua. Lau diba Iehova be lau ida ia noho, unai dainai lau gari lasi.” Namona be inai oi laloatao: Hekwakwanai oi hanaia neganai, unai ese oi do ia hagoadaia bona oi ia durua emu kara oi hanamoa totona. (Sal. 105:​17-​19; Lal. 3:​27) Ena be hekwakwanai idauidau oi davaria, to Dirava ese oi ia rakatania diba lasi. Ia be oi do ia “durua.”​​—⁠Isa. 41:⁠10.

Headava Totona Oi Hegaegae

12. Dahaka dainai headava ia lalohadailaia Keristani tauna be Aonega Herevadia 20:25 ena hereva ia laloa be namo?

¹² Matamata taudia haida be idia headava haraga, badina idia laloa unai ese idia do ia hamoalea bona durua edia lalometau bona ruma lalonai idia vara hekwakwanai idauidau idia hanaia totona. To, idia karaia headava gwauhamatana be mai anina bada. Baibel negadiai, haida be idia laloa namonamo lasi bona gwauhamata ta idia karaia haraga. (Aonega Herevadia 20:25 duahia.) Nega haida, matamata taudia be headava ena maduna idauidau idia laloa namonamo lasi. To idia headava murinai, idia laloparara maduna momo idia huaia be namo.

13. Headava lalohadaina idia do abia lasi neganai, edena henanadai idia laloa be namo? Bona idia totona dahaka heduru gaudia haida idia noho?

¹³ Oi be headava lalohadaina oi do abia lasi neganai, namona be sibona oi nanadaia: ‘Dahaka dainai lau ura lau headava? Lau be edena bamona headava maurina lau ura? Ia be adavana namona ai do ia lao, a? Lau hegeregere headava ena maduna idauidau lau huaia totona, a?’ Sibona emu kara oi tahua namonamo totona, “hesiai tauna mai ena kamonai, bona mai ena kara maoromaoro” oreana ese unai idia herevalaia buka bona magasin idia halasia oi idia durua totona.b (Mat. 24:​45-​47) Oi laloa gauna be inai: Iehova be unai dala amo oi ia sisiba henia bona durua. Unai heduru herevadia oi lalohadailaia namonamo bona oi badinaia. Namo lasi oi be “hosi o doniki edia kara bamona” oi kara, idia be diba bona aonega lasi. (Sal. 32:​8, 9) Taunimanima badadia bamona headava ena maduna idauidau oi laloa namonamo. Bema oi laloa oi hegeregere ta oi tura henia, namona be oi laloatao “kara goeva ai oi be haheitalai namona.”​​—⁠1 Tim. 4:​12, NW.

14. Keriso ena kara oi tohotohoa neganai, edena dala ai unai ese emu headava maurina ia durua?

¹⁴ Danu, lo Keristani tauna ena headava maurina be do ia namo. Lo Keristani tauna ia gaukara goada ‘Keriso ena bada hegeregerena danu do ia abia’ totona. (Efe. 4:​11-​14) Bona ia hekwarahi Keriso ena kara ia tohotohoa totona. Keriso be haheitalai namona ia hahedinaraia, badina ia be “sibona ena namo ia tahua lasi.” (Roma 15:⁠3) Bema tau bona hahine be sibona edia namo idia tahua lasi to ta ta edia namo idia tahua, vadaeni edia headava lalonai maino bona moale do ia noho. (1 Kor. 10:24) Tau be sibona ena ura dadaraia lalokauna do ia hahedinaraia, bona hahine be ena tau do ia kamonai henia, Iesu be Dirava ia kamonai henia hegeregerena.​​—⁠1 Kor. 11:3; Efe. 5:​25.

“Hesiai Gaukara Oi Hagugurua Momokani”

15, 16. Edena dala ai oi hahedinaraia diba emu hesiai gaukara oi goadalaia?

¹⁵ Paulo be Timoteo ese ia karaia mai anina bada gaukarana ia herevalaia neganai, ia gwau: “Keriso Iesu . . . bona Dirava vairanai oi lau oda henia, . . . Dirava ena hereva do oi harorolaia goadagoada.” Ma ia gwau: “Evanelia tauna ena gaukara oi karaia, bona emu hesiai gaukara oi hagugurua momokani.” (2 Tim. 4:​1, 2, 5, NW ) Timoteo be ena hesiai gaukara ia karaia namonamo totona, Iesu ena ‘hadibaia hereva ia badinaia noho’ be namo.​​—⁠1 Timoteo 4:6 duahia.

¹⁶ Edena dala ai oi be Iesu ena “hadibaia hereva oi badinaia noho” diba? Paulo ia gwau: “Namona be oi gaukara goada taunimanima vairanai oi duahiduahi noho, sisiba oi henia noho, bona oi hadibaia noho.  . . . Unai gaudia do oi laloa dobu, idia dekenai emu lalona ibounai oi henia.” (1 Tim. 4:​13, 15, NW ) Sibona eda stadi karana ese ita do ia durua iseda kara ita hanamoa noho totona. Inai hereva “lalona ibounai oi henia” ena anina be, mai kudouna ibounai ida gau ta oi karaia. Emu stadi karana be edena bamona oi karaia? Mai emu lalona ibounai ida “Dirava ena laloa dobu gaudia” oi tahua, a? (1 Kor. 2:​10) Eiava emu stadi be oi karaia kava, a? Oi stadilaia gaudia oi laloa dobu karana ese oi do ia hagoadaia.​​—⁠Aonega Herevadia 2:​1-5 duahia.

17, 18. (a) Emu hesiai gaukara oi karaia namonamo totona, dahaka gau ma haida oi karaia be namo? (b) Edena dala ai Timoteo ena haheitalai ese haroro gaukara ai oi ia durua?

¹⁷ Painia kekenina ta, Michelle, ia gwau: “Haroro gaukara ai anina namona lau havaraia totona, lau be sibona egu stadi karana ena sediual namona ta lau karaia bona hanaihanai hebou dekenai lau lao. Unai dala amo, lau be lau goada lau lao noho.” Bema painia gaukara oi karaia, unai ese oi do ia durua haroro gaukara ai Baibel oi gaukaralaia namonamo bona lo Keristani tauna ai oi lao totona. Oi hekwarahi oi duahiduahi namonamo bona Keristani heboudia dekenai haere namodia oi henia totona. Oi be lo Keristani matamata tauna ta dainai, do oi ura Tiokratik Haroro Sikuli ena tok oi hegaegaelaia namonamo bona idia henia sinado hegeregerena emu tok oi karaia.

¹⁸ “Evanelia tauna ena gaukara oi karaia” ena anina be, emu haroro gaukara oi goadalaia bona ma haida oi durudia mauri idia davaria totona. To unai bamona oi karaia totona, emu “hadibaia” karana oi hanamoa noho be gau badana. (2 Tim. 4:⁠2) Haroro gaukara ia manadalaia tadikaka o taihu ta ida oi gaukara hebou neganai, ena hadibaia dalana amo diba do oi abia, Timoteo be Paulo amo diba ia abia hegeregerena. (1 Kor. 4:​17) Paulo be ia durua taudia ia herevalaia neganai, ia gwau sivarai namona be idia dekenai ia harorolaia sibona lasi, to idia ia lalokau henia bada dainai ena mauri ia henia idia ia durua totona. (1 Tes. 2:⁠8) Haroro gaukara lalonai Paulo ena haheitalai oi tohotohoa totona, namona be Timoteo ena lalohadai oi abia, ia be ma haida ia laloa bona “Sivarai Namona” ia harorolaia goadagoada. (Filipi 2:​19-​23 duahia.) Emu haroro gaukara lalonai, sibona emu ura dadaraia karana oi hahedinaraia, a?

Umui Goada Umui Lao Karana ese Moale Korikori Ia Mailaia

19, 20. Dahaka dainai lo Keristani tauna ai oi lao karana ese moale ia mailaia?

¹⁹ Lo Keristani tauna ai oi lao totona oi hekwarahi be namo. To mai haheauka ida emu hadibaia daladia oi hanamoa neganai, oi ese hereva momokani oi hadibaia amo ‘momo dekenai Dirava ena kohu momo oi henia’ bona unai do oi ‘moalelaia bona oi heagilaia.’ (2 Kor. 6:​10; 1 Tes. 2:​19) Ful-taim hesiai gaukara ia karaia tadikaka ta, Fred, ia gwau: “Haroro gaukara ai egu nega bada lau gaukaralaia ma haida lau durua totona. Unai dainai, lau abia dae henia kara ena moale be bada, to abia kara ena moale be maragi.”

²⁰ Painia gaukara ia karaia taihu matamata ta, Daphne, be ena hesiai gaukara lalonai ia mamia moalena ia herevalaia neganai, ia gwau: “Iehova lau dibaia neganai, egu hetura karana Ia ida lau habadaia. Bona oi karaia gaudia ese Iehova ia hamoalea neganai, do oi moale bada danu!” Ena be nega momo taunimanima ese oi goada oi lao noho karana idia laloa bada lasi, to Iehova be hanaihanai unai ia itaia bona ia laloa bada. (Heb. 4:​13) Momokani, umui matamata Keristani taudia ese iseda guba Tamana ena ladana umui hahairaia bona umui abia isi diba. Namona be Iena kudouna umui hamoalea noho bona ma haida do idia itaia umui goada umui lao.​​—⁠Aon. 27:⁠11.

[Footnotes]

Dahaka Oi Dibaia?

• Lo Keristani taudia ai ita lao totona dahaka ita karaia diba?

• Edena dala ai inai negadia toi ai oi hahedinaraia oi be lo Keristani tauna . . .

hekwakwanai oi davaria neganai?

headava totona oi hegaegae neganai?

haroro gaukara lalonai?

[Picture on page 15]

Guriguri karana ese oi ia durua hekwakwanai oi haheaukalaia totona

[Picture on page 16]

Pablisa matamata taudia be edena dala ai edia hadibaia daladia idia hanamoa diba?