Iseda Haroro Bona Mauri Dalana Hebou Pepana Edia Referens
March 1-7
BAIBEL ENA HEREVA BADADIA | NUMERA 7-8
“Israela Taudia amo Ita Dibaia Gaudia”
it-1-E 497 par. 3
Kongrigeisen
Israela dekenai nega momo maduna huaia tatau be taunimanima durua totona idia gaukara. (Esr 10:14) Unai dainai, “iduhu edia lohia taudia” ese palai dubu ena lalona gaudia idia atoa murinai, boubou gaudia idia henia. (Nu 7:1-11) Danu, Nehemia ena nega ai “gwauhamata aukana” amo idia hamomokania hahelaga taudia, Levi taudia, bona gunalaia taudia be maduna idia huaia taudia. (Ne 9:38–10:27) Israela taudia be taunimanima lasi gabuna ai idia laolao neganai, “lohia taudia, mai edia ladana bada taudia” 250 be Kora, Datana, Abirama, bona Onu ida idia haboua bona Mose bona Arona idia gwau-edeede henia. (Nu 16:1-3) Dirava ena hakaua dalana hegeregerena, Mose ese Israela ena tau badadia 70, gunalaia taudia unai, ia abia hidi, ia idia durua “taunimanima edia metau” idia huaia totona. (Nu 11:16, 17, 24, 25) Levitiko 4:15 be “Israela taudia edia tau badadia” ia herevalaia, bona ia hahedinaraia idia be Israela besena ena tau badadia, hahemaoro taudia, bona gunalaia taudia, unai taudia be taunimanima durua totona maduna idia huaia.—Nu 1:4, 16; Ios 23:2; 24:1.
it-2-E 796 par. 1
Rubena
Israela besena ena kamepa ai, Rubena iduhu be palai dubu ena saut kahanai, unai be Simeona bona Gado iduhu edia badinai idia noho. Idia raka-lasi gwauraia neganai, Simeona bona Gado iduhu be Rubena iduhu ese ia gunalaidia, bona edia murinai be Iuda, Isakara, bona Sebuluno iduhu idia raka. (Nu 2:10-16; 10:14-20) Danu iduhu ta ta be unai dala hegeregerena ai palai dubu hahelagaia dinana ai boubou gaudia idia henia be namo.—Nu 7:1, 2, 10-47.
Numera Bukana Ena Hereva Badadia
8:25, 26. Levi gaukara idia karaia namonamo totona, tatau matamata haida idia abia bona idia buruka vadaeni taudia be edia mauri lagani dainai idia hamaoroa gaukara idia rakatania totona. To, sibona idia henia diba Levi taudia ma haida idia durua totona. Hari, Basileia harorolaia gaukarana be do ita rakatania lasi, to unai taravatu ena hakaua herevana ese mai anina bada gauna ta ia hadibaia. Bema Keristani tauna ta be buruka dainai maduna haida ia huaia diba lasi, iena goada hegeregerena ia karaia diba gaukarana ia karaia diba.
Hakaua Hereva Namodia
it-1-E 835
Vara Guna Natudia
Israela dekenai, vara guna memero be edia ruma bese ta ta ena gunalaia taudia ai do idia lao dainai, idia be bese ibounai totona idia gaukara diba. Momokani, Aberahamo gwauhamatana dainai Iehova ese Israela besena be ena “vara guna natuna” bamona ia herevalaia. (Eso 4:22) Iehova ese idia ia hamauria totona, oda ia henia “Israela edia vara guna mero, ia tau o ubua gauna” be ia dekenai do idia hahelagaia. (Eso 13:2) Unai dainai, vara guna memero be Dirava dekenai idia henia.
March 8-14
BAIBEL ENA HEREVA BADADIA | NUMERA 9-10
“Iehova ese Ena Taunimanima Ia Hakaua Dalana”
it-1-E 398 par. 3
Kamepa
Inai kamepa badana be orea ta bamona gabu ta amo gabu ma ta do ia lao karana be hoa gauna danu (Numera karoa 33 ai Mose ia gwau gabu 40 bamona dekenai idia kamepa). Palai dubu ena ataiai ori ia stopu neganai, Israela taudia be unuseni idia kamepa. Ori ia marere neganai, idia ibounai danu idia lao. “[“Iehova,” NWT] ena oda dainai idia kamepa, ma [“Iehova,” NWT] ena oda dainai idia toreisi.” (Nu 9:15-23) Siliva kibi rua idia hiriria neganai, Israela besena be Iehova ena oda ia badinaia. (Nu 10:2, 5, 6) Kibi ena regena ia idau neganai, unai ese Israela taudia ia hadibaia edia kamepa idia kokia totona. Unai ia vara ena nega ginigunana be, “lagani iharuana [1512 B.C.E.], hua iharuana ena dina namba 20 dekenai.” Taravatu Maua idia huaia bona vaira kahanai idia raka, bena Iuda iduhu ia raka, bona ena murinai be Isakara iduhu, bena Sebuluno iduhu. Unai iduhu toi edia murinai be Geresone bona Merari taudia idia raka, bona idia ese palai dubu ena kohu haida idia huaia. Idia edia murinai be Rubena iduhu ia raka guna, bona Simeona iduhu bena Gado iduhu ia raka. Unai iduhu toi edia murinai be Kohata taudia idia raka, idia be palai dubu idia huaia, bena iduhu ma toi, Eparaima, Manase bona Beniamina idia raka. Dokonai, Dano iduhu ia raka, bona murinai Asere iduhu bena Napatali iduhu idia raka. Oibe, iduhu goadadia bona badadia rua be vaira kahana ai bona murina kahana ai idia raka.—Nu 10:11-28.
Dirava Ena Hakaua Dalana Oi Itaia, A?
Edena dala ai ita hahedinaraia Dirava ena hakaua dalana ita badinaia? Aposetolo Paulo ia gwau: “Umui idia hakaua taudia do umui kamonai henia, bona idia henunai do umui noho.” (Heb. 13:17) Nega haida unai ita karaia be auka. Mani inai haheitalai oi laloa: Oi be Israela tauna ta bona Mose ena nega ai oi noho. Dina haida lalonai ori oi badinaia murinai, ori ia stopu. Unai gabu dekenai dina hida do ia noho? Dina ta, wiki ta, eiava hua haida, a? Bona oi laloa, ‘Egu kohu ibounai do lau kokia, eiava?’ Matamanai, reana do oi gaukaralaia kohu sibona oi kokia. To, dina haida murinai oi hesiku emu kohu oi tahua totona, bona emu kohu ibounai oi kokia. To, kohu ibounai oi kokia murinai, oi itaia ori ia marere, vadaeni ma kohu oi udaia haragaharaga! Do oi hekwarahi bada, ani? To ori ia marere neganai, Israela taudia “idia toreisi, edia kamepa idia rakatania.”—Num. 9:17-22.
Dirava ena hakaua herevana ita abia neganai, dahaka ita karaia? Maoromaoro ita badinaia, a? Eiava, eda kara gunadia ita do karaia noho? Hegeregere, Baibel stadi karaia daladia, idau tano taudia haroro henia daladia, hanaihanai ruma bese tomadiho karaia, Hospital Liesen Komiti ida gaukara hebou daladia bona hebouhebou negadiai iseda toana bona kara do ita naria namonamo edia hakaua herevadia be kongrigeisen hebou ai ita kamonai neganai ita badinaia, a? Bema ita idia henia sisiba ita abia dae, ita hahedinaraia Dirava ena hakaua dalana ita laloa bada. Abia hidi badadia ita ura karaia neganai, namo lasi sibona eda aonega dekenai ita tabekau, to namona be Iehova bona ena orea ese idia henia hakaua herevadia ita badinaia. Natu ta be lai gubana ia toa neganai, ena tama sina ia heau henia bona ia idia gimaia, unai hegeregerena lai gubana bamona hekwakwanai ita davaria neganai, namona be Iehova ena orea ita heau henia bona ita do ia gimaia.
Hakaua Hereva Namodia
it-1-E 199 par. 3
Hebou
Hebou Ena Namo. Iehova ese ia hegaegaelaia heboudia ita lao be mai anina bada, unai amo iseda hetura karana ia ida ita hagoadaia, bona unai be Pasova ariana ida ia hegeregere. Bema tau ta, ia goeva bona laolao ta ia karaia lasi, to ia ura lasi Pasova ariana ia karaia, ia idia hamasea. (Nu 9:9-14) King Hesekaia ese Iuda bona Israela taudia be Pasova aria totona Ierusalema ai ia haboudia neganai, ia gwau: “Israela taudia e, . . . Lohiabada, . . . dekenai do umui giroa mai lou. . . . Emui lalona do umui ha-aukaia lasi, emui tamadia bamona, to Lohiabada do umui kamonai henia. Iena Dubu Helaga Ierusalema dekenai do umui mai. Inai gabu be Lohiabada emui Dirava ia hahelagaia hanaihanai vadaeni. Inai gabu dekenai Lohiabada do umui tomadiho henia, iena badu siahu bada be umui dekena amo do ia abia siri totona. . . . Lohiabada, emui Dirava, be mai ena bogahisihisi. Bema ia dekenai umui giroa lou neganai, ia ese umui do ia abia dae.” (2Si 30:6-9) Bema idia ura lasi unai hebou idia lao henia, unai ese ia hahedinaraia idia be Dirava idia dadaraia. Bona Keristani taudia be unai bamona Pasova aria haida idia karaia lasi, to Paulo ese idia ia hagoadaia Dirava ena taunimanima edia hebou karadia idia rakatania lasi totona. Paulo ia gwau: “Namona be ta ta ibounai do ita laloa bona do ita hagoadaia, ita lalokau heheni bona kara namodia ita karaia totona. Bona iseda hebou karana ita rakatania lasi, vaia haida ese idia karaia bamona, to do ita hagoadaia heheni, bona unai kara do ita habadaia noho, badina umui itaia unai dina be ia kahirakahira noho.”—He 10:24, 25; CONGREGATION itaia.
March 15-21
BAIBEL ENA HEREVA BADADIA | NUMERA 11-12
“Dahaka Dainai Maumau Karana Ita Dadaraia?”
Kamonai Kava Taudia ai Ita Lao Lasi
20 Keristani taudia momo herea be matabodaga karaia hedibaganina idia dadaraia. To, namona be ita naria namonamo maumau karana ita manadalaia garina, badina unai amo Dirava ena lalonamo ita haboioa diba. Paulo ese ita ia sisiba henia, ia gwau: “Lohiabada ena siahu do ita tohoa lasi, [Israela taudia] haida ese idia karaia bamona. Vadaeni gaigai ese unai taudia idia koria mase. Bona Dirava dekenai do ita maumau lasi, idia haida idia karaia bamona. Vadaeni Alaia Aneruna ese idia ia alaia mase.” (1 Korinto 10:9, 10) Israela taudia ese Mose bona Arona—oibe, Dirava danu—idia maumauraia, bona hoa dalanai idia abia mana idia hesikulaia. (Numera 16:41; 21:5) Iehova be edia maumau karana dainai ia badu sisina bona edia sihari kava karadia dainai ia badu bada, a? Baibel sivaraina ese ia hahedinaraia gaigai ese maumau taudia momo herea idia hamasea. (Numera 21:6) Guna, gwau-edeede maumau taudia 14,700 ia hamasea. (Numera 16:49) Unai dainai, namo lasi Iehova ia henia gaudia matauraia lasi karana amo ena haheauka ita tohoa.
“Do Umui Maumau Lasi”
7 Israela taudia edia kara ia idau! Matamanai, Iehova ese Aigupito bona Davara Kakakakana amo Israela taudia ia hamauria neganai, idia moale bada bona ane amo Iehova idia hanamoa. (Esodo 15:1-21) To, Israela taudia be tano gagaena idia ura henia lasi bona Kanana taudia idia gari henia dainai, idia lalohisihisi. Idia be Iehova ena heduru dainai idia tanikiu lasi, to idia gwau Iehova be gau namodia ia kokia. Edia maumau karana ese ia hahedinaraia, idia be Iehova ena harihari gaudia idia laloa bada lasi. Unai dainai, Iehova ia gwau: “Inai orea dikana lau dekenai do idia maumau ela bona edena negai?”—Numera 14:27; 21:5.
it-2-E 719 par. 4
Hepapahuahu
Maumau Karana. Maumau karana ese ta ia hagoadaia lasi. Israela taudia be Aigupito idia rakatania bona daudau lasi murinai Iehova dekenai idia maumau, badina idia ese Dirava ena hesiai taudia Mose bona Arona edia hakaua daladia idia gwauraia dika. (Eso 16:2, 7) Edia maumau karadia dainai Mose ia lalomanoka bona ia ura ia mase. (Nu 11:13-15) Maumau karana ese maumau tauna dekenai dika ia havaraia diba. Mose idia maumauraia karana be Iehova ese ia itaia, badina unai be Iena hakaua dalana idia gwauraia dika. (Nu 14:26-30) Maumau karana dainai momo be edia mauri idia haboioa.
Hakaua Hereva Namodia
Numera Bukana Ena Hereva Badadia
12:9-11—Dahaka dainai Miriama sibona ese lepera gorerena ia abia? Badina ia ese unai maumau ia hamatamaia bona Arona ena lalona ia veria ia do ia bamoa totona. Arona be ena kerere ia gwauraia hedinarai karana amo lalohadai maorona ia hahedinaraia.
March 22-28
BAIBEL ENA HEREVA BADADIA | NUMERA 13-14
“Abidadama ese Ita Ia Hagoadaia Dalana”
Abidadama Bona Dirava Gari Henia Karana Dainai Idia Lalogoada
5 To spai taudia rua, Iosua bona Kaleba, be idia ura dikadika gwauhamata tanona dekenai idia vareai. Idia gwau, Kanana taudia be “do ita halusidia haraga. Lohiabada be ita dekenai ia noho, to idia be durua diravana ta lasi. Unai dainai do umui gari lasi.” (Numera 14:9) Iosua bona Kaleba edia hereva be anina lasi, a? Lasi! Iehova ese Hisihisi 10 amo Aigupito bona ena dirava idauidau ia hahemaraia karana be Israela taudia ibounai ese idia itaia. Bena idia itaia Iehova ese Farao bona ena tuari taudia be Davara Kakakakana ai ia hamasedia. (Salamo 136:15) Unai ese ia hahedinaraia, spai taudia 10 bona idia ese idia koia taudia idia gari be anina lasi. Iehova be ena lalohisihisi ia gwauraia: “Toa kara momo herea idia dekenai lau karaia vadaeni. Edena negai lau dekenai do idia abidadama henia?”—Numera 14:11.
6 Iehova be ena hereva amo ia hahedinaraia unai Israela taudia be abidadama lasi, unai dainai idia gari. Oibe, bema ta be mai ena abidadama, do ia lalogoada. Unai dainai aposetolo Ioane ese Keristani kongrigeisen ia tore henia neganai, ia gwau: “Ita ese Dirava ita abidadama henia noho, bona inai abidadama dekena amo tanobada ena kara ita halusia noho.” (1 Ioane 5:4) Iosua bona Kaleba bamona, hari inai negai Basileia harorolaia taudia milioni 6 mai kahana—matamata bona buruka—be mai abidadama ida tanobada hegegemadai Basileia ena sivarai namona idia harorolaia. Mai lalogoada ida idia haroro dainai, edia inai taudia ese idia koudia diba lasi.—Roma 8:31.
Hakaua Hereva Namodia
it-1-E 740
Dirava ese Israela Taudia Dekenai Ia Henia Tanona
DIRAVA ese Israela taudia dekenai ia henia tanona be namo herea. Mose ese spai taudia ia siaia guna Gwauhamata Tanona idia itaia bona unai tano ena aniani haida idia abia neganai, idia ese fig huahua, pomogranet, bona greips mai ena rigi ta idia abidia mai, bona unai greips ena rigi be bada herea dainai tatau rua ese au ta dekenai idia huaia! Ena be edia abidadama ia manoka dainai idia gari, to idia gwau: Tano be “rata bona hani dekenai ia honu.”—Nu 13:23, 27.
March 29–April 4
BAIBEL ENA HEREVA BADADIA | NUMERA 15-16
“Hekokoroku Bona Sibona Laloa Bada Karana Dekenai Naria Namonamo”
Iehova be Oi Ia Diba, A?
12 To, Gwauhamata Tanona idia lao henia noho lalonai, Kora ia laloa Iehova ese Israela besena ia hakaua dalana be maoro lasi. Unai dainai ia ura gau haida ia haidaua bona tatau 250 ese ia idia bamoa. Idia gwau Iehova be idia ia diba bona ia lalonamo henidia. Mose idia hamaoroa: “Umui ruaosi ese mai hekokoroku danu ai umui gunalaia noho! Ai Israela taudia ibounai be Lohiabada ena bese, bona Lohiabada be aiemai huanai ia noho!” (Num. 16:1-3) Idia hekokoroku bona idia laloa edia lalohadai be maoro. Mose ese ia hamaorodia: “Lohiabada ese do ia hedinaraia, daika be iena tau.” (Numera 16:5 duahia.) Murina dinana ai, Iehova ese Kora bona ena orea taudia ia hamasedia ore.—Num. 16:31-35.
Iehova be Oi Ia Diba, A?
11 Mani Mose bona Kora edia haheitalai ita herevalaia. Edia sivarai amo do ita dibaia gauna be, Iehova ese ita ia lalonamo henia totona, iena abia hidi bona iena orea ena hakaua dalana ita matauraia be namo. Kora be Levi tauna ta, Kohata ena iduhu amo. Iehova ese Davara Kakakakana ai Israela taudia ia durua neganai, reana Kora be unai ia itaia. Danu, Sinai Ororona ai gwau-edeede Israela taudia ia hamasedia neganai, reana ia be Iehova ena kahanai ia gini, bona taravatu mauana ia huaia danu. (Eso. 32:26-29; Num. 3:30, 31) Lagani momo lalodiai Kora be Iehova ia badinaia, unai dainai Israela taudia momo ese idia matauraia.
Hakaua Hereva Namodia
Mai Anina Bada Gaudia Atoa Guna!
Iehova be unai bamona ia laloa lasi. Baibel ia gwau: “Vadaeni Lohiabada ese Mose ia hamaoroa, ia gwau, ‘Inai tau be do umui alaia mase.’” (Numera 15:35) Dahaka dainai Iehova ia laloa unai tau ena kara be dika herea?
Taunimanima ese dina 6 lalonai lahi au idia gogoa diba, bona aniani, dabua, bona ruma gaudia idia hegaegae diba danu. Dina namba 7 be lauma gaudia idia tahua totona sibona. Ena be lahi au idia gogoa be kerere lasi, to Iehova idia tomadiho henia negana lalonai, unai gaukara idia karaia be kerere. Ena be Keristani taudia be Mose ena Taravatu henunai lasi, to unai sivarai amo ita diba hari inai negai mai anina bada gaudia ita atoa guna be namo, ani?—Filipi 1:10.
April 5-11
BAIBEL ENA HEREVA BADADIA | NUMERA 17-19
“Lau . . . be Oiemu Ahuna”
Iehova be Emu Ahuna, A?
9 Mani Levi taudia ita laloa, idia be tano ta idia abia lasi. Tomadiho dalanai idia ese Israela besena idia gunalaia dainai, idia abia dae momokani Iehova ese tauanina durua gaudia do ia henia bona ia be edia ahuna. (Num. 18:20) Ena be dubu helaga dekenai hahelaga bona Levi taudia edia gaukara ita karaia lasi, to ita abia dae momokani Iehova ese ita do ia naria. Dokona ia kahirakahira momokani dainai, gau badana be ita abia dae momokani Dirava be ita do ia rakatania lasi.—Apok. 13:17.
Iehova be Egu Ahuna
4 Iehova ese Levi taudia ia abia hidi neganai, edena dala ai ia be edia ahuna ai ia lao? Idia dekenai tano ia henia lasi to mai anina bada gaukara ta ia henidia. Bona unai gaukara be “Lohiabada ena hahelagaia taudia do idia lao.” (Ios. 18:7) Numera karoa 18 amo ita itaia idia be tauanina durua gaudia dekenai do idia dabu lasi. (Numera 18:19, 21, 24 duahia.) Israela taudia ese ‘karoa ta be Levi taudia dekenai idia henia, edia gaukara ena davana.’ Anina be aniani bona animal edia karoa 10 amo karoa ta idia henidia. Bena Levi taudia ese idia abia gaudia amo karoa 10 ena karoa ta, “gau namo hereadia sibona,” be hahelaga taudia dekenai idia henia. (Num. 18:25-29) Israela taudia ese dubu helaga dekenai idia mailaia “harihari gaudia helagadia” be hahelaga taudia dekenai idia henia danu. Unai dainai, hahelaga taudia idia diba momokani Iehova be idia do ia naria.
Hakaua Hereva Namodia
g02-E 6/8 14 par. 2
Damena—Mai Anina Bada
Gunaguna, damena be noho daudau gauna ta ia laulaulaia danu. Unai dainai, Baibel ese idia karaia gwauhamata be ia gwauraia “damena” gwauhamatana, bona nega momo orea rua idia aniani hebou neganai damena idia gaukaralaia, unai amo unai gwauhamata idia hamomokania. (Numera 18:19; BHḡ) Mose Ena Taravatu henunai, boubou patana dekenai idia atoa boubou gaudia latanai damena idia atoa, unai ese dika o bodaga lasi karana ia laulaulaia.
April 12-18
BAIBEL ENA HEREVA BADADIA | NUMERA 20-21
“Hekwakwanai Negadiai, Oi Manau”
Ita Manau Bona Iehova Ita Hamoalea
19 Ita manau neganai, kerere do ita karaia loulou lasi. Mani Mose oi laloa lou. Ia be lagani momo lalonai ia manau bona Iehova ia hamoalea. To, Israela taudia be lagani 40 dokonai tano gagaena ai idia loaloa neganai, Mose be manau karana ia hahedinaraia lasi. Iena taihuna Miriama be ia mase neganai Kadesi ai ia idia guria. Bona Israela taudia be idia maumau lou idia gwau ta ese idia ia laloa lasi. To Israela taudia be ranu lasi dainai “Mose dekenai idia maumau.” Ena be Iehova ese Mose dekenai siahu ia henia hoa karadia ia karaia bona Mose be mai ena ura bada ida lagani momo lalonai idia ia gunalaia. Ranu sibona totona idia maumau lasi, to Mose dekenai idia maumau, toana be iena kerere dainai idia ranu mase.—Num. 20:1-5, 9-11.
Ita Manau Bona Iehova Ita Hamoalea
20 Mose be ia badu dikadika dainai ia manau lasi. Ena be Iehova ese Mose ia hagania nadi do ia hereva henia, to Mose be mai badu ida Israela taudia ia hamaoroa ia be hoa karana ta do ia karaia. Bena, ia ese nega rua nadi ia botaia bona ranu ia raka-lasi. Ia badu bona hekokoroku dainai kerere badana ia karaia. (Sal. 106:32, 33) Mose be manau karana ia hahedinaraia lasi dainai, Gwauhamata Tanona ai ia vareai lasi.—Nu 20:12.
21 Unai haheitalai amo mai anina bada gaudia ita dibaia. Gau ginigunana be, nega ibounai manau karana ita hahedinaraia noho be namo. Bema ita manau lasi, mai hekokoroku ida do ita hereva bona kara. Gau iharuana be, bema ita lalohekwarahi unai ese ita ia hamanokaia diba, unai dainai namona be ita hekwarahi ita manau totona.
w09-E 9/1 19 par. 5
Kara Maoromaoro Ia Badinaia Hahemaoro Tauna
Ginigunana, Dirava ese Mose dekenai maoro ia henia lasi taunimanima ia hereva henia totona, eiava ia gwauraidia lasi gwau-edeede taudia. Iharuana, Mose bona Arona be Dirava idia hanamoa lasi. Dirava ia gwau: ‘Lau umui hahelagaia lasi.’ (Numera 20:12, BHḡ) Mose ese inai hereva, “emui ranu do ai haheaua” ia gwauraia neganai, toana be ia gwau, ia bona Arona ese hoa dalanai ranu idia haheaua, to Dirava lasi. Ihatoina, guna Dirava ese idia gwau-edeede Israela taudia ia hahemaoro henia karana be ia idau lasi. Ia ese gwau-edeede uruna ia koua Kanana tanona idia vareai lasi hegeregerena, Mose bona Arona dekenai unai bamona ia karaia danu. (Numera 14:22, 23) Namba 4, Mose bona Arona be Israela taudia edia gunalaia taudia. Maduna momo idia huaia taudia be Dirava dekenai edia kara anina do idia herevalaia.—Luka 12:48.
Hakaua Hereva Namodia
Manoka Taudia Dekenai Iehova Ena Lalohadai Oi Abia, A?
12 Unai negadiai, Iehova be maoromaoro Arona ia panisia diba. To Iehova ia laloparara Arona be tau dikana lasi bona unai kara dika ibounai be iena kerere lasi. Toana be Arona be ia vara hekwakwanai bona hutuma ese idia doria dainai, dala kererena ia abia hidi. To, gabeai Arona ia gwau ia be ia kerere bona Iehova ena hahemaoro karana ia abia dae. (Eso. 32:26; Num. 12:11; 20:23-27) Iehova ese Arona ena abidadama bona helalo-kerehai karana ia laloa bada. Lagani momo murinai, taunimanima ese Arona bona ena bese taudia idia gwauraia Iehova gari henia taudia.—Sal. 115:10-12; 135:19, 20.
April 19-25
BAIBEL ENA HEREVA BADADIA | NUMERA 22-24
“Iehova ese Dika Gauna be Namo Gauna ai Ia Halaoa”
“Iesu Ena Sivarai Namona” Gwauraia
5 Keristani taudia ginigunadia bamona, ena be hari Dirava ena taunimanima ese dagedage idia davaria, to haroro gaukara idia hadokoa lasi. Nega momo Keristani taudia idia doria edia gabu idia rakatania—tano o dibura ruma ma ta dekenai idia lao totona—bona unai amo idia lao gabudia dekenai Basileia sivaraina idia harorolaia. Hegeregere, Tanobada Tuarina Iharuana lalonai, Iehova ena Witnes taudia be Nazi dibura kamepadia dekenai idia noho neganai, ma haida idia haroro henia. Unuseniai Witnes taudia ia davaria Iuda tauna ia gwau: “Unai neganai, Iehova ena Witnes dibura taudia idia lalogoada dainai, lau diba edia abidadama ena badina be Baibel dekenai—bona lau be Witnes ta ai lau lao.”
it-2-E 291
Kavakava karana
Iehova Dagedage Henia Karana. Peroveta tauna Balama ia ura Israela taudia totona peroveta hereva koikoina ia gwauraia, unai amo Moaba ena King, Balaki amo moni ia abia diba, to Iehova ese ia ura karaia karana ia koua. Aposetolo Petero ese Balama be inai bamona ia gwauraia, “ia hereva diba lasi doniki be taunimanima edia gadona ai ia hereva, unai amo peroveta tauna ena kavakava karana ia koua.” Aposetolo Paulo ese Balama ena kavakava karana dekenai inai Greek herevana pa·ra·phro·niʹa, ia gaukaralaia, ena anina be “ta ena lalohadai badinaia.”—2Pe 2:15, 16; Nu 22:26-31.
Hakaua Hereva Namodia
Numera Bukana Ena Hereva Badadia
22:20-22—Dahaka dainai Iehova be Balama dekenai ia badu? Iehova ese peroveta tauna Balama ia hamaoroa Israela taudia do ia hadikaia lasi. (Numera 22:12) To, unai peroveta tauna be Balaki ena tatau ida ia lao, badina ia ura Israela taudia ia hadikaia. Balama ia ura Moaba edia King ia hamoalea bona ia amo moni ia abia. (2 Petero 2:15, 16; Iuda 11) Ena be Iehova ese Balama ia doria Israela taudia ia hanamoa, to ia hadikaia lasi totona neganai, Balama ese king ena hereva ia abia dae bona Bala idia tomadiho henia hahine idia gaukaralaia Israela tatau idia koia totona. (Numera 31:15, 16; Buka Helağa) Unai dainai, Peroveta tauna Balama ena mataganigani karana dainai Dirava be ia dekenai ia badu.
April 26–May 2
BAIBEL ENA HEREVA BADADIA | NUMERA 25-26
“Ta Ena Kara ese Namo Ia Havaraia”
“Matabodaga Karadia amo Umui Heau Siri”
HAODA tauna ta be gwarume momo gabuna ta dekenai ia lao. Ia ura henia gwarumena ta do ia veria totona. Guma be kimai dekenai ia atoa bona ranu lalonai ena kimai ia negea. Nega sisina murinai, ena kimai ia mareremarere bona ia ese gwarume ta ia veria. Ia moale badina ia diba ia be guma maorona ia gaukaralaia.
2 Lagani 1473 B.C.E. ai, tau ta ladana Balama be do ia gaukaralaia guma namona ta ia lalohadailaia. Ia ura unai guma ia gaukaralaia Moaba tanona ai idia kamepa Israela taudia ia veria totona. Idia be kahirakahira Gwauhamata Tanona dekenai do idia vareai. Mai koikoi ida Balama ia gwau ia be Iehova ena peroveta tauna, to momokani ia be mataganigani tauna bona Moaba ena king ese moni ia henia Israela taudia ia hadikaia totona. To, Iehova ese Balama ena gaukara ia koua dainai, idia dekenai hahenamo herevadia sibona ia gwauraia. Balama ia ura king ese do ia henia moni ia abia dainai, ia laloa bema ia ese Israela taudia ia veria kara dika rohorohona ta idia karaia totona, vadaeni Dirava sibona ese iena taunimanima do ia hadikaia. Unai ia karaia totona, Balama ese guma ta—Moaba ena hegahusi hahinedia—ia gaukaralaia.—Numera 22:1-7; 31:15, 16; Apokalupo 2:14.
“Matabodaga Karadia amo Umui Heau Siri!”
4 Dahaka dainai unai dika badana ia vara? Ena be Iehova ese Aigupito amo idia ia hamauria, tano gagaena dekenai idia ia ubua, bona gwauhamata tanona dekenai idia ia hakaua lao, to Israela taudia momo be Iehova idia tura henia lasi dainai, edia kudouna be ia dika. (Heberu 3:12, NW) Aposetolo Paulo be unai ia laloa neganai, ia gwau: “Matabodaga karadia do ita karaia lasi, idia haida ese matabodaga karadia idia karaia bamona, bona dina tamona ai idia 23,000 idia mase.”—1 Korinto 10:8, NW.
Hakaua Hereva Namodia
it-1-E 359 par. 1-2
Boda
Iduhu ta ta huanai tano idia haria neganai, inai dala rua idia badinaia: Nadi gadara, bona iduhu ena bada. Iduhu ta ta ese do idia abia tano be nadi gadara ese ia hahedinaraia, unai dainai idia abia tano ena kahana be idauidau, hegeregere not, saut, ist bona west, eiava kone bona ororo kahana. Unai nadi gadara ena abia hidi be Iehova amo, bona unai ese iduhu ta ta ia durua idia mama eiava badu lasi totona. (Ao 16:33) Dirava ese idia ia hakaua dainai Iakobo ese Genese 49:1-33 ai ia perovetalaia herevana be unai iduhu ta ta dekenai ia guguru.
Nadi gadara amo iduhu ta do ia noho gabuna idia davaria murinai, do idia noho gabuna ena bada do idia laloa bona badina iharuana dainai unai do idia karaia: iduhu ena bada hegeregerena. “Tano be [“gadara ta,” NWT] dekenai iduhu ta ta dekenai do oi haria, bona iduhu badadia dekenai tano badadia do oi henia, bona iduhu maragidia dekenai tano maragidia do oi henia. Bema [“gadara,” NWT] ese tau ta dekenai tano ta ia henia, unai be iena tano.” (Nu. 33:54) Nadi gadara amo iduhu ta ia noho gabuna ena disisen be do idia haidaua lasi, to unai iduhu ese do ia abia tano ena bada dekenai senisi haida idia karaia diba. Unai dainai idia davaria Iuda iduhu ena tano be bada herea neganai, iena tano ena kahana haida be Simeona ena iduhu dekenai idia henia.—Ios. 19:9.