LESENI 11
Baibel amo Heduru Oi Abia Dalana
Gaukara badana ta oi hamatamaia totona nega ta oi lalohekwarahi, a? Oi dekenai ia auka lasi totona gaukara be kahana ta ta dekenai oi haria. Baibel duahia totona danu be unai bamona. Reana do oi henanadai, ‘Edeseni amo do lau hamatamaia?’ Inai leseni ai, Baibel duahia bona stadilaia karana oi moalelaia totona oi do ia durua gaudia haida do ita herevalaia.
1. Dahaka dainai hanaihanai Baibel ita duahia be namo?
“Iehova ena taravatu,” eiava Baibel ia duahia tauna be do ia moale bona do ia kwalimu. (Salamo 1:1-3 duahia.) Baibel oi duahia totona, dina ta ta ai miniti haida lalonai unai oi tohoa. Dirava ena Hereva oi dibaia namonamo neganai, Baibel duahia karana do oi moalelaia bada.
2. Baibel duahia karana amo namo oi abia totona, dahaka ese oi do ia durua?
Baibel duahia karana amo namo ita abia totona, namona be nega ita atoa ita duahia gauna ita lalohadailaia. Namona be Baibel ita duahia bona ita “laloa dobu.” (Iosua 1:8, futnout) Emu duahiduahi oi karaia neganai, sibona oi nanadaia: “Edena dala ai inai sivarai ese lau dekenai Iehova Dirava ena kara ia hadibaia? Edena dala ai egu mauri lalonai lau badinaia diba? Edena dala ai inai siri amo ma haida lau durua diba?”
3. Edena dala ai nega oi atoa Baibel oi duahia totona?
Oi dekenai Baibel duahia totona nega oi atoa be auka, a? Ita ibounai dekenai unai ia vara. To namona be iseda ‘nega do ita gaukaralaia namonamo.’ (Efeso 5:16) Unai oi karaia diba, bema dina ta ta ai Baibel duahia totona nega oi abia hidi. Haida be daba momokani ai Baibel idia duahia. Ma haida be abia hidi idia karaia, reana dina tubu ai Baibel do idia duahia. Danu ma haida be hanuaboi ai, idia do mahuta lasi neganai Baibel idia duahia. Oi dekenai edena be nega namona Baibel oi duahia totona?
DIBA MA HAIDA ABIA
Baibel duahiduahi moalelaia dalana dibaia. Hegaegae namonamo dalana oi dibaia, unai amo Baibel stadilaia karana do oi moalelaia.
Aniani idauidau ania karana ita moalelaia hegeregerena, ita ese Baibel duahia karana ita moalelaia diba
4. Baibel duahiduahi moalelaia dalana oi dibaia
Baibel duahiduahi oi hamatamaia be mai ena hekwarahi. To, ta ese aniani matamata ia ura henia hegeregerena Baibel duahiduahi do ita “ura henia dikadika” diba. Petero Ginigunana 12:2 duahia bena inai henanadai herevalaia:
Bema dina ta ta ai Baibel oi duahia, do oi moalelaia bona oi ura duahia loulou, a?
VIDIO itaia haida ese Baibel duahiduahi idia moalelaia matamaia dalana oi itaia totona. Bena inai henanadai herevalaia.
Vidio ai, matamata taudia be dahaka koua gaudia idia hanaia?
Dahaka ese ia durudia hanaihanai Baibel idia duahia totona?
Dahaka gaudia idia karaia dainai Baibel duahiduahi idia ura henia bada?
Heduru daladia haida:
Baibel trensleisen maorona ta oi abia hidi. Nega Matamata Trensleisen oi tohoa bema emu gado ai ia noho.
Oi moalelaia Baibel sivaraina ta amo duahiduahi oi hamatamaia. Diba ma haida totona, “Baibel Duahiduahi Oi Hamatamaia” ena chart itaia.
Oi duahia kahana oi makaia. Inai pablikeisen ai “Emu Baibel duahiduahi Oi Makaia” ena chart oi gaukaralaia.
JW Library® app oi gaukaralaia. Gabu idauidau ai, emu smart fon o unai bamona gaudia ma haida amo Baibel oi duahia bona kamonai diba.
Inai apendiks oi gaukaralaia Nega Matamata Trensleisen. Ia be mai ena mapu, chart bona diksenari, bona oi ia durua diba emu Baibel duahiduahi oi moalelaia totona.
5. Emu Baibel stadi totona oi hegaegae
Salamo 119:34 duahia, bena inai henanadai herevalaia:
Baibel duahiduahi bona Baibel stadi oi do hegaegaelaia lasi neganai, dahaka dainai oi guriguri be namo?
Edena dala ai stadi ena kahana ta ta ese oi ia durua diba? Inai leseni ta ta oi hegaegaelaia neganai, inai oi tohoa:
Leseni ena paragraf ginigunana oi duahia.
Siri ta ta oi duahia bona leseni ida idia hegeregere dalana oi lalopararalaia toho.
Henanadai ta ta edia haere eiava hereva badadia oi makaia; unai ese oi ia durua oi ia stadi henia tauna ida unai leseni umui herevalaia totona.
Inai oi diba, a?
Iehova ena Witnes taudia be Baibel trensleisen idauidau idia gaukaralaia. To idia ese Nega Matamata Trensleisen Ena Buka Helaga idia moalelaia badina hereva maorodia idia noho, ia hedinarai namonamo bona Dirava ena ladana ia gaukaralaia.—Websait atikol itaia “Iehova Ena Witnes Taudia be Mai Edia Baibel, A?”
HAIDA IDIA GWAU: “Baibel stadilaia be mai ena hekwarahi. Lau be nega lasi bona lau hesiku.”
Dahaka oi laloa?
POINT BADANA
Baibel duahiduahi oi moalelaia totona, sediual namona oi karaia, oi duahia gaudia lalopararalaia totona oi guriguri, bona Baibel stadi ta ta totona oi hegaegae.
Riviu
Baibel amo heduru abia totona dahaka ese oi do ia durua?
Edena negai Baibel do oi duahia bona stadilaia diba?
Dahaka dainai emu Baibel stadi totona oi hegaegae be mai ena namo?
REFERENS ITAIA
Emu Baibel duahiduahi do ia durua daladia haida oi riviulaia.
“Baibel Duahiduahi ese Oi Do Ia Durua” (Gima Kohorona No. 1 2017)
Baibel duahiduahi ena dala toi dibaia.
“Edena Dala ai Baibel ese Lau Ia Durua Diba?—Kahana 1: Emu Baibel Oi Dibaia” (Websait atikol)
Oi tahua edena bamona Baibel duahiduahi do oi moalelaia.
Lagani momo Baibel duahiduahi idia karaia taudia amo heduru daladia haida abia.