Oi Abia Dae Iehova Ena Dala be Maoro, A?

1-2. (a) Dahaka dainai momo dekenai ia auka siahu taudia idia abidadama henia totona? (b) Inai atikol ai dahaka do ita herevalaia?

HARI inai negai, momo ese siahu taudia bona idia ida idia gaukara hebou taudia idia abidadama henia be auka, badina nega momo kohu momo bona dagi bada taudia sibona idia laloa bada, to ogogami taudia dekenai heduru maorona idia henia lasi. Baibel ia gwau: “Taunimanima ese ta ta idia biagua bona idia hahisia.” (Had. 8:9) Danu, tomadiho gunalaia taudia haida edia kara be maoro lasi, bona unai ese haida dekenai Dirava abidadama henia karana ia koua. Unai dainai ta ita stadi henia neganai, ia ita durua Iehova bona ena orea idia hakaua taudia dekenai ena abidadama ia hagoadaia totona.

² Oibe, ita stadi henia taudia ese Iehova bona ena orea idia abidadama henia be namo. Danu ena be Iehova ena orea lalonai lagani momo ita noho, to namona be ita laloatao hanaihanai Iehova ena dala be maoro. Nega haida, idia vara gaudia ese Iehova dekenai iseda abidadama ia tohoa diba. Inai atikol ai, iseda abidadama ia tohoa diba gaudia toi do ita herevalaia: (1) Baibel ena sivarai haida ita duahia neganai, (2) Iehova ena orea amo hakaua daladia ita abia neganai, bona (3) vaira nega ai hahetoho idia vara neganai.

BAIBEL OI DUAHIA NEGANAI IEHOVA DEKENAI OI ABIDADAMA

3. Baibel ena sivarai haida ita duahia neganai, edena dala ai Iehova abidadama henia karana ia tohoa?

³ Baibel ita duahia neganai, reana Iehova ese haida ia kara henia dalana bona ia karaia disisen dekenai do ita daradara diba. Hegeregere, Numera bukana ai, Israela tauna ta be Sabati dinana ai lahi au ia gogoa dainai Iehova ese ia hamasea. Bona lagani momo murinai, Samuel Iharuana ai Iehova ese King Davida ena dika ia gwauatao, ena be ia heudahanai bona ta ia alaia. (Num. 15:32, 35; 2 Sam. 12:9, 13) Reana do ita laloa, ‘Dahaka dainai Iehova ese Davida ena dika ia gwauatao, to kara dika badana ia karaia lasi tauna ia hamasea?’ Unai henanadai ita haerelaia totona, Baibel ita duahia neganai inai gaudia toi ita laloatao be namo.

4. Edena dala ai Genese 18:20, 21 bona Deuteronomi 10:17 ese Iehova dekenai iseda abidadama ia hagoadaia?

⁴ Baibel be sivarai ibounai ia herevalaia lasi. Hegeregere, ita diba Davida be mai kudouna ibounai ida ia helalo-kerehai. (Sal. 51:2-4) To Sabati taravatuna ia badinaia lasi tauna be edena bamona? Ia karaia karana dainai ia helalo-kerehai, a? Guna Iehova ena taravatu haida ia badinaia lasi, a? Matamanai hadibaia hereva haida ia dadaraia, a? Baibel ese unai ia herevalaia lasi. To, namona be inai ita diba: Iehova be “ia kara gageva lasi.” (Deu. 32:4) Ia be hamomokania gaudia amo disisen ia karaia, to ia kamonai gaudia, ta ena toana, eiava lalona veria gaudia dainai lasi. (Genese 18:20, 21; Deuteronomi 10:17 duahia.) Iehova bona ena taravatu ita dibaia noho neganai, ita abia dae momokani iena hahemaoro karadia be maoromaoro. Ena be hari Baibel ena sivarai haida ita duahia bona ita daradara noho, to namona be ita diba momokani iseda Dirava ena “kara ibounai be maoromaoro.”​—Sal. 145:17.

5. Edena dala ai ta ita laloa kerere? (Maua itaia: “Goevadae Lasi Dainai Gau Momo Ita Lalopararalaia Lasi.”)

⁵ Ita be goevadae lasi dainai, ta ita laloa kerere. Dirava ese ita ia karaia bona iena kara ita tohotohoa dainai, ita ura haida ese taunimanima idia kara namo henia be namo. (Gen. 1:26) To ita be goevadae lasi dainai, gau haida dekenai lalohadai kererena ita abia, ena be ita laloa hamomokania gaudia ibounai ita diba. Hegeregere, Iehova be Nineva taudia dekenai hebogahisi karana ia hahedinaraia neganai, Iona ia moale lasi. (Iona 3:10–4:1) To, ia vara gauna mani ita laloa. Nineva taudia 120,000 mai kahana be idia helalo-kerehai dainai idia mauri! Dokonai, Iona ena lalohadai ia hamaoromaoroa be namo, to Iehova lasi.

6. Dahaka dainai Iehova ese ia karaia disisen edia badina ia herevalaia be anina lasi?

⁶ Iehova ese ia karaia disisen edia badina be taunimanima dekenai ia herevalaia be anina lasi. Momokani, idaunegai Iehova be ia karaia vadaeni disisen eiava ia ura karaia disisen dekenai ena hesiai taudia edia lalohadai ia kamonai. (Gen. 18:25; Iona 4:2, 3) Bona nega haida, ia karaia disisen be idia dekenai ia gwauraia. (Iona 4:10, 11) To, Iehova ese ia karaia disisen edia badina be ita dekenai ia herevalaia be anina lasi. Ia be iseda Havaraia Tauna dainai, kara ta ia do karaia lasi eiava ia karaia murinai, ita amo gwaumaoro ia abia be anina lasi.​—Isa. 40:13, 14; 55:9.

HAKAUA DALADIA OI ABIA NEGANAI IEHOVA DEKENAI OI ABIDADAMA

7. Nega haida ia auka dahaka ita karaia totona, bona dahaka dainai?

⁷ Mai kudouna ibounai ida ita abia dae Iehova ena dala be hanaihanai idia maoro. To, Iehova ena orea idia gunalaia taudia ita abidadama henia be auka. Reana do ita laloa idia be Iehova ena hakaua dalana eiava sibona edia ura dalana idia badinaia. Reana Baibel negadiai idia noho taudia haida edia lalohadai be unai bamona. Paragraf 3 ai ita herevalaia haheitalai mani ita laloa. Sabati taravatuna ia badinaia lasi tauna ena varavara be reana idia laloa, Mose be Iehova ena lalohadai ia tahua guna bena gabeai ia gwau unai tauna do idia hamasea, a? Bona Davida ida ia heudahanai hahinena ena adavana Uria ena turana ta be reana ia laloa, Davida be ena king siahuna ia gaukaralaia panisi do ia abia lasi totona, a? Iehova be iena orea idia gunalaia taudia ia abidadama henia. Unai dainai, bema idia ita abidadama henia lasi, anina be Iehova ita abidadama henia lasi.

8. Kara 16:4, 5 hegeregerena, hari Hakaua Oreana be dahaka ia karaia danu?

⁸ Hari inai negai, Iehova ese “hesiai tauna mai ena kamonai bona mai ena aonega” amo ena tanobada oreana ia gunalaia. (Mat. 24:45) Keristani taudia ginigunadia edia negai hakaua oreana bamona, hari Hakaua Oreana ese tanobada hegegemadai Dirava ena taunimanima ia naria bona kongrigeisen ena elda taudia dekenai hakaua daladia ia henia. (Kara 16:4, 5 duahia.) Kongrigeisen ai elda taudia ese unai hakaua daladia idia badinaia be namo. Bema orea bona elda taudia amo idia mai hakaua daladia ita badinaia, ita abia dae Iehova ena dala be maoro.

9. Edena negai ia auka elda taudia ese idia karaia disisen ita badinaia totona, bona dahaka dainai?

⁹ Nega haida, elda taudia ese idia karaia disisen ita badinaia be auka. Hegeregere, vanegai laganidia lalonai kongrigeisen bona sekit momo dekenai senisi haida idia vara. Elda taudia ese pablisa haida idia noia kongrigeisen ma ta do idia bamoa, unai amo Kingdom Hall ai helai gabudia idia hahonua diba. Bema ita idia noia kongrigeisen ma ta ita lao, reana do ia auka iseda turadia bona famili ita rakatania totona. Elda taudia be Dirava ena hakaua dalana idia abia neganai, idia ia hamaoroa edena kongrigeisen ai pablisa idia siaia lao totona, a? Lasi. Unai dainai reana do ia auka ita abia hakaua dalana ita badinaia totona. To Iehova ese elda taudia ia abidadama henia disisen idia karaia totona, bona idia ita abidadama henia danu be namo.b

10. Heberu 13:17 hegeregerena, dahaka dainai elda taudia ida ita gaukara hebou?

¹⁰ Ena be elda taudia ese idia karaia disisen haida dekenai ita lalotamona lasi, to dahaka dainai edia disisen ita badinaia? Badina unai bamona ita karaia neganai, Dirava ena taunimanima be maino ai do idia noho. (Efe. 4:2, 3) Tadikaka bona taihu be mai manau ida elda oreana ese ia karaia disisen idia badinaia neganai, kongrigeisen ia goada ia lao. (Heberu 13:17 duahia.) Mai anina bada gauna be, Iehova ese ia abidadama henia taudia ida ita gaukara hebou neganai, ita hahedinaraia Iehova ita abidadama henia.​—Kara 20:28.

11. Dahaka ese ita ia durua elda taudia amo idia mai hakaua daladia ita badinaia totona?

¹¹ Elda taudia ese kongrigeisen ai gau haida idia hamaoromaoroa totona lauma helaga ena heduru idia noia, unai ita laloatao neganai ita do ia durua idia henia hakaua daladia ita abia dae bona badinaia totona. Danu, elda taudia be Baibel ena hakaua herevadia idia tahua namonamo bona Iehova ena orea ese idia totona ia henia hakaua daladia amo heduru idia tahua. Idia ura momokani Iehova idia hamoalea bona iena taunimanima idia naria namonamo. Unai abidadama tatau idia diba Dirava ese edia gaukara idia karaia dalana ia itaia noho. (1 Pet. 5:2, 3) Inai oi laloa: Ena be tanobada be bese idauidau, tomadiho, bona politikol karadia ese ia hapararaia noho, to Iehova ena taunimanima be mai lalotamona ida Dirava momokanina idia tomadiho henia. Unai ia vara badina Iehova ese ena orea ia hanamoa!

12. Kerere tauna ena helalo-kerehai karana dekenai elda taudia be dahaka idia laloa namonamo?

¹² Iehova ese elda taudia dekenai maduna badana ia henia iena kongrigeisen idia hagoevaia noho totona. Bema Keristani tauna ta be kara dika badana ia karaia, Iehova ia ura elda taudia ese abia hidi do idia karaia unai tauna be kongrigeisen ai do ia noho eiava lasi. Danu, namona be idia tahua bema unai tauna be ena kara dika amo ia helalo-kerehai momokani eiava lasi. Reana ia gwau ia helalo-kerehai, to ia karaia karana ia dadaraia momokani, a? Ena lalona ia hadaia unai kara dikana ia karaia lou lasi totona, a? Bema tura dikadia ia bamoa dainai kara dikana ia karaia, mai ura ida edia hebamo karana ia hadokoa, a? Elda taudia be Iehova idia guriguri henia, hamomokania gaudia bona Baibel ena hereva idia tahua namonamo, bona idia itaia kerere tauna ese ia karaia karana be edena bamona ia laloa. Bena disisen do idia karaia ia be kongrigeisen ai do ia noho eiava orea murimuri ai do idia atoa.​—1 Kor. 5:11-13.

13. Bema iseda turana o varavara idia atoa siri, dahaka do ita laloa?

¹³ Edena dala ai ia auka elda taudia ita abidadama henia totona? Bema orea murimuri ai idia atoa siri tauna be iseda turana o varavara ta lasi, reana elda taudia ese idia karaia disisen do ita abia dae haraga. To bema idia atoa siri tauna be iseda tura namona ta, reana elda edia disisen do ita abia dae lasi. Reana do ita laloa elda taudia be hamomokania gaudia idia tahua namonamo lasi, eiava reana idia karaia disisen be Iehova ena dala hegeregerena lasi. Dahaka ese ita ia durua idia karaia disisen dekenai lalohadai maorona ita abia totona?

14. Bema elda taudia be disisen idia karaia ta idia atoa siri totona, dahaka ita laloatao be namo?

¹⁴ Namona be ita laloatao ta atoa siri karana be Iehova ena dala bona unai ese kongrigeisen ai namo ia havaraia bona kerere tauna ia durua. Bema ia helalo-kerehai lasi tauna be kongrigeisen amo idia atoa siri lasi, ia ese ma haida ia hakaua kerere diba. (Gal. 5:9) Danu, do ia laloparara lasi ia be kara dikana ia karaia, bona Iehova ena lalonamo abia totona ena kara o lalohadai ia haidaua karana do ia laloa bada lasi. (Had. 8:11) Namona be ita diba elda taudia ese ta atoa siri karana ena disisen idia karaia neganai, unai idia lalohadailaia namonamo. Israela taudia edia negai hahemaoro taudia bamona, elda taudia idia laloparara idia be ‘taunimanima totona inai gaukara idia karaia lasi, to Iehova totona idia karaia.’​—2 Siv. 19:6, 7.

IEHOVA ITA ABIDADAMA HENIA NEGANAI, VAIRA NEGAI IA DO ITA ABIDADAMA HENIA

15. Dahaka dainai hari Iehova ena hakaua dalana ita abia dae momokani be namo?

¹⁵ Inai tanobada dikana be kahirakahira do ia ore, unai dainai Iehova ena hakaua dalana ita abia dae momokani be gau badana. Dahaka dainai? Badina hisihisi badana lalonai, do ita abia hakaua daladia haida ita lalopararalaia lasi eiava ita badinaia totona be auka. Oibe, Iehova be ita ta ta do ia hereva henia lasi. To ia abia hidi gunalaia taudia amo hakaua daladia do ia henia. Unai be nega namona lasi ita daradara o ita laloa, ‘Inai hakaua dalana be momokani Iehova amo ia mai, eiava gunalaia tadikaka be sibona edia disisen idia karaia, a?’ Unai nega aukana lalonai oi be Iehova bona ena orea do oi abidadama henia momokani, a? Hari Dirava amo idia mai hakaua daladia oi laloa dalana ese unai henanadai ena haere do ia hahedinaraia. Bema hari oi abia hakaua daladia oi abia dae bona badinaia haraga, vadaeni hisihisi badana lalonai unai bamona do oi karaia danu.​—Luka 16:10.

16. Edena dala ai vaira nega ai Iehova ena hahemaoro karadia ese iseda abidadama do ia tohoa?

¹⁶ Inai tanobada dikana ena dokona ai, Iehova ena hahemaoro karadia dekenai lalohadai maorona ita abia be mai anina bada. Dokona ia do ginidae lasi neganai, ita ura taunimanima momo bona iseda Witnes lasi varavara ita durua Iehova idia tomadiho henia totona. To Aramagedono tuarina ai, Iehova be Iesu amo idia totona vaira nega ena disisen do ia karaia. (Mat. 25:31-33; 2 Tes. 1:7-9) Iehova ese daidia do ia hebogahisi henia bona daidia be lasi ena disisen be ita ese do ita karaia lasi. (Mat. 25:34, 41, 46) Ita ese Iehova ena hahemaoro karadia do ita abia dae, a? Eiava Iehova ese ia karaia disisen ita abia dae lasi dainai Ia tomadiho henia karana do ita hadokoa, a? Hari Iehova dekenai iseda abidadama ita hagoadaia noho be gau badana, unai amo vaira nega ai ia do ita abidadama henia momokani.

17. Tanobada dikana ena dokona ai, Iehova ena hahemaoro karadia dainai dahaka gau namodia do idia vara?

¹⁷ Dirava ena tanobada matamata ai, Iehova ena hahemaoro karadia dainai do idia vara gau namodia mani ita laloa. Tomadiho koikoi, mataganigani bisinesi oreadia bona lagani momo lalonai taunimanima idia hahisia gavamani ibounai do idia ore. Danu gorere, buruka, bona eda lalokau taudia idia mase dainai ita mamia hisihisi ibounai do idia ore. Lagani 1,000 lalonai, Satani bona ena demoni ese taunimanima do idia hahisia lasi. Bona edia gwau-edeede dainai idia vara dika ibounai be do idia ore. (Apok. 20:2, 3) Iehova ena hakaua dalana ita abidadama henia dainai do ita moale bada!

18. Numera 11:4-6 bona 21:5 ai, Israela taudia edia haheitalai amo dahaka ita dibaia?

¹⁸ Tanobada matamatana lalonai do idia vara gaudia haida dainai, Iehova ena hakaua dalana dekenai iseda abidadama do ia tohoa, a? Hegeregere, Israela taudia be Aigupito ena igui amo ia ruhaia bona daudau lasi murinai ia vara gauna mani ita laloa. Haida idia maumau matamaia badina Aigupito ai idia moalelaia aniani namodia idia reaia, bona Iehova ese idia dekenai ia henia mana idia ura henia lasi. (Numera 11:4-6; 21:5 duahia.) Hisihisi badana ia ore murinai, ita be unai bamona lalohadai do ita abia danu, a? Ita diba lasi tanobada hagoevaia bona paradaiso ai do ita halaoa gaukarana ena bada be edena bamona. Reana gaukara be momo herea bona matamanai mauri be do ia auka. Unai nega ai, Iehova ese ita dekenai do ia henia gaudia dainai ita maumau, a? Bema hari Iehova ese ia henia gaudia ita laloa bada, unai nega ai do ia henia gaudia do ita laloa bada danu.

19. Inai atikol ena point badadia mani oi herevalaia.

¹⁹ Iehova ena hakaua daladia be nega ibounai idia maoro. Namona be unai ita abia dae momokani. Bona Iehova ese ia abia hidi gunalaia taudia ita abidadama henia danu. Iehova ese peroveta tauna Isaia amo ia gwauraia herevadia ita laloaboio lasi: “Bema umui manau bona lau umui abidadama henia, do umui goada.”​—Isa. 30:15.