“Lauma Helaga ese Emui Mauri Dala Ia Hakaua” Noho, A?
“Lauma Helaga ese emui mauri dala ia hakaua be namo, vadaeni tauanina ena ura dikadia do umui karaia lasi.”—GALATIA 5:16.
1. Lauma helaga ita koua ena lalohekwarahi be edena bamona ita hanaia diba?
LAUMA helaga ita koua eiava lasi ena lalohekwarahi ita hanaia dalana ta ia noho. Gauna be inai: Aposetolo Paulo ena sisiba ita badinaia be namo, ia gwau: “Lauma Helaga ese emui mauri dala ia hakaua be namo, vadaeni tauanina ena ura dikadia do umui karaia lasi.” (Galatia 5:16) Bema Dirava ena lauma helaga ese iseda mauri dala ia hakaua, tauanina ena ura dikadia be ita do idia biagua lasi.—Roma 8:2-10.
2, 3. Lauma helaga ese iseda mauri dalana ia hakaua neganai, dahaka do ita karaia?
2 Bema ‘lauma helaga ese iseda mauri dala ia hakaua,’ vadaeni Iehova do ita badinaia. Haroro gaukara, kongrigeisen, noho gabudia, o ma gabu haida dekenai ita be Iehova ena kara namodia ita hahedinaraia diba. Eiava adavana, natudia, tadikaka taihu, eiava ma haida be lauma ena huahua do idia hahedinaraia.
3 Dirava ena ‘lauma helaga ese iseda mauri dala ia hakaua’ neganai, ita be kara dika do ita dadaraia. (1 Petero 4:1-6) Eiava ita be kara dika badana do ita karaia lasi. To, ‘lauma helaga ese iseda mauri dala ia hakaua’ neganai, dahaka kara namodia ma haida do ita karaia?
Dirava Bona Keriso Kahirakahira Ita Noho
4, 5. Lauma helaga ese eda mauri dalana ia hakaua dainai, Iesu be edena bamona ita laloa?
4 Lauma helaga ese eda mauri dalana ia hakaua dainai, ita be Dirava bona Iesu ita tura henidia noho diba. Paulo be Korinto tadikaka dekenai Dirava ena harihari gaudia ia herevalaia neganai, ia gwau: “Lau ura umui [o kaivakuku umui rakatania taudia] diba Dirava ena Lauma ese ia hakaua tauna be inai bamona ia hereva diba lasi, ‘Iesu do ia dika momokani.’ Bona tau ta be inai bamona ia hereva diba lasi, ‘Iesu be Lohiabada,’ to Lauma Helaga ese ia hakaua noho tauna sibona mo.” (1 Korinto 12:1-3) Satani Diabolo ena lauma ese ia hakaua tauna be Iesu do ia hadikaia. To, ita be Dirava ena lauma helaga ese ia hakaua Keristani taudia dainai, ita abia dae momokani Iehova be Iesu ia hatorea isi lou bona dagi bada herea ia henia. (Filipi 2:5-11) Ita be Keriso ena mauri davalaia boubouna ita abidadama henia bona ita abia dae Dirava ese Iesu ia abia hidi ita do ia lohiaia totona.
5 Aposetolo edia negai, Keristani koikoi taudia haida idia gwau, Iesu Keriso be taunimanima edia tauanina dekenai ia mai lasi. (2 Ioane 7-11) Unai lalohadai koikoina dainai, haida be Mesia ena sivarai momokanina idia dadaraia. (Mareko 1:9-11; Ioane 1:1, 14) Lauma helaga ese ita eda mauri dalana ia hakaua neganai, ita be unai bamona lalohadai koikoidia do ita dadaraia. To, Baibel ai Dirava ena lalohadai eiava hadibaia hereva maorodia ita badinaia noho neganai, ita be Iehova ena hariharibada karadia ita moalelaia bona ‘Dirava ena hereva momokani ena dala dekenai ita raka noho’ diba. (3 Ioane 3, 4) Unai dainai, namona be aposteit taudia edia hahediba koikoi iboudiai ita dadaraia bona iseda guba Tamana ita tura henia noho.
6. Lauma helaga ese edia mauri dalana ia hakaua taudia be dahaka kara namodia idia hahedinaraia?
6 Paulo ese Galatia dekenai, aposteit taudia ese kaivakuku idia tomadiho henia bona orea hapararaia karana be “tauanina ena kara,” hegeregere heudahanai bona matabodaga ida ia gwauraia hebou. To, ia gwau: “Keriso Iesu ena murinai idia raka taudia ese edia tauanina mai edia ura dikadia bona kara dikadia idia hamasea vadaeni satauro dekenai. Lauma Helaga ese ita dekenai mauri ia henia vadaeni, unai dainai ia ese iseda mauri ia biagua be namo.” (Galatia 5:19-21, 24, 25) Lauma helaga ese iseda mauri dalana ia hakaua dainai, dahaka kara namodia ia havaraia diba? Paulo ia gwau: “Lauma Helaga ese inai bamona karadia ia havaraia: Lalokau, moale, maino, haheauka, bogahisihisi, kara maoromaoro [“kara namo,” NW ], abidadama momokani kara, manau, tauanina ena ura koua karana [“boga-auka,” BHğ].” (Galatia 5:22, 23) Mani unai lauma huahua ta ta ita herevalaia.
“Ita Ta Ta Ibounai Dekenai Do Ita Lalokau Henia”
7. Lalokau ena anina be dahaka? Lalokau karadia haida be dahaka?
7 Lalokau—lauma helaga ena huahua ta—ena anina be, tau ta be ma haida ia ura henia bada, edia namo ia laloa bada, bona idia hetura namo herea. Baibel ia gwau “Dirava be lalokau,” badina unai be ena kara korikorina. Iesu Keriso ena mauri davalaia boubouna ese ia hahedinaraia, Dirava bona Iesu be taunimanima idia lalokau henia bada. (1 Ioane 4:8; Ioane 3:16; 15:13; Roma 5:8) Iesu ena murinai idia raka taudia be, ta ta dekenai do idia lalokau henia. (Ioane 13:34, 35) Momokani, Baibel ena oda be inai: “Ita ta ta ibounai dekenai do ita lalokau henia” be namo. (1 Ioane 3:23) Ma Paulo ia gwau, lalokau be ia haheauka bona hebogahisi. Ia mama lasi, ia heagi lasi, haida hadikaia ia ura lasi o sibona ena gau ia tahua lasi. Lalokau be ia badu haraga lasi o haida edia dika ia laloatao noho lasi. Ia be taunimanima edia kara gagevagageva ia moalelaia lasi, to Dirava ena hereva momokani ia moalelaia. Lalokau be taunimanima durua kara dekenai ia hesiku lasi, nega ibounai iena abidadama ia goada noho, nega ibounai Dirava ena gwauhamata ia naria noho mai moale danu, bona metau ibounai lalonai ia gini goada noho. Ma danu, ia be do ia noho hanaihanai.—1 Korinto 13:4-8.
8. Dahaka dainai iseda tadikaka taihu ita lalokau henia be namo?
8 Dirava ena lauma helaga ese eda lalona dekenai lalokau ia havaraia neganai, ita be Dirava bona eda dekena taudia do ita lalokau henia. (Mataio 22:37-39) Ioane ia gwau: “Tau ta bema ia ese iena tadikakana ia lalokau henia lasi, unai tau be mase lalonai ia do noho. Bona iena tadikakana ia badu henia noho tauna be ala-ala tauna. Umui diba mauri hanaihanai be ala-ala tauna lalonai ia noho lasi.” (1 Ioane 3:14, 15) Israela ai, bema tau ta ese ma tau ta—ia badu henia lasi tauna—ia alaia kava neganai, unai ala-ala tauna be Israela taudia edia heau mauri hanuadia ta dekenai ia heau vareai bona ia mauri diba. (Deuteronomi 19:4, 11-13) Bema lauma helaga be iseda mauri dalana ia hakaua, ita be Dirava, tadikaka taihu, bona ma haida do ita lalokau henidia.
Iehova “Dainai Ita Moale Neganai, Goada Do Ita Abia”
9, 10. Ita moale ena badina haida be dahaka?
9 Iehova be “moale Diravana.” (1 Timoteo 1:11 NW; Salamo 104:31) Iesu be mai moale ida ena Tamana ena ura ia karaia. (Salamo 40:8; Heberu 10:7-9) Iehova “dainai ita moale neganai, goada do ita abia.”—Nehemia 8:10.
10 Metau, daradoko, o dagedage idia vara neganai, ita be mai moale ida Dirava ena ura ita karaia. ‘Dirava do ita diba’ be moale gauna! (Aonega Herevadia 2:1-5) Unai sibona lasi, ita be Dirava bona Iesu ena mauri davalaia boubouna ita abidadama henia dainai, mai moale ida Dirava ita hesiai henia noho. (1 Ioane 2:1, 2) Tanobada hegegemadai, tadikaka oreana lalonai ita noho dainai ita moale. (Sepanaia 3:9; Hagai 2:7) Basileia helarona ita abia bona sivarai namona ita harorolaia dainai ita moale. (Mataio 6:9, 10; 24:14) Danu, mauri hanaihanai helarona ita abia dainai ita moale be namo. (Ioane 17:3) Unai hahenamo hereadaena dainai, ita “moale bada” be namo.—Deuteronomi 16:15.
Maino Bona Haheauka
11, 12. (a) Maino ena anina be dahaka? (b) Dirava ena maino ese ita ia durua dahaka ita karaia totona?
11 Maino—lauma helaga ena huahua ma ta—anina be noho namona o laga-ani. Iseda guba Tamana be maino Diravana, bona Baibel ia gwau: “Lohiabada ese iena bese taudia . . . be maino dekena amo ia hanamodia noho.” (Salamo 29:11; 1 Korinto 14:33) Iesu ese ena hahediba taudia ia hamaoroa: “Maino umui dekenai lau rakatania, lauegu maino lau henia umui dekenai.” (Ioane 14:27) Unai hereva be edena dala ai Iesu ena hahediba taudia ia durua?
12 Iesu ia henia mainona dainai, ena hahediba taudia idia noho namonamo o idia gari lasi. Momokani, hahediba taudia be lauma helaga idia abia neganai, unai maino idia abia danu. (Ioane 14:26) Hari inai negai, Dirava ese lauma helaga ia henia bona eda guriguri ia haerelaia dainai, ita be “Dirava ena maino” ita abia bona ita noho namonamo. (Filipi 4:6, 7) Ma danu, Iehova ena lauma helaga be eda mauri dalana ia hakaua dainai, ita be tadikaka taihu bona ma haida ita badu henidia lasi to mai maino ida ita noho.—Roma 12:18; 1 Tesalonika 5:13.
13, 14. Haheauka be edena bamona kara? Dahaka dainai ita haheauka be namo?
13 Haheauka be maino hegeregerena; badina bema ta be ita ia habadua o kerere ia karaia, do ita haheauka badina be ita diba unai tau be ena kara do ia senisia. Iehova be haheauka Diravana. (Roma 9:22-24) Danu, Iesu be haheauka tauna. Ita danu be Iesu ita tohotohoa diba, badina Paulo ia gwau: “Dirava ese lau ia bogahisihisi henia ena badina be inai: Keriso ia ura iena haheauka, be lau dekena amo do ia hedinaraia namonamo, taunimanima ibounai edia vairana dekenai. Vadaeni egu kara dika bada Keriso ese ia gwauatao, be idia itaia neganai, idia danu ia do idia abidadama henia, bona iena mauri hanaihanai do idia davaria.”—1 Timoteo 1:16.
14 Ena be haida ese ita idia hereva o kara dika henia, to ita haheauka diba. Paulo ese Keristani tadikaka ia hagoadaia: “Taunimanima ibounai dekenai do umui lalo namo henidia.” (1 Tesalonika 5:14) Ita ibounai be goevadae lasi bona kerere ita karaia diba dainai, ita ura haida ese iseda kara o hereva kereredia idia haheaukalaia. Unai dainai, gau badana be ‘mai haheauka . . . bona . . . mai moale danu do ita noho.’—Kolose 1:9-12.
Hebogahisi Bona Kara Namo
15. Hebogahisi karadia haida be dahaka?
15 Haida edia namo ita tahua, tura henidia, bona heduru karadia o hereva namodia ita henia be hebogahisi karadia. Iehova bona Iesu be hebogahisi taudia. (Roma 2:4; 1 Petero 2:3) Edia hesiai taudia idia hebogahisi be namo. (Kolose 3:12) Dirava idia hesiai henia lasi taudia haida be “bogahisihisi” karadia idia karaia. (Kara 27:3; 28:2) Momokani, Dirava ena lauma helaga ese iseda mauri dalana ia hakaua neganai, ita be hebogahisi karadia ita karaia diba.
16. Edena negai hebogahisi ita hahedinaraia diba?
16 Ena be ta ena hereva eiava kara ese ita ia hahisia, to hebogahisi karana ita hahedinaraia diba. Paulo ia gwau: “Bema umui badu neganai, kara dika do umui karaia lasi. Bona dina do ia diho lasi neganai, emui badu do umui haorea. Satani ena dala do umui kehoa lasi. Umui ibounai ta ta do umui durua, bona ibounai ta ta do umui bogahisihisi henia. Bona ibounai ta ta edia kara dika do umui gwauatao, Dirava ese Keriso dainai emui dika ia gwauatao hegeregerena.” (Efeso 4:26, 27, 32) Hisihisi idia davaria taudia ita hebogahisi henia be namo. Bema tadikaka ta be metairametaira “kara namodia, kara maoromaoro, bona hereva momokani” ena dala ia rakatania noho to elda tauna ia ura lasi tadikaka ia hahisia dainai sisiba ia henia lasi, unai be hebogahisi lasi karana.—Efeso 5:9.
17, 18. Dahaka dainai kara namodia ita karaia be namo?
17 Iehova be kara namo Diravana. (Salamo 25:8; Isaia 63:7) Iesu ena kara be namo herea danu. To, Iesu ia ura lasi taunimanima ese ena ladana idia gwauraia “hadibaia tauna namona.” (Mareko 10:17, 18) Badina ia diba, Iehova sibona be kara namo Diravana.
18 Ita be goevadae lasi taudia dainai, kara namodia ita karaia be ia auka. (Roma 5:12) To, bema Dirava ita noia ita dekenai kara namodia ia hadibaia totona, vadaeni ita be kara namodia ita karaia diba. (Salamo 119:66, NW ) Paulo ese Roma dekenai idia noho tadikaka ia hagoadaia: “Lauegu turana Keristani taudia e, lau diba umui ese kara namona umui karaia noho, bona kara maorona dalana umui diba momokani.” (Roma 15:14) Elda tauna ese “kara namodia do ia ura henia” be namo. (Tito 1:7, 8) Dirava ena lauma helaga ese eda mauri dalana ia hakaua neganai, taunimanima do idia diba ita be kara namo taudia, bona Iehova be eda kara namodia ia laloatao dainai ita do ia hanamoa.—Nehemia 5:19; 13:31, NW.
“Abidadama Korikori”
19. Heberu 11:1 ese abidadama ena anina be edena bamona ia herevalaia?
19 Abidadama—lauma helaga ena huahua ma ta—ena anina be “ita daradara lasi, to ita diba momokani, Dirava ena davana namona ita naria kava lasi. Matana dekenai ita itaia lasi, to iseda lalona ia diba momokani, inai gauna do ita abia.” (Heberu 11:1) Bema Dirava ita abidadama henia, anina be ita abia dae Iehova ia gwauhamatalaia gaudia ibounai be do ia karaia. Hegeregere, tanobada bona guba ai idia noho gaudia ese idia hamomokania, Havaraia Tauna ta ia noho. Ena be unai gaudia ita itaia lasi, to ita diba momokani do idia vara—unai be abidadama karana. Bema lauma helaga ese eda mauri dalana ia hakaua, unai bamona abidadama do ita hahedinaraia.
20. “Ita idia guia noho kara dikadia” ta be dahaka? Edena dala ai abidadama lasi karana bona tauanina ena ura dikadia ita dadaraia diba?
20 Abidadama lasi karana be “ita idia guia noho kara dikadia” ta. (Heberu 12:1) Unai dainai, Dirava ena lauma helaga ita abia be namo, unai amo tauanina ena ura dikadia, kohu laloa bada karana, bona hahediba koikoidia be eda abidadama idia hadikaia lasi. (Kolose 2:8; 1 Timoteo 6:9, 10; 2 Timoteo 4:3-5) Dirava ena lauma helaga ese aposetolo edia negai idia noho Keristani taudia bona ma haida dekenai abidadama ia havaraia hegeregerena, hari inai negai idia noho Iehova ena Witnes taudia dekenai danu be unai bamona. (Heberu 11:2-40) Bona iseda “abidadama korikori” ese ma haida edia abidadama do ia hagoadaia.—1 Timoteo 1:5; Heberu 13:7.
Manau Bona Boga Auka
21, 22. Manau ena anina be dahaka? Dahaka dainai manau kara ita hahedinaraia be namo?
21 Manau anina be manada bona dagedage lasi. Dirava be ia manau bona dagedage lasi. Unai ita diba, badina Iesu be Iehova ena kara ia hahedinaraia goevagoeva. (Mataio 11:28-30; Ioane 1:18; 5:19) To, Dirava ena hesiai taudia ese dahaka idia karaia be namo?
22 Namona be Keristani taudia “idia manau. Nega ibounai taunimanima ibounai dekenai manada kara do idia karaia.” (Tito 3:2) Haroro gaukara ita karaia neganai, manau karana ita hahedinaraia. Baibel ese elda taudia ia hadibaia, “mai manau danu” kerere taudia idia sisiba henia totona. (Galatia 6:1) Ita ibounai be ‘nega ibounai do ita manau, do ita manada’ neganai, lalotamona bona maino ita havaraia diba. (Efeso 4:1-3) Bema Dirava ena lauma helaga ese eda mauri dalana ia hakaua bona ita boga auka, vadaeni ita be manau karana ita hahedinaraia diba.
23, 24. Boga auka ena anina be dahaka? Boga auka ese edena bamona ita ia durua diba?
23 Boga auka ena anina be iseda lalohadai, hereva, bona kara ita biagua namonamo. Babulonia ese Ierusalema ia hadikaia neganai, Iehova be ia “boga auka.” (Isaia 42:14, NW ) Iesu be haheitalai namona ita dekenai, badina hisihisi negana lalonai ia boga auka. Bona aposetolo Petero ese Keristani taudia ia sisiba henia, ia gwau: “Ma diba sibona lasi, to umui ese emui tauanina edia ura do umui biagua namonamo [“umui boga auka,” NW ].”—1 Petero 2:21-23; 2 Petero 1:5-8.
24 Baibel ese elda taudia ia hadibaia idia boga auka totona. (Tito 1:7, 8) Oibe, lauma helaga ese edia mauri dala ia hakaua taudia ibounai idia boga auka be namo, unai amo idia ese matabodaga, hereva mirodia, o Iehova ese ia inai henia karadia ma haida idia dadaraia diba. Bema lauma helaga ese iseda mauri dalana ia hakaua dainai ita boga auka, ma haida be unai do idia itaia badina iseda hereva bona kara be idia namo.
Lauma Helaga ese Iseda Mauri Dalana Ia Hakaua Noho be Namo
25, 26. Lauma helaga ese eda mauri dalana ia hakaua neganai, iseda hebamo karana be edena bamona ela bona hanaihanai?
25 Lauma helaga ese iseda mauri dalana ia hakaua neganai, ita be Basileia ena sivarai namona do ita harorolaia goadagoada. (Kara 18:24-26) Taunimanima idauidau bona Dirava idia badinaia taudia be iseda hebamo do idia moalelaia. Lauma helaga ese ita ia hakaua dainai, iseda hereva bona kara amo tadikaka taihu do ita hagoadaia. (Filipi 2:1-4) Keristani taudia ibounai idia ura unai bamona idia karaia, a?
26 Inai tanobada taudia be Satani ese ia gunalaia dainai, Iehova ena lauma helaga ena hakaua dalana ita badinaia be mai ena hekwarahi. (1 Ioane 5:19) To, taunimanima milioni momo be Iehova ena lauma helaga ese edia mauri dalana ia hakaua noho. Bema Iehova ita abidadama henia eda kudouna ibounai ida, vadaeni hari ita be mauri namona do ita moalelaia sibona lasi, to lauma helaga ia henia Diravana ena dala namona ai do ita raka hanaihanai.—Salamo 128:1; Aonega Herevadia 3:5, 6.
Emu Haere be Dahaka?
• Lauma helaga ese eda mauri dalana ia hakaua dainai, edena bamona ita be Dirava bona Iesu ita tura henidia noho diba?
• Lauma helaga ena huahua be dahaka dahaka?
• Lauma helaga ena huahua ita hahedinaraia diba daladia haida be dahaka?
• Lauma helaga ese eda mauri dalana ia hakaua neganai, iseda hebamo karana be edena bamona ela bona hanaihanai?
[Picture on page 9]
Iehova ena lauma helaga ese ita ia durua eda tadikaka taihu ita lalokau henia totona
[Picture on page 10]
Iseda kara bona hereva amo hebogahisi ita hahedinaraia diba