Adamu Bona Heva be Eden umana idia rakatania murinai, natudia momo idia havaraia. Edia natuna ginigunana Kaino be biru tauna, bona natuna iharuana Abela be mamoe naria tauna.

Dina ta ai, Kaino bona Abela be Iehova dekenai edia boubou gaudia idia henia. Boubou be dahaka? Ia be spesel harihari gauna ta. Iehova ese Abela ena harihari gauna ia moalelaia, to Kaino ena harihari gauna ia abia dae lasi. Unai dainai Kaino ia badu dikadika. Iehova ese Kaino ia hamaoroa, ia badu dainai kara dika do ia karaia diba. To Kaino ia kamonai lasi.

Gabeai, Kaino be Abela ia hamaoroa: ‘Mani uma gabu dekenai ita lao.’ Uma gabu ai sibodia idia noho neganai, Kaino ese ena tadina Abela ia botaia bona ia alaia mase. Iehova be dahaka do ia karaia? Iehova ese Kaino ia panisia totona ena famili amo gabu daudau dekenai ia siaia lao. Kaino be do ia giroa mai lou lasi.

Unai sivarai amo dahaka ita dibaia? Bema gau haida be ita laloa hegeregerena idia vara lasi, reana ita badu matamaia diba. Bema ita mamia ita badu, eiava haida ese unai idia itaia bona ita idia hadibaia, namona be badu ita koua haraga bona iseda hemami ita biagua.

Abela be Iehova ia lalokau henia bona kara maorona ia badinaia dainai, Iehova ese ia do ia laloatao hanaihanai. Dirava ese tanobada be Paradaiso ai ia halaoa neganai, Abela do ia hatorea isi lou.

Tanobada ai taunimanima idia momo herea. Idia momo be kara dika taudia. Guba ai aneru haida danu idia gwau-edeede. Guba ai edia noho gabuna idia rakatania bona tanobada dekenai idia diho mai. Dahaka dainai unai idia karaia? Unai amo taunimanima ai idia lao bona hahine do idia adavaia.

Aneru be idia adavaia hahine amo natudia idia havaraia. Unai natudia be goada bona dagedage taudia ai idia lao. Taunimanima idia hahisia. Iehova ia ura lasi unai do ia vara noho. Unai dainai ena lalona ia hadaia abata amo kara dika taudia do ia hadikaia ore.

To tau ta ena kara be idau. Ia be Iehova ia lalokau henia. Iena ladana be Noa. Ia be mai ena adavana bona natudia memero toi, Sema, Hamo, Iapeta, bona idia be mai edia adavadia. Iehova ese Noa ia hamaoroa bouti badana ta ia karaia totona, unai amo abata amo idia roho mauri diba. Unai bouti be maua badana ta bamona bona ranu latanai ia hure diba. Danu Iehova ese Noa ia hamaoroa animal momo do ia abia vareai bouti lalonai, unai amo do idia mauri.

Maoromaoro Noa be bouti ia karaia matamaia. Lagani 50 lalonai Noa bona ena famili ese bouti idia karaia. Iehova ese idia ia hadibaia hegeregerena bouti idia karaia. Unai nega ai, Noa ese taunimanima dekenai abata ena hadibaia hereva ia gwauraia. To iena hereva idia kamonai lasi.

Dokonai, bouti lalonai idia vareai negana ia ginidae. Dahaka do ia vara mani ita itaia.