Mai Anina Bada Gaudia Atoa Guna!

Ia be hebou dinana, to oi karaia gaukarana ia do noho. Dahaka do oi atoa guna?

OI BE adavana bona tamana ta. Gaukara gabuna ai oi gaukara goadagoada bona hari oi hesiku bada, to gaukara ia ore gwauraia neganai, unai hanuaboi ena kongregesen hebouna oi laloa matamaia. Bema gaukara gabuna oi rakatania maoromaoro, nega sisina ia noho oi digudigu, dabua oi haidaua, bona oi aniani haraga totona, bena hebou dekenai do oi lao. Karaharaga, oiemu gaukara biaguna ia mai bona ia nanadaia bema hora ma haida do oi gaukara. Ia gwau oi dekenai moni sisina bada do ia henia. Moni dekenai oi dabu.

Eiava oi be adavana bona sinana ta. Adorahi ena aniani oi hegaegaelaia neganai, oi do aeania lasi dabuadia momo oi itaia, idia haida be kerukeru ai do umui hahedokilaia. Sibona oi nanadaia, ‘Bema hari hebou dekenai do lau lao, edena negai unai dabua do lau aeania?’ Vanegai sibona ful-taim moni gaukara oi hamatamaia dainai, oi davaria ruma gaukara ena maduna oi huaia bona moni gaukara oi karaia danu be ia auka.

Eiava oi be sikuli stiuden ta. Oiemu daiutu lalonai, emu gaukara patana dekenai sikuli gaukara be ia bada. Idia momo be nega daudau idia noho vadaeni, to oi do karaia lasi, bona hari gaukara momo be nega tamona ai oi haorea be mai anina. Oi ura tama sina amo gwaumaoro oi abia, hebou dekenai oi lao lasi to ruma dekenai oi noho bona oiemu gaukara oi haorea.

Dahaka do oi atoa guna: moni gaukara, aeania gaukara, sikuli gaukara, eiava kongregesen ena hebou? Lauma dalanai, mai anina bada gaudia ita atoa guna ena anina be dahaka? Iehova be dahaka ia laloa?

Dahaka Ita Atoa Guna be Namo?

Israela taudia ese Taravatu 10 idia abia murinai, tau ta idia davaria ia ese Sabati dinana ai lahi au ia gogoa. Taravatu ese unai kara ia taravatua. (Numera 15:32-​34; Deuteronomi 5:​12-​15) Edena dala ai unai kara do oi hahemaorolaia? Do oi gwau unai tau ia kerere lasi badina ia ese taga bada totona ia gaukara lasi to ena ruma bese ena mauri durua gaudia totona ia gaukara, a? Do oi gwau lagani ta lalonai nega momo Sabati ia badinaia diba bona unai nega tamona ai Sabati ia badinaia lasi, reana ia hegaegae namonamo lasi dainai, ia idia gwauatao diba, a?

Iehova be unai bamona ia laloa lasi. Baibel ia gwau: “Vadaeni Lohiabada ese Mose ia hamaoroa, ia gwau, ‘Inai tau be do umui alaia mase.’ ” (Numera 15:35) Dahaka dainai Iehova ia laloa unai tau ena kara be dika herea?

Taunimanima ese dina 6 lalonai lahi au idia gogoa diba, bona aniani, dabua, bona ruma gaudia idia hegaegae diba danu. Dina namba 7 be lauma gaudia idia tahua totona sibona. Ena be lahi au idia gogoa be kerere lasi, to Iehova idia tomadiho henia negana lalonai, unai gaukara idia karaia be kerere. Ena be Keristani taudia be Mose ena Taravatu henunai lasi, to unai sivarai amo ita diba hari inai negai mai anina bada gaudia ita atoa guna be namo, ani?​—Filipi 1:​10.

Lagani 40 lalonai tano gagaena dekenai idia noho murinai, Israela taudia idia hegaegae Gwauhamata Tanona dekenai idia vareai totona. Idia haida be tano gagaena dekenai Dirava ia henia mana aniani idia hesikulaia bona mai edia ura ida aniani gaudia ma haida idia laloa noho. “Rata bona hani dekenai ia honu tanona” dekenai idia vareai neganai idia laloa maoromaoro totona, Iehova ese idia ia hamaoroa, ia gwau: “Taunimanima be aniani sibona dekena amo do idia mauri lasi. Lasi momokani, to Dirava ena hereva ibounai do idia badinaia danu, vadaeni mauri idia abia.”​—Deuteronomi 6:3; 8:3.

Israela taudia ese edia “rata bona hani” idia abia totona do idia gaukara goadagoada. Tuari taudia do idia halusia, ruma do idia haginidia, uma gabudia do idia karaia. Ena be unai gaukara ibounai ia noho, Iehova ese idia ia hagania dina ta ta iboudiai, nega idia atoa, lauma gaudia do idia laloa namonamo totona. Danu, namona be dina ta ta ai nega idia atoa edia natudia dekenai Dirava ena dala idia hadibaia totona. Iehova ia gwau: “Emui natudia dekenai inai Taravatu do umui hadibaia. Lohiabada ena Taravatu do umui herevalaia noho, emui ruma dekenai umui noho neganai, dala dekenai umui raka neganai, umui laga-ani neganai, bona umui gaukara neganai danu.”​—Deuteronomi 11:19.

Israela tatau bona Iuda tomadiho idia abia dae tatau ibounai, unai tano dekenai idia noho taudia unai, be hahegani idia abia lagani ta lalonai nega toi Iehova vairanai do idia hebou. Ruma bese kwaradia momo idia diba unai bamona hebou ese lauma dalanai edia ruma bese ibounai do idia durua dainai, dala idia karaia edia adavadia bona edia natudia be idia ida do idia lao totona. To ruma bese taudia ibounai idia lao neganai, daika ese edia inai taudia amo edia ruma bona edia uma gabudia do ia gimaia? Iehova ia gwauhamata: “Lagani ta ta ibounai lalonai nega toi Lohiabada emui Dirava ena vairanai umui hedinarai neganai, tau ta ese emui tano do ia abia kava lasi.” (Esodo 34:24) Bema lauma gaudia idia atoa guna, do idia ogogami lasi. Israela taudia ese unai lalohadai idia abia dae totona abidadama be mai anina bada. Iehova ese ena hereva ia hagugurua, a? Ia hagugurua momokani!

Basileia Umui Tahua Guna

Iesu ese ia murinai idia raka taudia ia hadibaia lauma gaudia do idia atoa guna, ma gau ibounai be gabeai. Ororo ai ia haroro neganai, kamonai taudia ia sisiba henia, ia gwau: “Emui lalona idia hekwarahi lasi. Umui hereva lasi, ‘Dahaka do ai ania?’ O, ‘Dahaka do ai inua?’ O, ‘Dahaka dabua do ai atoa?’ . . . Dirava ena Basileia bona iena kara maoromaoro do umui tahua guna, vadaeni unai [mauri durua gaudia] ibounai danu umui dekenai dohore ia henia.” (Mataio 6:​31, 33) Nega daudau lasi Iesu ena mase murinai, bapatiso idia abia Keristani taudia matamatadia ese unai heduru herevana idia badinaia. Idia momo be lagani 33 C.E. ai, Pentekoste ariana totona Ierusalema dekenai idia lao Iuda taudia eiava Iuda tomadiho idia abia dae taudia. Unuseniai idia noho neganai, idia do laloa lasi gauna ta ia vara. Idia ese Iesu Keriso ena sivarai namona idia kamonai bona idia abia dae. Edia abidadama matamatana idia dibaia namonamo totona, Ierusalema dekenai idia noho. Idia mailaia mauri durua gaudia idia ore gwauraia, to tauanina gaudia idia laloa bada lasi. Idia ese Mesia idia davaria vadaeni! Edia Keristani tadikaka ese idia ida edia mauri gaudia idia haria, idia ibounai be “aposetolo edia hadibaia herevadia idia kamonai . . . bona idia guriguri” totona.​—Kara 2:42.

Gabeai, Keristani taudia haida ese hebou dekenai idia lao hanaihanai lasi. (Heberu 10:23-​25) Reana moni idia laloa bada matamaia, bona idia sibodia bona edia ruma bese taudia totona kohu idia gogoa neganai, lauma gaudia idia laloa lasi. Aposetolo Paulo ese hebou idia rakatanidia lasi totona ena tadikaka ia hagoadaia murinai ia gwau: “Moni do umui ura henia dikadika lasi. To umui dekenai ia noho gauna, be inai bamona do umui laloalaia, ‘Lau dekenai noho gauna be namo, ia hegeregere vadaeni.’ Badina be Dirava be inai bamona ia hereva, ia gwau: ‘Lau ese umui do lau negea lasi, bona umui do lau rakatania lasi. Lasi bona lasi momokani.’ ”​—Heberu 13:5.

Paulo ena sisiba be mai anina bada unai neganai. Paulo ese Heberu taudia dekenai revareva ia torea bena lagani ima murinai, Cestius Gallus ena Roma tuari taudia ese Ierusalema idia hagegea. Kamonai Keristani taudia ese Iesu ena sisiba idia laloatao, ia gwau: “To umui ese [inai] umui itaia neganai, . . . Ruma ena guhi latanai noho tauna, be namo ia diho lasi ruma lalonai, iena gau abia totona. Uma lalonai noho tauna, namo ia giroa lou lasi, iena dabua abia totona.” (Mareko 13:14-16) Idia diba do idia roho mauri Iesu ena hereva idia kamonai dainai, to edia gaukara gabuna namona dainai eiava edia kohu ena bada dainai lasi. Paulo ena sisiba idia badinaia bona lauma gaudia idia atoa guna taudia be reana idia davaria edia ruma, gaukara, dabua, bona edia kohu idia rakatania bona ororo dekenai idia heau be ia auka momokani lasi, to moni ura henia karana idia do rakatania lasi taudia dekenai reana unai be ia auka herea.

Haida ese Anina Bada Gaudia Idia Atoa Guna Daladia Hari Inai Negai

Hari inai negai, kamonai Keristani taudia ese edia tadikaka ida idia hebou negadia idia laloa bada, bona idia momo ese gau haida idia dadaraia unai idia karaia totona. Gabu haida dekenai, idia abia diba gaukara be shift gaukarana sibona. Tadikaka ta ena noho gabuna dekenai taunimanima momo idia ura Saturday hanuaboi ai moale karadia idia karaia, unai dainai ia ese ena gaukara turadia ia nanadaia bema idia ura gaukara negadia idia haidaua bona ia ese edia gaukara negana ai ia gaukara, bema idia ese hebou dinadia ai ena gaukara negana ai do idia gaukara. Unai bamona gaukara idia karaia tadikaka ma haida be gaukara dainai, sibona edia kongregesen hebou dekenai idia lao diba lasi neganai, kahirakahira ia noho kongregesen heboudia dekenai idia lao. Unai bamona idia karaia dainai, nega momo hebou idia reaia lasi. Canada dekenai kamonai matamata hahinena ta ia lalo-parara haraga, Tiokratik Haroro Sikuli bona Hesiai Hebou be mai anina bada, to ena moni gaukara ena sediual ese ena hebou lao henia dalana ia koua. Unai dainai, ia ese gaukara turana ta dekenai moni ia henia ena gaukara horadia lalonai do ia gaukara totona bena ia be unai mai anina bada heboudia dekenai ia lao diba.

Gorere dikana idia haheaukalaia taudia momo be hebou haida sibona idia reaia. Kingdom Hall dekenai idia lao diba lasi neganai, edia ruma ai telefon eiava teipi amo hebou ena program idia kamonai. Iehova ese “hesiai tauna mai ena kamonai, bona mai ena kara maoromaoro” oreana amo ia henia lauma anianina idia laloa bada dainai, idia ita hanamoa be namo! (Mataio 24:45) Keristani taudia haida ese edia tama sina burukadia idia naria. Ia be kongregesen hebou dekenai ia lao totona, tadikaka ta eiava taihu ta ese ena tama o sina ida do ia noho diba ia gwauraia neganai, unai ia laloa bada momokani.

Oi Hegaegae Guna!

Lauma dalanai sibodia edia namo idia laloa bada tama sina ese edia natudia idia durua Keristani heboudia idia laloa bada totona. Idia ura edia natudia ese sikuli gaukara idia abia neganai, maoromaoro idia karaia, do idia rakatania lasi. Hebou dinadia ai natudia ese sikuli amo ruma dekenai idia ginidae neganai, maoromaoro edia sikuli gaukara idia karaia. Moale karadia bona gaukara ma haida ese hebou lao henia karana idia koua lasi.

Adavana bona tamana ta e, hebou lao henia karana oi atoa guna, a? Adavana bona sinana ta e, oi hegaegae namonamo oiemu maduna oi huaia totona bona hebou dekenai oi lao diba totona, a? Matamata mero o kekeni ta e, oi ese oiemu sikuli gaukara oi atoa guna bona hebou be gabeai, a? Eiava hebou oi atoa guna bona sikuli gaukara be gabeai?

Kongregesen hebouna be Iehova ese ena lalokau dainai ia henia harihari gauna ta. Unai dala oi badinaia totona oi hekwarahi bada be gau badana. Bema mai anina bada gaudia oi atoa guna, Iehova ese oiemu gaukara do ia hanamoa!