Sibona Biagua Karana—Mai Anina Bada Iehova Ena Lalonamo Abia Totona

“Egu kasin ia ura lau ia heatu henia neganai, ena aiona lau gigia. Lau ura ia lau hamasea.”—Paul.

“Ruma dekenai lau be gau maragidia dekenai lau badu dikadika. Ruma kohudia, egu natuna edia gadara gaudia bona lau dogoatao gaudia ibounai do lau makohia.”—Marco.

Reana ita be unai taudia rua bamona lasi. To, nega haida sibona biagua karana ita hahedinaraia be auka. Unai ia vara badina ita be tau ginigunana Adamu amo kara dika ita abia hanai. (Roma 5:12) Hegeregere, Paul bona Marco ese edia badu karana idia biagua be auka. Ma haida be edia lalohadai idia biagua be auka. Idia garilaia gaudia bona lalohadai kereredia idia laloa momo. Ma haida be idia hekwarahi matabodaga, inuinu kekero bona drag abia urana idia dadaraia totona.

Edia lalohadai, ura bona kara idia biagua lasi taudia be edia mauri idia hadikaia diba. To ita be unai ita dadaraia diba. Edena dala ai? Sibona biagua karana do ita hahedinaraia. Unai ita karaia totona, henanadai toi do ita herevalaia: (1) Sibona biagua karana be dahaka? (2) Dahaka dainai ia be mai anina bada? (3) Unai “lauma helaga ena huahua” be edena bamona ita havaraia diba? (Gal. 5:22, 23) Bona nega haida sibona ita biagua lasi neganai, dahaka ita karaia diba do ita herevalaia danu.

SIBONA BIAGUA KARANA BE DAHAKA?

Sibona ia biagua tauna be ena hemami ibounai ia badinaia kava lasi. To, Dirava idia habadua herevadia bona karadia ia dadaraia.

Iuda tomadiho gunalaia tauna ta be Sanhedrin taudia edia vairanai Iesu ena vairana ia pataia. Idia haida be Iesu dekenai edia imana idia davea, idia duduia, bona mai badu ida idia boiboi. — Iesu ese sibona biagua karana ia hahedinaraia goevagoeva

Iesu ese ita dekenai sibona biagua karana ena anina ia hahedinaraia. Baibel ia gwau: “Ia idia hereva dika henia neganai, idia ia hereva dika henia lou lasi. Hisihisi ia abia neganai, idia ia hagaria lasi, to ia hahemaoro maoromaoro tauna ena imana dekenai ia sibona ia atoa.” (1 Pet. 2:23) Iesu be hisihisi auna ai idia tauadae neganai, taunimanima ese idia kirikirilaia, to ia be sibona ia biagua. (Mat. 27:39-44) Matamanai, tomadiho gunalaia taudia idia ura iena hereva amo idia tarapua neganai, sibona biagua karana ia hahedinaraia. (Mat. 22:15-22) Bona Iuda tomadiho taudia be nadi amo ia idia hodoa gwauraia neganai, ia be haheitalai namona ia hahedinaraia. Iesu be idia ia badu henia lasi, to “ia hunia bona dubu helaga amo ia raka-lasi.”—Ioa. 8:57-59.

Iesu ena haheitalai ita tohotohoa diba, a? Oibe, ita tohotohoa diba. Aposetolo Petero ia gwau: “Keriso danu be umui dainai hisihisi ia abia. Ia be haheitalai namona umui dekenai, unai amo iena aena gabudia ai do umui raka namonamo.” (1 Pet. 2:21) Ena be ita be goevadae lasi taudia, to Iesu ena haheitalai ita tohotohoa namonamo diba. Dahaka dainai unai ita karaia be mai anina bada?

DAHAKA DAINAI SIBONA BIAGUA KARANA BE MAI ANINA BADA?

Iehova ena lalonamo ita abia totona, sibona biagua karana ita hahedinaraia be namo. Herevana lagani momo lalonai Iehova ita hesiai henia, to bema iseda hereva eiava kara ita biagua lasi, iseda hetura karana Dirava ida ita hadikaia diba.

Mani Mose ita laloa iena nega ai, “tanobada taudia ibounai edia huanai ia sibona be manau herea.” (Num. 12:3) Mose be lagani momo lalonai Israela taudia edia maumau herevadia ia haheaukalaia, to nega ta ena badu ia biagua lasi. Ranu ia ore dainai idia maumau lou, bona Mose ia badu. Ia hereva auka henidia, ia gwau: “Kamonai lasi taudia e, umui kamonai, inai nadi dekena amo emui ranu do ai haheaua mai, a?”—Num. 20:2-11.

Mose be ena badu ia biagua lasi. Hoa dalanai idia dekenai ranu ia henia Diravana, Iehova ena ladana ia hanamoa lasi. (Sal. 106:32, 33) Unai dainai, Iehova ese ia koua bena Gwauhamata Tanona lalonai ia vareai lasi. (Num. 20:12) Reana Mose be unai nega ai iena badu ia biagua lasi karana, ia lalohisihisilaia ela bona ia mase.—Deu. 3:23-27.

Unai sivarai amo dahaka ita dibaia? Herevana ita be nega daudau hereva momokani lalonai ita noho, to namo lasi ita idia habadua eiava idia kara kerere taudia dekenai mai badu ida do ita hereva. (Efe. 4:32; Kol. 3:12) Momokani, eda mauri lagani ia bada neganai, nega haida ita haheauka be mai ena hekwarahi. To, Mose do ita laloatao. Ita ura lasi iseda ladana namona Iehova ida ita hadikaia, badina sibona eda kara ita biagua lasi. Edena dala ai unai mai anina bada karana ita havaraia diba?

SIBONA BIAGUA KARANA HAVARAIA DALANA

Lauma helaga totona ita guriguri. Dahaka dainai? Badina sibona biagua karana be Dirava ena lauma helaga ena huahua ta, bona Iehova ese iena lauma helaga be idia noinoi taudia dekenai ia henia. (Luka 11:13) Iehova ese iena lauma helaga amo ita dekenai goada ia henia diba. (Fili. 4:13) Ia ese ita ia durua diba lauma helaga ena huahua ma haida hegeregere, lalokau, ita habadaia totona. Unai amo sibona biagua karana do ita hagoadaia diba.—1 Kor. 13:5.

Mero matamata ta be ena daiutu ai sibona ia noho neganai, kompiuta ai gau ta ia hedinarai bona ia ura lasi ia itaia. — Sibona biagua karana idia hamanokaia gaudia dadaraia

Sibona biagua karana idia hamanokaia gaudia dadaraia. Intanet ena websait haida bona kara dika idauidau idia hahedinaraia moale karadia do ita dadaraia. (Efe. 5:3, 4) Oibe, ita idia tohoa diba kara dikadia ibounai do ita dadaraia. (Aon. 22:3; 1 Kor. 6:12) Hegeregere, bema ta be matabodaga karadia karaia urana ia abia, lalokau sivaraidia idia kikilaia buka bona muvi do ia dadaraia.

Reana inai sisiba ita badinaia be auka. To, bema ita hekwarahi, Iehova ese ita dekenai goada do ia henia sibona ita biagua totona. (2 Pet. 1:5-8) Ia ese ita do ia durua iseda lalohadai, hereva bona kara ita biagua totona. Guna ita herevalaia taudia, Paul bona Marco, ese unai idia hamomokania, idia ese edia badu dikadika biagua karana idia dibaia. Mani tadikaka ta ita laloa, nega momo ia be motuka ia taria neganai, draiva ma haida dekenai ia badu bona idia ida ia hepapahuahu. Ia be dahaka ia karaia ena kara ia hanamoa totona? Ia gwau: “Dina ta ta lau guriguri goadagoada. Sibona biagua karana edia atikol lau stadilaia bona lau idia durua Baibel siridia lau laloatao. Ena be lagani momo lalonai unai lau karaia noho, to daba ibounai sibona lau hamaoroa lau ura hari dina do lau badu lasi. Bona bema gaukara ta totona taim lau makaia vadaeni, ruma lau rakatania haraga, unai amo lau sipidi lasi.”

BEMA SIBONA BIAGUA KARANA ITA HAHEDINARAIA LASI

Nega haida, sibona do ita biagua lasi. Unai ia vara neganai, reana do ita hemarai Iehova ita guriguri henia totona. To unai be nega namona ita guriguri goadagoada totona. Unai dainai karaharaga Iehova ita guriguri henia be namo. Ia ita noia iseda dika do ia gwauatao, ita do ia durua, bona iseda lalona ita hadaia kerere ita karaia lou lasi totona. (Sal. 51:9-11) Namo lasi oi laloa Iehova ese emu guriguri do ia kamonai henia lasi. (Sal. 102:17) Aposetolo Ioane ese ita ia hadibaia Dirava ena Natuna ena rara ese “kara dika ibounai amo ita ia hagoevaia.” (1 Ioa. 1:7; 2:1; Sal. 86:5) Laloatao, Iehova ese ena hesiai taudia ia hamaoroa hanaihanai idia gwauatao heheni be namo. Bona ita diba momokani Iehova ese ita dekenai unai bamona do ia karaia danu.—Mat. 18:21, 22; Kol. 3:13.

Mose be tano gagaena ai nega sisina lalonai ena badu ia biagua lasi dainai, Iehova ia moale lasi. To, Iehova ese ia gwauatao. Bona Baibel ia gwau abidadama karana dekenai Mose be haheitalai namona bona ia ita tohotohoa be namo. (Deu. 34:10; Heb. 11:24-28) Iehova ese Mose ia koua Gwauhamata Tanona ai ia vareai lasi totona, to Mose dekenai gwaumaoro ia henia tanobada Paradaisona ai do ia noho bona ia mauri hanaihanai. Ita danu be unai hahenamo ita moalelaia diba, bema unai mai anina bada karana, sibona biagua karana ita havaraia noho.—1 Kor. 9:25.