Oi Gima Noho Satani Ia Ura Oi Ia Hadikaia!

1. Lauma tauna ta be Satani ai ia lao dalana oi herevalaia.

GUNA, lauma tauna ta be Iehova ena aneru namona ta. To gabeai, unai lauma tauna ia ura taunimanima ese ia do idia tomadiho henia. Unai ura dikana ia dadaraia lasi, to ena lalona ai ia noho ela bona ia rogorogo bamona bona kara dika ia karaia. (Iam. 1:14, 15) Ita diba unai lauma tauna be Satani, ia be “hereva momokani ia badinaia lasi.” Ia be Iehova ia inai henia bona “koikoi ena tamana” ai ia lao.—Ioa. 8:44.

2, 3. Edena dala ai inai hereva “Satani,” “Diabolo,” “idaunegai gaigaina,” bona “huala badana” ese idia hahedinaraia ia be Iehova ena inai tauna badana?

² Satani ia gwau-edeede murinai, ia be Iehova ena inai tauna badana ai ia lao, bona taunimanima ia ura henia lasi. Satani ese ia abia ladadia ese idia hahedinaraia ia be kara gageva tauna. Satani ena anina be “Gwau-edeede Tauna,” unai ese ia hahedinaraia unai lauma dikana be Dirava ena lohia dalana ia dadaraia; eiava ia inai henia momokani. Satani ia ura dikadika Iehova ena lohia dalana ia haorea.

³ Apokalupo 12:9 ia gwau, Satani be Diabolo, anina be “Ladana Hadikaia Tauna.” Unai ese ita ia hadibaia Satani ese Iehova ena ladana ia hadikaia, bona ia gwauraia koikoi Diravana. Inai hereva “idaunegai gaigaina” ita kamonai neganai, Eden umana ai ia vara gauna ita laloa, unai be Satani ese gaigai ia gaukaralaia Heva ia koia totona. Inai hereva “huala badana” ese ia hahedinaraia Satani be unai dagedage animal dikana, bona ia ura Iehova ena palani bona ena taunimanima ia hadikaia ore.

4. Inai stadi lalonai dahaka do ita herevalaia?

⁴ Unai ese ia hahedinaraia Satani be eda abidadama ia tohoa tauna badana. Unai dainai, Baibel ia gwau: “Do umui laloa maoromaoro bona do umui gima noho. Emui inai tauna, Diabolo, be ia boiboi bada laiona bamona ia raka loaloa, do ia ania ore tauna ia tahua noho.” (1 Pet. 5:8) Inai atikol lalonai Satani ena kara toi do ita herevalaia, unai ese ia hahedinaraia dahaka dainai Iehova bona iena taunimanima be edia inai tauna dikana amo idia naria namonamo.

SATANI BE MAI ENA SIAHU

5, 6. (a) Edena dala ai aneru be mai edia siahu o “goada badana”? Haheitalai haida gwauraia. (b) Edena dala ai Satani ese “mase ia havaraia diba”?

⁵ Aneru be mai edia siahu o “goada badana.” (Sa 103:20) Edia aonega ese taunimanima edia aonega ia hereaia. To, aneru namodia be edia siahu idia gaukaralaia namonamo. Hegeregere nega ta, Iehova ena aneru tamona ese Asuria ena tuari taudia 185,000 ia alaia mase—tau tamona o tuari oreana ta ese unai ia karaia diba lasi. (2 Kin. 19:35) Nega ma ta ai, aneru ta ese ena siahu bona aonega ia gaukaralaia, Iesu ena aposetolo taudia be dibura ruma amo ia ruhaia totona. Ena be gadi taudia idia gini, to aneru ese iduara ia kehoa, bena aposetolo taudia idia raka lasi murinai, iduara be murimuri amo ia lokaia!—Kara 5:18-23.

⁶ Aneru namodia ese edia siahu idia gaukaralaia namonamo, to Satani ese ena siahu ia gaukaralaia kerere. Ia be mai ena siahu bona taunimanima ia hakaudia kerere. Baibel ia gwau, Satani be “inai tanobada ena lohia” bona “inai nega oromana ena dirava.” (Ioa. 12:31; 2 Kor. 4:4) Ia be “mase ia havaraia diba.” (Heb. 2:14) Eiava ita gwau diba Satani be dala haida ia gaukaralaia taunimanima edia mase ia havaraia totona. Momokani, iena ala-ala lalohadaina be inai tanobada ia hadikaia vadaeni. Danu, Heva ese Satani ena koikoi herevana ia abia dae bona Adamu ese Dirava ia gwau-edeede henia dainai, mase be taunimanima ibounai dekenai ia hanaia. (Roma 5:12) Unai dainai, ita gwau diba Satani ese “mase ia havaraia diba.” Iesu ia gwau Diabolo be “ala-ala tauna.” (Ioa. 8:44) Satani be tau dika rohorohona!

7. Edena dala ai demoni ese idia hahedinaraia idia be mai edia goada?

⁷ Bema Satani ita inai henia, anina be ia idia durua taudia bona Dirava ena lohia siahuna idia dadaraia taudia danu ita inai henia. Ia idia durua taudia haida be gwau-edeede anerudia, o demoni. (Apok. 12:3, 4) Nega momo taunimanima idia hahisia bona idia hahedinaraia edia goada be taunimanima edia goada ia hereaia. (Mat. 8:28-32; Mar. 5:1-5) Unai aneru dikadia eiava “demoni edia lohia” be mai edia siahu. (Mat. 9:34) Satani ita tuari henia bona ita kwalimu totona, Iehova ena heduru ita tahua be namo.

SATANI BE DAGEDAGE TAUNA

8. (a) Satani ena ura be dahaka? (Laulau ginigunana itaia) (b) Oi laloa edena dala ai tanobada ese Satani ena dagedage karana ia hahedinaraia?

⁸ Aposetolo Petero ia gwau, Satani be “boiboi bada laiona” bamona. Buka ta ese Greek herevana idia hahanaia “boiboi bada” ena anina be “dagedage animal ta be ia hitolo bada dainai ia boiboi.” Unai ese Satani ena dagedage karana ia hahedinaraia! Ena be tanobada ibounai be Satani ena siahu henunai ia noho, to ia ura dikadika taunimanima momo ia hakaua kerere. (1 Ioa. 5:19) Satani ia ura dikadika horoa orena taudia, “mamoe ma haida” ese idia bamoa taudia unai, ia hadikaia. (Ioa. 10:16; Apok. 12:17) Satani ia ura Iehova ena taunimanima do ia hadikaia. Aposetolo edia nega amo ema bona hari, Keristani taudia be dagedage idia davaria noho bona unai ese ia hahedinaraia Satani be dagedage tauna.

9, 10. (a) Edena dala ai Satani be Israela besena ia dagedage henia? (Haheitalai haida gwauraia.) (b) Dahaka dainai Satani ese Israela besena ia tohoa? (c) Bema Iehova ena hesiai tauna ta be kara dika badana ta ia karaia, Satani ena hemami be edena bamona?

⁹ Satani ia ura Dirava ena ura ia koua, unai dainai ia hahedinaraia ia be dagedage tauna. Laiona ia hitolo neganai, do ia ania animal dekenai ia hebogahisi lasi. Animal ta ia alaia bona ia ania murinai, unai do ia laloa momo lasi. Unai hegeregerena, Satani be ia hadikaia taudia ia hebogahisi henia lasi. Hegeregere, Israela taudia be matabodaga bona mataganigani karadia idia karaia neganai, oi laloa Satani ena hemami be edena bamona? Simiri ena matabodaga karana bona Gehasi ena mataganigani karana ese ia havaraia dika ena sivarai oi duahia neganai, Satani ese unai ia moalelaia, ani?—Num. 25:6-8, 14, 15; 2 Kin. 5:20-27.

¹⁰ Satani be Israela besena ia tohoa badina Mesia be unai bese amo do ia mai bona ia ese Satani do ia hadikaia, bona Iehova ena lohia siahuna do ia abia isi. (Gen. 3:15) Satani ia ura lasi Israela taudia be Dirava ena lalonamo idia abia dainai, ia gaukara goada idia ia koia kara dika idia karaia totona. Hegeregere, Davida ia heudahanai neganai, Satani be ia dekenai ia hebogahisi lasi. Mose be Gwauhamata Tanona ai ia vareai lasi neganai, Satani be ia dekenai ia hebogahisi lasi danu. To, Iehova ena hesiai tauna ta be kara dika badana ta ia karaia neganai, Satani ia moale bada. Bona Diabolo be unai dala amo Iehova ena lalona ia hahisia.—Aon. 27:11.

11. Dahaka dainai Satani ese Sara ia tohoa?

¹¹ Satani be Mesia do ia mai besena ia badu henia. Hegeregere, Iehova ese Aberahamo ia hamaoroa “bese bada herea” be ia amo do ia mai negana mani oi laloa. (Gen. 12:1-3) Aberahamo bona Sara be Aigupito ai idia noho neganai, Farao ese Sara ia hakaua lao ena ruma dekenai, bona ia ura ena adavana ai ia halaoa. To, Iehova ese Sara ia gimaia bona unai hekwakwanai amo ia hamauria. (Genese 12:14-20 duahia.) Isako ia do vara lasi neganai, Gerara dekenai unai bamona kara ta ia vara danu. (Gen. 20:1-7) Ita gwau diba Satani be unai hekwakwanai ia havaraia, a? Sara be kohu momo hanuana Uru ia rakatania bona palai rumana ai do ia noho dainai, Satani ia laloa Farao bona Abimeleka edia ruma hairaidia amo Sara do ia dibagania, a? Satani ia laloa Sara ese ena adavana bona Iehova do ia gwau-edeede henia bona do heudahanai, a? Baibel be unai ia herevalaia lasi, to bema Sara ese Mesia do ia mai besena ia havaraia lasi, Satani do ia moale bada. Bema Sara be ena headava, ladana namona, bona ena hetura karana Iehova ida ia hadikaia, Satani be unai do ia lalohisihisilaia lasi. Satani be dagedage tauna dika rohorohona!

12, 13. (a) Iesu ia vara murinai, Satani be edena dala ai dagedage karana ia hahedinaraia? (b) Hari Iehova idia lalokau henia bona idia ura ia idia hesiai henia natudia dekenai, Satani ena hemami be edena bamona?

¹² Aberahamo ia mase bona lagani handred murinai, Iesu ia vara. Satani be unai beibi dekenai ia moale lasi, badina ia diba unai beibi do ia bada neganai, ia be Iehova ese ia gwauhamatalaia Mesiana ai do ia lao. Iesu be Aberahamo ena garana ena kahana ginigunana bona gabeai ia ese ‘Diabolo ena gaukara ibounai do ia haorea momokani.’ (1 Ioa. 3:8) Satani ia laloa beibi ta alaia karana be kerere badana, a? Lasi. Ia laloa lasi dahaka be maoro o dahaka be kerere. To, ia ura Iesu do ia hamasea haraga. Edena dala ai?

¹³ King Heroda be hisiu stadilaia babalau taudia amo ia kamonai “Iuda taudia edia king” be ia vara vadaeni, unai dainai ia badu dikadika bona ia ura unai beibi ia alaia. (Mat. 2:1-3, 13) Unai dainai, oda ia atoa Betelehema bona ena badina hanuadia ai mauri lagani rua bona unai lagani idia do abia lasi memero ibounai do idia alaia mase. (Mataio 2:13-18 duahia.) Iesu be unai ala-ala karana amo ia heau mauri, to eda inai tauna Satani ena kara amo dahaka ita dibaia? Unai ese ia hamomokania Diabolo be taunimanima edia mauri ia laloa bada lasi. Danu, ia ese natudia ia hebogahisi henidia lasi. Momokani, Satani be “boiboi bada laiona” ta bamona, ena dagedage karana dekenai ita naria namonamo!

SATANI BE KOIKOI TAUNA

14, 15. Edena dala ai Satani be abidadama lasi taudia “edia lalona ia hadiburaia”?

¹⁴ Satani be taunimanima ia koia noho, unai amo lalokau Diravana, Iehova, idia rakatania. (1 Ioa. 4:8) Danu, Satani ena koikoi karana dainai, taunimanima do idia ura lasi Dirava idia dibaia. (Mat. 5:3) Satani ese abidadama lasi taudia “edia lalona ia hadiburaia, vadaeni Keriso, Dirava ena toana ia abia tauna, ena sivarai namona mai hairaina ena diari be idia dekenai ia hedinarai lasi.”—2 Kor. 4:4.

¹⁵ Satani ese tomadiho koikoi ia gaukaralaia taunimanima ia koia totona. Satani ia diba ‘ita be Iehova sibona ena.’ (Eso. 20:5) Satani do ia moale bema taunimanima ese edia sene karadia, animal, tanobada o guba gauna ta idia tomadiho henia. Madi, momo be edia tomadiho karadia lalonai hahediba koikoi bona sene karadia idia badinaia, bona idia laloa Dirava ese unai ia abia dae. Unai bamona taudia dekenai Iehova ia gwau: “Badina dahaka emui moni umui negea kava noho, mai ena anina lasi gauna totona? Badina dahaka emui gaukara ena davana moni umui negea, to umui hitolo noho? Lau dekenai do umui kamonai, bona lauegu hereva do umui karaia. Unai neganai aniani namo herea momokani do umui moalelaia.”—Isa. 55:2.

16, 17. (a) Dahaka dainai Iesu ese Petero ia hamaoroa: “Satani e, egu murinai oi lao”? (b) Bema ita gima lasi, edena dala ai Satani ese ita ia koia diba?

¹⁶ Satani be mai ura bada ida Iehova idia hesiai henia taudia ia koia diba. Hegeregere, Iesu be ena hahediba taudia ia hamaoroa ia do idia alaia mase neganai, ia vara gauna oi laloa. Iesu ia lalokau henia tauna, aposetolo Petero, ia gwau: “Lohiabada e, oi sibona oi hebogahisi henia, oi dekenai unai bamona do ia vara lasi.” To, Iesu be Petero dekenai ia gwau: “Satani e, egu murinai oi lao!” (Mat. 16:22, 23) Dahaka dainai Iesu ese Petero ia gwauraia “Satani”? Badina Iesu be do ia vara gauna ia diba. Daudau lasi murinai, Iesu do ia mase bona ena mauri davalaia boubouna ese do ia hahedinaraia Satani be koikoi tauna. Unai negai Iesu be sibona dekenai do ia “hebogahisi” lasi. Bema Iesu be unai bamona ia karaia, Satani do ia moale bada.

¹⁷ Inai nega oromana ena dokona be kahirakahira dainai, ita danu be nega aukana lalonai ita noho. Satani ia ura tanobada gaudia dekenai ita kwalimu totona, ita sibona dekenai ita “hebogahisi.” Namo lasi unai tarapu dekenai oi moru! To, namona be oi “gima noho.” (Mat. 24:42) Satani ena koikoi karadia ita abia dae lasi, bona ita gwau lasi dokona be daudau o do ia mai lasi.

18, 19. (a) Edena dala ai Satani ese ita ia koia diba, unai amo do ita laloa Iehova be ita ia lalokau henia lasi? (b) Edena dala ai Iehova ese ita ia durua, ita laloa maoromaoro bona ita gima noho totona?

¹⁸ Satani be dala ma ta amo ita ia koia diba. Ia ura ita laloa Iehova be ita ia lalokau henia lasi bona eda dika ia gwauatao lasi. Satani be unai lalohadai koikoina ia gaukaralaia. Daika ia laloa Iehova ese ita ia lalokau henia lasi? Dirava ese daika ena dika do ia gwauatao lasi? Unai henanadai rua ena haere be Satani. To, Baibel ia gwau: “Dirava ena kara be ia gageva lasi, ia ese emui gaukara bona iena ladana totona umui hahedinaraia lalokauna, do ia laloaboio lasi.” (Heb. 6:10) Iehova be ia totona ita karaia gaudia ibounai ia laloa bada, bona iseda hesiai gaukara be ita karaia kava lasi. (1 Korinto . 15:58 duahia.) Unai dainai Satani ena koikoi herevadia ese ita ia koia lasi.

¹⁹ Inai stadi ai ita herevalaia bamona, Satani be mai ena siahu, ia be dagedage bona koikoi tauna. Edena dala ai Satani ita inai henia bona ita kwalimu diba? Iehova ese ita do ia durua. Iena Hereva amo Satani ena koikoi karadia be ita dekenai ia hadibaia, unai dainai “ita be iena koikoi karadia ita diba.” (2 Kor. 2:11) Bema Satani ena koikoi karadia ita lalopararalaia, unai ese ita do ia durua, iseda laloa maoromaoro karana ita dogoatao bona ita gima noho totona. To, Satani ena koikoi karadia ita dibaia sibona be hegeregere lasi. Baibel ia gwau: “Diabolo umui inai henia, bona ia be umui amo do ia heau siri.” (Iam. 4:7) Stadi gabena ai ita ese Satani ita tuari henia bona do ita kwalimu daladia toi do ita herevalaia.