STADI 4

Hereva Namonamo

OI DUAHIDUAHI badabada neganai, hereva haida gwauraia totona oi hekwarahi, a? Eiava helai taudia vairanai oi hereva neganai, nega momo hereva maorodia davaria totona oi hekwarahi, a? Bema oibe, reana oi hereva namonamo lasi. Hereva namonamo tauna ena duahiduahi bona hereva dalana dainai, hereva bona lalohadai idia heau namonamo, hekwarahi be lasi. To ita gwau lasi anina be ia hereva hanaihanai, ia hereva haragaharaga, bona ia herevalaia gaudia laloa lasi dalanai ia hereva. Lasi, to ena hereva ese mamina namona ia havaraia. Hereva namonamo karana be Tiokratik Haroro Sikuli dekenai ita laloa bada karana ta.

Oi hereva namonamo lasi ena badina be reana momo. Inai gaudia ta do oi laloa namonamo be namo, a? (1) Ma haida dekenai oi duahiduahi neganai, hereva haida oi diba lasi dainai oi gwauraia maoromaoro lasi. (2) Nega momo oi laga-ani sisina dainai, emu hereva oi hamatamaia, oi hadokoa, bona oi hamatamaia lou. (3) Bema oi hegaegae namonamo lasi, unai hekwakwanai ia bada. (4) Taunimanima vairanai hereva oi henia neganai, nega momo oi hereva namonamo lasi ena badina be oi herevalaia gaudia oi atoa namonamo lasi. (5) Bema gado ena hereva momo oi diba lasi, reana hereva maorona davaria totona oi hekwarahi. (6) Bema hereva momo herea edia anina oi hahedinaraia toho, reana oi hereva namonamo lasi. (7) Grama ena taravatu oi diba namonamo lasi dainai, unai hekwakwanai ia bada.

Bema oi hereva namonamo lasi, Kingdom Hall dekenai helai taudia be do idia raka siri lasi, to reana emu hereva idia laloa lasi. Unai dainai, oi gwauraia gaudia momo idia boio bamona.

To oi naria namonamo, oi ura do idia badinaia herevana bona ia heau namonamo herevana ese kamonai taudia ia doria auka bona reana idia ia hahemaraia mamina ia havaraia garina. Bema oi tubu gabuna ena kastom be idau dainai, taunimanima idia laloa oiemu hereva dalana be doria auka bamona eiava mai momokani ida lasi, emu hereva ena badina do ia boio. Danu, ena be aposetolo Paulo be hereva namonamo tauna, to mai ‘goada lasi, gari, bona heudeheude momo’ ida Korinto taudia ia hereva henia, unai amo edia lalona ia veria lasi ia idia laloa bada totona.—1 Kor. 2:3.

Oi Karaia Lasi Karadia. Taunimanima momo be idia hereva neganai inai bamona hereva “a-a-a” idia gwauraia momo. Ma haida be nega momo inai hereva “bona” amo lalohadai idia hamatamaia, eiava herevana dahaka idia herevalaia to inai hereva “oi laloa” eiava “inai dahaka” idia gwauraia loulou. Reana unai bamona herevadia oi gaukaralaia ena momo oi diba lasi. Ia namo bema ta ese oiemu hereva ia kamonai bona unai bamona herevadia oi gwauraia neganai, idia ia gwauraia danu. Reana do oi hoa.

Taunimanima haida idia duahiduahi bona hereva neganai, sentens ta idia hamatamaia bena huanai edia hereva idia hadokoa bona idia gwauraia vadaeni gaudia haida idia gwauraia lou.

Bona ma haida edia hereva ena haraga ia namo, to lalohadai ta idia hamatamaia, bena sentens huanai idia hadokoa, bona gau ma ta idia gwauraia matamaia. Ena be hereva idia heau namonamo, to lalohadai idia haidaua haraga dainai idia hereva namonamo lasi.

Hanamoa Daladia. Bema oiemu hekwakwanai be hereva maorona oi tahua loulou, namona be oi hekwarahi gado ena hereva momo oi dibaia totona. Gima Kohorona, Awake!, bona oi duahia bukadia ma haida dekenai oi diba lasi herevadia oi laloa. Diksenari ai oi tahua, edia anina oi itaia, bona idia haida oi gaukaralaia matamaia. Bema oi dekenai diksenari be lasi, heduru abia totona gado ia diba namonamo tauna oi noia.

Duahiduahi badabada loulou karana ese emu hereva ia hanamoa. Hereva aukadia oi laloa, bona oi gwauraia badabada nega momo.

Oi duahiduahi namonamo totona, sentens lalonai hereva idia gaukara hebou dalana oi lalo-pararalaia be namo. Nega momo hereva oi duahidia hebou be gau badana, torea tauna ia ura hahedinaraia lalohadaina ia hedinarai totona. Unai bamona idia noho hebou herevadia oi laloa. Idia oi makaia, bema unai be oi do ia durua. Emu tahua gauna be hereva oi gwauraia maoro sibona lasi, to lalohadai oi hahedinaraia goevagoeva. Sentens ta oi laloa namonamo murinai, ma ta oi laloa ela bona paragraf oi stadilaia ore. Lalohadai ia heau dalana oi itaia. Bena oi duahiduahi badabada loulou. Paragraf oi duahia loulou ela bona ibounai oi duahia neganai nega ta oi daradara lasi bona gabu kererena dekenai oi laga-ani lasi. Bena paragraf ma ta oi karaia.

Unai murinai, mani oi duahia haraga. Bema sentens lalonai hereva idia gaukara hebou dalana oi diba, hereva tamona lasi to hereva momo nega tamona oi itaia diba bona oi diba dahaka do ia hedinarai gabeai. Unai ese oiemu duahiduahi amo ia vara anina do ia habadaia.

Nega ginigunana oi itaia gaudia oi duahia karana be treinini namona. Hegeregere, oi hegaegae lasi to dina ena siri bona hereva oi duahia; unai bamona oi karaia loulou. Namona be emu matana ese hereva ta ta lasi, to lalohadai tamona idia hahedinaraia herevadia ibounai nega tamona idia itaia karana oi manadalaia.

Herevahereva lalonai oi hereva namonamo ena anina be oi do hereva lasi neganai oi laloa guna. Dina ta ta ai unai oi karaia. Oi ura gwauraia lalohadai oi abia hidi bona emu lalona ai oi atoa namonamo; gabeai oi hereva matamaia. Oi haragaharaga lasi. Lalohadai ta oi gwauraia noho lalonai oi hadokoa lasi eiava oi haidaua lasi ela bona oi gwauraia ore. Bema auka lasi sentens kwadogidia oi gaukaralaia reana oi do ia durua.

Bema oi ura gwauraia gauna oi diba namonamo, hereva do idia heau namonamo. Do oi gaukaralaia herevadia oi abia hidi be gau bada hereana lasi. Momokani, do oi hereva namonamo totona, namona be lalohadai ta oi diba goevagoeva bona oi hereva lalonai oi gaukaralaia herevadia oi abia hidi. Bema oi hereva neganai unai oi karaia bona hereva ta ta lasi to unai lalohadai oi laloa noho, hereva do oi davaria haraga, bona emu lalohadai ese emu hemami idia hahedinaraia namonamo. Oi ese lalohadai lasi to hereva oi laloa neganai, emu hereva ia heau namonamo lasi. Hereva namonamo karana oi tohoa loulou neganai, do oi dibaia, bona emu hereva bona duahiduahi ese anina idia havaraia totona unai be gau badana.

Iehova ese Israela besena bona Aigupito ena Farao vairanai Iena hereva gwauraia totona Mose ia abia hidi neganai, Mose ia laloa ia hegeregere lasi. Dahaka dainai? Ia be hereva namonamo tauna lasi; iena hereva be reana mai ena dika ta. (Eso. 4:10; 6:12) Mose ese ekskius momo ia gwauraia, to Dirava ese unai ia abia dae lasi. Iehova ese hereva gwauraia totona Arona ia siaia, to danu, Ia ese Mose ia durua ia hereva totona. Mose be nega momo bona anina ia havaraia dalanai, taunimanima ta ta sibona lasi, to unai bese ibounai dekenai ia hereva. (Deu. 1:1-3; 5:1; 29:2; 31:1, 2, 30; 33:1) Bema emu hereva hanamoa totona oi karaia diba gaudia ibounai oi karaia bona Iehova dekenai oi tabekau, oi danu ese emu hereva amo Dirava oi hanamoa diba.

LANALANA BIAGUA DALANA

Gau momo ese lanalana idia havaraia. Haida idia durua gaudia ese ma haida idia durua lasi. To kwalimu ena moale oi davaria totona, durua daladia oi tohoa loulou be gau badana.

Bema oi laloa hebou dekenai do oi haere, unai dainai oi gari, a? Namona be Iehova oi guriguri henia, oi ia durua totona. (Fili. 4:6, 7) Iehova hanamoa bona ma haida durua karana oi laloa. Oi laloa lasi emu hekwakwanai be do ia ore sibona, to oi biagua totona oi idia durua gaudia oi laloa. Iehova ena hahenamo bona emu tadikaka ese oi idia hagoadaia dainai, do oi ura durua karadia oi habadaia.

Tiokratik Haroro Sikuli ese dala ia kehoa, taunimanima vairanai hereva henia dalana oi dibaia totona. Reana do oi hoa, badina oi itaia idia ura oi idia durua taudia bona idia ura oi kwalimu taudia edia vairanai oi hereva namonamo diba. Unai ese oi ia durua diba, nega idauidau ai do oi hereva totona.

Bema hereva do oi henia, oi hegaegae namonamo guna. Emu hereva oi laloa bada. Hemami maorona oi hahedinaraia. Bema oi hereva lalonai oi lanalana matamaia, oi karaia diba hegeregerena, emu gadona bona kara oi biagua. Emu aukina ena masolo oi hamanokaia. Sentens kwadogidia oi gaukaralaia. Inai bamona hereva “e-e-e” bona “a-a-a” oi gwauraia momo lasi.

Lanalana idia haheaukalaia taudia haida ese guna hekwakwanai idia havaraia herevadia idia dibaia bona idia gaukaralaia lasi, to anina tamona herevadia ma haida idia gaukaralaia. Ma haida be idia dekenai hekwakwanai idia havaraia gado regedia idia dibaia bona idia tohoa loulou.

Bema ta ida oi herevahereva lalonai oi lanalana matamaia, herevahereva karana oi rakatania lasi. Reana oi ida ia herevahereva tauna oi hagoadaia do ia hereva ela bona oi hereva lou diba. Hereva haida oi torea, eiava idia printaia gaudia haida ia dekenai oi hahedinaraia bema unai be mai anina.