Iesu Ena Manau Bona Hebogahisi Karana Tohotohoa

1. Edena dala ai Iesu ita tohotohoa neganai, Dirava kahirakahira ita lao diba?

NEGA momo ita ura edia kara be namo taudia ita tohotohoa. Tanobada taudia ibounai amo, Iesu Keriso sibona ita tohotohoa be namo. Dahaka dainai? Iesu ia gwau: “Lau ia itaia tauna be Tamana danu ia itaia vadaeni.” (Ioa. 14:9) Iesu ese Tamana ena kara ia tohotohoa goevagoeva dainai, ia idia dibaia taudia be ena Tamana idia dibaia bamona. Unai dainai Iesu ita tohotohoa neganai, Iehova, iunives ibounai lalonai Dirava hereadaena kahirakahira ita lao. Unai be hahenamo badana!

2, 3. (a) Dahaka dainai Iehova ese ena Natuna ena sivarai be Baibel ai ia atoa, bona Iehova ia ura dahaka ita karaia? (b) Inai stadi bona stadi gabena ai dahaka do ita herevalaia?

² To, edena dala ai Iesu do ita dibaia? Ita moale badina Baibel ai Iesu ena sivarai ita davaria diba. Iehova ese unai sivarai be Keristani Grik Toretoredia ai ia atoa, badina ia ura Iena Natuna ita dibaia bona tohotohoa. (1 Petero 2:21 duahia.) Baibel ai, Iesu ena haheitalai be “aena gabudia” bamona ia herevalaia. Anina be Iehova ese ita ia hadibaia Iesu ena murinai ita raka bona ena aena gabudia ita badinaia. Oibe, Iesu be haheitalai goevadaena ia hahedinaraia, bona Iehova ia diba Iesu ita tohotohoa goevagoeva diba lasi badina ita be goevadae lasi taudia. To, Dirava ia ura ita gaukara goada Iena Natuna ita tohotohoa totona.

³ Mani Iesu ena kara namodia haida ita laloa. Inai stadi ai ita ese Iesu ena manau bona hebogahisi karana do ita herevalaia, bona stadi gabena ai iena gari lasi bona laloa kehoa karana do ita herevalaia. Unai kara ta ta ita herevalaia neganai, inai henanadai toi do ita haerelaia: Unai kara ena anina be dahaka? Edena dala ai Iesu ese unai kara ia hahedinaraia? Edena dala ai Iesu ita tohotohoa diba?

IESU BE MANAU TAUNA

4. Manau karana ena anina be dahaka?

⁴ Manau ena anina be dahaka? Inai hekokoroku tanobadana ai, reana haida idia laloa manau be manoka o gari karana. To ena anina korikori be, goada bona gari lasi karana. Manau tauna be ia hekokoroku lasi. Manau karana be iseda laloa dalana amo ia matamaia. Baibel diksenari ta ia gwau: “Manau tauna be do ia laloa Dirava ese ia ia hereaia.” Bema ita be Dirava vairanai ita manau momokani, do ita gwau lasi ita ese eda tadikaka taihu ita hereaia. (Roma 12:3) Goevadae lasi taudia ese manau karana idia hahedinaraia be mai ena hekwarahi. To, manau karana ita hahedinaraia diba, bema Dirava vairanai eda kara ita laloa bona ena Natuna ena aena gabudia ai ita raka.

5, 6. (a) Aneru Badana Mikaela be daika? (b)  Edena dala ai Mikaela ese manau karana ia hahedinaraia?

⁵ Edena dala ai Iesu ese manau karana ia hahedinaraia? Guna Dirava ena Natuna be guba ai siahu bada aneruna ta bamona ia noho bona tanobada ai goevadae tauna bamona ia noho neganai, manau karana ia hahedinaraia. Mani haheitalai haida ita laloa.

⁶ Iena laloa dalana. Iesu be tanobada ia do mai lasi neganai ia vara gauna be Baibel torea tauna Iuda ese ia herevalaia. (Iuda 9 duahia.) Aneru badana Mikaela, Iesu unai, be “Diabolo ida Mose ena tauanina dainai idia hepapahuahu.” To laloatao, Mose ia mase murinai Iehova ese Mose ena tauanina be ta ese ia davaria diba lasi gabuna ta dekenai ia guria. (Deu. 34:5, 6) Reana Diabolo ia ura Mose ena tauanina ia gaukaralaia tomadiho koikoi ia habadaia totona. Ena be Diabolo be lalohadai dikadia ia abia, to Mikaela ese mai gari lasi ida ia koua. Buka ta ia gwau, Greek gado idia hahanaia herevana “hepapahuahu” ena anina ma ta be “tau ta ese ena maoro dainai ia hepapahuahu,” bona ia hahedinaraia “Mikaela ese Diabolo ia koua Mose ena tauanina ia abia lasi totona.” To, Aneru Badana ia diba ia be maoro lasi hahemaoro ia karaia totona. Unai dainai, ia hahedinaraia Hahemaoro Tauna Badana, Iehova ese hahemaoro do ia karaia. Ena be Mikaela ia badu, to ia ese ena siahu ia gaukaralaia kerere lasi. Unai be manau karana!

7. Edena dala ai Iesu ese ena hereva bona kara amo manau karana ia hahedinaraia?

⁷ Iesu be tanobada ai haroro gaukara ia karaia neganai, iena hereva bona kara amo manau karana ia hahedinaraia. Iena hereva. Ia ura lasi ma haida ese ia do idia laloa bada, to ia ese ena Tamana ia hanamoa. (Mar. 10:17, 18; Ioa. 7:16) Iesu be iena hahediba taudia dekenai ia gwau lasi idia be anina lasi taudia. To, idia ia matauraia, edia kara namo dainai idia ia hanamoa, bona idia ia abidadama henia. (Luka 22:31, 32; Ioa. 1:47) Iena kara. Iesu be kohu momo lasi maurina ia noholaia. (Mat. 8:20) Ia karaia karadia be momo ese idia laloa bada lasi karadia. (Ioa. 13:3-15) Dirava ia kamonai henia amo manau karana ia hahedinaraia. (Filipi 2:5-8 duahia.) Hekokoroku taudia be ma haida idia kamonai henia lasi. To, Iesu be unai bamona lasi, badina ia be mai manau ida Dirava ena ura ia badinaia, bona “kamonai karana ia hahedinaraia ela bona mase.” Unai ese ia hahedinaraia Iesu, taunimanima ena Natuna, be “lalo-manau tauna.”—Mat. 11:29; BHḡ.

IESU ENA MANAU KARANA TOHOTOHOA

8, 9. Edena dala ai manau karana do ita hahedinaraia?

⁸ Edena dala ai Iesu ena manau karana ita tohotohoa diba? Iseda laloa dalana. Manau karana ese ita ia durua ita diba iseda maoro be mai ena hetoana. Bema ita laloparara ita be maoro lasi ma haida ita hahemaoro henia totona, idia edia kara do ita gwauraia kerere haraga lasi. (Luka 6:37; Iam. 4:12) Manau karana ese ita ia durua ita “kara maoromaoro auka herea lasi,” bona edia diba be bada lasi o hahenamo momo idia abia lasi taudia ita laloa bada totona. (Had. 7:16) Mai edia manau elda taudia idia gwau lasi idia ese edia tadikaka idia hereaia. To unai mamoe naria taudia ese edia kara amo idia hahedinaraia idia be ladana maragi taudia, bona ma haida ese “idia hereaia.”—Fili. 2:3; Luka 9:48.

⁹ Mani tadikaka W. J. Thorn ita laloa. Lagani 1894 ai ia be pilgrim o sekit naria tauna ena gaukara ia karaia. Lagani momo unai gaukara ia karaia murinai, ia idia boiria Kingdom Farm, dekenai kokoroku naria gabuna ai do ia gaukara, unai be New York ai. Ia gwau: “Nega haida lau sibona lau laloa momo neganai, lau sibona gabu ta dekenai lau gini siri bona sibona lau hereva henia bona lau gwau: ‘Oi be kahu maragina ta sibona. Dahaka dainai oi hekokoroku?’” (Isaia 40:12-15 duahia.) Unai be manau karana momokani!

10. Edena dala ai iseda hereva bona kara amo manau karana ita hahedinaraia?

¹⁰ Iseda hereva. Bema ita manau momokani, iseda hereva amo unai do ia hedinarai danu. (Luka 6:45) Ma haida ita hereva henia neganai, ita sibona eda namo do ita laloa lasi. (Aon. 27:2) To, iseda tadikaka taihu edia kara namo do ita laloa bada, bona idia do ita hanamoa badina gaukara namodia idia karaia bona hagugurua diba. (Aon. 15:23) Iseda kara. Inai tanobada dikana lalonai idia manau Keristani taudia be ladana bada abia karana idia tahua lasi. Ena be kohu momo lasi maurina idia noholaia bona momo ese idia laloa bada lasi gaukaradia idia karaia, to unai idia karaia badina idia ura nega bada idia atoa Iehova idia hesiai henia totona. (1 Tim. 6:6, 8) To, manau karana ita hahedinaraia totona, kamonai karana be mai anina bada. Namona be ita lalomanau, unai amo kongrigeisen ai ‘ita idia hakaua taudia do ita kamonai henia’ bona Iehova ena orea amo ia mai hakaua herevadia do ita abia dae bona badinaia.—Heb. 13:17.

IESU BE HEBOGAHISI TAUNA

11. Hebogahisi ena anina be dahaka?

¹¹ Hebogahisi ena anina be dahaka? Inai hereva “hebogahisi” anina be “haida edia hemami laloa bada karana.” Hebogahisi be lalokau karana ta. Baibel ia gwau Iehova bona Iesu be hebogahisi bona lalokau idia hahedinaraia. (Luka 1:78; 2 Kor. 1:3; Fili. 1:8) Baibel ia herevalaia bukana ta ia gwau: “Hebogahisi be ma haida edia hemami ita laloa bada karana sibona lasi, to gau haida ita karaia idia ita durua totona, unai ese edia mauri ia hanamoa.” Unai dainai hebogahisi karana ese ita ia hagoadaia ma haida ita durua, unai amo edia mauri ita haidaua.

12. Dahaka ese ia hahedinaraia Iesu be ma haida ia hebogahisi henia, bona hebogahisi karana ese ia ia doria dahaka ia karaia totona?

¹² Edena dala ai Iesu ese hebogahisi karana ia hahedinaraia? Iena hebogahisi bona kara. Iesu be ma haida ia hebogahisi henidia. Ia itaia ena turana Maria bona ma haida be Lasaro ia mase dainai idia taitai neganai, “Iesu ena mata ranu ia diho.” (Ioane 11:32-35 duahia.) Bena, Iesu ia hebogahisi dainai Lasaro ia hatorea isi lou—vabu ta ena natuna dekenai ia karaia bamona. (Luka 7:11-15; Ioa. 11:38-44) Iesu ena hebogahisi karana dainai, dala ia kehoa Lasaro ese guba helarona ia abia totona. Nega ta Iesu be ia dekenai idia lao hutuma bada taudia ia “hebogahisi henia.” Unai dainai, idia dekenai “gau momo ia hadibaia matamaia.” (Mar. 6:34) Momokani, iena hadibaia herevadia idia badinaia taudia be edia mauri ia hanamoa! Laloatao, Iesu ena hebogahisi karana ese ia ia doria ma haida edia hemami ia laloa bada sibona lasi, to kara ta ia karaia idia ia durua totona.—Mat. 15:32-38; 20:29-34; Mar. 1:40-42.

13. Edena dala ai Iesu be mai hebogahisi ida taunimanima ia hereva henidia? (Laulau ginigunana itaia.)

¹³ Iena hebogahisi herevadia. Iesu ena manau karana ese ia ia doria mai hebogahisi ida lalomanoka taudia ia hereva henidia totona. Mataio ese ia hahedinaraia, Isaia ena hereva be Iesu dekenai ia guguru, ia gwau: “Siriho manokana do ia makohia lasi, bona lamepa ena diari ia maragi neganai, ia ese do ia habodoa lasi.” (Isa. 42:3; Mat. 12:20) Oibe, manoka taudia haida be siriho manokana o lamepa ena diari ia maragi bamona, to Iesu ena hereva dalana ese idia ia hagoadaia. Ia harorolaia sivaraina ese “kudouna idia makohia taudia” dekenai helaro ia henia. (Isa. 61:1) Ia ese “tauanina manokamanoka bona gaukara metau taudia” ia hamaoroa ia dekenai do idia lao, unai amo “do idia laga-ani” diba. (Mat. 11:28-30) Iena murinai idia raka taudia ia hadibadia Dirava be Ia idia tomadiho henia taudia ta ta, “ladana maragi” taudia o taunimanima ese idia laloa bada lasi taudia danu, ia hebogahisi henidia.—Mat. 18:12-14; Luka 12:6, 7.

IESU ENA HEBOGAHISI KARANA TOHOTOHOA

14. Edena dala ai ma haida dekenai hebogahisi ita hahedinaraia?

¹⁴ Edena dala ai Iesu ena hebogahisi karana ita tohotohoa diba? Iseda hebogahisi mamina. Unai bamona hemami be ia vara kava lasi, to Baibel ese ita ia hagania do ita hahedinaraia totona. Namona be Keristani taudia ibounai ese “hebogahisi mai lalokauna” be dabua bamona do idia hahedokilaia. (Kolose 3:9, 10, 12 duahia.) Edena dala ai ma haida dekenai hebogahisi mai lalokauna ita hahedinaraia diba? Baibel ia gwau, iseda lalokau do ita habadaia be namo. (2 Kor. 6:11-13) Bema ta be ena lalohekwarahi gauna ia herevalaia, namona be ita kamonai namonamo. (Iam. 1:19) Mani sibona oi nanadaia: ‘Bema unai be lau, egu hemami be edena bamona? Dahaka do lau abia be namo?’—1 Pet. 3:8.

15. Edena dala ai idia taitai o hisihisi taudia ita durua diba?

¹⁵ Iseda hebogahisi karana. Hebogahisi karana ese ita ia doria, siriho manokana o lamepa ena diari ia maragi bamona taudia ita durua totona. Edena bamona idia ita durua diba? Roma 12:15 ia gwau: “Idia taitai taudia ida umui taitai.” Lalometau taudia be do idia ura idia dekenai hebogahisi karana ita hahedinaraia. Taihu ta be ena natuna kekeni ia mase neganai, tadikaka taihu ese ia idia hagoadaia dainai ia moale. Taihu ia gwau: “Lau moale badina egu turadia idia mai bona lau ida ai taitai hebou.” Hebogahisi mai lalokauna ita hahedinaraia dalana ta be, ma haida ita kara namo henidia. Vabu ta ena ruma oi hanamoa diba, a? Emu motuka amo tadikaka o taihu burukana ta be hebou, haroro, o hospital dekenai oi abia lao diba, a? Ta dekenai kara namo ta ita hahedinaraia neganai, unai ese ena mauri ia durua diba. (1 Ioa. 3:17, 18) Gau badana be, ma haida dekenai hebogahisi ita hahedinaraia totona, haroro gaukara ita karaia. Unai dala sibona amo kudou-maoro taudia edia mauri ita durua diba!

16. Lalometau taudia dekenai dahaka hagoadaia herevadia ita gwauraia diba?

¹⁶ Iseda hebogahisi herevadia. Hebogahisi mai lalokauna ese ita ia doria, “lalometau taudia do [ita] hagoadaia.” (1 Tes. 5:14) Dahaka hagoadaia hereva ita gwauraia diba? Idia hagoadaia totona, ita hamaoroa diba idia ita laloa bada. Idia ita hanamodia bona ita durudia unai amo idia diba idia be mai edia kara namo bona gau momo idia karaia diba. Idia ita hadibaia Iehova ese idia ia veria mai iena Natuna dekenai, unai dainai Iehova ena matanai idia be mai anina bada. (Ioa. 6:44) Idia ita hadibaia Iehova be “lalohisihisi taudia” o “edia lalona ia ore taudia” ia laloa bada. (Sal. 34:18) Iseda hebogahisi herevadia ese lalometau taudia idia hagoadaia diba.—Aon. 16:24.

17, 18. (a) Iehova ia ura elda taudia ese ena mamoe be edena bamona do idia kara henidia? (b) Stadi gabena ai dahaka do ita herevalaia?

¹⁷ Iehova ia ura elda taudia be mai hebogahisi ida Iena mamoe do idia naria. (Kara 20:28, 29) Namona be elda taudia idia laloatao, edia maduna be Iehova ena mamoe do idia naria, hadibaia bona hagoadaia. (Isa. 32:1, 2; 1 Pet. 5:2-4) Unai dainai, hebogahisi ia hahedinaraia elda tauna be ena mamoe do ia biagua lasi, taravatu idauidau do ia atoa lasi, bona do ia doria lasi idia karaia diba lasi gaudia idia karaia totona. To, ia ura idia ia hamoalea, bona ia diba edia lalokau Iehova dekenai ese edia lalona do ia veria, mai kudouna ibounai ida Iehova idia hesiai henia totona.—Mat. 22:37.

¹⁸ Iesu ena manau bona hebogahisi karana ita stadilaia dainai, unai ese ita ia hagoadaia Iesu ena aena gabudiai ita raka totona. Stadi gabena ai, Iesu ena kara namodia rua, unai be gari lasi bona laloa kehoa, do ita herevalaia.