Dirava ese Ia Lalokau Henia Taudia Ita Lalokau Henia

1-3. (a) Baibel be dahaka hereva momokani ia gwauraia? (b) Edena dala ai tura namodia ita abia hidi diba?

TAUNIMANIMA be spansi bamona. Spansi ese ranu ia abia haraga hegeregerena, taunimanima be idia bamoa taudia edia kara, lalohadai, bona ura gaudia idia abia dae haraga diba. Bona idia laloparara lasi idia be unai bamona idia karaia noho.

² Baibel ena hereva be momokani, ia gwau: “Aonega tauna danu ia raka hebou noho tauna, be do ia aonega, to kavakava taudia danu oi turana karaia neganai, dika do oi davaria.” (Aonega Herevadia 13:20) Oibe, ita ura ita bamoa taudia ita tohotohoa, ani? Momokani, ita bamoa taudia ita ura henidia bada dainai, edia kara ese iseda kara ia haidaua diba, unai amo ita be kara namo ita karaia o kara dika ita karaia.

³ Dirava ena lalokau lalonai ita noho totona, gau badana be ita abia hidi turadia ese ita idia durua kara namodia ita hahedinaraia totona. Edena bamona unai ita karaia diba? Unai ita karaia diba, bema Dirava ese ia lalokau henia taudia ita lalokau henia bona iena turadia be iseda turadia ai ita halaoa. Idia be tura namodia badina Iehova ia ura henia karadia idia hahedinaraia. Vadaeni, mani Dirava ese ia lalokau henia taudia edia kara ita tahua. Iehova ena lalohadai ita diba neganai, unai ese ita do ia durua tura namodia ita abia hidi totona.

DIRAVA ESE IA LALOKAU HENIA TAUDIA

4. Dahaka dainai Iehova be mai ena maoro ia ura henia taudia sibona ia abia hidi totona? Dahaka dainai Aberahamo ia gwauraia Iena “turana”?

⁴ Iehova be ia ura henia taudia sibona ia tura henidia. Ia be mai ena maoro unai bamona ia karaia totona, ani? Ia be Siahu Ibounai Lohiabadana, bona iena turana ai ita lao be hahenamo badana ta. Vadaeni, Iehova be daidia ia abia hidi iena turadia ai idia lao totona? Iehova be ia idia abidadama henia bona tabekau henia taudia kahirakahira ia lao. Mani, Aberahamo oi laloa, ia be abidadama bada ia hahedinaraia tauna. Bema tau ta ese tama ta ia hamaoroa iena natuna mero be boubou gauna bamona do ia hamasea, unai do ia karaia be auka, ani?a To, Aberahamo ia daradara lasi, ia diba bema Isako ia bouboulaia “Dirava be mai ena siahu do ia hatorea isi lou,” unai dainai Aberahamo ia hegaegae ena natuna ia bouboulaia totona. (Heberu 11:17-19) Aberahamo ese abidadama bona kamonai karana ia hahedinaraia dainai, Iehova ia gwau ia be iena “turana.”—Isaia 41:8; Iamesi 2:21-23.

5. Iehova ese ia idia badinaia taudia be edena bamona ia lalodia?

⁵ Iehova be Ia idia badinaia taudia ia laloa bada. Iehova badinaia karana idia atoa guna taudia ia lalokau henidia. (2 Samuela 22:26) Karoa 1 ai ita itaia bamona, Iehova be Ia idia lalokau henia bona kamonai henia taudia dekenai ia moale bada. Aonega Herevadia 3:32 ia gwau: “Kara maoromaoro taudia be ia ese ia abidadama henia noho.” Iehova ena taravatu idia badinaia taudia be Iehova ese ia boiridia: Iena “Dubu Helaga” lalonai do idia noho—anina be Ia idia tomadiho henia bona idia guriguri henia diba.—Salamo 15:1-5.

6. Edena dala ai ita hahedinaraia Iesu ita lalokau henia, bona Iehova ese ena Natuna idia lalokau henia taudia be edena bamona ia lalodia?

⁶ Iehova be iena Natuna tamona sibona Iesu idia lalokau henia taudia Ia lalokau henia. Iesu ia gwau: “Lau ia lalokau henia tauna ese lauegu hereva do ia badinaia, vadaeni egu Tamana ese do ia lalokau henia, bona ai ruaosi be ia dekenai do ai lao, ia dekenai do ai noho.” (Ioane 14:23) Edena dala ai Iesu dekenai iseda lalokau ita hahedinaraia diba? Ita ese Iesu ita lalokau henia bema iena hahegani idauidau ita badinaia, sivarai namona ita harorolaia bona taunimanima be hahediba taudia ai halaoa gaukarana ita karaia. (Mataio 28:19, 20; Ioane 14:15, 21) Danu, Iesu ena ‘aena gabudia dekenai ita raka,’ anina be iseda hereva bona kara amo Iesu ita tohotohoa neganai, ita hahedinaraia Iesu ita lalokau henia. (1 Petero 2:21) Iehova be ena Natuna idia lalokau henia bona idia gaukara goada Iesu ena kara idia tohotohoa taudia dekenai ia moale bada.

7. Dahaka dainai Iehova ena turadia be iseda turadia ai ita halaoa be aonega karana?

⁷ Iehova ia ura iena turadia be inai bamona kara idia hahedinaraia: Abidadama, Dirava badinaia karana, kamonai karana, bona Iesu ita lalokau henia bona iena kara ita tohotohoa. Ita ta ta be sibona do ita henanadai: ‘Egu turadia be unai bamona kara namodia idia hahedinaraia, a? Iehova ena turadia be egu turadia ai lau halaodia, a?’ Unai bamona ita karaia be aonega karana. Kara namodia idia hahedinaraia bona Basileia ena sivarai namona idia harorolaia taudia ese ita idia durua diba Dirava ita badinaia noho totona.—Rau 33 ai “Daika be Tura Namona?” mauana itaia.

BAIBEL SIVARAIDIA AMO DIBA ITA ABIA

8. Inai taudia huanai ia noho hetura karana ese edena dala ai oi ia durua: (a) Naomi bona Ruta? (b) Heberu memero toi? (c) Paulo bona Timoteo?

⁸ Baibel lalonai tura namodia idia abia hidi bona namo idia davaria taudia momo edia sivarai idia noho. Baibel lalonai inai taudia edia hetura karana ena sivarai ita duahia diba: Naomi bona Ruta, Babulonia ai Heberu memero toi, bona Paulo bona Timoteo edia hetura karana edia sivarai oi duahia diba. (Ruta 1:16; Daniela 3:17, 18; 1 Korinto 4:17; Filipi 2:20-22) To, Davida bona Ionatana be hetura karana dekenai haheitalai namona idia hahedinaraia, mani edia sivarai ita itaia.

9, 10. Dahaka dainai Davida bona Ionatana edia hetura karana be ia goada?

⁹ Baibel ia gwau Davida ese Goliata ia hamasea murinai, “Ionatana bona Davida be idia turana karaia momokani. Ionatana ese Davida ia lalokau henia, ia sibona ia lalokau henia hegeregere.” (1 Samuela 18:1) Ena be ta ena mauri lagani be maragi, bona ta ena mauri lagani be bada, to unai nega amo idia be tura namodia ai idia lao ela bona Ionatana be tuari lalonai ia mase.b (2 Samuela 1:26) Dahaka dainai Davida bona Ionatana edia hetura karana be ia goada momokani?

¹⁰ Davida bona Ionatana edia hetura karana be ia goada, badina Dirava idia lalokau henia bona idia ura Iehova idia badinaia noho. Idia ta ta idia ura bada Iehova idia hamoalea. Idia ruaosi ese idia ura henia kara namodia be idia ta ta ese idia hahedinaraia. Tau matamatana Davida be mai lalogoada bona ura bada ida Iehova ena ladana ia abia isi dainai, Ionatana ese ia laloa bada. Davida be tau buruka Ionatana ia matauraia bada, badina Ionatana ese Iehova ena palani ia abia hidi bona sibona ia laloa lasi, to Davida ena namo ia tahua guna. Hegeregere, King Saulo, Ionatana ena tamana, ia ura Davida ia hamasea dainai, Davida be ia komu loaloa bona ia lalometau neganai, Ionatana ia karaia gauna mani ita laloa. Ionatana ia hahedinaraia ia be Davida ena turana momokani, badina “Davida dekenai ia lao . . . Davida ena abidadama Dirava dekenai do ia hagoadaia totona.” (1 Samuela 23:16) Davida be ena turana namona Ionatana ese ia hagoadaia neganai, ia moale bada!c

11. Ionatana bona Davida edia hetura karana amo dahaka ita dibaia?

¹¹ Ionatana bona Davida edia sivarai amo dahaka ita dibaia? Ita dibaia mai anina bada gauna be inai: Tura namodia be Dirava do idia tura henia bona Iena hakaua herevadia do idia badinaia. Bema ita bona iseda turadia ese ita abia dae gaudia be tamona, kara be tamona bona ita ura Dirava do ita badinaia noho, vadaeni iseda lalohadai, hemami bona ekspiriens idauidau amo ta ta do ita hagoadaia diba. (Roma 1:11, 12) Dirava idia ura hamoalea tura namodia momo be iseda kongrigeisen lalonai ita davaria diba. To, Kingdom Hall dekenai idia mai taudia ibounai be tura namodia, a? Lasi.

TURA NAMODIA ITA ABIA HIDI DALANA

12, 13. (a) Ena be kongrigeisen lalonai ita noho, to dahaka dainai iseda turadia do ita abia hidi namonamo? (b) Kongrigeisen haida be dahaka hekwakwanai idia davaria, bona Paulo be dahaka sisiba ia henidia?

¹² Ena be kongrigeisen lalonai ita noho, to namona be iseda turadia ita abia hidi namonamo. Ita idia durua Iehova ita badinaia noho turadia sibona ita abia hidi be namo. Reana, unai hereva dekenai oi daradara, ani? Kongrigeisen lalonai Keristani taudia haida be lo taudia ai idia lao haraga lasi, au ta ena huahua haida be idia mage haraga lasi bamona. Unai dainai, kongrigeisen ibounai dekenai do ita davaria Keristani taudia haida be idia goada, bona haida be idia goada lasi. (Heberu 5:12–6:3) To, namona be matamata o manoka taudia dekenai lalokau bona haheauka karana ita hahedinaraia noho, badina ita ura idia ita durua edia hetura karana Iehova ida ia goada totona.—Roma 14:1; 15:1.

¹³ Nega haida kongrigeisen lalonai kara ta ia vara dainai ma haida ita tura henia karana do ita naria namonamo. Haida be Keristani kara maoromaoro idia hahedinaraia lasi. Haida be idia badu o idia maumau momo. Aposetolo taudia edia negai, kongrigeisen haida be unai hekwakwanai idia davaria danu. Momo be Dirava idia badinaia, to haida edia kara be namo lasi. Korinto kongrigeisen lalonai haida be Keristani hahediba hereva haida idia badinaia lasi dainai, aposetolo Paulo ese kongrigeisen taudia ia sisiba henia: “Umui laloa kerere lasi. Bema kara dika taudia danu umui turana karaia neganai, idia ese emui kara namona do idia hadikaia.” (1 Korinto 15:12, 33) Paulo ese Timoteo ia sisiba henia ia naria namonamo totona, badina kongrigeisen lalonai haida edia kara be maoro lasi. Timoteo ia hamaoroa unai bamona taudia do ia tura henidia lasi.—2 Timoteo 2:20-22.

14. Paulo ena sisiba hebamo karana dekenai be edena bamona ita badinaia diba?

¹⁴ Edena dala ai Paulo ena sisiba ita badinaia diba? Kongrigeisen lalonai eiava murimurina ai, iseda kara namodia idia hadikaia diba taudia do ita tura henidia lasi. (2 Tesalonika 3:6, 7, 14) Namona be iseda hetura karana Iehova ida ita gimaia. Namona be ita laloatao bema spansi be ranu mirona dekenai ita atoa neganai, ia be ranu mirona do ia abia, ranu goevana do ia abia lasi. Unai hegeregerena, ita be ita bamoa momo taudia edia kara ita tohotohoa bona edia lalohadai ita abia dae. Unai dainai, bema kara dika idia karaia taudia ita bamoa, kara namo do ita karaia lasi to kara dika do ita karaia.—1 Korinto 5:6.

15. Dahaka oi karaia diba Dirava idia badinaia tura namodia oi davaria totona?

¹⁵ Ita moale badina iseda tadikaka taihu huanai tura namodia momo ita davaria diba. (Salamo 133:1) Edena dala ai kongrigeisen lalonai Dirava idia badinaia tura namodia oi davaria diba? Dirava ia ura henia karadia oi hahedinaraia dainai, kara namodia idia ura henia taudia ma haida be do idia ura oi idia tura henia. Danu, namona be oi hekwarahi tura namodia oi tahua bona oi bamodia totona. (Rau 34 ai, “Tura Namodia Ai Davaria Dalana” mauana itaia.) Bona edia kara namodia oi tohotohoa. Ena be tadikaka taihu be kopi idauidau, bese idauidau, eiava kastom idauidau, to Baibel ia gwau namona be iseda lalokau idia dekenai ita “habadaia.” (2 Korinto 6:13; 1 Petero 2:17) Oiemu uru tamona taudia sibona oi bamoa lasi. Laloatao, Ionatana ena mauri lagani be bada bona Davida be mero matamata sibona. Buruka taudia momo edia diba bada bona aonega ese emui hetura karana ia hanamoa diba.

HEKWAKWANAI IDIA VARA NEGANAI

16, 17. Bema ta ese ena hereva o kara amo iseda lalona ia hahisia, dahaka dainai kongrigeisen ita rakatania be maoro lasi?

¹⁶ Kongrigeisen lalonai, tadikaka taihu edia kara bona mauri dalana be idauidau dainai, nega ta ta ai hekwakwanai do idia vara. Tadikaka o taihu ta ese ia gwauraia herevana o ia karaia gauna ese iseda lalona ia hahisia diba. (Aonega Herevadia 12:18) Iseda kara be idauidau dainai lalohadai kereredia ita abia bona ma haida ida ita lalotamona lasi, unai ese nega haida hepapahuahu ia havaraia diba. Unai hekwakwanai dainai do ita badu bona kongrigeisen do ita rakatania, a? Bema ita be Iehova bona Ia idia lalokau henia taudia ita lalokau henia momokani, unai bamona do ita karaia lasi.

¹⁷ Iehova be iseda Havaraia Tauna bona Mauri Henia Tauna dainai, namona be Ia ita lalokau henia bona Ia sibona ita tomadiho henia. (Apokalupo 4:11) Danu, Ia gaukaralaia kongrigeisen ida ita gaukara hebou bona badinaia. (Heberu 13:17) Unai dainai bema tadikaka ta ena hereva eiava kara ese iseda lalona ia hahisia o habadua, namo lasi kongrigeisen ita rakatania. Dahaka dainai? Badina unai be Iehova ena kerere lasi. Ita be Iehova ita lalokau henia dainai, Iehova bona iena taunimanima do ita rakatania lasi!—Salamo 119:165.

18. (a) Dahaka ita karaia diba kongrigeisen lalonai maino ia noho totona? (b) Ta ena dika ita gwauatao karana ese dahaka hahenamo ia mailaia?

¹⁸ Iseda tadikaka taihu ita lalokau henia dainai, ita ura kongrigeisen lalonai maino ia noho. Iehova be ia lalokau henia taudia amo kara goeva ia tahua lasi, bona ita danu be unai bamona ita karaia be namo. Lalokau dainai ta ena kerere maragimaragi ita gwauatao, do ita laloatao ita be goevadae lasi taudia bona kerere ita karaia danu. (Aonega Herevadia 17:9; 1 Petero 4:8) Lalokau ese ita ia durua ma haida edia ‘dika ita gwauatao’ noho totona. (Kolose 3:13) Unai sisiba ita badinaia be auka sisina. Bema lalohadai kerere ita abia, iseda tadikaka be nega daudau do ita badu henia noho, bona ita laloa unai kara amo iseda lalona ia hahisia tauna ita panisia bamona. To, nega daudau ita badu noho karana ese ita ia hadikaia diba. Bema ta ena kara dika ita gwauatao, hahenamo momo do ita davaria. (Luka 17:3, 4) Unai bamona ita karaia neganai, lalomaino do ita abia, kongrigeisen lalonai maino do ia noho, bona mai anina bada gauna be iseda hetura karana Iehova ida ia gimaia.—Mataio 6:14, 15; Roma 14:19.

TA ENA HEBAMO KARANA ITA DADARAIA ENA NEGA

19. Edena nega ai kongrigeisen lalonai ta do ita bamoa lasi?

¹⁹ Nega haida, elda taudia ese ita idia hadibaia kongrigeisen lalonai ta do ita bamoa lasi. Unai ia vara bema ta be Dirava ena taravatu ia utua bona ia helalo-kerehai lasi dainai kongrigeisen amo idia atoa siri, eiava hahediba koikoi ia hadibaia eiava ia sibona be kongrigeisen amo ia gini siri. Baibel ia gwau unai bamona taudia do ita bamoa lasi.d (1 Korinto 5:11-13; 2 Ioane 9-11) Bema ia be emu tura namona o varavara ta, reana do ia auka ia oi dadaraia totona. To, namona be ita gini goada, unai amo ita hahedinaraia ita ura Iehova bona iena kara maoromaoro taravatudia ita badinaia. Laloaboio lasi, Iehova dekenai mai anina bada gauna be Ia ita kamonai henia bona ita badinaia.

20, 21. (a) Dahaka dainai kongrigeisen amo ta idia atoa siri karana be lalokau karana? (b) Dahaka dainai mai aonega ida iseda turadia ita abia hidi be namo?

²⁰ Kongrigeisen amo ta idia atoa siri karana be Iehova ena lalokau ia hahedinaraia dalana ta. Edena dala ai unai be lalokau karana? Ia helalo-kerehai lasi kara dika tauna atoa siri karana ese ia hahedinaraia Iehova ena ladana helagana bona ena anina ita laloa bada. (1 Petero 1:15, 16) Unai kara dika tauna atoa siri karana ese kongrigeisen ia gimaia. Mai edia abidadama tadikaka taihu be unai kara dika taudia bona kara dika tanobadana amo ia gimadia bona kongrigeisen goevana lalonai Dirava idia tomadiho henia diba. (1 Korinto 5:7; Heberu 12:15, 16) Kongrigeisen amo atoa siri karana ese kara dika tauna ia durua, unai amo lalohadai maorona do ia abia bona Iehova dekenai ia giroa lou.—Heberu 12:11.

²¹ Momokani, iseda turadia ese iseda lalohadai bona kara idia haidaua diba. Unai dainai, gau badana be mai aonega ida iseda turadia ita abia hidi namonamo. Bema Iehova ena turadia be iseda turadia ai ita halaoa, bona ia lalokau henia taudia ita lalokau henidia neganai, ita be tura namodia ita davaria unai. Idia amo ita dibaia gaudia ese ita idia durua Iehova do ita hamoalea noho totona.