Maria Ia Headava Lasi, To Ia Rogorogo

Maria be ia rogorogo bona hua 4 idia hanaia vadaeni. Ia rogorogo ena hua ginigunana ai, ena varavara Elisabeta ia vadivadi henia, ia be Iudea ena ororo gabudia ena saut kahana ai ia noho. To hari, Maria be ena hanua Nasareta dekenai ia giroa lou. Bona kahirakahira taunimanima do idia diba Maria be ia rogorogo. Mani oi laloa Maria be unai ia lalohekwarahilaia!

Maria ia lalohekwarahi badina ia be kapenta tauna Iosepa ida ia maoheni vadaeni. Bona ia diba Dirava ese Israela taudia dekenai ia henia Taravatu hegeregerena, bema tau ta ida ia maoheni kekeni be mai ena ura ida tau ma ta ida ia mahuta hebou, ia be nadi amo idia hodoa mase. (Deuteronomi 22:23, 24) Ena be Maria be matabodaga karana ia karaia lasi, to reana Iosepa dekenai ena rogorogo sivaraina do ia herevalaia dalana bona do ia vara gauna ia laloa momo.

Maria be ena varavara Elisabeta ida hua toi ia noho dainai, ita diba Iosepa ia ura bada Maria ia itaia. Idia hedavari neganai, reana Maria ese ena rogorogo sivaraina be Iosepa dekenai ia herevalaia namonamo, ia gwau Dirava ena lauma helaga ena siahu amo ia rogorogo. To ita diba, Iosepa ese Maria ena hereva ia lalopararalaia bona abia dae be auka.

Iosepa ia diba Maria be hahine namona bona momo ese idia matauraia. Bona Maria ia lalokau henia bada. To herevana Maria be dahaka ia gwauraia, Iosepa ia laloa Maria be tau ma ta amo ia rogorogo. Iosepa be ia ura lasi taunimanima ese Maria be nadi amo idia hodoa mase eiava ia ura lasi taunimanima vairanai Maria ia hahemaraia; unai dainai ia ura hehuni dalanai edia headava ia hadokoa. Unai negadiai, idia maoheni taudia be headava taudia bamona idia lalodia, bema ta ia ura edia maoheni idia hadokoa, namona be idia divos be namo.

Iosepa be unai gaudia ia lalohadailaia noho lalonai, ia mahuta. Bena Iehova ena aneru ta be nihi amo Iosepa ia hamaoroa: “Oi laloa momo lasi, Maria emu adavana be emu ruma dekenai oi abia lao, badina ia be lauma helaga ena siahu amo ia rogorogo. Ia be natuna mero ta do ia havaraia, bona iena ladana do oi hatoa Iesu, badina ia ese ena taunimanima be edia kara dika amo do ia hamauria.”​—Mataio 1:20, 21.   

Iosepa ia noga neganai, ia moale badina gau ibounai ia lalopararalaia namonamo! Maoromaoro, aneru ese ia hamaoroa hegeregerena ia karaia. Iosepa ese Maria be ena ruma dekenai ia abia lao. Taunimanima ibounai be unai idia itaia neganai, reana idia abia dae Iosepa bona Maria be idia headava vadaeni. To, Iosepa be Maria ida ia mahuta hebou lasi ela bona Iesu ia vara.

Hua haida murinai, Iosepa bona Maria idia hegaegae Nasareta do idia rakatania, bona gabu ma ta dekenai do idia lao. Ena be Maria be kahirakahira do ia mara, to idia ura edeseni idia lao?