Ena Tamana Bona Iehova Ia Hamoalea

Laulau ai ia noho kekeni oi itaia, a?​— Ia be Iepeta ena natuna kekeni. Baibel ese ena ladana ia gwauraia hedinarai lasi, to ita diba ia ese ena tamana bona Iehova ia hamoaledia. Mani ia bona ena tamana Iepeta ita herevalaia.

Iepeta be tau namona bona hanaihanai ena natuna kekenina dekenai Iehova ia herevalaia. Danu, ia be tau goadana bona hakaua tauna namona. Unai dainai, Israela taudia ese idia noia idia do ia gunalaia edia inai taudia idia tuari henia totona.

Iepeta be Dirava ena heduru ia noia idia kwalimu totona. Iepeta ia gwauhamata bema tuari ai ia kwalimu bona ruma dekenai ia giroa, ia hedavari henia totona ia mai tauna ginigunana be Iehova dekenai do ia henia. Anina be unai tau o hahine be ena mauri ibounai lalonai Dirava ena palai dubu dekenai do ia gaukara. Unai negai, taunimanima be unai gabu dekenai Iehova idia tomadiho henia. Iepeta be tuari dekenai ia kwalimu! Oi diba ena ruma dekenai ia giroa neganai, daika ia raka-lasi guna?​—

Oibe, Iepeta ena natuna kekenina! Ia be Iepeta ena natuna tamona sibona, bona hari Iepeta ese do ia siaia lao. Unai dainai, Iepeta ia lalohisihisi bada. To laloatao, ia be gwauhamata ta ia karaia. Iena natuna kekeni be maoromaoro ia gwau: ‘Tamagu e, oi be Iehova dekenai gwauhamata ta oi karaia, unai dainai namona be emu gwauhamata oi hagugurua.’

Iepeta ena natuna kekeni be ia lalohisihisi danu. Bema palai dubu ai ia gaukara, ia be do ia headava lasi bona natuna do ia havaraia lasi. To ia ura ena tamana ena gwauhamata do ia guguru bona Iehova do ia hamoalea. Ia dekenai unai be mai anina bada, to headava bona natuna havaraia karana ia laloa maragi. Unai dainai, ena ruma ia rakatania bona ena mauri ibounai lalonai palai dubu lalonai ia noho.

Oi laloa ia karaia gauna ese ena tamana bona Iehova ia hamoaledia, a?​— Oibe! Bema oi kamonai bona Iehova oi lalokau henia, oi be Iepeta ena natuna kekeni hegeregerena. Oi danu ese emu tama sina bona Iehova do oi hamoaledia.