Iesu bona ena hahediba taudia be Ieriko idia rakatania murinai, Betania ai hanuaboi toi idia mahuta. Monday daba momokani ai, unai be Nisan 10, idia be Ierusalema dekenai idia lao. Iesu be ia hitolo dainai, fig auna ia itaia neganai, ia raka henia. Unai au be mai ena huahua, a?

Inai be March dokona, to fig audia be June ai huahua idia atoa. To au be ena raurau matamatadia ia atoa vadaeni. Unai dainai Iesu ia laloa, reana huahua haida ia atoa vadaeni. To huahua ta ia davaria lasi. Raurau matamatadia ia atoa bona toana be huahua haida idia noho. Bena Iesu ia gwau: “Tau ta be oi amo huahua ta do ia abia lasi hari amo ela bona hanaihanai.” (Mareko 11:14) Maoromaoro unai au ia kakoro matamaia, murina dinana ai Iesu ena hereva ena anina idia lalopararalaia.

Daudau lasi Iesu bona ena hahediba taudia be Ierusalema dekenai idia ginidae. Dina haida gunanai dubu helaga ia sekea. To hari, ia be dubu helaga ia sekea sibona lasi, to lagani toi gunanai, lagani 30 C.E. ena Pasova negana ai ia karaia karana ia karaia. (Ioane 2:14-16) Dubu helaga lalonai idia “hoihoi taudia ia lulua.” Danu, “moni idia senisia taudia edia pata bona pune manu idia hoihoilaia taudia edia helai gaudia ia hagirodia.” (Mareko 11:15) Kohu idia huaia bona dubu helaga lalonai idia raka hanai taudia ibounai ia koudia danu.

Dahaka dainai Iesu ese dubu helaga amo moni senisia taudia bona animal hoihoilaia taudia ia lulua? Ia gwau: “Toretore Helagadia ia gwau, ‘Egu ruma do idia gwauraia bese ibounai edia guriguri rumana,’ ani? To umui ese henaohenao taudia edia kohua ai umui halaoa.” (Mareko 11:17) Idia ia gwauraia henaohenao taudia, badina taunimanima ese boubou totona idia ura hoia animal edia davana idia habadaia. Iesu ia laloa edia kara be koikoi o henaohenao taudia bamona.

Momokani, dubu biagudia, taravatu hadibaia taudia, bona hanua ena tau badadia be Iesu ia karaia karana ena sivarai idia kamonai, bona dala ma haida idia tahua ia idia hamasea totona. To idia diba lasi edena dala ai Iesu do idia hamasea, badina hutuma idia ura iena hereva idia kamonai.

Iuda taudia sibona lasi, to Iuda tomadiho idia abia dae taudia danu be Pasova Aria totona idia mai. Edia huanai be Grik taudia danu, idia be unai aria ena tomadiho karana totona idia mai. Reana idia laloa Filipo be Grik ladana dainai, ia dekenai idia lao bona idia noia Iesu idia itaia totona. To Filipo ia daradara bema Iesu idia itaia be maoro eiava lasi, unai dainai Andrea ia nanadaia. Bena idia ruaosi ese Iesu idia nanadaia, ia be dubu helaga dekenai ia do noho.

Iesu ia diba dina haida murinai do ia mase, unai dainai ia ura lasi nega ia halusia kava taunimanima edia daradara ia hamaoromaoroa eiava ladana bada ia abia totona. Unai dainai parabole ta amo aposetolo rua ia haere henia, ia gwau: “Nega ia ginidae vadaeni taunimanima ena Natuna be hairai do ia abia. Umui lau hamaoroa momokani, bema witi ena uhe ta be tano dekenai ia moru bona ia mase lasi, uhe tamona sibona do ia noho, to bema ia mase, huahua momo do ia havaraia.”​—Ioane 12:23, 24.

Witi ena uhe tamona be taunimanima ese idia laloa maragi. To bema tano lalonai idia hadoa, bona ia “mase,” do ia tubu bona gabeai anina momo do ia havaraia. Unai hegeregerena, Iesu be tau goevadaena tamona. To, Dirava ia badinaia ela bona mase, unai amo ia hegeregerena ma haida durua totona edia mauri idia atoa diho taudia be mauri hanaihanai idia abia diba. Unai dainai Iesu ia gwau: “Iena mauri ia ura henia tauna ese ena mauri ia hadikaia, to inai tanobada dekenai ena mauri ia ura henia lasi tauna be ena mauri do ia gimaia, unai amo mauri hanaihanai do ia abia.”​—Ioane 12:25.

Iesu be sibona ia laloa lasi, badina ia gwau: “Bema ta be lau ia hesiai henia, namona be egu murinai ia raka, bona lau noho gabunai egu hesiai tauna danu do ia noho. Bema ta be lau ia hesiai henia, Tamana ese ia do ia hanamoa.” (Ioane 12:26) Unai be ahuna namona! Tamana ese ia hanamoa taudia be Keriso ida Basileia lalonai do idia noho.

Iesu ese do ia mamia hisihisina bona do idia hamasea dalana ia laloa dainai, ia gwau: “Hari lau lalohekwarahi bada, dahaka do lau gwau? Tamagu e, inai lalohekwarahi negana amo lau oi hamauria.” To Iesu ia ura Dirava ena ura ia hagugurua. Ma ia gwau: “To inai lalohekwarahi negana be do ia vara, badina unai dainai lau mai.” (Ioane 12:27) Iesu be Dirava ena ura ibounai dekenai ia lalotamona, bona ia sibona ena mase dalana dekenai danu.

Monday, Nisan 10 ai, Iesu be dubu helaga dekenai ena mase ia herevalaia, unai be kahirakahira do ia vara. Dirava ena ladana dekenai do ia vara gauna ia laloa dainai, Iesu ia gwau: “Tamagu e, emu ladana oi hanamoa.” Bena gado badana ta guba amo ia mai, ia gwau: “Unai ladana lau hanamoa vadaeni bona do lau hanamoa lou.”​—Ioane 12:27, 28.

Unuseni idia gini taudia idia daradara bada. Haida idia laloa guba ia boiboi. Ma haida idia gwau: “Aneru ta be ia dekenai ia hereva.” (Ioane 12:29) To idia ese Iehova ena gadona idia kamonai! Unai be nega ginigunana lasi Dirava ese Iesu ia hereva henia bona taunimanima idia kamonai.

Lagani toi mai kahana gunanai, Iesu ia bapatiso neganai, Ioane Bapatiso ia kamonai Dirava be Iesu dainai ia gwau: “Inai be egu Natuna, egu lalokau, ia lau lalonamo henia.” Gabeai, 32 C.E. ena Pasova Aria murinai, Iamesi, Ioane, bona Petero edia vairanai Iesu ena toana ia idau. Idia toi ese Dirava ena gadona idia kamonai, ia gwau: “Inai be egu Natuna, egu lalokau, ia lau lalonamo henia. Ia umui kamonai henia.” (Mataio 3:17; 17:5) To inai nega ihatoina ai, Dirava ia hereva neganai, ibounai idia kamonai!

Iesu ia gwau: “Inai gadona umui kamonai be lau totona lasi, to umui totona.” (Ioane 12:30) Unai ese ia hamomokania ia be Dirava ena Natuna korikorina, idia gwauhamatalaia Mesiana.

Iesu ena mauri dala amo taunimanima dekenai haheitalai ia hahedinaraia idia tohotohoa totona bona ia hamomokania Satani Diabolo, inai tanobada ena lohia, ia mase be namo. Iesu ia gwau: “Dirava ese inai tanobada ia hahemaoro henia noho, bona inai tanobada ena lohia be murimuri dekenai do ia negea.” Bena ia gwau: “Lau, bema lau be tanobada amo idia abia isi, taunimanima idauidau be lau dekenai do lau veria mai.” (Ioane 12:31, 32) Unai ese ia hahedinaraia Iesu ena mase amo momo be namo do idia davaria. Ia ese taunimanima be ia dekenai do ia veria mai, unai amo mauri hanaihanai idia abia diba.

Iesu ia gwau ia be do “idia abia isi” dainai, hutuma idia gwau: “Taravatu ia gwau Keriso be do ia noho hanaihanai. To edena bamona oi gwau taunimanima ena Natuna be do idia abia isi? Taunimanima ena Natuna be daika?” (Ioane 12:34) Ena be hamomokania gaudia be momo, bona Dirava ena gadona idia kamonai, to momo idia abia dae lasi Iesu be taunimanima ena Natuna korikorina, idia gwauhamatalaia Mesiana.

Guna ia karaia bamona, Iesu ese sibona ia gwauraia “diari.” (Ioane 8:12; 9:5) Ia ese hutuma ia hamaoroa, ia gwau: “Diari be nega sisina umui huanai do ia noho. Diari ia noho lalonai umui raka be namo, unai amo dibura ese umui do ia koua lasi . . . Diari ia noho neganai, diari umui abidadama henia, unai amo diari ena natudia ai do umui lao.” (Ioane 12:35, 36) Bena Iesu be idia ia rakatania, badina Nisan 10 be iena mase dinana lasi. Pasova Nisan 14 ai, ia be do idia “abia isi”—au dekenai do idia kokoa kau.​—Galatia 3:13.

Iesu ena hesiai gaukara ita laloa neganai, ia hedinarai goevagoeva Iuda taudia ese ia idia abidadama henia lasi neganai, unai ese peroveta herevana ia hagugurua. Isaia ia peroveta, taunimanima edia matana be do ia koua bona do idia laloparara lasi, unai amo do idia helalo-kerehai lasi bona namo do idia davaria lasi. (Isaia 6:10; Ioane 12:40) Oibe, Iuda taudia momo idia abia dae lasi Iesu be edia Hahemauri Tauna, bona mauri abia dalana.

Nikodemo, Iosepa Arimatea tauna, bona lohia taudia ma haida be Iesu “idia abidadama henia.” To mai abidadama ida do idia kara, eiava edia abidadama do idia hunia, badina dika sinagoga amo idia luludia eiava “taunimanima edia hanamoa idia ura henia bada”?​—Ioane 12:42, 43.

Iesu ese ia abidadama henia karana ena anina ia gwauraia: “Lau ia abidadama henia tauna be lau sibona ia abidadama henia lasi, to lau ia siaia tauna danu ia abidadama henia. Bona lau ia itaia tauna ese lau ia siaia tauna danu ia itaia.” Dirava ese Iesu ia hamaoroa do ia harorolaia hereva momokanina be mai anina bada, unai dainai Iesu ia gwau: “Lau ia dadaraia bona egu hereva ia abia dae lasi tauna be ta ese do ia hahemaoro henia. Lau gwauraia herevana ese dina gabediai ia do ia hahemaoro henia.”​—Ioane 12:44, 45, 48.

Bena dokonai Iesu ia gwau: “Lau be sibona egu ura dainai lau hereva lasi, to lau ia siaia Tamana ese lau ia hagania hegeregerena lau hereva bona hadibaia. Bona lau diba ena taravatu ese mauri hanaihanai do ia mailaia.” (Ioane 12:49, 50) Iesu ia diba kahirakahira ena rara be ia idia abidadama henia taudia totona do ia bubua, boubou gauna bamona.​—Roma 5:8, 9.