Lalometau Taudia Hagoadaia, Iesu Ia Karaia Bamona

BETANIA ai ia noho tauna, Lasaro, be ia gorere bada. Iena taihudia, Mareta bona Maria, ese edia turana Iesu dekenai gwaukau taudia idia siaia. To unai gorere dainai Lasaro ia mase. Ia be guria gabunai ia noho lalonai, turadia bona dekena taudia ese Mareta bona Maria idia vadivadi henia, “edia lalona hagoadaia totona.” (Ioane 11:19) Iesu be Betania dekenai ia ginidae bona ia lao ena turadia ia itaia totona. Iesu ena hereva bona ena kara ita laloa karana amo do ita diba, edena bamona lalometau taudia do ita hagoadaia.

Eda Vadivadi Karana ese Ia Hahedinaraia Idia Ita Laloa Bada

Iesu be Betania dekenai ia lao totona, ia be dina rua lalonai do ia raka, Ioridane Sinavaina do ia hanaia bona Ieriko ena ororo dalana, mai ena kona momo dekenai do ia raka. Karaharaga Mareta be hanua murimuri dekenai ia lao, Iesu ia hedavari henia totona. Gabeai, Maria ia kamonai Iesu ia mai neganai, ia danu be ia lao haraga Iesu ia itaia totona. (Ioane 10:​40-42; 11:​6, 17-20, 28, 29) Momokani, Iesu ena vadivadi karana ese idia lalometau taihu rua ia hagoadaia.

Hari inai negai danu, lalometau taudia ita vadivadi henia karana ese idia ia hagoadaia. Scott bona Lydia edia natuna mero, Theo, mauri lagani 6, be motuka aksiden dekenai ia mase, idia gwau: “Goada ai abia totona, emai ruma bese bona turadia idia noho be namo. Idia be hanuaboi momokani hospital dekenai idia mai.” Unai turadia be dahaka idia gwau? “Unai nega dekenai ai hagoadaia herevana ta idia gwauraia lasi. To ai idia vadivadi henia karana ese ia hahedinaraia idia be ai idia laloa bada.”

Baibel ia gwau, Iesu be Lasaro dainai idia taitai taudia ia itaia neganai, “iena lalona ia hisihisi bada” bona “ena mata ranu ia diho.” (Ioane 11:​33-35, 38) Iesu ia hemarai lasi ma haida vairanai ia tai totona. Edia hisihisi bona edia hemami ia lalopararalaia. Unai amo dahaka ita dibaia? Idia lalometau taudia ita vadivadi henia neganai, namo lasi ita hemarai, to idia taitai taudia ida ita tai. (Roma 12:15) To danu, namo lasi ita ese ia lalometau tauna ita doria ia tai totona. Reana haida be idia ura sibona idia noho neganai, idia tai.

Edia Hereva Ita Kamonai Namonamo

Reana Iesu be Mareta bona Maria edia lalona hagoadaia herevadia ia laloa, to edia hereva ia kamonai guna. (Ioane 11:​20, 21, 32) Mareta ida ia herevahereva neganai, henanadai ta ia henia, bena ena haere ia kamonai.​—⁠Ioane 11:​25-27.

Bema ta ena hereva ita kamonai namonamo, unai ese ia hahedinaraia ita be ia ita laloa bada. Lalometau tauna ita hagoadaia totona, namona be iena hereva ita kamonai henia namonamo. Reana lalometau tauna dekenai henanadai haida ita henia diba bona bema ena lalohadai ia gwauraia hedinarai, ena hereva ita kamonai namonamo. To naria namonamo, namo lasi idia oi doria idia herevahereva totona. Reana idia be idia hesiku bada bona idia ura laga-ani.

Idia lalometau taudia be idia daradoko bona nega haida hereva tamona do idia gwauraia loulou. Haida be edia hemami do idia gwauraia hedinarai. Maria bona Mareta be Iesu dekenai idia gwau: “Lohiabada e, iniseni bema oi noho, be egu taihuna ia mase lasi.” (Ioane 11:​21, 32) Iesu be dahaka ia karaia? Edia hereva ia kamonai namonamo. Idia ia hamaoroa lasi edena bamona hemami idia abia be namo. Unai amo ita diba Iesu be idia lalometau taudia edia hemami ia lalopararalaia.

Bema oi daradara lalometau taudia dekenai dahaka do oi gwauraia, reana inai bamona oi hereva diba: “Oi ura ia vara gauna ita herevalaia?” Bena ena haere oi kamonai. Bona oi kamonai herevadia oi lalodia namonamo. Ia hereva tauna oi itaia bona iena hemami oi lalopararalaia toho.

Ia lalometau tauna ena hemami ita lalopararalaia be auka. Lydia ia gwau: “Emai ura gaudia be idia idau. Nega haida ai idia vadivadi henia taudia vairanai ai tai dikadika. Ai ura ma haida ese ai dekenai hagoadaia herevadia idia gwauraia. Aiemai turadia idia hekwarahi bada emai hemami idia lalopararalaia totona.”

Iesu be unai ia hahedinaraia namo herea. Ia diba ta ta be “sibona ena hisihisi bona ena lalohisihisi ia diba.” (2 Sivarai 6:​29, BHğ) Taihudia rua edia hereva hegeregerena Iesu ia haere. Mareta ia hereva noho dainai, Iesu be ia ida ia herevahereva. To Maria be ia taitai dainai, Iesu be ia ida nega daudau ia herevahereva lasi. (Ioane 11:​20-28, 32-35) Iena haheitalai amo dahaka ita dibaia? Namona be ia lalometau tauna ese hereva ia matamaia. Bema mai emu ura bada ida edia lalometau herevadia oi kamonai, unai ese edia lalona do ia hagoadaia bada.

Lalona Hagoadaia Herevadia

Maria bona Mareta be Iesu dekenai idia gwau: “Iniseni bema oi noho,” unai hereva dainai Iesu be ma ta dekenai kerere ia atoa lasi eiava ia lalohisihisi lasi. To Mareta ia hagoadaia, ia gwau: “Oiemu taihuna be do ia toreisi lou.” (Ioane 11:23) Unai hereva amo, Iesu ese ia durua vaira nega ia laloa totona, bona ia hadibaia helaro ia noho.

Lalometau taudia ita hereva henia neganai, namona be ita laloatao, mai kudou maoro ida ita gwauraia hereva maorodia ese idia ia hagoadaia diba, herevana ia be hereva kwadogina sibona. Idia dekenai hagoadaia herevadia ita gwauraia eiava torea diba. Ita torea revarevadia bona kadi idia duahidia lou diba, bona unai ese nega daudau lalonai idia do ia hagoadaia. Kath ena adavana, Bob, ia mase bona hua 9 idia hanaia murinai, ia ese ia abia kadi ibounai ia duahidia lou. Ia gwau: “Lau davaria unai kadi ese lau idia durua bada. Unai nega ai goada lau abia.”

Revareva ta ita torea neganai, dahaka hagoadaia hereva kwadogina ita torea diba? Ia mase tauna ena sivarai oi gwauraia diba​—⁠ia ida oi karaia gaudia eiava ena kara namodia oi herevalaia. Kath ia gwau: “Bob dainai idia torea hereva namodia ese lau idia hamoalea bona hataia danu. Ia dainai idia torea sivarai haida ese lau idia hakiria bona ia mauri neganai, ai karaia hebou gaudia ena moale lau laloa lou. Lau dekenai idia noho kadi momo lalonai Baibel ena siri namodia idia noho.”

Heduru Henia Daladia

Lasaro ena ruma bese durua totona, Iesu be ita karaia diba lasi gauna ta ia karaia. Lasaro be mase amo ia hatorea isi lou. (Ioane 11:​43, 44) Iseda goada hegeregerena idia ita durudia diba, hegeregere edia aniani ita hegaegaelaia, vadivadi taudia totona noho gabuna ita hegaegaelaia, edia dabua ita huria, maragidia ita naria, sitoa dekenai ita lao eiava iseda motuka ita gaukaralaia idia ita durua totona. Ita diba momokani, iseda lalokau karana be ia lalometau tauna ese do ia laloa bada momokani.

Namona be ita diba, idia lalometau taudia be nega haida idia ura sibodia idia noho. To, dala oi karaia diba idia oi hereva henia noho totona. Ia lalometau sina ta ia gwau: “Lalohisihisi negana be hetoana lasi, bona oi diba lasi edena negai emu lalona do ia namo.” Haida be ia lalometau tauna ena headava laganina eiava ia mase vadaeni tauna ena mase dinana ai ia idia laloatao. Unai bamona negadiai idia ida oi noho neganai, nega aukadia ai oi be iena bamona namona ai oi lao diba.​—⁠Aonega Herevadia 17:⁠17.

Iesu ena hagoadaia herevana amo ena hahediba taudia dekenai helaro namona ia hadibaia, ia gwau: “Iseda turana Lasaro be ia mahuta noho, to lau lao, do lau hanogaia.” (Ioane 11:11) Iesu ese ena murinai idia raka taudia ia hadibaia mase taudia be do idia toreisi lou. Mareta ia nanadaia: “Inai hereva oi abia dae, a?” Ia haere: “Lohiabada e, oibe.”​—⁠Ioane 11:​24-27.

Oi abia dae Iesu be mase taudia do ia hatorea isi lou, a? Bema oibe, inai helaro hereadaena be ia lalometau tauna ida oi herevalaia. Dala idauidau ai idia oi durua. Oiemu hereva bona kara ese idia do ia hagoadaia bada.​—⁠1 Ioane 3:⁠18.

[Map on page 25]

SAMARIA

PEREA

Ieriko

Ierusalema

Betania

Ioridane

Sinavaina

Mase Davarana