Karoa 14
Iehova Ena Guba Terona Ena Hairai
Matahanai 2—Apokalupo 4:1–5:14
Anina: Dirava ena hahemaoro terona vairanai hagaria gaudia idia vara
Hagugurua negana: Unai matahanai lalonai lagani 1914 amo ela bona Lagani 1,000 negana ena dokona ai do idia vara gaudia idia hedinarai. Lagani 1,000 negana ena dokona ai bona unai nega murinai, guba bona tanobada taudia iboudiai ese Iehova do idia hanamoa.—Apokalupo 5:13
IOANE ese ma matahanai haida ia gwauraia danu. Unai neganai lauma helaga ena siahu amo ia be Lohiabada ena dina lalonai ia do noho. Unai dainai ena hereva be mai anina bada ita dekenai, badina ita be unai dina lalonai ita noho hari. Unai matahanai amo, Iehova ese dala ia kehoa ita itaia diba lasi guba gaudia do ita itaia totona bona ia ese ena lalohadai ia sibona ena hahemaoro karadia tanobada dekenai ita ia hadibaia. Danu, herevana iseda helaro be guba helarona eiava tanobada helarona, to unai hereva ese ita idia durua do ita diba Iehova ena palani lalonai iseda gabu be dahaka. Unai dainai, namona be ita ibounai be mai eda ura ida Ioane ena hereva ita laloa namonamo, ia gwau: “Inai buka idia duahia taudia be do idia moale, inai buka ena peroveta hereva idia kamonai henia, bona iena hadibaia hereva idia badinaia taudia be do idia moale.”—Apokalupo 1:3.
2 Ioane ese ia itaia gauna be hari inai negai taunimanima ese video dekenai idia hahedinaraia gaudia iboudiai ia hanaia! Ioane ia gwau: “Inai murinai, lauegu matana lau negea lao, vadaeni guba dekenai iduara ta ia kehoa, be lau itaia. Vadaeni gado ta, kibi ena regena bamona, guna lau kamonai gauna, ese lau ia hereva henia, ia gwau, ‘Oi daekau mai iniseni, vadaeni gabeai do idia vara momokani gaudia oi dekenai do lau hedinaraia.’ ” (Apokalupo 4:1) Unai matahanai lalonai Ioane be guba lalonai ia vareai bona Iehova ena noho gabuna dekenai ia mai. Unai gabu be atai herea momokani, guba ai idia loaloa taudia ese idia tahua gabuna ataiai bona hisiu oreadia edia gabuna ataiai. Ioane idia boiria, ia kehoa iduarana lalonai ia raka vareai hegeregerena, lauma gabuna hairaina, Iehova ena terona gabuna unai, ia itaia totona. (Salamo 11:4; Isaia 66:1) Hahenamo badana unai!
3 Baibel ese ia hahedinaraia lasi unai “gado ta” be daika ena. Unai gado be kibi ena regena bamona, Iesu ena gado badana hegeregerena. (Apokalupo 1:10, 11) Unai be hegeregere Iehova be Sinai Ororona dekenai ia diho neganai, kibi ena regena bada herea idia kamonai. (Esodo 19:18-20) Momokani, Iehova be unai boiboi badana ena Badina. (Apokalupo 1:1) Iehova ese iduara ia kehoa Ioane be matahanai lalonai Iehova ese ia lohia gabu helaga hereana lalonai do ia vareai totona.
Iehova Ena Noho Hairaina
4 Ioane ese dahaka ia itaia? Oi kamonai! Ia gwau: “Nega tamona Lauma Helaga ese lau ia abia, vadaeni guba dekenai helai gabuna badana ta lau itaia, bona ia latanai tau ta ia helai.” (Apokalupo 4:2) Karaharaga, Dirava ena gaukara siahuna ese Ioane ia abia lao Iehova ena terona gabuna dekenai. Unai ese Ioane ia hamoalea bada herea! Ia itaia gauna be ia bona ma horoa Keristen taudia iboudiai do idia lao henia gabuna, unuseniai “ia noho hanaihanai, ia be goevagoeva, ia bodaga diba lasi” maurina be idia totona ia noho hegaegae. (1 Petero 1:3-5; Filipi 3:20) Edia helaro be tanobada ai do idia mauri hanaihanai taudia dekenai, Ioane ena matahanai be mai anina bada. Unai matahanai ese ia durudia, Iehova ena noho hairaina dekenai do idia lalo-parara totona, bona guba gavamani oreadia edia toana do idia diba totona. Iehova ese unai orea do ia gaukaralaia bese badadia do ia hahemaoro henidia bena unai murinai tanobada taudia edia mauri dalana do ia biagua totona. Momokani, Iehova ese gau iboudiai ia biagudia namonamo!
5 Ioane ese guba dekenai ia itadia gaudia momo be tano gagaena dekenai idia haginia tomadiho kalagana ena gau idauidau bamona. Lagani 1,600 gunanai, unai kalaga idia haginia Israel taudia edia tomadiho momokanina gabuna bamona idia gaukaralaia totona. Tomadiho kalagana ena Helaga Herea Gabuna dekenai gwauhamata maua helagana ia noho. Unai maua ena koua gauna be golo amo idia karaia, bona Iehova be unai koua gauna ataina amo ia hereva. (Esodo 25:17-22; Heberu 9:5) Unai dainai, Maua Helagana ena koua gauna ese Iehova ena terona ia laulaulaia. Ioane ese unai laulau ena anina ia itaia: Atai Herea Lohiabada Iehova be pavapava mai hairaina iena guba terona latanai ia helai!
6 Peroveta taudia gunadia ese Iehova ena terona be matahanai lalonai idia itaia. To Ioane ena kara be idia edia kara amo ia idau, badina unai terona latanai ia helai Helaga Tauna ena toana ia gwauraia momo lasi. (Esekiela 1:26, 27; Daniela 7:9, 10) To Ioane ese unai terona latanai ia helai Tauna be inai bamona ia gwauraia: “Helai gabuna badana latanai ia helai tauna ena toana be iasipa bona sadio nadi edia diaridiari toana bamona. Bona kevau ese helai gabuna badana ia hagegea, lau itaia iena toana be samaragi nadi bamona.” (Apokalupo 4:3) Toana hairai hereana unai! Ioane ese hururu hairaina ia itaia, ia be nadi namodia edia hururu bamona. Unai ese Iamesi ena hereva ia hamomokania; ia gwau Iehova be “diari ibounai ia karaia” Diravana! (Iamesi 1:17) Ioane ese Apokalupo bukana ia torea nega sisina murinai, ia gwau: “Dirava be diari, bona dibura sisina sibona ia dekenai ia noho lasi.” (1 Ioane 1:5) Iehova be hairai herea Tauna!
7 Ioane ese kevau ia itaia, iena toana be samaragi nadi bamona. Greek gado herevana irʹis be Motu gado ai idia hahanaia kevau. Unai Greek hereva ena anina be kuboru gauna ta. Baibel ese Noa ena nega ia gwauraia neganai, unai be nega ginigunana kevau ia gwauraia. Abata ena ranu idia diho murinai, Iehova ese kevau ta be ori lalonai ia havaraia, bona ia laulaulaia gauna be inai bamona ia gwauraia: “Egu kevau ori lalonai lau atoa inai. Ia be egu gwauhamata tanobada dekenai ena toana. Lau be lauegu gwauhamata umui dekenai bona mauri gaudia ibounai dekenai do lau laloatao, abata be mauri gaudia do ia hadikaia ore lou lasi.” (Genese 9:13, 15) Ioane ese guba be matahanai lalonai ia itaia neganai, dahaka do ia laloa? Unai kevau dainai Ioane do ia laloatao Iehova ida maino ita karaia be gau badana, Ioane oreana taudia be hari inai negai idia karaia vadaeni hegeregerena. Danu, unai matahanai amo Ioane do ia diba Iehova ena noho gabuna be maino gabuna. Iehova ese tanobada matamata taudia be ena kalaga amo do ia koudia neganai, kamonai taudia iboudiai ese unai maino do idia davaria.—Salamo 119:165; Filipi 4:7; Apokalupo 21:1- 4.
Elda Taudia 24 be Daidia?
8 Ioane ia diba idaunegai haida idia abidia hidi, hahelaga gaukara be tomadiho kalagana lalonai do idia karaia totona. Unai dainai inai gau ia itaia neganai, reana ia hoa: “Helai gabudia ibounai 24 ese unai helai gabuna badana idia hagegea, bona badana [elda] taudia 24 be unai helai gabudia latanai idia helai. Dabua kurokuro idia karaia bena edia kwaradia latanai be edia dagi toana, golo kwara gaudia, idia noho.” (Apokalupo 4:4) Oibe, hahelaga taudia edia gabudia ai, elda taudia 24 idia noho, terona latanai idia helai bona pavapava edia kwara gaudia idia karaia. Unai elda taudia be daidia? Idia be Keristen kongregesen ena horoa taudia; idia toreisi lou vadaeni, bona Iehova be idia dekenai ia gwauhamatalaia guba dagina idia abia vadaeni. Edena bamona unai ita diba?
9 Gau ginigunana be inai: Idia ese pavapava edia kwarana gaudia idia karaia. Baibel ese horoa Keristen taudia ia gwauraia neganai ia gwau ‘noho hanaihanai kwalimu ahuna’—ia doko diba lasi maurina unai—idia abia. (1 Korinto 9:25; 15:53, 54) To unai elda taudia 24 be terona 24 latanai idia helai dainai, unai siri lalonai edia golo kwara gaudia ese edia pavapava siahuna idia laulaulaia. (Apokalupo 6:2; 14:14 itaia danu.) Unai ese ia hamomokania, unai elda taudia 24 ese Iesu murinai idia raka horoa taudia idia laulaulaidia, badina Iesu be idia ida gwauhamata ta ia karaia, iena Basileia lalonai edia terona ta ta latanai do idia helai. (Luka 22:28-30) Baibel ia gwau Iesu bona unai elda taudia 24 sibodia—aneru lasi—be guba dekenai idia lohia Iehova ena vairanai.
10 Unai be Iesu ena gwauhamata Laodikea kongregesen dekenai hegeregerena; ia gwau: “Kwalimu taudia dekenai be lau ese gwau maoro do lau henia, vadaeni idia ese lau danu lauegu helai gabuna badana latanai do ai helai hebou.” (Apokalupo 3:21) To elda taudia 24 edia gaukara guba dekenai be lohia gaukarana sibona lasi. Apokalupo bukana ena hamatamaia herevadia lalonai, Ioane ese Iesu be inai bamona ia gwauraia: “Ia ese ita ia haboua, vadaeni ita be Basileia ta, bona Tamana Dirava ena boubou helaga karaia taudia ia ese ita ia halaoa vadaeni.” (Apokalupo 1:5, 6) Unai elda taudia be pavapava bona hahelaga taudia danu. “Idia be Dirava bona Keriso edia boubou helaga karaia taudia. Bona lagani 1,000 lalonai Keriso danu do idia lohia.”—Apokalupo 20:6.
11 Ioane ia itaia elda taudia 24 be terona badana idia hagegea noho; unai dainai namba 24 ena anina be dahaka? Dala momo amo unai elda taudia 24 be idaunegai Israel hahelaga taudia namodia bamona. Aposetolo Petero be horoa Keristen taudia dekenai ia gwau: “Umui be ‘abia hidi besena ta, hahelaga pavapava besena, bese helagana ta, Dirava ena bese korikori, ia ese umui ia abia hidi.’ ” (1 Petero 2:9, NW ) Idaunegai, unai Iuda hahelaga orea be orea maragidia 24 ai idia hapararaia. Unai orea maragidia ta ta iboudiai be mai edia nega lagani ta lalonai wiki haida dekenai edia hesiai gaukara be Iehova vairanai do idia karaia totona; unai dala amo gaukara helagana be nega ibounai idia karaia. (1 Sivarai 24:5-19) Unai dainai, elda taudia 24 be Ioane ena matahanai lalonai idia hedinarai be maoro, badina unai hahelaga oreana be nega ibounai Iehova ena hesiai gaukara idia karaia noho, idia hadokoa lasi. Unai orea taudia iboudiai be guba dekenai idia lao murinai, hahelaga taudia edia orea maragidia 24 do idia noho, idia ta ta iboudiai lalonai kwalimu taudia 6,000 idia noho. Apokalupo 14:1-4 ese ia hahedinaraia, 144,000 (24 x 6,000) be “taunimanima ibounai edia huanai dekena amo Dirava ese idia ia hoia vadaeni,” Mamoe Natuna, Iesu Keriso, ida guba Siona Ororona dekenai do idia gini hebou totona. Namba 12 ese ia laulaulaia gauna be, Dirava be dala maorona ai ena orea ia haginia; namba 24 be nega rua amo unai kara ia habadaia—anina be, ia hagoadaia.
Kevaru, Gado Edia Regena Bona Guba Ena Boiboi
12 Bena, Ioane ese dahaka ia itaia, bona dahaka ia kamonaia? “Helai gabuna badana dekena amo kevaru bona gado edia regena, bona guba ena boiboi ia mai.” (Apokalupo 4:5a) Unai hereva be Iehova ese ena siahu ia hahedinaraia negadia ma haida hegeregerena! Haheitalai ta be inai: Iehova be Sinai Ororona dekenai “ia diho” neganai, Mose ia gwau: “Dina ihatoina, daba neganai, guba ia boiboi bona kevaru ese ororo ia hadiaria. Unai neganai danu ori badana ta ororo dorina dekenai ia diho. Vadaeni kibi ta ena regena bada herea idia kamonai. . . . Kibi ena regena ia bada daekau, vadaeni Mose be ia hereva, bona Dirava ese guba ena boiboi dekena amo ia haere henia.”—Esodo 19:16-19.
13 Lohiabada ena dina lalonai Iehova be hagaria dalana amo ena siahu bona sibona ena noho ia hahedinaraia goevagoeva. Kevaru korikorina amo unai gaudia ia hahedinaraia lasi, badina Ioane ese toa amo ia itaia. Vadaeni, unai kevaru ese dahaka idia laulaulaia? Kevaru ia mai neganai, gau ta ia hadiaria diba, to danu ta ia hamasea diba. Unai dainai, kevaru be Iehova ena terona amo idia mai neganai, unai ese Iehova be ena orea taudia ia henidia lauma diarina bona ena lahi bamona hahemaoro herevadia idia laulaulaidia.—Salamo 18:14; 144:5, 6; Mataio 4:14-17; 24:27 itaia danu.
14 To, unai gado regedia be dahaka? Iehova be Sinai Ororona dekenai ia diho neganai, gado ta ese Mose ia hereva henia. (Esodo 19:19) Apokalupo ena hahegani bona hadibaia herevadia momo be guba amo idia mai gadodia ese idia gwauraia. (Apokalupo 4:1; 10:4, 8; 11:12; 12:10; 14:13; 16:1, 17; 18:4; 19:5; 21:3) Hari inai negai, Iehova ese hahegani bona hadibaia herevadia be ena orea taudia ia henidia, bona unai dala amo edia lalo-parara Baibel ena peroveta herevadia bona dala maorodia dekenai ia habadaia. Nega momo intenesenel hebouheboudia dekenai lalona idia hadiaria herevadia idia halasia, bena unai Baibel hereva momokanidia be tanobada ibounai dekenai idia harorolaia. Aposetolo Paulo ese sivarai namona idia harorolaia kamonai taudia be inai bamona ia gwauraia: “Edia gadona ena sivarai be tanobada ibounai dekenai idia gwauraia loaloa, bona edia hereva be tanobada ena dokona momokani dekenai idia lao.”—Roma 10:18.
15 Nega momo, kevaru ia mai murinai, guba ena regena ia mai. David ese guba ena boiboi regena ia gwauraia “Iehova ena gadona.” (Salamo 29:3, 4) Baibel ia gwau Iehova ese David ena inai taudia ia tuari henidia neganai, guba regena be Ia ena amo ia mai. (2 Samuela 22:14; Salamo 18:13) Elihu ese Iobu ia hamaoroa Iehova ena gadona be guba regena bamona, badina Ia ese “kara badadia, ita diba lasi karadia, ia karaia.” (Iobu 37:4, 5) Hari inai negai, Lohiabada ena dina lalonai, Iehova be ‘guba regena’ bamona ia hereva, bona taunimanima ia hadibaia, dahaka kara badadia amo iena inai taudia do ia tuari henidia. Unai guba regena bamona gaudia be tanobada ibounai lalonai idia lao loulou. Bema unai hadibaia herevadia dekenai oi kamonai bona mai emu aonega ida emu malana oi gaukaralaia unai guba regena bamona gaudia do oi habadaia totona, vadaeni, moale do oi davaria! —Isaia 50:4, 5; 61:1, 2.
Lamepa—Mai Edia Lahi Bona Hevarivari Davarana Ta
16 Ioane ese dahaka gaudia ma haida ia itaia? Inai: “Helai gabuna badana ena vairanai lamepa 7 idia araia noho, mai diaridiari bada, Dirava ena lauma 7 be inai. Unai helai gabuna badana ena vairanai danu be davara ta ia noho, galasi gauna. Unai davara ena toana be hevarivari bamona.” (Apokalupo 4:5b, 6a) Vadaeni, Ioane ese unai lamepa 7 edia anina ia gwauraia hedinarai, ia gwau idia be “Dirava ena lauma 7.” Unai namba 7 ese Dirava ena gaudia edia kahana ibounai ia laulaulaia. Unai dainai unai lamepa 7 ese lauma helaga ena hadiaria siahuna ibounai idia laulaulaia. Ioane oreana taudia idia moale badina unai hadiaria gaukarana idia naria, bona idia be mai edia maduna, lauma gaudia idia ura dikadika tanobada taudia dekenai unai diari do idia henidia! Ita moale badina lagani ta ta iboudiai dekenai Gima Kohorona magasin ena kopi milion handred momo be gado 150 dekenai unai diari idia hahedinaraia goevagoeva!—Salamo 43:3.
17 Ioane ese “davara ta . . . galasi gauna” ia itaia, “unai davara ena toana be hevarivari bamona.” Iehova ena pavapava gabuna lalonai do idia vareai totona idia boiridia mai taudia dekenai unai ena anina be dahaka? Paulo ese Iesu be kongregesen ia hagoevaia dalana ia gwauraia. Ia gwau Iesu be “iena hereva dekena amo Dirava vairanai ekalesia do ia hahelagaia totona, ranu dekena amo ia huria.” (Efeso 5:26) Ia do mase lasi neganai, Iesu ese ena hahediba taudia ia hamaorodia, ia gwau: “Umui goeva, umui dekenai lau henia herevadia dainai.” (Ioane 15:3) Unai dainai, unai galasi davarana, hevarivari toana gauna, ese Dirava ena hagoevaia Herevana ia laulaulaia. Dirava vairanai idia gini pavapava hahelaga taudia be Dirava ena Hereva amo idia goeva be gau badana.
Itaia! “Mauri Gaudia 4”
18 Ioane ese ma gau ta ia itaia. Ia gwau: “Mauri gaudia 4 mai edia matana momo, edia vairana kahanai bona edia murina kahanai danu, be helai gabuna badana idia hagegea noho.”—Apokalupo 4:6b.
19 Unai mauri gaudia ese dahaka idia laulaulaia? Peroveta tauna ma ta, Esekiel, ena matahanai ese ita ia durua, unai henanadai do ita haerelaia totona. Esekiel ese Iehova ia itaia, guba kariota latanai ia helai. Kariota kahirakahira dekenai mauri gaudia idia noho. Edia toana be Ioane ese ia itaia gaudia edia toana bamona. (Esekiela 1:5-11, 22-28) Gabeai, Esekiel ese unai kariota terona bona mauri gaudia ia itaia lou neganai, ia gwau unai mauri gaudia be kerubi. (Esekiela 10:9-15) Ioane ese ia itaia mauri gaudia 4 ese Dirava ena kerubi momo idia laulaulaia—idia be dagi badana mauridia Iehova ena lauma oreana lalonai. Ioane ia itaia unai kerubi be Iehova kahirakahira dekenai idia noho neganai, ia hoa lasi, badina idaunegai tomadiho kalagana lalonai golo kerubi rua be gwauhamata maua helagana ena koua gauna latanai idia atoa, bona unai maua ena koua gauna ese Iehova ena terona ia laulaulaia. Unai kerubi rua edia huana amo, Iehova ena gadona ese hahegani be Israel besena ia henia.—Esodo 25:22; Salamo 80:1.
20 Unai mauri gaudia 4 “be helai gabuna badana idia hagegea.” Unai ena anina korikori be dahaka? Reana ena anina be terona ena kahana ta ta ena huana ena huana dekenai idia gini. Unai dainai English gado Baibel ta, Today’s English Version, idia hahanaia taudia ese unai siri ena Greek gado herevana be inai bamona idia hahanaia: “Terona idia koua hegege, ena kahana ta ta dekenai.” Eiava, unai hereva ena anina be mauri gaudia 4 be guba ena huana, terona ena noho gabuna, dekenai idia gini. Reana, unai badina dainai, The Jerusalem Bible ese unai siri be inai bamona ia hahanaia: “Ena huana dekenai, terona idia gini hagegea hebou.” Gau badana be inai: Kerubi be Iehova ena terona kahirakahira dekenai idia gini, Esekiel ese ia itadia kerubi be Iehova ena kariota ena daiguni ta ta dekenai idia gini hegeregerena. (Esekiela 1:15-22) Unai gau ibounai ese Salamo 99:1 ena hereva idia hamomokania. Unai siri ia gwau: “Iehova be pavapava ai ia lao vadaeni. . . . Kerubi edia latanai ia helai.”
21 Ioane be ma ia gwau: “Mauri gauna ginigunana ena toana be leona bamona, iharuana be boromakau tau bamona, ihatoina ena vairana be taunimanima ta bamona, bona mauri gauna namba 4 ena toana be ugava ia roho noho bamona.” (Apokalupo 4:7) Dahaka dainai unai mauri gaudia 4 edia toana be idauidau? Unai mauri gaudia ese Dirava ena kara idauidau idia hahedinaraia. Baibel lalonai leona ese boga-auka karana, hahemaoro bona kara maoromaoro badinaia totona, ia laulaulaia. (2 Samuela 17:10; Aonega Herevadia 28:1) Unai dainai, leona ese Dirava ena hahemaoro mai ena boga-auka ia laulaulaia namo herea. (Deuteronomi 32:4; Salamo 89:14) Mauri gauna iharuana be boromakau tau matamatana ta bamona. Boromakau tau ena kara be dahaka? Israel taudia dekenai boromakau tau be heduru gauna badana, badina ia goada herea dainai. (Aonega Herevadia 14:4; Iobu 39:9-11 itaia danu.) Unai dainai, boromakau tau matamatana ese siahu, Iehova ese ia henia siahuna, ia laulaulaia.—Salamo 62:11; Isaia 40:26.
22 Mauri gauna ihatoina ena vairana be taunimanima ena vairana bamona. Unai ese Dirava ena lalokau ia hahedinaraia, badina tanobada dekenai Dirava ese taunimanima sibodia be Iena toana bona ena laulau hegeregerena ia karaia, bona kara hereadaena, lalokau, ia henidia. (Genese 1:26-28; Mataio 22:36-40; 1 Ioane 4:8, 16) Momokani, kerubi ese edia hesiai gaukara be Iehova ena terona idia hagegea karaia neganai, edia lalokau idia hahedinaraia. Mauri gauna namba 4 ena toana be ia roho ugavana ena toana bamona. Vadaeni, Iehova ia gwau ugava ese gabu daudaudia ia itaia diba; ia gwau: “Ena matana ese daudau herea gabuna ia itaia noho.” (Iobu 39:29) Unai dainai, ugava ese aonega badana ia laulaulaia. Iehova be aonega ena Badina. Iena kerubi ese ena hahegani idia badinaia neganai, ena aonega idia badinaia.—Aonega Herevadia 2:6; Iamesi 3:17.
Ane amo Iehova Idia Hanamoa
23 Ioane be ma ia gwau: “Inai mauri gaudia 4 ta ta edia hanina be 6, bona inai hanina be mai edia matana momo, lalonai bona murimurinai. Idia be dina bona hanuaboi idia laga-ani lasi, idia hereva noho, idia gwau, ‘Helaga, Helaga, Helaga. Lohiabada Dirava be mai Siahu Ibounai. Gunaguna ia noho, harihari ia noho, bona gabeai danu do ia mai.’ ” (Apokalupo 4:8) Matana be momo dainai, unai ese ia hahedinaraia gau momo idia itaia. Mauri gaudia 4 be nega ibounai unai bamona idia karaia, badina idia mahuta lasi. Baibel ese idia tohotohoa Tauna be inai bamona ia gwauraia: “Iehova ena matana amo tanobada ibounai ia itaia loaloa, edia kudouna ibounai ia dekenai idia henia taudia dainai iena goada ia hahedinaraia totona.” (2 Sivarai 16:9) Kerubi edia matana be momo herea dainai, gabu iboudiai idia itaia diba. Gau ta idia reaia lasi. Unai dainai idia hegeregere vaitani, Dirava ena hahemaoro gaukarana lalonai do idia hesiai henia. Baibel ese Iehova be inai bamona ia gwauraia: “Iehova ena matana ese gabu iboudiai ia raraia noho, dika taudia bona namo taudia ia itaia noho.” (Aonega Herevadia 15:3) Kerubi be mai edia hanina 6, hanina rua rua nega toi amo. Baibel lalonai toi ena anina be gau ta ia hahedinaraia goevagoeva eiava ia hahedinaraia loulou. Unai dainai, kerubi be kevaru bamona idia roho haraga diba, Iehova ena hahemaoro herevadia idia harorolaia totona bona ena hahemaoro karadia idia karaia totona.
24 Kamonai! Kerubi be Iehova dekenai idia henia anena be namo herea bona lalona ia hagoadaia. Idia gwau: “Helaga, Helaga, Helaga. Lohiabada Dirava be mai Siahu Ibounai. Gunaguna ia noho, harihari ia noho, bona gabeai danu do ia mai.” “Helaga” be nega toi idia gwauraia neganai, idia hahedinaraia Dirava ia helaga bada herea. Kerubi ese Iehova ena helaga idia hamomokania. Iehova be helaga ena Badina, bona ia ese helaga ena anina ia hahedinaraia. Danu, ia be “Noho Hanaihanai King.” Nega ibounai ia be “Alepa bona Omega, ginigunana bona gini gabena, matamana bona dokona.” (1 Timoteo 1:17; Apokalupo 22:13) Kerubi ese Iehova ena kara hereadaedia be aneru bona taunimanima iboudiai vairanai idia harorolaia negana lalonai idia laga-ani lasi.
25 Guba ena ataiai herea gabuna lalonai Iehova hanamoa anedia momo idia abia! Ioane be ma ia gwau: “Inai mauri gaudia 4 ese ane idia abia noho. Mauri Hanaihanai Diravana ena helai gabuna badana latanai ia helai noho, be idia ese ane dekena amo idia hanamoa bada, idia tanikiu henia, bona hairai idia henia. Inai bamona idia karaia neganai, inai badana [elda] taudia 24 ese helai gabuna badana latanai ia helai Diravana vairanai idia tui diho, idia tomadiho henia noho. Oibe, Mauri Hanaihanai Diravana ena vairanai idia tomadiho henia, bona edia kwara gaudia helai gabuna badana vairanai idia negea diho, idia gwau, ‘Aiemai Lohiabada, aiemai Dirava e, oi be hegeregere momokani vadaeni, taunimanima ibounai ese hairai bona mataurai oi do idia henia, bona oiemu siahu henunai do idia noho. Badina be gau ibounai be oi ese oi havaraia. Oiemu ura dainai oi karadia, bona oiemu ura dainai idia noho.’ ” (Apokalupo 4:9-11) Revareva Helagadia lalonai Iehova hanamoa anedia iboudiai amo, unai ane be hereadae! Iehova be iseda Dirava, iseda Atai Herea Lohiabadana!
26 Elda taudia 24 ese Iesu ena lalohadai idia badinaia; edia kwara gaudia be Iehova vairanai idia negea diho. Dirava vairanai idia gini noho neganai, idia ura lasi sibodia do idia abia isi. Mai edia manau ida idia lalo-parara edia pavapava gaukarana ena anina be, hemataurai bona hairai be Iehova dekenai do idia henia, Iesu ese nega ibounai ia karaia hegeregerena. (Filipi 2:5, 6, 9-11) Mai manau danu idia gwauraia hedinarai Iehova henunai idia noho bona Iehova ena lohia siahuna dainai idia lohia diba. Unai dainai, gau ibounai ia havaraia Diravana ena ladana idia abia isi neganai, idia be kerubi bona kamonai taudia iboudiai ida idia lalo-tamona.—Salamo 150:1-6.
27 Daika be Ioane ena matahanai ia duahia murinai, ena lalona do ia marere lasi? Unai matahanai be namo herea! To Iehova ena noho gabuna korikorina be edena bamona? Iehova be mai ena pavapava hairaina dainai, kudou-namo taudia idia ura idia guriguri neganai bona Iehova ena ladana idia harorolaia neganai, mauri gaudia 4 bona elda taudia 24 ida Iehova do idia hanamoa hebou. Hari inai negai Keristen taudia edia hahenamo be inai: Idia be unai Dirava ena witness taudia. (Isaia 43:10) Namona be ita laloatao, Ioane ena matahanai ena anina be Lohiabada ena dina dekenai ia vara, bona ita be unai dina lalonai ita noho hari. “Lauma 7” be hanaihanai ita kahirakahira dekenai idia noho, ita idia hakaua bona ita idia hagoadaia totona. (Galatia 5:16-18) Hari inai negai Dirava ena Hereva ita gaukaralaia diba, Dirava helagana ena hesiai gaukara ita karaia neganai do ita helaga totona. (1 Petero 1:14-16) Momokani, inai peroveta herevana ita duahia dainai, ita moale. (Apokalupo 1:3) Unai peroveta herevana ese ita ia hagoadaia Iehova do ita badinaia bona inai tanobada do ita dadaraia totona, Iehova hanamoa karana amo ita do ia veria siri garina!—1 Ioane 2:15-17.
28 Ia kehoa guba iduarana lalonai ia raka vareai murinai, Ioane ese dahaka ia itaia gaudia be ia gwauraia hedinarai. Ena hereva badana be Iehova be mai ena pavapava hairaina bona dagi badana bona Iena guba terona latanai ia helai. Iehova idia hagegea goada herea oreana ia noho—unai orea ia diaridiari ena hairai bona abidadama dainai. Dirava ese kota ia karaia noho. (Daniela 7:9, 10, 18) Gau idauna ta do ia vara. Unai gau be dahaka, bona hari inai negai ena anina ita dekenai be dahaka? Mani ita itaia dahaka ia vara, unai gau iboudiai do idia vara neganai!
[Study Questions]
1. Dahaka dainai mai eda ura ida Ioane ena matahanai ita tahua be namo?
2. Ioane dekenai dahaka ia vara?
3. Gado ta, “kibi ena regena bamona” be dahaka hegeregerena, bona unai gado ena Badina be daika?
4. (a) Horoa Keristen taudia dekenai Ioane ena matahanai ena anina be dahaka? (b) Idia be mai edia helaro tanobada lalonai mauri hanaihanai do idia abia taudia dekenai unai matahanai ena anina be dahaka?
5. Ioane ese dahaka ia itaia, gwauhamata maua helagana ia koua gauna ese ia laulaulaia?
6. Ioane ese Iehova ena toana be edena bamona ia gwauraia, bona badina be dahaka unai bamona ia hereva be maoro?
7. Kevau ese Iehova ena terona ia hagegea dainai, dahaka ita diba?
8. Ioane ese daidia ia itaia terona dekenai idia gini hegege, bona idia ese daidia idia laulaulaia?
9, 10. Edena bamona ita diba elda taudia 24 ese horoa Keristen kongregesen guba dekenai idia laulaulaia?
11. Dahaka dainai elda taudia edia namba maorona be 24, bona unai namba ese dahaka ia laulaulaia?
12. Ioane ese dahaka ia itaia bona dahaka ia kamonaia, bona “kevaru bona gado edia regena, bona guba ena boiboi” be dahaka hegeregerena?
13. Kevaru be Iehova ena terona amo ia mai neganai, unai ese dahaka ia laulaulaia?
14. Hari inai negai gado be edena bamona idia boiboi?
15. Hari inai negai, Lohiabada ena dina lalonai, dahaka guba regena be terona amo idia mai?
16. ‘Idia araia noho lamepa 7’ edia anina be dahaka?
17. ‘Galasi davarana mai hevarivari toana’ ese dahaka ia laulaulaia?
18. Ioane ese daidia ia itaia terona ai idia gini hegege?
19. Mauri gaudia 4 ese dahaka idia laulaulaia, bona edena bamona unai ita diba?
20. Badina be dahaka ita gwau diba unai mauri gaudia 4 be terona “huana dekenai, terona idia gini hagegea hebou”?
21, 22. (a) Ioane ese mauri gaudia 4 edena bamona ia herevalaidia? (b) Unai mauri gaudia ta ta ena toana ena toana ese dahaka idia laulaulaia?
23. Mauri gaudia 4 be “mai edia matana momo”; unai ese dahaka ia laulaulaidia, bona idia be mai edia hanina 6 dainai dahaka ia hedinarai goevagoeva?
24. Kerubi ese Iehova edena bamona idia hanamoa, bona unai ena anina be dahaka?
25. Iehova idia hanamoa neganai, mauri gaudia bona elda taudia 24 be edena dala amo idia lalo-tamona?
26. Dahaka dainai elda taudia 24 ese edia kwara gaudia be Iehova vairanai idia negea diho?
27, 28. (a) Ioane ese ena matahanai ia torea dalana be edena bamona ita laloa be namo? (b) Ioane ese ia itaia bona ia kamonaia gaudia dainai dahaka henanadai idia vara?
[Full-page picture on page 75]
[Full-page picture on page 78]