Baibel ese ia herevalaia momo sinado badana be Dirava ena Basileia. Iehova ese unai Basileia amo ena ura ginigunana tanobada totona do ia hagugurua. Basileia be dahaka? Edena dala ai ita diba hari ia lohia noho? Basileia be dahaka gaudia ia hagugurua vadaeni? Bona vaira nega ai dahaka do ia karaia? Inai leseni bona gabeai leseni rua ese unai henanadai do ia haerelaia.

1. Dirava ena Basileia be dahaka, bona ena King be daika?

Basileia be Iehova Dirava ese guba ai ia haginia gavamani ta. Ena King be Iesu Keriso, ia be guba amo do ia lohia. (Mataio 4:17; Ioane 18:36) Baibel ia gwau, Iesu be ‘do ia lohia ela bona hanaihanai.’ (Luka 1:​32, 33) Iesu be Dirava ena Basileia ena King dainai, ia ese tanobada taudia ibounai do ia lohiaia.

2. Daidia be Iesu ida do idia lohia?

Iesu be sibona do ia lohia lasi. To ia ida be “iduhu, gado, kopina, bona bese idauidau taudia . . . bona idia be tanobada do idia lohiaia.” (Apokalupo 5:​9, 10) Taunimanima hida be Keriso ida do idia lohia? Iesu be tanobada ai ia mai negana amo, Keristani taudia milioni be ia murinai idia raka. To taunimanima 144,000 sibona be Iesu ida guba ai do idia lohia. (Apokalupo 14:​1-4 duahia.) Keristani taudia ma haida tanobada ai be unai Basileia henunai do idia noho.—Salamo 37:29.

3. Edena dala ai Dirava ena Basileia ese taunimanima edia gavamani ia hereaia?

Ena be taunimanima ese edia lohia dalana amo gau namodia idia ura karaia, to idia be siahu lasi idia ura karaia gaudia ibounai idia karaia totona. Gabeai, lohia taudia ma haida ese edia gabu idia abia, bona sibona edia namo idia laloa dainai taunimanima idia durua lasi. To Dirava ena Basileia ena Lohia Tauna, Iesu, ena gabu be ta ese do ia abia diba lasi. Dirava ese “basileia ta do ia haginia, ta ese do ia hadikaia lasi.” (Daniela 2:44) Iesu be tanobada ibounai do ia lohiaia, bona taunimanima ibounai do ia kara namo henia. Ia be lalokau, hebogahisi bona kara namo tauna, bona ia ese taunimanima ibounai do ia hadibaia ta ta do idia kara namo henia totona—mai lalokau, hebogahisi, bona kara maoromaoro ida.—Isaia 11:9 duahia.

4. Mai ena siahu bada gavamani ta ese tanobada ibounai do ia lohiaia

Iesu Keriso be mai ena siahu taunimanima ia lohiaia totona, bona lohia ta be ia bamona lasi. Mataio 28:18 duahia, bena inai henanadai herevalaia:

• Edena dala ai Iesu ena lohia siahuna ese taunimanima edia lohia siahuna ia hereaia?

Taunimanima edia gavamani be nega momo idia senisi, bona idia ta ta be tanobada ena kahana ta sibona idia lohiaia. To, Dirava ena Basileia be edena bamona? Daniela 7:14 duahia, bena inai henanadai herevalaia:

• Dahaka dainai Dirava ena Basileia “do idia hadikaia lasi” be gau namona?

• Dahaka dainai unai Basileia ese tanobada ibounai ia lohiaia be gau namona?

5. Gavamani ma ta ese taunimanima edia gavamani ena gabu ia abia be namo

Dahaka dainai Dirava ena Basileia ese taunimanima edia gavamani ena gabu ia abia be namo? VIDIO itaia, bona henanadai herevalaia.

VIDIO: Dirava Ena Basileia be Dahaka?—Ena Kahana Ta (1:​41)

• Taunimanima edia lohia dalana dainai dahaka ia vara?

Hadibaia Tauna 8:9 duahia, bena inai henanadai herevalaia:

• Oi laloa Dirava ena gavamani ese taunimanima edia gavamani ena gabu ia abia be namo, a? Dahaka dainai?

6. Dirava ena Basileia idia lohiaia taudia ese iseda mauri idia lalopararalaia

Iseda King, Iesu, be tanobada ai ia noho neganai “iseda manoka ia mamia momokani.” (Heberu 4:15) Iesu ida do idia lohia 144,000 abidadama tatau bona hahine be Iehova ese “iduhu, gado, kopina, bona bese idauidau” amo ia abidia hidi.—Apokalupo 5:9.

• Iesu bona ia ida do idia lohia taudia be ita davaria hekwakwanai bona iseda hemami idia lalopararalaia dainai oi moale, a? Dahaka dainai?

7. Dirava ena Basileia ena taravatu ese taunimanima edia gavamani ena taravatu ia hereaia

Gavamani idia karaia taravatu ese edia taunimanima ia durua bona gimaia be namo. Dirava ena Basileia danu be mai ena taravatu, bona ena taunimanima ese idia badinaia be namo. Korinto Ginigunana 6:​9-11 duahia, bena inai henanadai herevalaia:

• Mani oi laloa tanobada maurina be edena bamona bema taunimanima ibounai ese Dirava ena taravatu idia badinaia?a

• Iehova ia ura ena Basileia henunai idia noho taudia ese ia atoa taravatu do idia matauraia, oi laloa unai bamona ia karaia be namo, a? Dahaka dainai?

• Dahaka ese ia hahedinaraia unai taravatu idia badinaia lasi taudia be edia kara idia haidaua diba?—Siri 11 itaia.

POINT BADANA

Dirava ena Basileia be gavamani korikorina guba ai ia noho, bona tanobada ibounai do ia lohiaia.

Riviu

• Daidia be Dirava ena Basileia do idia lohiaia?

• Edena dala ai Dirava ena Basileia ese taunimanima edia gavamani ia hereaia?

• Iehova ia ura ena Basileia henunai idia noho taudia ese dahaka do idia karaia?

REFERENS ITAIA

Iesu ese Basileia ia noho gabuna ia herevalaia dalana mani oi laloa.

“Dirava Ena Basileia be Emu Kudouna Lalonai, A?” (Websait atikol)

Dahaka dainai Iehova ena Witnes taudia idia ura Dirava ena Basileia idia badinaia to tanobada ena gavamani edia lohia dalana lasi?

Mai Lalona Ibounai Ida Dirava Ena Basileia Idia Laloa (1:​43)

Baibel ese 144,000 taudia ia herevalaia karana oi stadilaia, idia be Iehova ese ia abia hidi Iesu ida idia lohia totona.

“Daidia be Guba Do Idia Lao?” (Websait atikol)

Dahaka dainai dibura ruma ai ia noho hahine ta ia abia dae Dirava ese tanobada ai kara maoromaoro do ia mailaia?

“Kara Gageva Ia Vara Ena Badina Lau Dibaia Dalana” (Noga!, November 2011)

Lagani 1914 amo Dirava ena Basileia be guba ai ia lohia matamaia. Danu, unai nega ai taunimanima edia lohia negana ginigabena ia matamaia. Edena dala ai unai ita diba? Baibel ena peroveta herevadia bona lagani 1914 amo tanobada ai idia vara gaudia, bona taunimanima edia kara ese unai ia hamomokania dalana do ita herevalaia.

1. Baibel ena peroveta herevana ese dahaka ia hahedinaraia?

Baibel bukana Daniela ese ia hahedinaraia, Dirava ena Basileia be “lagani 7” ena dokona ai do ia lohia matamaia. (Daniela 4:​16, 17) Lagani handred momo murinai, Iesu ese unai nega ia gwauraia “idau bese edia nega,” bona ia hadibaia unai nega be ia do ore lasi. (Luka 21:24) Inai stadi ai do ita itaia lagani 7 be lagani 1914 ai ia doko.

2. Lagani 1914 amo, tanobada ai dahaka gaudia idia vara, bona taunimanima edia kara be edena bamona?

Iesu ena hahediba taudia be ia idia nanadaia: “Do oi noho negana bona inai nega oromana ena dokona ena toana be dahaka?” (Mataio 24:3) Iesu be idia dekenai ia gwau, ia be guba ai Dirava ena Basileia ena King ai ia lao bena ia lohia matamaia murinai, peroveta herevadia momo do idia vara. Hegeregere, tuari, hitolo bada, bona tano mareremarere. (Mataio 24:7 duahia.) Danu Baibel ia peroveta, “dina gabedia ai” taunimanima edia kara ese mauri do idia “hametaua bada.” (2 Timoteo 3:​1-5) Lagani 1914 amo idia vara gaudia bona taunimanima edia kara ese unai ia hamomokania.

3. Dirava ena Basileia ia lohia matamaia negana amo, dahaka dainai tanobada ai dika momo idia vara?

Iesu be Dirava ena Basileia ena King ai ia lao murinai, guba ai Satani mai ena demoni ia tuari henidia. Unai tuari ai Satani ia kwalimu lasi. Baibel ia gwau, “ia bona ena aneru be tanobada dekenai idia negea diho.” (Apokalupo 12:​9, 10, 12) Satani ia badu dikadika badina ia diba ia do idia hadikaia ore. Unai dainai tanobada ibounai dekenai hisihisi bona dika idauidau ia havaraia noho. Unai gaudia amo ita laloparara dahaka dainai dika ia bada ia lao noho! Dirava ena Basileia ese unai hekwakwanai ibounai do ia kokia.

DIBA MA HAIDA ABIA

4. Baibel ena peroveta herevadia ese lagani 1914 ia hamomokania

VIDIO: Lagani 1914 ai Dirava Ena Basileia Ia Lohia Matamaia (5:​02)

Dirava ese nihi ta amo idaunegai Babulonia ena King Nebukanesa dekenai vaira negai do idia vara gaudia ia hahedinaraia. Daniela ese unai nihi bona ena anina ia herevalaia karana amo ia hahedinaraia unai be Nebukanesa ena lohia gaukarana bona Dirava ena Basileia ia herevalaia.—Daniela 4:17 duahia.a

Daniela 4:​20-26 duahia, bena chart gaukaralaia inai henanadai haerelaia totona:

• (A) Nebukanesa be ena nihi ai dahaka ia itaia?—Siri 20 bona 21 itaia.

• (B) Au dekenai dahaka do ia vara?—Siri 23 itaia.

• (C) “Lagani 7” ena dokona ai dahaka do ia vara?—Siri 26 itaia.

Nihi ai Ia Hedinarai Au ese Dirava Ena Basileia Ia Herevalaia Dalana

PEROVETA HEREVANA (Daniela 4:​20-​36)

Lohia negana

(A) Au lata herea ta

Lohia negana ia stopu

(B) “Au utua diho,” bona “lagani 7 idia ore”

Lohia negana ia matamaia lou

(C) “Emu basileia do oi abia lou”

Peroveta herevana be nega ginigunana ia guguru neganai . . .

• (D) Au ese daika ia laulaulaia?—Siri 22 itaia.

• (E) Edena dala ai iena lohia negana ia stopu?—Daniela 4:​29-33 duahia.

• (F) “Lagani 7” ena dokonai, Nebukanesa dekenai dahaka ia vara?—Daniela 4:​34-36 duahia.

NEGA GINIGUNANA IA GUGURU

Lohia negana

(D) Nebukanesa, Babulonia ena King

Lohia negana ia stopu

(E) Lagani 606 B.C.E. murinai, Nebukanesa be ia kavakava bona lagani 7 korikoridia lalonai ia lohia lasi

Lohia negana ia matamaia lou

(F) Nebukanesa ia namo lou bona ia lohia matamaia lou

Peroveta herevana be nega iharuana ia guguru neganai . . .

• (G) Au ese daidia ia laulaulaia?—1 Sivarai 29:23 duahia.

• (H) Edena dala ai edia lohia negana ia stopu? Edena dala ai ita diba Iesu be tanobada ai ia noho neganai, idia lohia noho lasi?—Luka 21:24 duahia.

• (I) Edena nega ai bona edeseniai unai lohia negana ia matamaia lou?

NEGA IHARUANA IA GUGURU

Lohia negana

(G) Israela ena king ese Dirava ena lohia negana idia laulaulaia

Lohia negana ia stopu

(H) Ierusalema idia hadikaia, bona lagani 2,520 lalonai Israela ena bese amo king ta ia lohia lasi

Lohia negana ia matamaia lou

(I) Iesu be guba ai Dirava ena Basileia ena King ai ia lao bona ia lohia matamaia

5. Lagani 1914 amo tanobada ai gau momo idia idau

VIDIO itaia.

VIDIO: Lagani 1914 amo Tanobada ai Gau Momo Idia Idau (1:​10)

Iesu ia peroveta, King ai ia lao murinai, tanobada ai gau idauidau do idia vara. Luka 21:​9-11 duahia, bena inai henanadai herevalaia:

• Edena gaudia be oi itaia eiava oi kamonai idia vara noho?

Aposetolo Paulo ese inai nega dokona ai taunimanima edia lohia dalana dainai do idia vara gaudia ia herevalaia. Timoteo Iharuana 3:​1-5 duahia, bena inai henanadai herevalaia:

• Hari inai negai, oi itaia taunimanima ese unai bamona karadia idia hahedinaraia noho, a?

6. Dirava ena Basileia ena lohia karana ese ita ia hagoadaia be namo

Mataio 24:​3, 14 duahia, bena inai henanadai herevalaia:

• Edena mai anina bada gaukarana ese ia hahedinaraia Dirava ena Basileia ia lohia noho?

• Edena dala ai unai gaukara oi durua diba?

Dirava ena Basileia ia lohia noho bona tanobada do ia biagua dinana be ia kahirakahira vadaeni. Heberu 10:​24, 25 duahia, bena inai henanadai herevalaia:

• Ita itaia “dina be ia kahirakahira noho” dainai, ita ta ta ese dahaka ita karaia be namo?

POINT BADANA

Baibel ena peroveta hereva, nega duahia karana, bona tanobada ai idia vara gaudia ese idia hamomokania, Dirava ena Basileia be hari ia lohia noho. Ita hahedinaraia unai ita abia dae bema Basileia ita harorolaia bona kongrigeisen heboudia dekenai ita lao.

Riviu

• Baibel ai Daniela bukana ese ia perovetalaia lagani 7 ena dokona ai dahaka ia vara?

• Dahaka dainai oi abia dae momokani Dirava ena Basileia be lagani 1914 ai ia lohia matamaia?

• Edena dala ai do oi hahedinaraia Basileia be hari ia lohia noho?

REFERENS ITAIA

Histori torea taudia bona ma haida ese lagani 1914 ai tanobada ia idau dalana idia herevalaia dalana oi stadilaia.

“Taunimanima Edia Kara ia Dika Bona Ia Senisi Haraga” (Noga!, April 2007)

Mataio 24:14 ai ia noho peroveta herevana ese tau ta ena mauri ia haidaua dalana oi duahia.

“Beisbol Gadara Lau Ura Henia Momokani!” (Gima Kohorona No. 3 2017)

Edena dala ai ita diba Daniela karoa 4 ai ia noho peroveta herevana ese Dirava ena Basileia ia herevalaia?

“Dirava Ena Basileia be Edena Negai Ia Lohia Matamaia? (Kahana 1)” (Gima Kohorona, October 1, 2014)

Dahaka ese ia hamomokania Daniela karoa 4 ese ia herevalaia “lagani 7” be lagani 1914 ai ia doko?

“Dirava Ena Basileia be Edena Negai Ia Lohia Matamaia? (Kahana 2)” (Gima Kohorona, January 1, 2015)

Dirava ena Basileia be ia lohia noho. Kahirakahira tanobada ai senisi badadia do ia karaia. Mani unai Basileia ena lohia henunai oi ura itaia gau namodia haida ita herevalaia.

1. Edena dala ai Dirava ena Basileia ese tanobada ai maino bona kara maoromaoro do ia havaraia lou?

Iesu, Dirava ena Basileia ena King, ese Aramagedono tuarina amo kara dika taudia bona gavamani do ia hadikadia ore. (Apokalupo 16:​14, 16) Unai nega ai inai Baibel ena gwauhamata do ia guguru: “Nega daudau lasi murinai, kara dika taudia do idia noho lasi.” (Salamo 37:10) Iesu ese unai Basileia do ia gaukaralaia tanobada ibounai dekenai maino bona kara maoromaoro ia havaraia totona.—Isaia 11:4 duahia.

2. Dirava ena ura be tanobada ai ia vara neganai, mauri be edena bamona?

Dirava ena Basileia ena lohia henunai, “kara maoromaoro taudia be tanobada do idia abia, bona tanobada ai do idia noho ela bona hanaihanai.” (Salamo 37:29) Mani oi laloa, tanobada ibounai be kara maoromaoro taudia amo ia honu bona idia ibounai ese Iehova bona ta ta idia lalokau henia! Ta do ia gorere lasi, bona taunimanima ibounai be do idia mauri ela bona hanaihanai.

3. Kara dika taudia idia ore murinai, Dirava ena Basileia ese dahaka do ia hagugurua?

Kara dika taudia idia hadikaia ore murinai, King Iesu be lagani 1,000 lalonai do ia lohia. Unai nega ai, Iesu bona ia ida do idia lohia 144,000 taudia ese tanobada ai do idia noho taudia do idia durua goevadae taudia ai idia lao totona. Lagani 1,000 ena dokonai, tanobada be paradaiso gabu hairaina ai do ia lao, bona mai moale ida Iehova ena taravatu idia badinaia taudia amo do ia honu. Bena Iesu ese ena Tamana Iehova dekenai Basileia do ia henia giroa. Iehova ese ena ‘ladana do ia hahelagaia,’ guna bamona lasi. (Mataio 6:​9, 10) Unai ese do ia hamomokania Iehova be ena taunimanima ia lalodia bada Lohia Tauna namona. Iehova ese, Satani, demoni, bona Iena lohia dalana idia ura lasi badinaia gwau-edeede taudia do ia hadikaia ore. (Apokalupo 20:​7-10) Dirava ena Basileia ese do ia havaraia mauri goevadaena be do ia noho ela bona hanaihanai.

DIBA MA HAIDA ABIA

4. Dirava ena Basileia ese taunimanima edia gavamani do ia haorea

“Taunimanima ese ta ta idia biagua bona idia hahisia.” (Hadibaia Tauna 8:9) Iehova ese kara gageva ia haorea totona ena Basileia do ia gaukaralaia.

Daniela 2:​44, bona 2 Tesalonika 1:​6-8 duahia, bena inai henanadai herevalaia:

• Iehova bona iena Natuna, Iesu, ese taunimanima edia gavamani bona idia durua taudia dekenai dahaka do idia karaia?

• Iehova bona Iesu dekenai oi dibaia gaudia ese edena dala ai ia hamomokania idia ese maka tamona ai mai kara maoromaoro ida taunimanima do idia kara henia?

5. Iesu be King hereadaena

Iesu be Dirava ena Basileia ena King dainai, ia ese gau momo do ia karaia tanobada ai do idia noho taudia durua totona. VIDIO itaia unai ese ia hahedinaraia Iesu ia ura Dirava ese ia henia siahuna ia gaukaralaia taunimanima ia durua totona.

VIDIO: Iesu ese Basileia Do Ia Hagugurua Gaudia Ia Hahedinaraia (1:​13)

Iesu be tanobada ai ia noho neganai, Basileia ese do ia hagugurua gaudia ia karaia. Inai lista ai edena hahenamo oi ura itaia? Inai hahenamo idauidau idia herevalaia Baibel siridia oi duahia.

6. Dirava ena Basileia ese vaira nega namona do ia mailaia

VIDIO: Vaira Nega ai Do Idia Vara Hahenamo Haida (4:​38)

Salamo 145:16 duahia, bena inai henanadai herevalaia:

• Iehova ese “mauri gaudia ibounai edia ura gaudia [ia] henia” oi dibaia dainai, emu hemami be edena bamona?

POINT BADANA

Dirava ena Basileia ese iena ura do ia hagugurua. Basileia ese tanobada ibounai be paradaiso ai do ia halaoa, bona taunimanima namodia ese do idia noholaia, bona idia ese hanaihanai Iehova do idia tomadiho henia.

Riviu

• Edena dala ai Dirava ena Basileia ese Iehova ena ladana do ia hahelagaia?

• Dahaka dainai ita abia dae diba Dirava ena Basileia ese Baibel ena gwauhamata do ia hagugurua?

• Basileia ese do ia hagugurua gau namodia amo edena oi ura itaia?

REFERENS ITAIA

Aramagedono ena anina oi tahua.

“Aramagedono Ena Tuari be Dahaka?” (Websait atikol)

Iesu ese ia gwauraia “hisihisi badana“ negana lalonai do idia vara gaudia stadilaia.

“Hisihisi Badana be Dahaka?” (Websait atikol)

Famili lalonai ta ta be vaira negai Basileia ese do ia havaraia hahenamo idauidau idia laloa dobu dalana oi itaia.

Paradaiso ai Oi Ura Karaia Gaudia Laloa (1:​50)

Inai sivarai, “Henanadai Momo Lau Lalohekwarahilaia” oi duahia, tau ta be politikol edia gwau-edeede karana hamaoromaoroa dalana ia davaria.

“Baibel ese Mauri Ia Haidaua” (Gima Kohorona, January 1, 2012)