Iehova Ia Havaraia Gaudia ese Iena Aonega Idia Hahedinaraia
“Dirava ese tanobada ia karaia negana ia mai bona harihari, taunimanima idia kamonai diba Dirava ena siahu be ia doko diba lasi.”—ROMA 1:20.
1. Hari inai negai, tanobada ena aonega idia abia taudia momo be dahaka idia karaia diba lasi?
TAUNIMANIMA idia laloa sikuli amo diba bada idia abia taudia be aonega taudia. To, ita gwau diba idia be aonega taudia, a? Lasi, badina unai aonega bada taudia be taunimanima idia durua diba lasi bona mauri ena anina korikori dekenai sisiba namona idia henia lasi. Tanobada ena aonega idia badinaia taudia be “hurehure ese ia doria lao doria mai bamona, bona hadibaia hereva ena lai ese ia odaia lao.”—Efe. 4:14, NW.
2, 3. (a) Dahaka dainai Iehova be “aonega Dirava tamona”? (b) Edena dala ai Dirava amo ia mai aonega be tanobada ena aonega amo ia idau?
2 Iehova Dirava amo ia mai aonega idia abia taudia be unai bamona lasi! Baibel ia gwau Iehova be “aonega Dirava tamona.” (Roma 16:27) Ia be guba bona tanobada ai idia noho gaudia ibounai edia vara dalana ia diba. Iehova ese guba bona tanobada idia biagua taravatudia ia atoa—bona taunimanima be unai taravatudia idia stadilaia bona gau haida idia karaia. Unai dainai Dirava be taunimanima ese idia karaia gaudia bona taunimanima edia aonega bada dekenai ia hoa lasi. “Inai tanobada ena aonega be kavakava, Dirava ena vairana dekenai.”—1 Kor. 3:19.
3 Baibel ia gwau Iehova be Iena hesiai taudia dekenai “aonega” ia henia. (Aon. 2:6) Dirava amo ia mai aonega be mai anina bada, taunimanima edia aonega ia hereaia. Badina Dirava ena aonega ese taunimanima dekenai diba maoromaoro bona laloparara ia henia. (Iamesi 3:17 duahia.) Aposetolo Paulo be Iehova ena aonega dekenai ia hoa. Ia gwau: “Dirava ena namo bona iena hariharibada be bada bona bada herea, ani? Iena aonega bona iena laloa dobu be edena bamona ita tahua diba? Iena dala be daika ese do ia davaria diba?” (Roma 11:33) Iehova be aonega bada Diravana dainai, ita diba momokani Iena taravatu ese ita do idia gimaia mauri ena dala maorona ai ita raka totona. Momokani, Iehova ia diba dahaka gaudia ese ita do idia hamoalea.—Aon. 3:5, 6.
Iesu—“Gaukara Karaia Tauna” Namona
4. Edena dala ta ai Iehova ena aonega ita itaia diba?
4 Iehova ese ia havaraia gaudia amo ena aonega bona ena kara badadia haida ita itaia diba. (Roma 1:20 duahia.) Iehova ese ia havaraia gaudia ibounai, maragidia bona badadia, ese Iena kara idia hahedinaraia. Guba gaudia eiava tanobada ai idia noho gaudia ita itaia neganai, idia hahedinaraia Dirava be aonega bada bona iseda lalokau Havaraia Tauna badana. Ia karaia gaudia ita stadilaia neganai, gau momo ita dibaia.—Sal. 19:1; Isa. 40:26.
5, 6. (a) Daika ese Iehova ia durua guba bona tanobada idia karaia totona? (b) Dahaka do ita herevalaia, bona dahaka dainai?
5 Iehova be sibona “guba bona tanobada ia karaia” lasi. (Gen. 1:1) Baibel ia gwau, Iehova ese guba bona tanobada ia do karaia lasi neganai, lauma tauna ta ia karaia guna, ia amo “gau ibounai” ia karaia. Ia be Dirava ena Natuna tamona sibona—“Dirava ia havaraia gaudia ibounai amo ia be ginigunana”—gabeai tanobada dekenai ia mai bona iena ladana be Iesu. (Kol. 1:15-17; NW ) Iehova bamona, Iesu be mai ena aonega. Aonega Herevadia karoa 8 ese Iesu be aonega bamona ia gwauraia. Danu unai karoa ese ia hahedinaraia Iesu be Dirava ena “gaukara karaia tauna.”—Aon. 8:12, 22-31.
6 Guba bona tanobada ai idia noho gaudia ese Iehova bona Iena gaukara karaia tauna Iesu edia aonega ia hahedinaraia. Bona ita dekenai gau namodia momo ia hadibaia. Aonega Herevadia 30:24-28 ai Dirava ese ia havaraia “aonega herea” animal foa ia herevalaia. Mani unai animal ta ta ita herevalaia.a
Dimairi Edia Gaukara Goadagoada Karana amo Diba Ita Abia
7, 8. Dimairi ena gaukara dalana dekenai dahaka oi laloa bada?
7 Baibel ese ia gwauraia “maragi momokani” gaudia edia tauanina bona edia gaukara dalana amo diba ita abia. Mani dimairi ena aonega bada ita laloa.—Aonega Herevadia 30:24, 25 duahia.
8 Tanobada ai dimairi momo herea be idia gaukara goadagoada. Tahua gaukara idia karaia taudia haida idia gwau, dimairi edia namba be nega 200,000 bamona taunimanima edia namba ia hanaia. Dimairi be mai edia orea ta ta, unai orea momo lalodiai, kwini dimairi, tatau dimairi, bona gaukara dimairi idia noho. Idia ta ta be mai edia gaukara ta ta bona idia gaukara hebou edia orea lalonai idia noho dimairi ibounai idia naria totona. South America ai au raurau ia utua dimairi be uma gaukara ia diba momo. Unai dimairi maragina be tano henunai ena aniani umana, fungus, ia karaia totona, au raurau ia abia diho, bona fungus haida be gabu gunana amo ia abia lao gabu matamata dekenai ia atoa. Unai amo fungus momo idia tubu diba. Tahua gaukara idia karaia taudia idia gwau unai uma gabu karaia dalana ia diba momo dimairi edia orea be bada, edia gaukara idia habadaia diba.b
9, 10. Edena dala ai dimairi edia gaukara goadagoada karana ita tohotohoa diba?
9 Dimairi ena gaukara dalana ese ita ia hadibaia, bema ita gaukara goadagoada huahua namodia do ita havaraia. Baibel ia gwau: “Lahedo taudia ese, dimairi edia kara bamona do idia karaia be namo. Dimairi be mai edia king lasi, mai edia lohia ta lasi, bona mai edia biaguna lasi. To medu lasi neganai edia aniani idia haboua, bona medu ena nega totona idia hegaegae noho.” (Aon. 6:6-8) Iehova bona Iena gaukara karaia tauna Iesu be gaukara goadagoada taudia. Iesu ia gwau: “Egu Tamana be ia gaukara noho ia mai bona hari, lau danu lau gaukara noho.”—Ioa. 5:17.
10 Ita be Dirava bona Keriso ita tohotohoa dainai, namona be ita gaukara goadagoada. Ena be kongrigeisen lalonai eda maduna be dahaka, to ita ibounai be ‘Lohiabada ena gaukara do ita karaia goadagoada.’ (1 Kor. 15:58) Unai dainai, Paulo ese Roma Keristani taudia dekenai ia henia sisiba ita badinaia be namo, ia gwau: “Gaukara goada. Gaukara lalonai do umui lahedo lasi. Lohiabada ena gaukara do umui karaia, mai emui lalona ibounai.” (Roma 12:11) Iehova ena ura karaia totona ita gaukara goada be mai anina bada, badina Baibel ia gwau: “Dirava ena kara be gagevagageva lasi, ia be maoromaoro momokani. Unai dainai ia ese emui kara namodia do ia laloaboio lasi. Umui ese Dirava umui lalokau henia.”—Heb. 6:10.
Iseda Hetura Karana Dirava ida Ita Gimaia
11. Mada ena kara haida oi herevalaia.
11 “Mada” maragina amo mai anina bada gauna ita dibaia danu. (Aonega Herevadia 30:26 duahia.) Iena toana be ataiai laulau dekenai, iena taiana be maragi bona ena aena be kwadogi. Unai animal maragina be nadi gabudiai ia noho. Iena matana be gabu daudau ia itaia diba dainai, dagedage animal amo ia hunia haraga, bona ia be hanaihanai matu badinai sibona ia loaloa. Unai mada be idia noho hebou, unai amo ta ta idia gimaia bona keru bada negana ai ta ta idia hasiahua diba.c
12, 13. Mada amo dahaka ita dibaia?
12 Mada amo dahaka ita dibaia? Gau ginigunana be, unai animal be nega ibounai ia naria namonamo dainai, dagedage animal be ia idia hadikaia diba lasi. Ia be matu badinai sibona ia loaloa bona daudau amo dagedage animal ia itaia bona ia hunia haraga diba. Unai hegeregerena, nega ibounai ita noga noho be gau badana, unai amo Satani ena tanobada ese ia havaraia dika ita itaia haraga bona ita dadaraia diba. Aposetolo Petero ese Keristani taudia ia sisiba henia: “Do umui laloa maoromaoro, bona naria namonamo. Umui dekenai ia tuari henia tauna, Satani, be laiona mai ena boiboi bada bamona. Ia ese hunia dekenai ia raka loaloa noho, do ia ania ore taudia ia tahua noho.” (1 Pet. 5:8) Iesu be tanobada ai ia noho neganai, ia naria namonamo, badina Satani ia ura ena Dirava badinaia karana ia hadikaia. (Mat. 4:1-11) Iesu be haheitalai namona ia hahedinaraia ia murinai idia raka taudia totona!
13 Ita naria namonamo dalana ta be, Iehova ese ita ia gimaia totona ia henia gaudia ita laloa bada. Baibel stadilaia karana bona Keristani heboudia lao henia karana ita rakatania lasi. (Luka 4:4; Heb. 10:24, 25) Danu, mada be gabu tamona ai idia noho hebou hegeregerena, iseda Keristani tadikaka taihu ida ita noho hebou be namo, unai amo edia abidadama ese ita ia hagoadaia diba. (Roma 1:12) Iehova ena gimaia karana henunai ita noho neganai, ita hahedinaraia Salamo torea tauna Davida ena hereva ita abia dae, ia gwau: “Lohiabada be egu Nadi Badana. Ia be egu magu, bona egu hamauria Tauna. Egu Dirava be egu kohoro, lau heau mauri gabuna.”—Sal. 18:2.
Dagedage Lalonai Ita Haheauka
14. Ena be kwadi tamona ese dika ia havaraia diba lasi, to kwadi momo herea ese dahaka idia karaia diba?
14 Kwadi amo diba ita abia danu. Kwadi tamona, ena lata be 5 sentimita, ese dika do ia havaraia lasi, to kwadi milioni momo ese dika bada idia havaraia diba. (Aonega Herevadia 30:27 duahia.) Kwadi be aniani bada herea idia ania diba dainai, kwadi milioni momo ese uma gabuna idia hadikaia ore diba. Baibel ese kwadi momo herea edia mai ena regena be kariota ena regena bona lahi ese rei kakoro ia gabua ena regena ida ia hahegeregerea. (Ioe. 2:3, 5) Kwadi milioni momo idia mai neganai, taunimanima be lahi idia karaia unai kwadi idia koua totona, to idia koua diba lasi. Dahaka dainai? Badina kwadi haida be lahi ese ia hamasea neganai, edia tauanina be lahi ia habodoa, bena unai amo kwadi ma haida be idia mauri noho diba. Ena be kwadi oreana be ta ese ia gunalaia lasi, to ami orea ta bamona idia gaukara hebou namonamo bona koua gaudia ibounai idia hanaia.d—Ioe. 2:25.
15, 16. Edena dala ai Basileia idia harorolaia taudia be kwadi momo herea bamona?
15 Peroveta tauna Ioela ese Iehova ena hesiai taudia edia gaukara be kwadi edia kara ida ia hahegeregerea. Ia gwau: “Tuari taudia bamona idia heau mai noho. Tuari taudia bamona magu idia daekau lao noho. Idia raka hebou maoromaoro, tuari taudia idia raka bamona. Idia edia dala dekena amo idia raka siri lasi. Idia raka hebou noho, to ta ese ma ta ena dala ia koua lasi. Idia be tuari magu ibounai idia makohia diho noho, bona gau ta ese edia raka ia hadokoa diba lasi.”—Ioe. 2:7, 8.
16 Unai peroveta herevana be hari inai negai Dirava ena Basileia idia harorolaia taudia dekenai ia momokani! “Magu” bamona dagedage karadia ta ese edia haroro gaukara ia koua diba lasi. Idia be Iesu idia tohotohoa, ena be taunimanima momo ese ia idia ura henia lasi, to ia be Dirava ena ura ia karaia noho. (Isa. 53:3) Momokani, Keristani taudia haida be edia abidadama dainai idia hamasedia. To, haroro gaukara be ia doko lasi, bona Basileia harorolaia taudia edia namba be ia bada ia lao noho. Danu, dagedage karadia ese nega momo dala ia kehoa ma haida be Basileia ena sivarai namona idia kamonai totona. (Kara 8:1, 4) Emu haroro gaukara ai, ena be haida ese oi idia gwauraia dika bona idia dagedage henia, to kwadi bamona haroro gaukara oi goadalaia noho, a?—Heb. 10:39.
‘Kara Namo Oi Dogoatao Momokani’
17. Dahaka dainai vaboha ena aena be haba dekenai ia kamokau namonamo diba?
17 Toana be vaboha maragina be graviti ena siahu ese ia veria diba lasi. (Aonega Herevadia 30:28 duahia.) Saiens taudia be unai animal maragina dekenai idia hoa, badina ia be haba dekenai ia kamokau diba bona ia moru lasi. Edena dala ai vaboha be unai bamona ia karaia diba? Vaboha ena aena dekenai glu ia noho lasi, to ena aena dekenai huina bamona gaudia idia noho. Ma unai huina bamona gaudia ai nila bamona gaudia tausen momo idia noho bona idia be maragi momokani dainai emu matana amo oi itaia diba lasi. Unai dainai ena be vaboha be galasi ta henunai ia kamokau, to unai huina bamona gaudia handred momo be ena tauanina ibounai idia dogoatao diba. Tahua gaukara idia karaia taudia be unai dekenai idia hoa, bona idia gwau vaboha ena aena ai idia noho gaudia idia gaukaralaia diba glu goadadia idia karaia totona.e
18. Edena dala ai nega ibounai ita hahedinaraia ‘kara namo ita dogoatao momokani’?
18 Vaboha amo dahaka ita diba? Baibel ese ita ia hagoadaia: “Dika do umui negea momokani, to namo do umui dogoatao momokani.” (Roma 12:9) Satani ena tanobada be kara dika amo ia honu dainai, Dirava ena hakaua herevadia ita rakatania diba. Hegeregere, sikuli o gaukara gabuna ai o moale kara dikadia lalonai Dirava ena taravatu idia badinaia lasi taudia ita bamoa neganai, iseda lalona do idia veria kara dika ita karaia totona. Namo lasi oi dekenai unai bamona ia vara! Baibel ia gwau: “Oi sibona do oi laloa lasi oi be mai emu aonega.” (Aon. 3:7) Idaunegai, Mose ese Dirava ena taunimanima dekenai ia henia aonega sisibana oi badinaia: “Lohiabada, emui Dirava, do umui gari henia. Iena hesiai gaukara do umui karaia, bona ia dekenai do umui badinaia.” (Deu. 10:20) Iehova ita badinaia neganai, ita be Iesu Keriso ita tohotohoa, badina Baibel ese Iesu be inai bamona ia gwauraia: “Oi ese kara maoromaoro oi ura henia, to kara dika be oi badu henia.”—Heb. 1:9.
Dirava Ia Havaraia Gaudia amo Diba Ita Abia
19. (a) Iehova ese ia havaraia gaudia amo, edena kara namodia ia hahedinaraia? (b) Edena dala ai Dirava amo ia mai aonega ese ita ia durua?
19 Ita itaia vadaeni, Iehova ese ia havaraia gaudia be ena kara namodia idia hahedinaraia, bona unai gaudia amo diba ita abia. Iehova ese ia havaraia gaudia ita tahua noho lalonai, Iena aonega bada dekenai do ita hoa. Hanaihanai Dirava ena aonega ita badinaia neganai, hari do ita moale bada bona vaira nega ai ita do ia gimaia. (Had. 7:12) Oibe, Aonega Herevadia 3:13, 18 ena hereva be ita dekenai do ia momokani, ia gwau: “Aonega ia davaria tauna be mai moale danu. Ia ese lalona kehoa ia davaria vadaeni. Aonega idia davaria taudia be idia moale, bona aonega ese mauri namona, idia dekenai do ia henia.”
[Footnotes]
a Matamata taudia be futnout ai idia noho referens idia duahia bona stadilaia diba, unai amo idia dibaia gaudia be kongrigeisen ena Gima Kohorona Stadi ai idia herevalaia diba.
b Au raurau ia utua dimairi ena kara ma haida oi diba totona, Awake! March 22, 1997, rau 31, bona Awake! May 22, 2002, rau 31 itaia.
c Mada ena kara ma haida oi diba totona, Insight on the Scriptures, Vol. 2 rau 816 itaia.
d Kwadi ena kara ma haida oi diba totona, Insight on the Scriptures, Vol. 2, rau 260-1, Gima Kohorona July 15, 1996 itaia.
e Vaboha dekenai diba ma haida oi abia totona, Awake! April 2008, rau 26 itaia.
Oi Laloatao, A?
Inai gauna amo dahaka ita dibaia . . .
• dimairi?
• mada?
• kwadi?
• vaboha?
[Picture on page 16]
Oi be au raurau ia utua dimairi bamona oi gaukara goadagoada, a?
[Pictures on page 17]
Mada be idia noho hebou dainai, ta ta idia gimaia. Oi danu be Iehova ena orea taudia ida oi noho hebou, a?
[Pictures on page 18]
Kwadi bamona, Keristani taudia be hisihisi idia davaria, to edia gaukara idia karaia goadagoada noho
[Picture on page 18]
Vaboha be haba dekenai ia kamokau momokani bamona, namona be Keristani taudia be namo idia dogoatao momokani
[Credit Line]
Stockbyte/Getty Images