Hebogahisi Herevana Ena Siahu
“Lalo-hekwarahi ese tau ta ia hametaua noho, to hebogahisi hereva ese ia hamoalea.”—Hereva Lada-isidia 12:25.
KERISTEN taudia danu ese hekwakwanai idia davaria diba. Nega haida idia lalo-hekwarahi badina idia be “metau dikadia momo do idia vara” negana lalonai idia noho dainai.—2 Timoteo 3:1.
Hekwakwanai dainai hisihisi oi davaria neganai, oiemu turana momokani ese hebogahisi herevana ta oi ia henia be hahenamo gauna! Baibel ia gwau: “Turana korikorina be nega ibounai lalokau ia hahedinaraia, bona ia be tadikaka ta, dika ia vara neganai, ita ia durua totona ia vara.” (Hereva Lada-isidia 17:17) Taunimanima idia diba mai ena abidadama tauna Iobu be unai bamona turana ta. Elifasa ese danu ia gwauraia inai bamona: “Emu hereva ese hekwakwanai tauna ia haginia lou.”—Iobu 4:4.
To, Iobu be hagoadaia hereva ia abia be namo neganai, Elifasa bona ena turadia be hebogahisi hereva ta idia henia lasi. Idia gwau Iobu be sibona ena kerere dainai dika ia davaria, idia gwau hehuni dalanai kerere ia karaia. (Iobu 4:8) The Interpreter’s Bible lalonai idia gwau: “Iobu be taunimanima amo hebogahisi hereva ia kamonai be namo. To taunimanima amo ia abidia herevadia be hereva ‘momokanidia’ bamona sibona, bona idia gwauraidia loulou tomadiho herevadia mai hairaidia haida, bona anina bada lasi taravatudia idia gwauraidia kava bamona.” Iobu be Elifasa bona ena turadia edia hereva ia kamonai neganai, ia lalohisihisi bada dainai ia boiboi, ia gwau: “Lau umui hahisihisia ela bona edena nega ai? Hereva momo amo lauegu lalona umui hadikaia bada ela bona edena nega ai?”—Iobu 19:2.
Namo lasi iseda hereva kava, hebogahisi lasi herevadia dainai Dirava ena hesiai tauna be mai lalohisihisi danu ia boiboi. (Deuteronomi 24:15 oi itaia.) Baibel ena aonega herevana ta ese inai sisiba ia henia, ia gwau: “Mase bona mauri be mala ena siahu lalonai idia noho; idia ura henia taudia ese huahua do idia ania.”—Hereva Lada-isidia 18:21.
Hereva be mai ena siahu dainai, namona be aposetolo Paulo ena kara ita tohotohoa. Makedonia dekenai ia noho neganai, “idia goada totona hereva momo taunimanima ia henia.”—Kara 20:2.