Kara Maoromaoro Natudia Hadibaia—Hari Ita Karaia Diba, A?

OTTAWA, Canada dekenai, Vanier Institute for the Family, ena orea tauna, Robert Glossop, ia gwau: “Hari ita be hekwakwanai idauidau momo herea, kastom idauidau momo, bona kara maoromaoro ena taravatu dalana tamona be lasi tanobadana dekenai ita noho.” Unai dainai dahaka ia vara? The Toronto Star niuspepa ena ripoti ta ia gwau: “Kekeni matamata idia rogorogo, matamata taudia edia dagedage karadia bona sibodia idia hamasea karadia idia bada idia lao.”

Unai hekwakwanai be North America sibona dekenai ia vara lasi. Center for Human Development, Brown University, Rhode Island, U.S.A. dekenai, ena dairekta tauna Bill Damon, ese unai hekwakwanai ia stadilaia Britain bona Europe ena tano ma haida dekenai, bona Australia, Israel, bona Japan dekenai danu. Ia hahedinaraia ena badina haida be dubu, sikuli, bona orea ma haida edia matamata taudia hakaua karana ia maragi ia lao. Ia laloa, hari inai negai “taunimanima ese natudia edia kara idia hanamoa bona hagoadaia daladia idia laloaboio.” Ia gwau natudia hadibaia daladia idia stadilaia taudia badadia idia hadibaia “matahakani ese natudia edia tauanina ena goada bona edia namo ia hadikaia diba.” Damon ia gwau unai be “sibodia edia ura idia badinaia bona idia gwau-edeede natudia havaraia dalana.”

Hari, memero kekeni be dahaka idia abia be namo? Edia kudouna bona darana hamaoromaoroa totona, mai lalokau ida idia hadibadia loulou be gau badana. Memero kekeni idauidau be matahakani idauidau idia abia be namo. Lalokau ese ia ha-uraia neganai, matahakani dalana be herevahereva namona amo idia karaia diba. Unai dainai Aonega Herevadia 8:​33 ai ita ia hamaoroa “lauegu [matahakani] do umui kamonai henia.” To, natudia haida be ‘hereva sibona dekena amo oi matahakani henia diba lasi.’ Idia gwau-edeede dainai, panisi maorona oi henia be namo, bona edia kerere ena bada hegeregerena do oi karaia. (Aonega Herevadia 17:10; 23:​13, 14; 29:19) Unai sisiba ia henia neganai, Baibel ese mai badu ida kwadia karana, eiava dadabaia dikadika karana, natuna idia haberoa diba karadia unai, ia hanamoa lasi. (Aonega Herevadia 16:32) Lasi, to namona be natuna be ia abia matahakani ena badina ia diba bona ia lalo-parara ia abia badina ena tamana o sinana be ena namo idia laloa.​—⁠Heberu 12:​6, 11 itaia.

Unai bamona sisiba namona, Baibel amo, be The Secret of Family Happiness bukana ese ia herevalaia momo.