STADI 8

Haheitalai Bona Laulau Herevadia Gaukaralaia

Mataio 13:34, 35

POINT BADANA: Emu hadibaia gaukara lalonai auka lasi haheitalai o laulau herevadia oi gaukaralaia, emu kamonai taudia edia lalona oi veria bona point badadia oi hahedinaraia.

KARAIA DALANA:

Auka lasi haheitalai o laulau herevadia gaukaralaia. Iesu bamona, gau maragidia amo gau badadia edia anina oi hahedinaraia, bona auka lasi gaudia amo auka gaudia edia anina oi hahedinaraia. Haheitalai o laulau hereva ena anina momo gwauraia lasi. Namona be emu haheitalai o laulau hereva be oi hadibaia leseni ida ia hegeregere momokani, unai amo kamonai taudia do idia daradara lasi.

Gau ibounai oi stadilaia namonamo. Tanobada ai idia vara gaudia oi itaia, orea ena pablikeisen idauidau oi stadilaia, bona hadibaia taudia namodia oi kamonai henia. Unai bamona oi karaia lalonai, emu hadibaia gaukara ai oi gaukaralaia diba haheitalai o laulau herevadia oi laloa. Unai haheitalai o laulau herevadia oi torea bona gabu ta (file) dekenai oi atoa.
Kamonai taudia oi laloa. Kamonai taudia ese idia karaia bona laloa bada gaudia be emu haheitalai lalonai oi gaukaralaia. To, namo lasi oi gaukaralaia haheitalai o laulau hereva ese idia ia hahemaraia eiava edia lalona ia hahisia.
Point badadia oi hadibaia. Haheitalai o laulau herevana ena point badana do oi hahedinaraia dalana oi laloa, to gau maragimaragi oi laloa momo lasi. Namona be kamonai tauna ese oi gaukaralaia haheitalai o laulau herevana ia laloatao sibona lasi, to ia dibaia point badana danu ia laloa.