Revareva amo Hereva Siaia Dalana
REVAREVA ese taunimanima milioni momo edia mauri bona kara idia hanamoa. Keristani Greek Revarevadia lalonai idia noho buka momo be revareva korikoridia. Hari inai negai, ita ese abidadama matamata taudia, maduna idauidau idia huaia tadikaka bona taihu, bona hekwakwanai idia davaria taudia hagoadaia totona bona turadia dekenai hereva siaia bona kongregesen gaukara haida karaia totona revareva ita torea diba.—1 Tes. 1:1-7; 5:27; 2 Pet. 3:1, 2.
Revareva torea karana danu be haroro dalana namona ta. Gabu haida ai, taunimanima idia noho gabudia haida be idia taravatua eiava sekuriti ese idia naria dainai ita vareai bona haroro be auka. Taunimanima haida be ruma dekenai idia noho momo lasi, unai dainai ruma-ta-ruma-ta gaukarana ita karaia neganai idia ita davaria lasi. Ma haida be daudau gabudia dekenai idia noho.
Nega haida gorere, medu bada, eiava kefiu dainai ruma oi rakatania diba lasi. Varavara ta eiava guna gabu ta dekenai oi haroro henia tauna oi hadibaia noho totona revareva oi torea diba, a? Hari emu Baibel stiuden tauna ta be gabu idauna dekenai ia noho, a? Reana oi siaia revarevana ese ia hagoadaia dainai, lauma gaudia do ia laloa noho. Eiava reana oi ese vanegai idia headava, natudia idia abia, eiava edia lalokau tauna ta ia mase taudia dekenai Baibel ena hereva haida oi siaia diba.
Revareva amo Oi Haroro
Guna oi davaria lasi tauna be revareva amo oi haroro henia neganai, oi sibona oi herevalaia guna. Reana oi gwau oi ese intenesenel volantia gaukara oi karaia. Bema ia namo, oi gwau oi be Iehova ena Witnes tauna ta. Oi hahedinaraia dahaka dainai ia oi vadivadi henia lasi to revareva oi siaia. Ia dekenai oi hereva bamona emu revareva oi torea. To, ‘oi aonega gaigai bamona’ bona oi sibona oi herevalaia neganai dahaka do oi hadibaia diba oi laloa namonamo.—Mat. 10:16.
Bema unai tauna oi vadivadi henia diba, unai neganai ia dekenai do oi gwauraia gaudia be revareva dekenai oi torea danu. Reana Herevalaia bukana amo hamatamaia herevana ta eiava Iseda Basileia Gaukara pepana amo Baibel herevalaia herevana ta oi haidaua sisina bona oi torea. Henanadai ta oi gwauraia diba bona ia oi hagoadaia do ia laloa totona. Pablisa haida idia gwau davana lasi Baibel henanadai haerelaia gaukarana ita karaia bona stadi lalonai ita gaukaralaia bukadia ta amo karoa haida edia hereva kwaradia idia torea. Haroro revarevana ena haheitalai ta be rau 73 dekenai ia noho. Reana ia amo lalohadai haida oi abia, to oi torea gaudia oi haidaua be namo. Bema lasi, reana taunimanima ese revareva tamona do idia abia loulou.
Taunimanima haida be idia diba lasi tauna amo ia mai revareva latana idia ura lasi duahia. Unai dainai aonega dalana be revareva kwadogina oi torea. Abia tauna ese emu revareva ia do hesikulaia lasi neganai, ia ore be namo. Kingdom Hall dekenai umui karaia heboudia totona boiboi pepana oi udaia be namo. Reana pepapepa maragina ta, buklet ta, eiava Gima Kohorona eiava Awake! ta oi udaia bona oi hahedinaraia, bema ia ura, do ia abia loulou diba. Eiava oi henanadai, bema ena ruma dekenai oi lao diba bona ia ida oi torea gauna do umui herevalaia.
Revareva Ena Toana
Hari revareva ena haheitalai mani oi itaia. Inai gaudia oi itaia: (1) Iena toana be namo herea. (2) Ena be envelop ia boio, to abia tauna be siaia tauna ena ladana bona adres ia diba. (3) Revareva ena badina be paragraf ginigunana ai ia hedinarai goevagoeva. (4) Lalohadai badadia ta ta be murinai paragraf ta ta ese idia herevalaia. (5) Bema unai revareva ita laloa, ita itaia ia be oi dibaia turana ena revareva eiava bisinesi revarevana bamona lasi.
Kongregesen seketere ese brens opesi dekenai ia siaia revarevana bona unai bamona revareva ma haida lalonai kongregesen ena ladana, seketere ena ladana, seketere ena adres, bona deit idia hedinarai be namo. Revareva ia abia tauna eiava oreana ena ladana bona adres oi torea danu. Unai murinai, hedavari herevana maorona oi torea. Gado haida ai, revareva ena dokona dekenai siaia tauna ena ladana ataiai inai bamona hereva ta, “Emui tadikaka” eiava “Mai momokani ida,” idia torea. Namona be ladana be imana amo oi torea.
Revareva iboudiai lalonai, spelin, grama, maka maragidia, bona toana oi laloa. Unai oi karaia neganai emu revareva bona ia gwauraia sivaraina ena hairai oi habadaia.
Envelop dekenai, revareva idia siaia mai totona adres oi torea—oiemu adres oi torea be namo. Bema oi laloa revareva amo oi haroro neganai, oi diba lasi taudia dekenai emu adres oi henia be reana aonega karana lasi, elda taudia oi nanadaia bema emui kongregesen ena adres oi gaukaralaia diba. Watch Tower Society ena adres be unai totona oi gaukaralaia lasi, badina unai ese toana ia hahedinaraia unai revareva be Society ena opesi amo idia siaia bona haida do idia daradara. Bema buklet eiava magasin oi udaia to revareva idia siaia mai totona adres oi torea lasi, unai neganai danu toana be Society ese unai revareva ia siaia.
Buklet eiava magasin oi udaia neganai, bona nega ibounai, oi hamomokania oi atoa stamp idia hegeregere. Oi laloatao tano momo dekenai, buklet eiava magasin idia udaia neganai, ena davana ese revareva sibona ena davana ia hanaia.
Oi Gaukaralaia Herevadia
Emu revareva oi torea bena oi duahia, ena namo oi itaia totona. Toana be edena bamona? Kara namo ia hahedinaraia, a? Lalokau bona hebogahisi be ma haida ita kara henia neganai ita ura ita hahedinaraia karadia rua. (Gal. 5:22, 23) Bema oi itaia hereva haida edia mamina idia namo momokani lasi, do oi haidaua.
Revareva be oi lao diba lasi gabudia dekenai ia lao diba. Unai dainai ia be haroro dalana namona. Oiemu revareva ese oi bona oi abia dae gaudia ia hahedinaraia dainai, namona be ena hereva, ena toana, bona ia hahedinaraia lalohadai oi laloa namonamo. Reana ta ia durua mauri ena dala ai ia raka matamaia totona eiava ia hagoadaia unai dala ia badinaia noho totona.