Dirava ida Oi Raka Noho
“Lauma ena hakaua hegeregerena umui raka noho bena tauanina ena ura dikana ta do umui karaia lasi.”—GALATIA 5:16, NW.
BAIBEL ese ita ia hamaoroa Enoka be “Dirava momokanina ida ia raka noho.” Ena be Enoka ena negai taudia be Dirava gari henia lasi karadia idia karaia bona edia hereva be dika, to Dirava ida ia raka noho ela bona ena mauri lagani be 365 neganai ia mase. (Genese 5:23, 24, NW; Iuda 14, 15) Noa danu be “Dirava momokanina ida ia raka.” Iena ruma bese taudia ia ubua neganai, gwau-edeede aneru bona edia dagedage natudia be taunimanima idia hakaua kerere neganai, bona idaunegai taudia be ena bada hegeregerena idia karaia lasi lagatoina ta ena gaukara idauidau ia karaia neganai, Dirava ida ia raka. Abata ia ore murinai Dirava ida ia raka noho, Babela dekenai taunimanima be Iehova idia gwau-edeede henia lou negana ai danu. Oibe, Noa be Dirava ida ia raka noho ela bona mauri lagani 950 ia abia neganai ia mase.—Genese 6:9, NW; 9:29.
2. Dirava ida raka noho karana ena anina be dahaka?
2 Baibel ia gwau unai abidadama taudia be Dirava ida idia “raka” noho neganai, edia kara be laulau dalanai ia herevalaia. Ena anina be Enoka bona Noa be edia kara amo idia hamomokania edia abidadama Dirava dekenai be ia goada. Iehova ia oda henia gaudia idia karaia bona ena kara taunimanima dekenai idia dibaia bona unai diba hegeregerena idia mauri noho. (2 Sivarai 7:17 itaia.) Dirava ena hereva bona ena kara be edia lalona ai idia abia dae sibona lasi, to ia ura gaudia ibounai idia karaia—kahana ta sibona lasi, to goevadae lasi taudia idia karaia diba gaudia ibounai idia karaia. Unai dainai, Noa be Dirava ena hereva ibounai hegeregerena ia karaia. (Genese 6:22) Noa be Dirava ena oda dekenai gau ta ia atoa lasi, bona mai lahedo ida gau haida ia kokia lasi. Ia be Iehova ia turana karaia tauna, Dirava ia guriguri henia mai gari lasi bona Dirava ena hakaua dalana ia ura henia, unai dainai Dirava ida ia raka. Oi ese unai oi karaia, a?
Hanaihanai Oi Badinaia Mauri Dalana
3. Dirava dekenai edia mauri idia gwauhamatalaia bona bapatiso idia abia vadaeni taudia ibounai dekenai dahaka be gau badana?
3 Taunimanima be Dirava ida idia raka matamaia neganai, iseda kudouna ia hamarerea bada. Iehova ena ura hegeregerena idia raka neganai, edia abidadama idia hamomokania, bona tau ta be Dirava ia hamoalea diba lasi bema abidadama ia noho lasi. (Heberu 11:6) Ita moale bada herea badina idia hanaia laganidia ima lalonai, lagani ta ta ai Iehova dekenai edia mauri idia gwauhamatalaia bona ranu lalonai bapatiso idia abia taudia edia averes be 320,000! To gau badana be idia bona ita ibounai be Dirava ida ita raka noho.—Mataio 24:13; Apokalupo 2:10.
4. Ena be abidadama sisina idia hahedinaraia, to dahaka dainai Aigupito idia rakatania Israela taudia momo be Gwauhamata Tanona ai idia vareai lasi?
4 Mose ena nega ai, Aigupito dekenai Israela ruma besena ta be Pasova idia karaia bona edia ruma ena iduara ena au kahana kahana bona ataiai audia ai rara idia dahua totona, abidadama be gau badana. (Esodo 12:1-28) To Davara Kakakaka dekenai, Farao ena ami be idia murinai kahirakahira idia noho neganai, idia momo edia abidadama ia manoka. (Esodo 14:9-12) Salamo 106:12 ese ia hahedinaraia tano kaukauna dekenai davara idia raka hanai, bona davara ena hurehure badadia idia diho bona Aigupito ami taudia ibounai idia hamasea idia itaia neganai, ‘Iehova ena gwauhamata’ idia abidadama henia lou. To nega sisina murinai, tano gagaena dekenai, Israela taudia be inuinu ranuna, aniani, bona edia hakaua taudia idia maumauraia matamaia. Gwauhamata Tanona idia itaia spai taudia 12 amo, 10 ese ripoti dikana idia mailaia dainai idia gari. Unai neganai, Salamo 106:24 ia gwau: “Dirava ena gwauhamata idia abidadama henia lasi.” Idia ura Aigupito dekenai idia giroa lou. (Numera 14:1-4) Dirava ena siahu amo ia karaia hoa karadia idia itaia negana sibona ai edia abidadama be ia hedinarai. Dirava ida idia raka noho lasi. Unai dainai, unai Israela taudia be Gwauhamata Tanona ai idia vareai lasi.—Salamo 95:10, 11.
5 Baibel ena hereva ese ita ia sisiba henia, ia gwau: “Umui sibona emui kara do umui tahua, bona emui mauri do umui tohoa, umui be abidadama korikori taudia o lasi.” (2 Korinto 13:5) “Abidadama korikori” ena anina be Keristani hahediba herevadia ibounai oi badinaia. Unai be mai anina bada gauna bema ita ura iseda mauri ibounai lalonai Dirava ida do ita raka noho. Dirava ida ita raka totona, namona be Iehova ita abidadama henia momokani. (Aonega Herevadia 3:5, 6) Idia karaia lasi taudia totona, tarapu bona hamorua gaudia momo idia noho. Unai tarapu haida be dahaka?
Sibona Emu Goada Laloa Bada Tarapuna Oi Dadaraia
6. Keristani taudia ibounai be dahaka idia diba heudahanai bona sihari kava karadia dekenai, bona unai kara dika be edena bamona idia laloa?
6 Baibel idia stadilaia, edia mauri be Iehova dekenai idia gwauhamatalaia, bona bapatiso idia abia taudia ibounai idia diba Dirava ena Hereva ese heudahanai bona sihari kava karadia ia gwauraia dika. (1 Tesalonika 4:1-3; Heberu 13:4) Unai bamona taudia idia gwau unai taravatu be maoro. Idia laloa unai taravatu hegeregerena do idia mauri noho. To, Satani ena tarapu namona ta be sihari kava karadia. Dahaka dainai?
7. Moaba ena Palaka Gabuna ai, dahaka dainai Israela tatau be idia diba kara kererena idia karaia?
7 Reana matamanai, unai bamona taudia be sihari kava karadia karaia totona palani ta idia karaia lasi. Reana unai be momokani Moaba ena Palaka Gabuna ai idia noho Israela taudia dekenai danu. Reana matamanai, tano gagaena idia hesikulaia Israela tatau dekenai, unai lebulebu Moaba bona Midiana hahine edia toana be namo, idia be heabidae karana idia hahedinaraia. To unai bese be Bala idia tomadiho henia bona Iehova idia tomadiho henia lasi taudia, edia kekeni (ladana bada taudia edia kekeni danu) be idia adavaia lasi tatau ida idia mahuta hebou neganai idia koua lasi. Israela tatau be unai bamona taudia edia boiboi idia abia dae bona idia bamoa matamaia neganai dahaka ia vara? Israela ena kamepa amo idia lao tatau be unai taudia edia hebamo idia ura henia neganai, idia veria idia diba kara kererena idia karaia totona, bona unai kara ena davana be mase.—Numera 22:1; 25:1-15; 31:16; Apokalupo 2:14.
8. Hari inai nega ai, edena gauna be Keristani tauna ia veria diba sihari kava karana ta ia karaia totona?
8 Hari inai negai, reana edena bamona gauna dainai ta be unai bamona tarapu lalonai ia moru? Ena be ia diba sihari kava karana be kara dika badana, to bema sibona eda goada laloa bada karana ena dika ia laloa lasi, reana gau ta do ia vara bona kara dika urana ese ena laloa namonamo karana do ia hanaia.—Aonega Herevadia 7:6-9, 21, 22; 14:16.
9. Baibel lalonai, edena sisiba ese ita idia naria sihari kava karana ta ita karaia lasi totona?
9 Dirava ena Hereva ese ita ia sisibalaia goevagoeva, ia gwau namo lasi ita laloa ita goada dainai hebamo dikadia ese ita do idia hadikaia lasi. Lebulebu taudia edia mauri sivaraina idia hahedinaraia televisen program bona sihari kava karadia idia hagoadaia magasin itaia be hebamo dikadia danu. (1 Korinto 10:11, 12; 15:33) Iseda tadikaka ita bamoa neganai, hekwakwanai idia vara diba danu bema ita naria namonamo lasi. Tau bona hahine ihuanai ia noho urana ia goada. Unai dainai Iehova ena orea be mai lalokau ida inai sisiba ia henia, tadikaka ta o taihu ta be ena adavana lasi o ena ruma bese lasi tauna o hahine ta ida sibona idia noho eiava taunimanima ma haida be lasi gabudia dekenai idia lao be namo lasi. Dirava ida ita raka noho totona, namona be sibona eda goada laloa bada karana ita dadaraia bona ia henia sisiba ita badinaia.—Salamo 85:8.
Namona be Taunimanima Gari Henia Karana be Oi Ia Biagua Lasi
10 Aonega Herevadia 29:25 be gau dikana ma ta ia hahedinaraia, ia gwau: “Taunimanima do oi gari henia neganai, dika do oi davaria, tarapu lalonai oi moru bamona.” Nega momo labana tauna ena tarapu be varo ta be animal ena aiona ia koua eiava varo haida be ena aena idia dogoatao. (Iobu 18:8-11) Taunimanima gari henia karana ese ta ena mai kwalimu ida hereva dalana bona Dirava ia hamoalea karana ia koua diba. Ma haida ita ura ita hamoalea be vaia taunimanima edia kara ta, bona ma haida edia lalohadai laloa lasi karana be Keristani taudia edia kara ta lasi. To unai gaudia ita laloa namonamo be gau badana. Bema ta be taunimanima edia kara ia garilaia dainai Dirava ese ia taravatulaia gauna ia karaia eiava Dirava ena Hereva ena hahegani ta ia karaia lasi, unai tauna be tarapu lalonai ia moru vadaeni.
11. (a) Taunimanima gari henia karana ese ta ia biagua lasi totona, edena heduru gauna ia noho? (b) Iehova ena hesiai taudia be taunimanima idia gari henia neganai, edena dala ai ia ese idia ia durua?
11 Unai bamona tarapu lalonai ita moru lasi totona, ita ia durua gauna be iseda goada lasi, to ‘Iehova ita abidadama henia’ karana. (Aonega Herevadia 29:25b) Bema ta be hemarai tauna, to Dirava ia abidadama henia, do ia boga-auka bona do ia gini goada diba. Satani ena tanobada mai ena doria gaudia lalonai ita do noho neganai, namona be ita naria namonamo noho, taunimanima gari henia tarapuna dekenai ita moru garina. Ena be peroveta tauna Elia be ena hesiai gaukara ia karaia mai boga-auka ida, to Iesebele ia gwau do ia hamasea neganai, mai gari bada ida unai gabu ia heautania. (1 King Taudia 19:2-18) Aposetolo Petero ena gari ese ia doria dainai, nega toi ia gwau Iesu Keriso ia diba lasi, bona lagani momo murinai, gari dainai ena abidadama hegeregerena ia kara lasi. (Mareko 14:66-71; Galatia 2:11, 12) To, Elia bona Petero be lauma dalana ai idia abia heduruna idia abia dae bona, mai abidadama ida Iehova dekenai, Dirava idia hesiai henia noho iena ura hegeregerena.
12. Hari inai negai, edena haheitalai idia hahedinaraia taunimanima haida ese heduru idia abia, bena gari dainai Dirava hamoalea karadia idia rakatania lasi?
12 Hari inai negai, Iehova ena hesiai taudia momo be gari ena tarapu hanaia daladia idia dibaia vadaeni. Guyana dekenai, Witness kekeni badana ta ia gwau: “Sikuli dekenai, sikuli taudia edia lalo-ani herevadia lau dadaraia be auka.” Ma ia gwau: “To egu abidadama Iehova dekenai ia auka danu.” Iena tisa be ena abidadama dainai ena klas taudia vairanai ia hevasehalaia neganai, mai regerege lasi ida Iehova dekenai ia guriguri. Unai murinai, taunimanima idia noho lasi neganai, tisa tauna ia haroro henia mai ena hemataurai ida. Iehova ena taravatu ia dibaia tauhau ta be ena hanua, Benin dekenai, ia vadivadi henia neganai, ena lalona ia hadaia ena tamana ese ia karaia bona ia dekenai ia henia kaivakuku ta do ia negea. Unai tauhau ia diba unai kaivakuku be mauri lasi gauna, unai dainai ia gari henia lasi, to ia diba hanua taudia do idia badu bona reana dala do idia tahua ia idia hamasea totona. Iehova dekenai ia guriguri, bena hanuaboi ai unai kaivakuku ia abia lao uda dekenai bona ia hadikaia. (Gunalaia Taudia 6:27-31 itaia.) Dominican Republic dekenai, hahine ta be Iehova ia hesiai henia matamaia neganai, ena adavana ese ia hamaoroa namona be Iehova eiava ia do ia abia hidi. Iena tau ese ia hagaria, ia gwau edia headava do ia hadokoa. Gari dainai iena abidadama ia rakatania, a? Ia gwau: “Bema heudahanai ia vara, do lau hemarai, to lau hemarai lasi Iehova Dirava lau hesiai henia dainai!” Dirava ida ia raka noho, bona gabeai ena adavana be ia ida Iehova ena ura ia karaia. Bema iseda guba Tamana ita abidadama henia momokani, taunimanima do ita gari henia lasi bona Iehova hamoalea karadia do ita karaia sibona.
Sisiba Ena Namo Oi Hamaragia Lasi
13. Timoteo Ginigunana 6:9 ese dahaka tarapu ia herevalaia bona sisibalaia?
13 Ena be labana taudia idia gaukaralaia tarapu haida be gabu ta dekenai ia loaloa animal idia dogoatao, to tarapu ma haida lalonai, animal idia ura henia gauna ia noho bona unai ese idia ia veria. Taunimanima momo dekenai, kohu bada be unai bamona. (Mataio 13:22) Baibel be 1 Timoteo 6:8, 9 ai ita ia hagoadaia aniani bona dabua idia hegeregere neganai ita moale be namo. Bena inai sisiba ia henia: “Kohu momo idia ura henia taudia be dibagani dekenai idia moru diba. Bona boroma be tarapu dekenai ia moru bamona, ura dikadia bona ura kavakava ese unai kohu ura henia taudia do idia koia, bona hadikaia.”
14. (a) Dahaka dainai ta be Baibel ena sisiba, aniani bona dabua idia hegeregere neganai ia moale be namo, ia abia dae momokani lasi? (b) Bema ta be lalohadai kererena ia abia kohu momo ena anina dekenai, dahaka dainai unai ese 1 Timoteo 6:9 ena sisiba ena namo ia hamaragia diba? (c) Dahaka dainai mataganigani dainai haida be ia noho tarapuna idia itaia lasi?
14 Ena be unai sisiba ia noho, to momo be unai tarapu dekenai idia moru badina unai sisiba idia gaukaralaia lasi edia mauri lalonai. Dahaka dainai? Edia hekokoroku ese idia ia doria edia mauri lalonai Baibel ia gwau ia hegeregere “aniani bona dabua” sibona lasi to gau ma haida idia tahua totona, a? Idia be Baibel ena sisiba ena namo idia hamaragia badina idia laloa kohu bada ena anina be taga bada taudia idia abia gaudia sibona, a? Baibel ese taga tahua goadagoada karana bona ta be aniani bona dabua ia davaria neganai ena lalona ia hegeregere karana ia hahegeregerea sibona. (Heberu 13:5 itaia.) Reana mataganigani—idia itaia gaudia idia ura dikadika idia abia, ena be lauma gaudia do idia negea—dainai, tomadiho momokani gaudia be gau ginigunana lasi edia mauri lalonai, a? (1 Ioane 2:15-17; Hagai 1:2-8) To Baibel ena sisiba idia badinaia momokani bona edia mauri lalonai Iehova ena hesiai gaukara idia atoa guna dainai Dirava ida idia raka hebou taudia idia moale bada herea!
Mauri Ena Lalo-Hekwarahi Haheaukalaia mai Kwalimu Ida
15. Iehova ena taunimanima ese dahaka gaudia dainai idia lalo-hekwarahi, bona unai bamona lalo-hekwarahi ita davaria neganai, edena tarapu dainai ita naria namonamo?
15 Taga tahua goadagoada karana be hekwakwanai ta, to nega momo mauri durua gaudia abia ena lalo-hekwarahi be hekwakwanai badana ta. Iehova ena hesiai taudia momo edia kohu be bada lasi. Hora momo lalodiai idia gaukara goadagoada, dabua haida, hanuaboi ai ruma bese be mai ena mahuta gabuna, bona unai dina dekenai aniani sisina idia abia totona. Ma haida idia hekwarahi badina idia gorere, idia buruka, eiava edia ruma bese taudia idia buruka. Karaharaga unai bamona lalo-hekwarahi ese edia mauri ena lauma gaudia idia hadikaia diba!—Mataio 13:22.
16. Iehova ese edena dala ai ita ia durua mauri ena hekwakwanai idauidau ita haheaukalaia totona?
16 Mai ena lalokau ida, Iehova ese ita ia hamaoroa ena Mesia Basileiana henunai unai hekwakwanai do idia ore. (Salamo 72:1-4, 16; Isaia 25:7, 8) Mauri ena hekwakwanai idauidau hari ita haheaukalaia totona, ia ese ita ia durua dalana be sisiba ia henia edena bamona ita be mai anina bada gaudia ita atoa guna diba. (Mataio 4:4; 6:25-34) Iehova ese ena idaunegai hesiai taudia ia durua sivaraidia amo iseda lalona ia hagoadaia. (Ieremia 37:21; Iamesi 5:11) Ita ia hagoadaia dalana ma ta be, herevana dahaka hekwakwanai ia vara ita dekenai, ita diba ia idia badinaia hesiai taudia ia lalokau henia noho. (Roma 8:35-39) Iehova idia abidadama henia taudia dekenai ia gwau: “Lau ese umui do lau negea lasi, bona umui do lau rakatania lasi. Lasi bona lasi momokani.”—Heberu 13:5.
17. Hekwakwanai dikadia idia davaria taudia be Dirava ida idia raka hebou noho, mani edia sivarai haida oi gwauraia.
17 Unai diba ese Keristani momokani taudia ia hagoadaia dainai, Dirava ida idia raka noho bona tanobada karadia idia karaia lasi. Tano momo lalonai, ogogami tanobada taudia edia lalohadai be bema ta ena kohu ena bada ese edia kohu ena bada ia hanaia, bona iena kohu idia abia edia ruma bese idia ubua totona, unai be henaohenao karana ta lasi. To abidadama dekenai idia raka taudia ese unai lalohadai idia dadaraia. Dirava ena lalo-namo idia laloa bada bona idia tahua guna, bona idia diba edia kara maoromaoro ena davana be ia amo do idia abia. (Aonega Herevadia 30:8, 9; 1 Korinto 10:13; Heberu 13:18) India dekenai, vabu ta ese ia davaria ia lahedo lasi bona dala idauidau ai gaukara ia tahua dainai iena mauri gaudia idia hegeregere. Iena ogogami nohona dainai ia badu lasi, to ia diba bema Dirava ena Basileia bona iena kara maoromaoro ia tahua guna ena mauri dekenai, Iehova ese ena hekwarahi do ia hanamoa bena ia bona ena natuna merona be edia mauri durua gaudia do idia davaria diba. (Mataio 6:33, 34) Tanobada ibounai lalonai taunimanima tausen tausen momo ese idia hahedinaraia, herevana edena bamona hekwakwanai idia davaria, Iehova be edia gima bona naria Tauna. (Salamo 91:2) Unai be momokani oi dekenai danu, a?
18. Satani ena tarapu idauidau amo ita raka siri dalana be dahaka?
18 Inai tanobada dikana lalonai ita do noho negana ibounai lalonai, idia noho tarapu amo do ita raka siri. (1 Ioane 5:19) Baibel ese unai tarapu idauidau ia herevalaia bona raka siri daladia ia hahedinaraia ita dekenai. Iehova idia lalokau henia momokani bona ia idia habadua garina idia gari taudia ese unai tarapu amo do idia raka siri diba. Bema ‘lauma ena hakaua hegeregerena idia raka noho,’ tanobada karadia do idia karaia lasi. (Galatia 5:16-25) Edia mauri lalonai Iehova hetura henia karana idia atoa guna momokani taudia ibounai vairanai inai helaro ia noho, Dirava ida do idia raka hebou bona do idia tura henia diba ela bona hanaihanai.—Salamo 25:14.
Emu Haere be Dahaka?
◻ Edena dala ai sibona eda goada laloa bada karana be tarapu ta?
◻ Dahaka kara ese ita do ia naria taunimanima ita gari henia lasi totona?
◻ Reana dahaka gauna dainai ita be kohu tahua goadagoada karana dekenai ita abia sisiba ita badinaia lasi?
◻ Dahaka ese ita ia durua diba mauri ena lalo-hekwarahi idauidau edia tarapu amo ita raka siri totona?
1. (a) Enoka be Dirava ida ia raka noho ela bona edena negai, bona ena nega ai taunimanima edia kara be edena bamona? (b) Noa be Dirava ida ia raka noho ela bona edena negai, bona edena maduna metaudia ia huaia?
5. Edena dala ai 2 Korinto 13:5 bona Aonega Herevadia 3:5, 6 be mai anina Dirava ida raka noho karana dekenai?
10. Edena dala ai ‘taunimanima gari henia’ karana be tarapu ta?
[Picture on page 16]
Taunimanima momo be edia mauri ibounai lalonai Dirava ida idia raka noho