Autlain Gaukaralaia

TAUNIMANIMA momo be autlain amo hereva henia karana dekenai idia gari. Idia laloa do idia kerere diba lasi bema edia hereva ibounai idia torea eiava edia kwarana amo idia gwauraia diba.

To, dina ta ta ai ita hereva neganai maniuskrip ita gaukaralaia lasi. Ruma bese taudia bona turadia ida ita herevahereva neganai danu be unai bamona. Haroro gaukara ita karaia neganai danu. Bona mai kudouna ibounai ida ita sibona eiava taunimanima vairanai ita guriguri neganai danu be unai bamona.

Maniuskrip eiava autlain oi gaukaralaia neganai emu hereva dalana ia idau, a? Maniuskrip amo oi duahia neganai, oi diba oi gwauraia lalohadai bona hereva idia maoro, to reana taunimanima edia kudouna oi hamarerea be auka. Sentens momo oi duahia neganai, nega momo gado regena haidaua dalana ta oi badinaia bona unai be emu herevahereva dalana amo ia idau. Bema emu pepa oi laloa bada bona kamonai taudia oi laloa sisina reana momo do idia kamonai namonamo lasi, to bema mamina idia abia oi ese idia oi laloa bada bona oi herevalaia gauna be mai anina bada edia mauri dekenai, do idia kamonai namonamo. Taunimanima oi ura hagoadaia neganai, sibona emu hereva amo idia oi hereva henia be namo.

Tiokratik Haroro Sikuli idia karaia, dina ta ta maurina ai ita ia durua totona. Turadia ita davaria neganai, idia dekenai hereva namona ita gwauraia totona pepa ta amo lalohadai ita duahia lasi. Haroro gaukara dekenai maniuskrip ita abia lao lasi, badina ita laloa lasi ita ura gwauraia lalohadaina do ita laloaboio. Inai sikuli lalonai unai bamona haroro daladia oi hahedinaraia neganai, herevahereva bamona oi karaia. Bema oi hegaegae namonamo, do oi itaia emu lalona ai eiava pepa ai ia noho autlain sibona ia hegeregere, oi ura herevalaia gauna ena hereva badadia oi laloatao totona. To edena bamona emu gari oi koua diba bena autlain amo oi hereva?

Emu Lalohadai Oi Atodia Namonamo. Hereva oi henia neganai autlain oi gaukaralaia totona emu lalohadai oi atodia namonamo be namo. To unai be do oi gaukaralaia herevadia ta ta oi abia hidi karana lasi. Unai ena anina badana be oi laloa guna bena gabeai oi hereva.

Ia hereva haraga tauna be reana gabeai ia moale lasi badina lalohisihisi idia havaraia herevadia ia gwauraia. Ma ta be reana lalohadai idauidau ia gwauraia to edia badina ia hedinarai lasi. Unai hereva daladia rua ita hanamoa diba, bema ita do hereva lasi neganai eda lalona ai autlain ita karaia. Emu tahua gauna oi laloa guna, murinai unai oi hagugurua totona oi karaia gaudia oi laloa, bena oi hereva matamaia.

Haroro gaukara totona oi hegaegae, a? Nega oi atoa, emu haroro baege hegaegaelaia sibona totona lasi to emu lalohadai oi atodia namonamo totona. Bema oi ura Iseda Basileia Gaukara pepana dekenai ia noho kiki herevana ta oi gaukaralaia, oi duahia loulou, lalohadai badadia oi diba namonamo totona. Sentens tamona eiava rua amo ena lalohadai badadia oi gwauraia. Hereva oi haidaua sisina, sibona emu hereva amo oi gwauraia diba bona emu teritori dekenai ia namo totona. Do oi itaia emu lalona ai ia noho autlain ese oi ia durua. Unai autlain lalonai dahaka ia noho? (1) Reana hereva hamatamaia totona, emu gabu dekenai momo ese idia laloa gauna ta oi gwauraia. Ruma tauna ena lalohadai oi tahua. (2) Unai gauna dekenai hereva namona ta oi abia hidi, bona unai gauna hamaoromaoroa totona Dirava ese ia gwauhamatalaia karana idia hahedinaraia siri ta eiava rua danu. Bema dala ia noho, oi hahedinaraia Iehova ese ena Basileia, ena guba gavamanina, amo unai do ia karaia. (3) Ruma tauna oi hagoadaia, umui herevalaia gauna dainai gau ta do ia karaia. Buka eiava magasin ta bona reana Baibel stadi oi herevalaia bona do umui herevahereva lou totona dala oi karaia.

Reana unai bamona haroro herevana totona emu lalona ai ia noho autlain sibona ia hegeregere. Bema oi ura ruma ginigunana oi do karaia lasi neganai pepa ai ia noho autlain ta oi itaia, reana hamatamaia hereva kwadogina, siri ta eiava rua, bona dokona hereva kwadogina sibona idia noho be namo. Unai bamona autlain ita hegaegaelaia bona gaukaralaia dainai do ita hereva kava lasi, to ruma taudia ese idia laloatao diba sivaraina ita harorolaia goevagoeva.

Bema henanadai ta eiava ura lasi herevana ta be emu teritori ai idia gwauraia momo, reana ia dainai hereva haida oi tahua. Nega momo, lalohadai rua eiava toi bona unai lalohadai idia hamomokania siridia sibona oi hegaegaelaia be hegeregere. Reana Bible Ena Hereva Badadia buklet eiava Buka Helaga Herevalaia bukana lalonai leta koremadia ai idia torea hereva kwarana maragidia be oiemu autlain ena hereva namodia. Reana buka ma ta ena hereva ta oi ura oi gwauraia danu. Autlain oi torea bona unai hereva oi torea hanai, bona haroro gaukara lalonai oi gaukaralaia gaudia ida oi atoa. Ruma tauna ese unai henanadai eiava ura lasi herevana ia gwauraia neganai, oi hamaoroa oi ura bada emu abidadama ena badina oi hahedinaraia. (1 Pet. 3:15) Oi karaia autlain amo haere oi henia.

Ruma bese, buka stadi taudia, eiava kongregesen vairanai guriguri oi henia neganai, namona be emu lalohadai oi atodia namonamo. Luka 11:​2-4 ena hereva hegeregerena, Iesu ese ena hahediba taudia dekenai guriguri ena autlain kwadogina ia henia. Ierusalema ena dubu idia hahelagaia neganai, Solomona ena guriguri ia lata. Ia hahedinaraia ia gurigurilaia gaudia ia laloa guna. Guna ia ese Iehova bona Iena gwauhamata Davida dekenai ia herevalaia; murinai dubu; bena idia vara diba gaudia idauidau bona taunimanima edia orea idauidau ia herevalaia. (1 Kin. 8:​22-53) Unai haheitalai rua amo heduru ita abia diba.

Emu Autlain Ia Kwadogi be Namo. Emu autlain be hereva henia totona oi karaia, a? Do ia lata eiava ia kwadogi?

Oi laloaboio lasi, autlain be lalohadai laloatao totona oi karaia. Reana oi laloa oi ia durua bema hamatamaia totona sentens haida oi torea. To unai murinai, hereva ta ta lasi to lalohadai oi laloa. Bema unai lalohadai be sentens haida amo oi torea, namona be unai sentens idia kwadogi. Oi ura gaukaralaia hereva badadia haida be autlain dekenai idia hedinarai goevagoeva be namo. Unai totona reana leta badadia oi torea, eiava idia henunai laini oi atoa, eiava kala idauna amo oi makaia. Hereva badadia ta ta henunai, idia oi herevalaia neganai oi ura gaukaralaia lalohadai oi toredia. Oi ura gaukaralaia siridia oi torea. To namona be Baibel amo oi duahia. Oi ura gaukaralaia haheitalai oi toredia. Reana buka ma ta ena hereva namona ta oi ura gwauraia. Namona be emu nouti idia hegeregere mai anina gaudia oi hahedinaraia totona. Bema autlain ena toana ia namo do oi gaukaralaia be auka lasi.

Haida edia autlain idia kwadogi momokani. Reana autlain lalonai be mai anina herevadia haida sibona, hereva henia tauna ese ena kwarana amo do ia gwauraia siridia, bona lalohadai ia laloatao totona laulau idia noho. Unai gaudia haida sibona amo, hereva henia tauna ese ia herevalaia gauna be herevahereva bamona ia hahedinaraia namonamo diba. Unai be inai kahana ena tahua gauna.

Inai buka ena rau 39 ia lao 42 lalonai, kahana ladana “Autlain Karaia Dalana” ia noho. Inai stadi, “Autlain Gaukaralaia,” oi badinaia neganai namona be unai kahana oi duahia.

Autlain Gaukaralaia Dalana. Hari oiemu tahua gauna be autlain karaia dalana ai emu hereva oi hegaegaelaia lasi. To, oi ura autlain oi gaukaralaia namonamo.

Oiemu autlain oi gaukaralaia karana ginigunana be hereva henia dalana oi hegaegaelaia. Sinado oi itaia, hereva badadia ta ta oi duahia, bona unai hereva badadia ta ta bona sinado idia hakapua dalana be oi sibona dekenai oi gwauraia. Hereva badadia ta ta totona do oi atoa negana oi laloa. Unai murinai oi giroa lou bena hereva badana ginigunana oi stadilaia. Unai kahana oi herevalaia neganai oi ura gaukaralaia hamomokania herevadia, siri, bona haheitalai oi laloa lou. Unai gaudia oi laloa loulou ela bona emu lalona ai unai kahana oi diba goevagoeva. Hereva badadia ta ta be unai bamona oi laloa. Oi kokia diba gaudia oi laloa danu, nega maorona ai emu hereva oi haorea totona. Bena hereva ibounai oi itaia lou. Hereva ta ta lasi to lalohadai oi lalodia. Hereva ibounai oi laloatao toho lasi.

Hereva oi henia neganai, nega momo kamonai taudia do oi itaia noho diba. Siri oi duahia murinai, emu Baibel oi gaukaralaia bona unai siri oi herevalaia be hegeregere, to emu nouti oi itaia be badina lasi. Unai hegeregerena, bema haheitalai ta oi gaukaralaia, nouti amo oi duahia lasi to turadia dekenai oi gwauraia bamona oi gwauraia. Oi hereva lalonai, nouti amo sentens iboudiai oi itaia lasi. Mai kudouna ibounai ida oi hereva, bona kamonai taudia edia kudouna do oi hamarerea.

Autlain amo hereva henia dalana oi manadalaia neganai, hereva henia tauna namona ai oi lao totona gau badana ta oi dibaia unai.