Duahia Maoro

BUKA HELAGA ia gwau Dirava ia ura taunimanima ibounai ese “hereva momokani do idia diba.” (1 Tim. 2:4) Unai dainai, Baibel ita duahia badabada neganai, namona be eda duahia dalana ese ia hahedinaraia ita ura hereva momokani ita hahedinaraia maoro.

Matamata taudia bona taunimanima badadia ese Baibel bona Baibel idia herevalaia bukadia idia duahia badabada be mai anina bada karana ta. Ita be Iehova ena Witnes taudia dainai, iseda maduna be taunimanima dekenai Iehova bona ena dala ita hadibaia. Unai dainai, nega momo taunimanima ta eiava haida vairanai ita duahiduahi. Ruma bese lalonai unai bamona ita karaia danu. Tiokratik Haroro Sikuli lalonai, tadikaka bona taihu, matamata bona buruka taudia, ese sisiba idia abia, duahiduahi badabada karana idia hanamoa totona.

Taunimanima edia vairanai Baibel duahia karana ita laloa bada be namo, herevana haida sibona eiava kongregesen ibounai vairanai ita karaia. Baibel be Dirava ena lauma amo ia vara. Danu, “Dirava ena hereva be ia mauri noho, bona ia be mai ena siahu . . . iseda lalona bona iseda kudouna ena ura ibounai ia tahua.” (Heb. 4:12) Dirava ena Hereva lalonai ia noho diba namona be gabu ma ta ai ita davaria diba lasi. Unai Hereva ese ta ia durua, Dirava momokanina tamona ia diba, ia ida hetura karana namona ia abia, bona mauri ena hekwakwanai idauidau ia hanaia totona. Ia ese Dirava ena tanobada matamatana lalonai mauri hanaihanai abia dalana ia hahedinaraia. Namona be eda tahua gauna be Baibel ita duahia namonamo.​—Sal. 119:140; Ier. 26:2.

Duahia Maoro Dalana. Hereva duahia namonamo karana ena kahana be momo, to gau ginigunana be duahia maoro karana. Unai ena anina be idia printaia herevadia hegeregerena oi duahia. Oi naria namonamo, hereva eiava edia dokona oi reaia lasi bona edia toana idia hegeregere herevadia oi duahia kerere lasi.

Hereva oi duahia maoro totona idia hahedinaraia lalohadai oi lalo-pararalaia be namo. Unai totona oi hegaegae namonamo. Gabeai, oi do duahia lasi herevadia oi itaia bona edia lalohadai oi laloa karana ia namo ia lao neganai, hereva duahia maoro karana do ia namo ia lao danu.

Idia torea herevadia lalonai maka maragidia be mai anina bada. Maka maragidia ese laga-ani gabudia, laga-ani ena daudau, bona emu duahiduahi regena do oi haidaua gabudia idia hahedinaraia. Gado haida ai, bema maka maragina ese ia hahedinaraia gabuna ai emu gado regena oi haidaua lasi, henanadai be hereva ta bamona do oi gwauraia, eiava sentens ena anina ia idau momokani. To, momokani, nega haida maka maragidia be hereva torea dalana dainai idia atoa. Oiemu gado ai maka maragidia idia gaukaralaia dalana oi dibaia. Unai be dala badana ta, emu duahiduahi ese anina ia hahedinaraia totona. Oi laloatao, emu tahua gauna be lalohadai oi hahedinaraia, hereva ta ta oi gwauraia sibona lasi.

Bema oi ura hereva duahia maoro karana oi hanamoa, oi karaia loulou be namo. Paragraf tamona oi duahia, bena oi karaia loulou ela bona kerere ta oi karaia lasi. Bena paragraf iharuana oi duahia. Gabeai, rau momo oi duahia bona oi gaukara goada, hereva ta oi reaia lasi, oi duahia lou lasi, bona oi duahia kerere lasi totona. Unai gaudia oi karaia murinai, ta oi noia emu duahiduahi ia kamonai bona oi karaia kereredia ia hahedinaraia.

Tanobada ena kahana haida ai, taunimanima edia matana idia dika bona diari namona be lasi dainai idia duahiduahi be auka. Bema unai gaudia oi hanamoa diba, emu duahia karana do ia namo ia lao.

Idia duahiduahi namonamo tadikaka idia boiria diba, Kongregesen ena Buka Stadi bona Gima Kohorona Stadi lalonai, stadi kahana idia duahia totona. To unai oi karaia namonamo totona hereva haida oi gwauraia maoro sibona be hegeregere lasi. Kongregesen ai taunimanima vairanai oi duahiduahi namonamo totona, sibona emu duahia karana oi hanamoa be namo. Namona be oi lalo-parara sentens ena hereva iboudiai be mai anina bada. Idia haida oi reaia neganai, sentens ena anina oi itaia goevagoeva diba lasi. Ena be oi sibona dekenai oi duahia, to bema hereva oi duahia kerere, sentens ena anina ia idau. Reana maka maragidia eiava hereva idia hahedinaraia lalohadai oi laloa lasi dainai oi duahia kerere. Sentens ena hereva ta ta edia anina oi lalo-pararalaia be namo. Danu, maka maragidia ese sentens ena anina idia haidaua dalana oi laloa. Oi laloatao, nega momo idia hakapua herevadia ese lalohadai ta idia hahedinaraia hebou. Unai bamona herevadia oi itaia bona oi duahia badabada neganai, hereva ta ta lasi, to idia hakapua herevadia​—lalohadai ta idia hahedinaraia hebou herevadia​—oi duahia hebou. Oi duahia gauna oi lalo-pararalaia goevagoeva be gau badana, taunimanima vairanai duahiduahi karana amo diba maorona oi hahedinaraia totona.

Aposetolo Paulo ese lo Keristani elda tauna ta ia hagoadaia duahia karana ia goadalaia noho totona. (1 Tim. 4:13) Ia hedinarai ita ibounai ese inai kara ita hanamoa be namo.