LESENI 25

Dirava Ena Ura Ita Totona be Dahaka?

Printaia Gauna

Baibel ese ita ia hadibaia taunimanima edia mauri be “kwadogi sibona bona hekwakwanai amo ia honu.” (Iobu 14:1) Unai be Dirava ena ura ita totona, a? Bema lasi, iena ura ita totona be dahaka? Iena ura be do ia guguru, a? Baibel ese unai do ia haerelaia.

1. Edena bamona mauri be Iehova ia ura ita abia?

Iehova ia ura mauri namona ita abia. Ia ese taunimanima ginigunadia Adamu bona Heva ia karaia neganai, paradaiso gabu hairaina, Eden umana ai ia atodia. Bena “Dirava ese idia ia hanamoa, bona idia dekenai ia gwau: ‘Natudia umui havaraia bona do umui momo herea bona tanobada umui hahonua bona umui biagua.’” (Genese 1:28) Iehova ia ura idia ese natudia do idia havaraia, tanobada ibounai be paradaiso ai do idia halaoa bona animal do idia naridia. Ia ura lasi taunimanima do idia gorere eiava hisihisi, to ia ura mauri idia moalelaia hanaihanai.

Ena be unai ia vara lasi,a to Dirava be ena ura ia haidaua lasi. (Isaia 46:10, 11) Ia ura ia idia kamonai henia taudia ese mauri goevadaena idia moalelaia hanaihanai.—Apokalupo 21:3, 4 duahia.

2. Edena dala ai hari ita ese mauri ita moalelaia diba?

Iehova ese ita dekenai “Dirava dibaia” urana ia atoa, unai dainai ita ura ia ita dibaia bona tomadiho henia. (Mataio 5:3-6 duahia.) Ia ura iena tura namona ai ita lao, ‘iena dala ibounai dekenai do ita raka, ia do ita lalokau henia,’ bona ‘mai iseda kudouna ibounai ida’ ia ita hesiai henia. (Deuteronomi 10:12; Salamo 25:14) Unai bamona ita karaia neganai do ita moale bada, herevana hekwakwanai ita davaria. Iehova ita tomadiho henia neganai ita mamia iseda mauri be mai ena anina, badina iseda mauri lalonai iena ura ita badinaia.

DIBA MA HAIDA ABIA

Iehova ese tanobada ia hegaegaelaia neganai ita totona lalokau karana ia hahedinaraia, bona ena Hereva ese mauri ena badina ia hadibaia dalana oi dibaia.

Adamu bona Heva ese uma gabu hairaina, unai be edia noho gabuna, mai ena tubutubu gaudia namodia momo bona animal danu idia itaia noho.

3. Iehova ia ura taunimanima ese mauri namona idia moalelaia

VIDIO itaia, bona henanadai herevalaia.

VIDIO: Dahaka Dainai Dirava ese Tanobada Ia Karaia?—Ena Kahana Ta (1:41)

Dahaka dainai Dirava ese iseda tanobada hairaina ia karaia?

Hadibaia Tauna 3:11 duahia, bena inai henanadai herevalaia:

Iehova dekenai dahaka oi dibaia?

4. Iehova be ena ura ia haidaua lasi

Salamo 37:11, 29 bona Isaia 55:11 duahia, bena inai henanadai herevalaia:

Edena bamona ita diba Iehova ena ura ita totona be ia haidaua lasi?

A. Ia dika ruma ena toana. Guhi ia dika noho, windo idia makohi, bona ruma badinai momoru idia noho. — Ruma ta ia dika neganai idia hanamoa lou diba. Unai hegeregerena, taunimanima ese idia hadikaia tanobada be Dirava ese ia idia lalokau henia taudia totona do ia hanamoa lou diba

B. Unai seim ruma idia hanamoa lou, mai ena hairai bona gabu ena toana danu be namo herea. — Ruma ta ia dika neganai idia hanamoa lou diba. Unai hegeregerena, taunimanima ese idia hadikaia tanobada be Dirava ese ia idia lalokau henia taudia totona do ia hanamoa lou diba

5. Iehova ita tomadiho henia dainai iseda mauri be mai ena badina

Mauri ena badina ita dibaia karana ese ita ia hamoalea. VIDIO itaia, bona henanadai herevalaia.

VIDIO: Mauri Ena Badina Lau Dibaia (5:03)

Edena dala ai Terumi be mauri ena badina ia dibaia karana amo namo ia davaria?

Hadibaia Tauna 12:13 duahia, bena inai henanadai herevalaia:

Iehova be ita totona gau momo ia karaia dainai, dahaka do ita karaia ia ita tanikiu henia totona?

REANA TA DO IA HENANADAI: “Dahaka dainai ita mauri noho?

Edena bamona do oi haere?

POINT BADANA

Iehova ia ura tanobada ai mauri goevadaena ita moalelaia hanaihanai. Bema mai kudouna ibounai ida ia ita tomadiho henia, mauri do ita moalelaia—hari danu.